ಶ್ವಾನ ಪ್ರೀಯರು ತಿಳಿದುಕೊಳ್ಳಲೇ ಬೇಕಾದ ವಿಚಾರಗಳಿವು..!

1. ಚಿಕ್ಕವಯಸ್ಸಿನಲ್ಲೇ ಜಿಗಿಯುವುದನ್ನು ತಡೆಯಿರಿ

ನೀವು ಹೊಸ ಶ್ವಾನವನ್ನು ಮನೆಗೆ ಸ್ವಾಗತಿಸಿದ್ದರೆ ಅದಕ್ಕೆ ಈಗಿನಿಂದಾನೇ ತರಬೇತಿ ನೀಡುವುದು ಉತ್ತಮ. ನಾವೇನಾದರೂ ತಿನ್ನಲು ಕೊಡಲು ಹೋದಾಗ ಅದು ಮೇಲಕ್ಕೆ ಹಾರಲು ಆರಂಭಿಸುತ್ತದೆ. ಆದರೆ ಈ ಅಭ್ಯಾಸ ಒಳ್ಳೆಯದಲ್ಲ. ಇಂತಹ ನಡವಳಿಕೆಯನ್ನು ಯಾರು ಇಷ್ಟಪಡುವುದಿಲ್ಲ. ಹೀಗಾಗಿ ನಾಯಿಯು ಹಾರುವುದನ್ನು ನಿಲ್ಲಿಸಿ ನಾಲ್ಕು ಕಾಲುಗಳನ್ನು ನೆಲಕ್ಕೆ ಊರಿ ನಿಮ್ಮತ್ತ ನೋಡುವವರೆಗೂ ಅದಕ್ಕೆ ಏನನ್ನು ನೀಡಬೇಡಿ. ನಿಮ್ಮಲ್ಲಿ ಗಮನವನ್ನು ಕೇಂದ್ರೀಕರಿಸಿದೆ ಎಂದು ಖಾತರಿ ಪಡಿಸಿಕೊಂಡು ನಂತರ ನಾಯಿಗೆ ತಿನ್ನಲು ಕೊಡಿ.

2. ಎಲ್ಲರೊಂದಿಗೆ ಬೆರೆಯುವುದನ್ನು ಕಲಿಸಿ

ಶ್ವಾನ ಚಿಕ್ಕದಿರುವಾಗಲೇ ಅಕ್ಕೆ ಎಲ್ಲಾ ರೀತಿಯ ಹವ್ಯಾಸಗಳನ್ನು ರೂಢಿಸಿದರೆ ಉತ್ತಮ. ಬೇರೆ ಬೇರೆ ಜಾಗಕ್ಕೆ ಕರೆದುಕೊಂಡು ಹೋಗಿ, ಇತರರೊಂದಿಗೆ ಸ್ನೇಹ ಜೀವಿಯಾಗಿ ಬೆರೆಯಲು ಬಿಡಿ, ಇತರ ನಾಯಿಗಳೊಂದಿಗೆ ಆಟವಾಡಲು ಅಭ್ಯಾಸ ಮಾಡಿಸಿ. ಹೀಗಾದಾಗ ಅವುಗಳು ಕೂಡ ಎಲ್ಲಾ ರೀತಿಯ ವಾತಾವರಣಕ್ಕೆ ಹೊಂದಿಕೊಳ್ಳುತ್ತದೆ. ಇಲ್ಲವಾದರೆ ನೀವು ಹೊರಗಡೆ ಕರೆದುಕೊಂಡು ಹೋದಾಗ ಶ್ವಾನಕ್ಕೆ ಎಲ್ಲವೂ ಹೊಸತು ಅನ್ನಿಸುತ್ತದೆ. ಬೊಗಳೋದು, ಚೀರಾಡೋದನ್ನ ಮಾಡುತ್ತದೆ. ಹೀಗಾದಾಗ ನಮಗೆ ಒಂದು ರೀತಿ ಮುಜುಗೊರ ಉಂಟಾಗುತ್ತದೆ.

3. ತರಬೇತಿ ವೇಳಾಪಟ್ಟಿ ತೀರ್ಮಾನಿಸಿ

ಶ್ವಾನಗಳಿಗೆ ಮನೆ ತರಬೇತಿ ತುಂಬಾನೇ ಮುಖ್ಯ. ಪ್ರತಿದಿನ ಒಂದೇ ಸಮಯದಲ್ಲಿ ನೀವು ತರಬೇತಿ ನೀಡಿದಾಗ ಆ ಸಮಯಕ್ಕೆ ನಿಮ್ಮ ನಾಯಿ ಹೊಂದಿಕೊಳ್ಳುತ್ತದೆ. ಅದರ ಊಟದ ಸಮಯ, ಆಟದ ಸಮಯ ಹಾಗೂ ಸ್ನಾನದ ಸಮಯವನ್ನು ಸರಿಯಾಗಿ ಪಾಲನೆ ಮಾಡಿ. ಆಗ ನಿಮ್ಮ ಶ್ವಾನವು ಆರಾಮದಾಯಕವಾಗಿರುತ್ತದೆ.

4. ಮನೆ ತರಬೇತಿ ತುಂಬಾನೇ ಮುಖ್ಯ

ನೀವೇನಾದರೂ ಮನೆಯ ಒಳಗಡೆ ನಾಯಿಯನ್ನು ಸಾಕುತ್ತಿದ್ದರೆ ಪದೇ ಪದೇ ಮನೆಯಿಂದ ಹೊರ ಹೋಗದಂತೆ ತಡೆಯಿರಿ. ಇನ್ನೂ ಹೊರಗಡೆ ನಾಯಿಯನ್ನು ಸಾಕುವುದಾದರೆ ಮನೆಯ ಒಳಬಾರದಂತೆ ತಡೆಯಿರಿ. ಈ ರೀತಿ ಅಭ್ಯಾಸವನ್ನು ಮೈಗೂಡಿಸಿಕೊಳ್ಳಿ. ಅದು ತಪ್ಪು ಮಾಡಿದಾಗ ಹೊಡೆದು, ಗದರಿಸಿ ಹೇಳಬೇಡಿ. ಬದಲಾಗಿ ಅದಕ್ಕೆ ಅರ್ಥವಾಗುವ ರೀತಿಯಲ್ಲಿ ಪ್ರೀತಿಯಿಂದ ತಿಳಿ ಹೇಳಿ.

5. ತರಬೇತಿ ಸ್ಥಿರವಾಗಿರಲಿ

ಪ್ರತಿದಿನ ಒಂದೇ ರೀತಿಯ ತರಬೇತಿಯನ್ನು ಶ್ವಾನಕ್ಕೆ ಕಲಿಸಿಕೊಡಿ. ಅದನ್ನು ಬಿಟ್ಟು ನೀವು ಪ್ರತಿ ದಿನ ನಿಮ್ಮ ತರಬೇತಿ ಶೈಲಿಯನ್ನು ಬದಲಾಯಿಸಿದರೆ ಶ್ವಾನಕ್ಕೂ ಕನ್‌ಫ್ಯೂಸ್‌ ಆಗಬಹುದು. ಇನ್ನೂ ನೀವು ಬಳಸುವ ಭಾಷೆಯು ಕೂಡ ತುಂಬಾನೇ ಮುಖ್ಯ. ಯಾವುದಾದರೂ ಒಂದು ಭಾಷೆಯನ್ನು ಮಾತ್ರ ನಿತ್ಯ ಬಳಸಿ. ಅದನ್ನು ಬಿಟ್ಟು ನಿಮಗೆ ಬೇಕಾಗುವ ಭಾಷೆಯಲ್ಲಿ ಮಾತನಾಡಿದರೆ ನಾಯಿಗೆ ಅರ್ಥ ಮಾಡಿಕೊಳ್ಳಲು ಕಷ್ಟವಾಗುತ್ತದೆ.

6. ತಾಳ್ಮೆ ಇರಲಿ

ಶ್ವಾನಗಳಿಗೆ ತರಬೇತಿ ನೀಡುವಾಗ ತಾಳ್ಮೆ ತುಂಬಾನೇ ಮುಖ್ಯ. ಕೆಲವು ನಾಯಿಗಳು ತುಂಬಾ ನಿಧಾನವಾಗಿ ಕಲಿತುಕೊಳ್ಳುತ್ತವೆ. ಇನ್ನೂ ಕೆಲವು ಜಾತಿಯ ನಾಯಿಗಳು ಬೇಗ ಕಲಿತುಕೊಳ್ಳುತ್ತದೆ. ಕೆಲವೊಂದು ಸಲ ನಾವು ಎಷ್ಟೇ ಕಲಿಸಿದರು ಶ್ವಾನ ಮತ್ತೆ ಮತ್ತೆ ಮರೆತು ಹೋಗುತ್ತದೆ. ಆಗ ನೀವು ಕೋಪಗೊಳ್ಳಬಾರದು. ಬದಲಿಗೆ ತಾಳ್ಮೆಯಿಂದ ಅದಕ್ಕೆ ಕಲಿಸುವ ಪ್ರಯತ್ನ ಮಾಡಬೇಕು. ತಾಳ್ಮೆಯಿಂದ ನೀವು ನಿರಂತರ ಪ್ರಯತ್ನ ಮಾಡಿದ್ದೇ ಆದರೆ ಖಂಡಿತ ಒಂದಲ್ಲ ಒಂದು ದಿನ ಫಲ ಸಿಗುತ್ತದೆ.

7. ತರಬೇತಿಯ ಸಮಯದಲ್ಲಿ ಮುಖ್ಯವಾಗಿ ಕಮಾಂಡ್‌ ಬಗ್ಗೆ ತಿಳಿಸಿ

ತರಬೇತಿಯ ಸಮಯದಲ್ಲಿ ಮೊದಲಿಗೆ ಅವುಗಳಿಗೆ ಕಮಾಂಡ್‌ ಬಗ್ಗೆ ಚೆನ್ನಾಗಿ ತಿಳಿಸಿ ಕೊಡಿ. ಕಮಾಂಡ್‌ ಜೊತೆಗೆ ಕೆಲವೊಂದು ಒಳ್ಳೆಯ ಅಭ್ಯಾಸಗಳನ್ನು ಕಲಿಸಿಕೊಡಿ. ಪ್ರತಿನಿತ್ಯ ಹೀಗೆ ಮಾಡುತ್ತಾ ಇದ್ದರೆ ಅವುಗಳಿಗೆ ರೂಢಿ ಆಗುತ್ತದೆ.

ಪುಟ್ಟ ಶ್ವಾನಕ್ಕೆ ತರಬೇತಿ ನೀಡುವಾಗ ಈ ಎಲ್ಲಾ ಅಂಶಗಳನ್ನು ನೀವು ಗಮನದಲ್ಲಿ ಇಟ್ಟುಕೊಳ್ಳಬೇಕು. ಸಣ್ಣ ವಯಸ್ಸಿನಲ್ಲಿ ಅವುಗಳಿಗೆ ಸರಿಯಾದ ತರಬೇತಿ ಸಿಕ್ಕರೆ ತುಂಬಾನೇ ಒಳ್ಳೆಯದು.