ಪುಟಾಣಿ ನಾಯಿ ಪಗ್ ಬಗ್ಗೆ ನಿಮಗೆ ಎಷ್ಟು ಗೊತ್ತು?

Pet Care

oi-Sumalatha N

By Sumalatha N

Published: Friday, August 26, 2011, 17:43 [IST]

ಶ್ವಾನ ತಳಿಯಲ್ಲಿ ಅತಿ ಮುದ್ದೆನಿಸುವ, ಪುಟ್ಟದಾದ ನಾಯಿಯಂದರೆ ಪಗ್. ಮಕ್ಕಳಿಗೆ ಹೆಚ್ಚು ಪ್ರಿಯವಾದ ಈ ಪಗ್ ಎಲ್ಲರಿಗೂ ಚಿರಪರಿಚಿತ. ಹಚ್ ಜಾಹೀರಾತು ಜನಪ್ರಿಯಗೊಂಡಿದ್ದೇ ಈ ಪುಟ್ಟ ಪುಟ್ಟ ಕಾಲುಗಳಿರುವ ಪಗ್ ನಿಂದ. ನೀವು ಪಗ್ ನಾಯಿಯನ್ನೂ ನಿಮ್ಮ ಮನೆಗೂ ಕರೆದುಕೊಳ್ಳಬೇಕು ಅಂತಿದ್ದರೆ ಪಗ್ ಬಗ್ಗೆ ಕೆಲವು ಮಾಹಿತಿಗಳನ್ನು ತಿಳಿದುಕೊಂಡಿರಲೇ ಬೇಕು.

ಅವುಗಳು ಏನು ಗುಣ ವಿಶೇಷತೆಯನ್ನು ಹೊಂದಿದೆ ಎಂಬುದನ್ನು ತಿಳಿಯುವುದಕ್ಕಿಂತ ಮುಂಚೆ ಅವುಗಳು ಯಾವ ಗುಣವನ್ನು ಹೊಂದಿಲ್ಲ ಎಂಬುದರ ಬಗ್ಗೆ ಮೊದಲು ತಿಳಿದುಕೊಳ್ಳಿ.

* ಕಾವಲು ನಾಯಿಯಲ್ಲ: ನೀವು ಮನೆಯಲ್ಲಿರದಿದ್ದರೆ ನಿಮ್ಮ ಪಗ್ ನಾಯಿ ಕೂಡ ಮನೆ ಕಾಯಲು ತಯಾರಿರುವುದಿಲ್ಲ. ಪಗ್ ಒಂಟಿಯಾಗಿ ಕಾಲ ಕಳೆಯಲು ಬಯಸದ ವಿಚಿತ್ರ ನಾಯಿ. ಅದರಲ್ಲೂ ಹೊಸ ಜಾಗದಲ್ಲಿ ಹೊಂದಿಕೊಳ್ಳಲು ಅದಕ್ಕೆ ತುಂಬಾ ಕಾಲ ಹಿಡಿಯುತ್ತದೆ.

* ರಕ್ಷಣೆಗೆ ಒಲ್ಲದು: ನಿಮ್ಮ ನಾಯಿಯಿಂದ ನೀವು ರಕ್ಷಣೆಯನ್ನು ನಿರೀಕ್ಷಿಸುತ್ತೀರಿ ಎಂದಾದರೆ ಪಗ್ ಆಯ್ಕೆ ಕುರಿತು ಚಿಂತಿಸಲೇಬಾರದು. ಏಕೆಂದರೆ ಇದು ಯಾರಿಗೂ ಹಾನಿ ಮಾಡದಂತಹ ಶ್ವಾನ ತಳಿ. ಅಷ್ಟು ಕ್ರೂರವಾಗಿ ವರ್ತಿಸಲೂ ಪಗ್ ಗೆ ಬರುವುದಿಲ್ಲ ಮತ್ತು ಹೊರಗಿನವರ ಮೇಲೂ ದಾಳಿ ಮಾಡಲು ಇವು ಸಮರ್ಥವಲ್ಲ. ಹೊರಗಿನವರು ಬಂದರೆ ತಾನೇ ಬಚ್ಚಿಕೊಳ್ಳುವ ವಿಚಿತ್ರ ರೀತಿಯ ಪುಟ್ಟ ನಾಯಿ ಇದು.

* ಬುದ್ಧಿವಂತ ನಾಯಿಯಲ್ಲ: ಪಗ್ ನಾಯಿಗಳು ಅಷ್ಟೇನೂ ಬುದ್ಧಿವಂತ ನಾಯಿಯಲ್ಲ. ಸಾಕು ನಾಯಿ ತುಂಬಾ ಬುದ್ಧಿವಂತಿಕೆ ಹೊಂದಿರಬೇಕು ಎಂದು ಬಯಸಿದರೆ ಪಗ್ ನಿಮ್ಮ ಆಯ್ಕೆಯಾಗದಿರಲಿ. ನಿರಾಕರಿಸುವಷ್ಟು ಪೆದ್ದುತನ ಪಗ್ ಗೆ ಇಲ್ಲದಿದ್ದರೂ ಅಷ್ಟೇನೂ ಬುದ್ಧಿವಂತಿಕೆಯೂ ಅದಕ್ಕೆ ಇಲ್ಲ ಎನ್ನುವುದನ್ನು ಒಪ್ಪಿಕೊಳ್ಳಲೇಬೇಕು.

* ಪಳಗುವಿಕೆ: ಪಗ್ ನಾಯಿಗಳು ತುಂಬಾ ನಿಧಾನಗತಿಯಲ್ಲಿ ಅಭ್ಯಾಸಕ್ಕೆ ಹೊಂದುಕೊಳ್ಳುತ್ತವೆ. ತಕ್ಷಣವೇ ಪಳಗಲು ಅವುಗಳಿಗೆ ಸಾಧ್ಯವಿಲ್ಲ. ಇದು ಆಜ್ಞೆಗಿಂತ ಹೆಚ್ಚಾಗಿ ಭಾವನೆಗಳಿಗೆ ಬೇಗನೆ ಸ್ಪಂದಿಸುತ್ತದೆ.

* ನಡಿಗೆ: ನಾಯಿ ಸಾಮಾನ್ಯವಾಗಿ ಹೆಚ್ಚು ನಡೆಯುವ ಸಾಮರ್ಥ್ಯವನ್ನು ಹೊಂದಿರುತ್ತವೆ. ಆದರೆ ಪಗ್ ಯಾವಾಗಲೂ ನಿಮ್ಮ ತೊಡೆಯ ಮೇಲೆ ಓಡಾಡಿಕೊಂಡು ಅಲ್ಲೇ ತಿರುಗುತ್ತಿರುತ್ತವೆ.

ಪಗ್ ನಾಯಿಗೆ ಯಾವ ಗುಣಗಳಿರುವುದಿಲ್ಲ ಎಂದು ನೋಡಿದಿರಿ, ಮುಂದಿನ ಪುಟದಲ್ಲಿ ಪಗ್ ಯಾವ ವಿಶೇಷತೆಯನ್ನು ಹೊಂದಿದೆ ಎಂಬುದರ ಬಗ್ಗೆ ತಿಳಿದುಕೊಳ್ಳಿ..