ಬಾಡಿಗೆ ಮನೆಯಲ್ಲಿ ಗಮನಿಸಬೇಕಾದ ಅಂಶಗಳಿವು

ಬಾಡಿಗೆ ಮನೆಗೆ ಹೋಗುವಾಗ ತುಂಬಾ ಎಚ್ಚರಿಕೆಯಿಂದ ಇರಬೇಕು. ಮನೆ ನೋಡಿ ನಮಗೆ ಇಷ್ಟವಾದರೂ ಓನರ್ ಹೇಗೆ , ಮನೆಯಲ್ಲಿ ಯಾವೆಲ್ಲಾ ಸೌಲಭ್ಯವಿದೆ ಎಂದು ನೋಡಬೇಕು. ಕೆಲವೊಮ್ಮೆ ಅರ್ಜೆಂಟ್ ಆಗಿ ನಮಗೆ ಮನೆ ಬೇಕಾಗುತ್ತದೆ, ಹುಡುಕಿದ ಮನೆಗಳಲ್ಲಿ ಸ್ವಲ್ಪ ಬೆಟರ್ ಅನಿಸಿದ ಮನೆಗೆ ಹಿಂದೆ ಮುಂದೆ ನೋಡದೆ ಅಡ್ವಾನ್ಸ್ ಕೊಟ್ಟು ಬಂದು ಬಿಡುತ್ತೇವೆ. ಬಂದ ಸ್ವಲ್ಪ ದಿನದಲ್ಲಿಯೇ ಆ ಮನೆಯಲ್ಲಿ ನೀರಿನ ಸಮಸ್ಯೆ, ಮತ್ಯಾವುದೋ ಸಮಸ್ಯೆ ಕಾಣಿಸಿದರೆ ಪುನಃ ಮನೆ ಬದಲಾಯಿಸಬೇಕು. ಇದರಿಂದ ಪೇಯಿಂಟ್ ಚಾರ್ಜ್, ಬ್ರೋಕರ್ ಚಾರ್ಜ್ ಅಂತ ದುಡ್ಡು ವ್ಯರ್ಥವಾಗುತ್ತದೆ.

ಆದ್ದರಿಂದ ಬಾಡಿಗೆ ಮನೆಗೆ ಹೋಗುವಾಗ ಅಥವಾ ಮನೆಯನ್ನು ಕೊಳ್ಳುವಾಗ ಈ ಕೆಳಗಿನ ಅಂಶಗಳನ್ನು ಗಮನಿಸಿದರೆ ಒಳ್ಳೆಯದು.

ಸ್ವಿಚ್: ಮನೆಯಲ್ಲಿ ಕರೆಂಟ್ ಸ್ವಿಚ್ ಸರಿಯಾಗಿದೆಯೇ? ಒಂದು ವೇಳೆ ಸರಿಯಿಲ್ಲದಿದ್ದರೆ ಅದನ್ನು ಬದಲಾಯಿಸಲು ಹೇಳಿ. ನೀವೇ ಕೊಳ್ಳುವುದಾದರೆ ಅಂತಹ ಸ್ವಿಚ್ ಬೋರ್ಡ್ ಅನ್ನು ಬದಲಾಯಿಸಿ.

ಫ್ಯಾನ್ : ಫ್ಯಾನ್ ಅಥವಾ ಏರ್ ಕಂಡೀಷನರ್ ಚೆನ್ನಾಗಿ ಕಾರ್ಯನಿರ್ವಹಿಸುತ್ತಿದೆಯೇ ಎಂದು ಪರೀಕ್ಷಿಸಿ.

ಬಲ್ಭ್: ಎಲ್ಲಾ ಬಲ್ಬ್ ಗಳಿವೆಯೇ ಎಂದು ಪರೀಕ್ಷಿಸಿ. ಇಲ್ಲದಿದ್ದರೆ ಬಿಟ್ಟು ಬರುವಾಗ ಬಲ್ಬ್ ಇರಲಿಲ್ಲ ಅಂದರೆ ಕೇಳಲು ಓನರ್ ಸಿದ್ಧವಿರುವುದಿಲ್ಲ.

ಟ್ಯಾಪ್: ನೀರು ಸರಿಯಾಗಿ ಬರುತ್ತಿದೆಯೇ, ಟ್ಯಾಪ್ ನಲ್ಲಿ ಲೀಕ್ ಇದೆಯೇ ಅನ್ನುವುದನ್ನು ಪರೀಕ್ಷಿಸಿ. ನಿರಿನ ಬಗ್ಗೆ ಅಕ್ಕ-ಪಕ್ಕದವರಲ್ಲಿಯೂ ವಿಚಾರಿಸಿದರೆ ಒಳ್ಳೆಯದು.

ಮನೆಯ ಗಾತ್ರ: ನಿಮ್ಮಲ್ಲಿರುವ ಸಾಮಾನುಗಳನ್ನು ತುಂಬಲು ಈ ಮನೆ ಸಾಕೇ ಎಂದು ನೋಡಿ. ಬಂದ ಮೇಲೆ ಸಾಮಾನು ಇಡಲು ಸ್ಥಳವಿಲ್ಲದೆ ಒದ್ದಾಡುವಂತೆ ಆಗಬಾರದು.

ಕಿಟಕಿ, ವೆಂಟಿಲೇಷನ್ : ಕಿಟಕಿಗಳನ್ನು ಪರೀಕ್ಷಿಸಿ. ಗಾಳಿಯಾಡಲು ಅವಕಾಶವಿದೆಯೇ ಅನ್ನುವುದನ್ನು ಕೂಡ ಪರೀಕ್ಷಿಸಬೇಕು. ನಿಮ್ಮ ಸ್ವಾತಂತ್ರ್ಯಕ್ಕೆ ಧಕ್ಕೆಯಾಗುವುದೇ? ಗಾಳಿ ಬೆಳಕು ಸರಿಯಾಗಿ ಬರುತ್ತಿದೆಯೇ ಈ ಎಲ್ಲಾ ಅಂಶಗಳನ್ನು ಗಮನಿಸಬೇಕು.

ಬಾಲ್ಕನಿ: ಬಾಲ್ಕನಿ ಇದೆಯೇ, ಮನೆಯ ಮುಂದುಗಡೆ ಸ್ವಚ್ಛವಾಗಿದೆಯೇ ಎಲ್ಲವನ್ನು ಗಮನಿಸಬೇಕು. ನಿಮ್ಮ ಮನೆಯ ಮುಂದೆ ಕಸದ ಬುಟ್ಟಿಯಿದ್ದರೆ ಅಂತಹ ಮನೆಗೆ ಹೋಗದಿರುವುದು ಒಳ್ಳೆಯದು. ಆ ಕಸದ ವಾಸನೆ ಕುಡಿದುಕೊಂಡೇ ಓಡಾಡಬೇಕಾಗುತ್ತದೆ.