ಕೋಲಾ ಬಳಸಿ ಕ್ಲೀನಿಂಗ್ ಮಾಡಬಹುದು!

Improvement

oi-Reena

By Hema S

Updated: Saturday, August 4, 2012, 10:17 [IST]

ಕೋಲಾ ಕುಡಿಯುವುದು ಆಧುನಿಕ ಜೀವನ ಶೈಲಿಯಲ್ಲಿ ಒಂದು ಫ್ಯಾಷನ್ ಆಗಿ ಬಿಟ್ಟಿದೆ. ಹೊರಗಡೆ ಶಾಪಿಂಗ್ ಅಥವಾ ರೆಸ್ಟೋರೆಂಟ್ ಗೆ ಹೋದಾಗ ಅಥವಾ ಪಾರ್ಟಿಗಳಲ್ಲಿ ಕೋಲಾ ಕುಡಿಯುತ್ತೇವೆ. ಆದರೆ ಈ ಕೋಲಾ ಆರೋಗ್ಯಕ್ಕೆ ಎಷ್ಟರ ಮಟ್ಟಿಗೆ ಒಳ್ಳೆಯದು? ಎಂಬ ಚರ್ಚೆ ನಡೆಯುತ್ತಲೇ ಇದೆ. ಆದರೆ ಈ ಕೋಲಾ ಮನೆ ಶುದ್ಧಿಯಲ್ಲಿ ಬಳಸಿದರೆ ಒಳ್ಳೆಯ ಪರಿಣಾಮ ದೊರೆಯುತ್ತದೆ. ಈ ಕೋಲಾವನ್ನು ಮನೆ ಶುದ್ಧಿಯಲ್ಲಿ ಯಾವ ರೀತಿ ಬಳಸಬಹುದು ಎಂದು ತಿಳಿಯೋಣ ಬನ್ನಿ.

ಕೋಲಾ ಪಾತ್ರೆಯನ್ನು ಶುದ್ಧ ಮಾಡಲು: ಅಡುಗೆ ಸ್ವಲ್ಪ ಗಮನಿಸದಿದ್ದರೆ ಪಾತ್ರೆ ಸೀದು ಹೋಗುವುದು ಸಹಜ. ಹೀಗೆ ಸೀದು ಹೋದ ಪಾತ್ರೆಗಳನ್ನು ತೊಳೆಯುವುದು ಕಷ್ಟ. ಇಂತಹ ಸೀದು ಹೋದ ಪಾತ್ರೆಯಲ್ಲಿ ತೊಳೆಯುವಾಗ ಸ್ವಲ್ಪ ಕೋಲಾ ಹಾಕಿಟ್ಟು 10 ನಿಮಿಷದ ಬಳಿಕ ತೊಳೆದರೆ ಪಾತ್ರೆ ಹೊಚ್ಚ ಹೊಸದು ತರಹ ಕಾಣುವುದು.

ಕಲೆಯನ್ನು ಹೋಗಲಾಡಿಸಲು: ಗ್ರೀಸ್, ರಕ್ತ, ಎಣ್ಣೆ ಕಲೆಗಳನ್ನು ತೆಗೆಯಲು ಕೋಲಾ ಬಳಸಬಹುದು. ಬಕೆಟ್ ನೀರಿನಲ್ಲಿ ಕೋಲಾ ಹಾಕಿ ಅದಕ್ಕೆ ಸೋಪಿನ ಪುಡಿ ಹಾಕಿ ಮಿಶ್ರ ಮಾಡಿ ಬಟ್ಟೆಯನ್ನು ಅದರಲ್ಲಿ ಅರ್ಧಗಂಟೆ ಕಾಲ ನೆನೆ ಹಾಕಬೇಕು. ನಂತರ ಒಗೆದರೆ ಕಲೆ ನಿಮ್ಮ ಬಟ್ಟೆಯಿಂದ ಮಾಯವಾಗಿ ಬಟ್ಟೆ ತುಂಬಾ ಸ್ವಚ್ಛವಾಗಿ ಕಾಣಬಹುದು.

ಟಾಯ್ಲೆಟ್ ಶುದ್ಧ ಮಾಡಲು: ಬಾತ್ ಟಬ್, ಟಾಯ್ಲೆಟ್, ಸಿಂಕ್ ಇವುಗಳ್ನು ಕೋಲಾ ಹಾಕಿ ತೊಳೆದರೆ ಪಳಪಳ ಹೊಳೆಯುತ್ತಿರುತ್ತದೆ. ಕೋಲಾವನ್ನು ಬಾತ್ ಟಬ್ ಅಥವಾ ಟಾಯ್ಲೆಟ್ ಗೆ ಹಾಕಿ ಅರ್ಧ ಗಂಟೆ ಬಿಟ್ಟು ಬ್ರಷ್ ನಿಂದ ತಿಕ್ಕಿ ತೊಳೆಯಿರಿ. ನಿಮ್ಮ ಟಾಯ್ಲೆಟ್ ಉಳಿದ ಟಾಯ್ಲೆಟ್ ಕ್ಲೀನರ್ ಗಿಂತ ಪಳಪಳವಾಗಿ ಹೊಳೆಯುವುದು.

ತುಕ್ಕು ತೆಗೆಯಲು: ತಾಮ್ರ ಅಥವಾ ಕಬ್ಬಿಣದ ವಸ್ತುಗಳಿಗೆ ತುಕ್ಕು ಹಿಡಿದರೆ ಆ ವಸ್ತುಗಳ ಮೇಲೆ ಕೋಲಾ ಸುರಿದು ಒಂದು ರಾತ್ರಿ ಇಟ್ಟು ಮಾರನೆ ದಿನ ತೊಳೆದರೆ ಆ ತುಕ್ಕು ಕಲೆಗಳು ಮಾಯವಾಗುವುದು!

ಗ್ಲಾಸ್ ಗಳನ್ನು ಶುಚಿಗೊಳಿಸಲು: ಮನೆ ಕಿಟಕಿಗಳನ್ನು ಶುದ್ಧ ಮಾಡಲು ಇದನ್ನು ಬಳಸಬಹುದು. ಇದರಲ್ಲಿ ಸಿಟ್ರಿಕ್ ಆಸಿಡ್ ಇರುವುದರಿಂದ ಇದರಿಂದ ಗ್ಲಾಸ್ ಉಜ್ಜಿದರೆ ಗ್ಲಾಸ್ ಪಳಪಳ ಹೊಳೆಯುವಂತಾಗುವುದು.

ಇನ್ನೊಮ್ಮೆ ಕೋಲಾ ರುಚಿ ಸವಿಯಲು ಕೊಳ್ಳುವಾಗ ಒಂದು ಕೋಲಾ ಅಧಿಕ ಕೊಂಡು ಅದನ್ನು ಈ ಮೇಲಿನಂತೆ ಬಳಸಿ ನೋಡಿ ಇದರ ಟು ಇನ್ ಒನ್ ಗುಣ ನಿಮಗೆ ಇಷ್ಟವಾಗುವುದು.