ಶೂನಿಂದ ಕೆಟ್ಟ ವಾಸನೆ ತೆಗೆಯಲು 8 ಸಲಹೆಗಳು

Improvement

oi-Reena

By Hema S

Published: Wednesday, March 14, 2012, 15:30 [IST]

ಶೂ ವಾಸನೆ ಎಂದಿಗೂ ಸುವಾಸನೆಯಲ್ಲ. ಸ್ಮೆಲ್ ಬರೋ ಶೂ ಧರಿಸಿದ್ರೆ ಎಲ್ಲರೂ ಸ್ಮೈಲ್ ಮರೆತು ಅಕ್ಕಪಕ್ಕ ದುರುಗಟ್ಟಿ ನೋಡಲು ಆರಂಭಿಸುತ್ತಾರೆ. ವಾಸನೆ ಬರೋ ಶೂ ಧರಿಸಿದವನಂತೂ ಅಕ್ಕಪಕ್ಕದವರ ಕಾಲು ನೋಡುತ್ತಾನೆ! ವಾಸ್ನೆ ಬರೋ ಶೂ ಯಾರಿಗೂ ಶೋಭೆ ತರುವುದಿಲ್ಲ. ಬೇಸಿಗೆಯಲ್ಲಿ ಕಾಲು ಹೆಚ್ಚಾಗಿ ಬೆವರುವುದರಿಂದ ಶೂ ಬೇಗನೆ ವಾಸನೆ ಬರುತ್ತದೆ. ಆದರೆ ಕೆಲವು ಬೆಲೆ ಬಾಳುವಂತಹ ಶೂಗಳನ್ನು ತೊಳೆಯಲು ಸಾದ್ಯವಿಲ್ಲ. ಶೂ ದುರ್ನಾತ ತಡೆಗಟ್ಟಲು ಇಲ್ಲಿವೆ ಸುಲಭ ಉಪಾಯಗಳು.

1. ಶೂಗಳನ್ನು ಬಿಸಿಲಿನಲ್ಲಿ ಒಣಗಿಸಬೇಕು. ಉಪಯೋಗಿಸಿದ ಪ್ರತಿ ಸಲವೂ ಅದರಲ್ಲಿರುವ ಬೆವರನ್ನು ಬಿಸಿಲಿನಲ್ಲಿಟ್ಟು ಒಣಗಿಸಿದರೆ ಕೆಟ್ಟವಾಸನೆ ಬರುವುದಿಲ್ಲ.

2. ನಾಪ್ತಲಿನ್ ಬಾಲ್ ಅನ್ನು ರಾತ್ರಿ ಶೂನಲ್ಲಿ ಹಾಕಿ ನಂತರ ಮರುದಿನ ತೊಳೆದರೆ ಕೆಟ್ಟ ವಾಸನೆ ಹೋಗುವುದು.

3. ಶೂ ತೊಳೆಯುವ ಮೊದಲು ಅದರಲ್ಲಿ ಬರೆದಿರುವ ಸೂಚನೆಗಳನ್ನು ಓದಬೇಕು. ತುಂಬಾ ಕೊಳೆ ಇರುವ ಶೂಗಳನ್ನು ಸೋಪ್ ನೀರಿನಲ್ಲಿ ಹಾಕಿಟ್ಟು ನಂತರ ತೊಳೆಯಬೇಕು.

4. ಸೋಪ್ ನೀರಿನಲ್ಲಿ ಒಂದು ಚಮಚ ಅಡುಗೆ ಸೋಡಾ ಹಾಕಿ ಅದರಲ್ಲಿ ಶೂಗಳನ್ನು 20 ನಿಮಿಷ ನೆನೆ ಹಾಕಿ ತೊಳೆದರೆ ಶೂ ಶುಭ್ರವಾಗುವುದು.

5. ತೊಳೆಯುವಂತಹ ಶೂ ಅಲ್ಲದಿದ್ದರೆ ಅಡುಗೆ ಸೋಡಾವನ್ನು ಉದುರಿಸಿ ರಾತ್ರಿಯಿಟ್ಟು, ಮರುದಿನ ಬಟ್ಟೆಯಿಂದ ಉಜ್ಜಿದರೆ ವಾಸನೆ ಬರುವುದಿಲ್ಲ.

6. ಶೂನಲ್ಲಿರುವ ಕೆಟ್ಟ ವಾಸನೆಯನ್ನು ಹೋಗಲಾಡಿಸಲು ಬಿಳಿ ವಿನಿಗರ್ ಬಳಸಬಹುದು. ವಿನಿಗರ್ ಅನ್ನು ಸ್ವಲ್ಪ ಚಿಮುಕಿಸಬಹುದು ಅಥವಾ ಬಕೆಟ್ ನಲ್ಲಿ ಒಂದು ಚಮಚ ಬಿಳಿ ವಿನಿಗರ್ ಹಾಕಿ ಅದರಲ್ಲಿ ಶೂ ತೊಳೆದರೆ ಕೆಟ್ಟ ವಾಸನೆ ಬರುವುದಿಲ್ಲ.

7. ನೀರಿನಲ್ಲಿ ಹಾಕಬಾರದ ಶೂ ಆಗಿದ್ದರೆ ಒಣ ಬಟ್ಟೆಯನ್ನು ವಿನಿಗರ್ ನಲ್ಲಿ ಹಾಕಿ ಅದರಿಂದ ಶೂ ಉಜ್ಜಿದರೆ ಸಾಕು.

8. ಸೆಂಟ್ ಹಾಕಿದ ಫ್ಯಾಬ್ರಿಕ್ ಶೀಟ್ ಅನ್ನು ಶೂ ಒಳಗಡೆ ಇಟ್ಟು ಕೆಟ್ಟ ವಾಸನೆಯನ್ನು ಹೋಗಲಾಡಿಸಬಹುದು.