ಬಟ್ಟೆ ಮೇಲೆ ತಿನಿಸಿನ ಕಲೆಯಾದರೆ ಏನು ಮಾಡಬೇಕು?

Improvement

oi-Sumalatha

By Sumalatha

Published: Monday, November 28, 2011, 15:05 [IST]

ತಿಂಡಿ ತಿನ್ನುವಾಗ ಕೆಲವೊಮ್ಮೆ ಗಮನಕ್ಕೆ ಬಾರದೆ ಬಟ್ಟೆ ಮೇಲೆ ತಿಂಡಿ ಚೆಲ್ಲಿಬಿಡುತ್ತೆ. ಬಟ್ಟೆ ಮೇಲಿನ ಆ ಕಲೆ ತುಂಬಾ ಗಟ್ಟಿಯಾಗಿ ಕೂತಿರುವಾಗ ಅದನ್ನು ತೆಗೆಯುವುದು ಅಷ್ಟು ಸುಲಭವಲ್ಲ. ಈ ಕಲೆ ಬಟ್ಟೆಯ ಅಂದ ಚೆಂದವನ್ನೇ ಹಾಳು ಮಾಡಿಬಿಡಬಹುದು. ಆದ್ದರಿಂದ ಬಟ್ಟೆ ಮೇಲೆ ಬಿದ್ದ ಆಹಾರದ ಕಲೆಯನ್ನು ತೆಗೆಯಲು ಇಲ್ಲೊಂದಿಷ್ಟು ಉಪಾಯಗಳಿವೆ. ಅದು ಹೇಗೆಂದು ತಿಳಿಯಿರಿ.

ಬಟ್ಟೆ ಮೇಲಿನ ಆಹಾರದ ಕಲೆ ಹೋಗಿಸುವ ವಿಧಾನ:

1. ಕಲೆಯಾದ ತಕ್ಷಣವೇ ಅದನ್ನು ತೊಳೆದುಬಿಡಬೇಕು. ಅದು ಒಣಗಿದ ನಂತರ ತೊಳೆಯಲು ಹೆಚ್ಚು ಶ್ರಮಪಡಬೇಕಾಗುತ್ತದೆ. ಇನ್ನೊಂದು ಬಟ್ಟೆಯನ್ನು ತೇವಗೊಳಿಸಿ ಅದರ ನೆರವಿನಿಂದ ಕಲೆ ತೆಗೆದುಬಿಡಬೇಕು.

2. ಲಿಕ್ವಿಡ್ ಡಿಟರ್ಜೆಂಟ್ ಹಾಕಿ 3-5 ನಿಮಿಷ ಬಿಟ್ಟು ಉಜ್ಜಿ ತೊಳೆಯಬಹುದು.

3. ಬಿಸಿ ನೀರಿಗೆ ಅಡುಗೆ ಸೋಡಾ ಬೆರೆಸಿ ಅದಕ್ಕೆ ಸ್ವಲ್ಪ ಡಿಟರ್ಜೆಂಟ್ ಹಾಕಿ ಅದರಲ್ಲಿ ಬಟ್ಟೆಯನ್ನು 15-20 ನಿಮಿಷ ನೆನೆಸಿ ನಂತರ ಒಗೆದರೆ ಕಲೆ ಬೇಗ ಬಿಟ್ಟುಕೊಳ್ಳುತ್ತೆ.

4. ಬಟ್ಟೆ ಒಗೆಯುವ ಮುನ್ನ ಅದರ ಮೇಲಿನ ಲೇಬಲ್ ಓದಿಕೊಳ್ಳಿ. ಕೆಲವೊಂದು ಬಟ್ಟೆಗಳು ಬಿಸಿ ನೀರಿನಲ್ಲಿ ತನ್ನ ಸಹಜ ಹೊಳಪು ಕಳೆದುಕೊಳ್ಳಬಹುದು. ಆದ್ದರಿಂದ ಪರೀಕ್ಷಿಸಿ ಬಟ್ಟೆ ಒಗೆಯಬೇಕು.

5. ಬಿಸಿ ನೀರಿನಲ್ಲಿ ನೆನೆಸಿದ ನಂತರವೂ ಕೊಳೆ ಪೂರ್ಣ ಬಿಟ್ಟಿಲ್ಲವೆಂದರೆ ಸ್ವಲ್ಪ ಕ್ಲಬ್ ಸೋಡಾ ಬೆರೆಸಿ ನಯವಾಗಿ ಉಜ್ಜಿದರೆ ಕಲೆ ಹೋಗುತ್ತದೆ.

6. ಬಟ್ಟೆಯಿಂದ ಎಣ್ಣೆ ಅಥವಾ ಆಹಾರದ ಕಲೆ ಹೋಗಿಸಲು ನಿಂಬೆಹೋಳುಗಳನ್ನೂ ಬಳಸಬಹುದು. ನಿಂಬೆಯೊಂದಿಗೆ ಸ್ವಲ್ಪವೇ ಸ್ವಲ್ಪ ಉಪ್ಪು ಬೆರೆಸಿ ಅದರ ಮೇಲೆ ಉಜ್ಜಿದರೆ ಕಲೆ ಬೇಗ ಹೋಗುತ್ತೆ. ಆದರೆ ಉಪ್ಪನ್ನು ಹೆಚ್ಚು ಬಳಸಿದರೆ ಬಟ್ಟೆ ಬಣ್ಣ ಮಾಸುವ ಸಾಧ್ಯತೆಯೂ ಇದೆ.