ಬಟ್ಟೆ ಮೇಲಿನ ಕೆಟ್ಟ ಕಲೆಗೆ ಇಲ್ಲಿದೆ ಸಲಹೆ

Improvement

oi-Sumalatha

By Sumalatha

Published: Thursday, October 20, 2011, 12:37 [IST]

ದುಬಾರಿ ಬಟ್ಟೆಗಳ ಮೇಲೆ ಯಾವುದಾದರೂ ಕಲೆಯಾದರೆ ಬೇಸರವಾಗುತ್ತೆ. ಅದರಲ್ಲೂ ನೈಲ್ ಪಾಲಿಶ್ ಮತ್ತು ಲಿಪ್ ಸ್ಟಿಕ್ ಕಲೆಯಾದರೆ ಬಟ್ಟೆಯ ಅಂದವನ್ನೇ ಕೆಡಿಸಿಬಿಡುತ್ತೆ. ಆದ್ದರಿಂದ ನೈಲ್ ಪಾಲಿಶ್ ಮತ್ತು ಲಿಪ್ ಸ್ಟಿಕ್ ಕಲೆಯನ್ನು ಸುಲಭವಾಗಿ ಹೋಗಿಸುವ ವಿಧಾನವನ್ನು ಇಲ್ಲಿ ನೀಡಲಾಗಿದೆ.

ಬಟ್ಟೆ ಮೇಲೆ ನೈಲ್ ಪಾಲಿಶ್ ಮತ್ತು ಲಿಪ್ ಸ್ಟಿಕ್ ಕಲೆಯಾದರೆ ಹೀಗೆ ಮಾಡಿ:

1. ಕಲೆಯಾದ ಬಟ್ಟೆಯನ್ನು ಒಗೆಯುವ ಮುನ್ನ ಅದರ ಮೇಲೆ ನೀಡಿರುವ ಲೇಬಲ್ ಪರೀಕ್ಷಿಸಿ. ಕೆಲವೊಂದು ಬಟ್ಟೆಗಳು ಡ್ರೈ ವಾಶ್ ಮಾತ್ರದ್ದಾಗಿರುತ್ತದೆ.

2. ಬಟ್ಟೆಯಿಂದ ನೈಲ್ ಪಾಲಿಶ್ ಕಲೆ ಹೋಗಬೇಕೆಂದರೆ ಏಸ್ಟೋನ್ ಹೊಂದಿರುವ ನೈಲ್ ಪಾಲಿಶ್ ರಿಮೂವರ್ ಉಪಯೋಗಿಸಬಹುದು. ಕಲೆಯಾದ ಬಟ್ಟೆ ಕೆಳಗೆ ಬಿಳಿ ಬಟ್ಟೆ ಹಾಕಿ ಹತ್ತಿಯನ್ನು ರಿಮೂವರ್ ನಲ್ಲಿ ಅದ್ದಿ ಕಲೆಯಾದ ಜಾಗವನ್ನು ಉಜ್ಜಬೇಕು. ಕಲೆಯನ್ನು ಟವಲ್ ಹೀರಿಕೊಳ್ಳುವವರೆಗೂ ಮೃದುವಾಗಿ ಉಜ್ಜಬೇಕು.

3. ರಿಮೂವರ್ ನಿಂದ ಕಲೆ ಹೋಗದಿದ್ದರೆ, ರಬ್ಬಿಂಗ್ ಆಲ್ಕೊಹಾಲ್ ನಲ್ಲಿ ಹತ್ತಿ ಅದ್ದಿ ಕಲೆಯ ಮೇಲೆ ಉಜ್ಜಬೇಕು. ಬಟ್ಟೆ ಬಣ್ಣ ಬಿಳಿ ಅಥವಾ ತಿಳಿ ಬಣ್ಣದ್ದಾಗಿದ್ದರೆ, ಅದಕ್ಕೆ ಹೈಡ್ರೋಜೆನ್ ಪೆರಾಕ್ಸೈಡ್ ಬಳಸಿ ಉಳಿದ ಕಲೆಯನ್ನು ತೊಲಗಿಸಬಹುದು.

4. ಬಟ್ಟೆ ಮೇಲೆ ಲಿಪ್ ಸ್ಟಿಕ್ ಕಲೆಯಾಗಿದ್ದರೆ, ಅದಕ್ಕೂ ರಬ್ಬಿಂಗ್ ಆಲ್ಕೊಹಾಲ್ ಬಳಸಬಹುದು. ಶುದ್ಧಗೊಳಿಸುವಾಗ ಯಾವಾಗಲೂ ಬಿಳಿ ಬಟ್ಟೆಯನ್ನೇ ಉಪಯೋಗಿಸಿ. ಇದರಿಂದ ಬಟ್ಟೆಗೆ ಬಣ್ಣ ತಗುಲುವುದು ತಪ್ಪುತ್ತದೆ.

5. ಡಿಟರ್ಜೆಂಟ್ ನಿಂದಲೂ ಲಿಪ್ ಸ್ಟಿಕ್ ಮತ್ತು ನೇಲ್ ಪಾಲಿಶ್ ಕಲೆ ಹೋಗಿಸಬಹುದು. ಬಿಸಿ ನೀರಿನಲ್ಲಿ 10-15 ನಿಮಿಷ ಬಟ್ಟೆ ನೆನೆಸಿ ನಂತರ ಡಿಟರ್ಜೆಂಟನ್ನು ಕಲೆಯಾದ ಜಾಗಕ್ಕೆ ಉಜ್ಜಬೇಕು. 3-4 ನಿಮಿಷ ಬಿಟ್ಟು ತೊಳೆಯಬೇಕು. ನೀರಿಗೆ ವಿನಿಗರ್ ಬೆರೆಸಿದರೂ ಕಲೆ ಬೇಗ ಹೋಗುತ್ತೆ.

6. ನೀರು, ವಿನೆಗರ್ ಮತ್ತು ಅಡುಗೆ ಸೋಡಾ ಬೆರೆಸಿ 5-8 ನಿಮಿಷ ಈ ಮಿಶ್ರಣದಲ್ಲಿ ಬಟ್ಟೆ ನೆನೆಸಿ ನಂತರ ಒಗೆದರೆ ಕಲೆ ಬೇಗ ಬಿಡುತ್ತದೆ.

7. ಪೆಟ್ರೋಲಿಯಂ ಜೆಲ್ಲಿ ಕಲೆ ತೊಲಗಿಸಲು ಇರುವ ಇನ್ನೊಂದು ಸುಲಭ ಉಪಾಯ. ಕಲೆ ಮೇಲೆ ಪೆಟ್ರೋಲಿಯಂ ಜಲ್ಲಿ ಬಳಸಿ ಉಜ್ಜಿ 15 ನಿಮಿಷ ಹಾಗೆಯೇ ಬಿಟ್ಟು ತೊಳೆಯಬೇಕು.

8. ಶೇವಿಂಗ್ ಕ್ರೀಂ ಅನ್ನು ಸಹ ಕಲೆ ತೆಗೆಯಲು ಉಪಯೋಗಿಸಬಹುದು.

9. ಅಮೊನಿಯಾದೊಂದಿಗೆ ಅಡುಗೆ ಸೋಡಾ ಬೆರೆಸಿ ಉಜ್ಜಿದರೂ ಕಲೆಯಿಂದ ಬೇಗ ಮುಕ್ತಿ ದೊರೆಯುತ್ತದೆ.