ಬಾತ್ ರೂಂಗಿಂತ ಅಡುಗೆ ಮನೆಯಲ್ಲೇ ಹೆಚ್ಚು ಕೀಟಾಣು!

Improvement

oi-Sumalatha

By Sumalatha

Published: Friday, September 16, 2011, 16:55 [IST]

ನೀವು ಮುಂದಿನ ಬಾರಿ ಮನೆ ಶುದ್ಧಗೊಳಿಸುವ ಕೆಲಸ ಕೈಗೊಂಡರೆ ಮೊದಲು ಅಡುಗೆ ಮನೆಯತ್ತ ಹೆಚ್ಚು ಗಮನ ಹರಿಸಿ. ನಿಮ್ಮ ಮನೆಯ ಬಾತ್ ರೂಂಗಿಂತ ಅಡುಗೆ ಮನೆಯಲ್ಲೇ ಹೆಚ್ಚು ಕ್ರಿಮಿ ಕೀಟಾಣುಗಳಿರುತ್ತವೆ ಎಂದಿದೆ ಇತ್ತೀಚಿನ ಜಾಗತಿಕ ಸಮೀಕ್ಷೆ.

ಯಾವಾಗಲೂ ನೀರು ಹರಿದಾಡುವ ಬಾತ್ ರೂಂಗಿಂತ ಆಹಾರ ತಯಾರಿಸುವ ಅಡುಗೆ ಮನೆಯಲ್ಲಿಯೇ ಹೆಚ್ಚು ಕ್ರಿಮಿ ಕೀಟಾಣುಗಳಿರುತ್ತವೆ ಎಂದು ಸಮೀಕ್ಷೆ ತಿಳಿಸಿದೆ. ಅಷ್ಟೇ ಅಲ್ಲದೆ ಇವು ರೋಗರುಜಿನಗಳನ್ನು ಬೇಗ ತಗುಲುವಂತೆ ಮಾಡುತ್ತದೆ ಎಂದೂ ಎಚ್ಚರಿಸಿದೆ.

ಸಮೀಕ್ಷೆಯ ಭಾಗವಾಗಿ ಸುಮಾರು 10,000 ಜನರನ್ನು ಈ ಕುರಿತು ಪ್ರಶ್ನೆಗೆ ಒಳಪಡಿಸಿದಾಗ, ಬಾತ್ ರೂಂ ನಲ್ಲಿಯೇ ಹೆಚ್ಚು ಕ್ರಿಮಿ ಕೀಟಾಣುಗಳಿವೆ ಎಂಬ ಉತ್ತರ ಲಭಿಸಿತ್ತು. ಆದರೆ ಸತ್ಯ ಬೇರೆಯೇ ಆಗಿದೆ ಎಂದು ಸಂಶೋಧನೆ ವರದಿ ಮಾಡಿದೆ.

ಅಡುಗೆ ಮನೆಯಲ್ಲಿ ಪಾತ್ರೆ ತೊಳೆಯುವುದರಿಂದ, ಪಾತ್ರೆ ತೊಳೆಯುವ ಸಿಂಕ್ ಅನ್ನು ಸರಿಯಾಗಿ ಶುದ್ಧಗೊಳಿಸದಿರುವುದರಿಂದ, ಅಡುಗೆ ನಂತರ ಜಾಗವನ್ನು ಒಪ್ಪವಾಗಿ ಶುಚಿಗೊಳಿಸದಿರುವುದರಿಂದ ಮತ್ತು ಬೇಡದ ಉಳಿಕೆ ಸಾಮಾನನ್ನು ಅಲ್ಲಲ್ಲಿ ಹಾಗೆಯೇ ಬಿಡುವುದರಿಂದ ಕೀಟಾಣುಗಳು ದುಪ್ಪಟ್ಟಾಗಿ ಆರೋಗ್ಯಕ್ಕೆ ಮಾರಕವಾಗುತ್ತದೆ ಎಂದಿದೆ.

ಡೈನಿಂಗ್ ಟೇಬಲ್ ಮೇಲೂ ಅತಿಯಾದ ಕೀಟಾಣುಗಳಿರುತ್ತವೆ. ಅದನ್ನು ಅವಶ್ಯವಾಗಿ ಕ್ಲೀನ್ ಮಾಡದಿದ್ದರೆ ಆರೋಗ್ಯ ಸಮಸ್ಯೆಗೆ ದಾರಿಯಾಗುತ್ತದೆ ಎಂದಿದೆ. ಆದ್ದರಿಂದ ಆಗಾಗ್ಗೆ ಅಡುಗೆ ಮನೆಯಲ್ಲಿ ಬಳಸುವ ಬಟ್ಟೆಯನ್ನು ಬದಲಿಸುವುದು, ಅಡುಗೆ ಮನೆಯನ್ನು ಗಲೀಜಾಗದಂತೆ ಎಚ್ಚರವಹಿಸುವುದು ತುಂಬಾ ಅವಶ್ಯಕ.

ಮೂರು ದಿನಕ್ಕೊಮ್ಮೆಯಾದರೂ ಬಿಸಿ ನೀರಿನಲ್ಲಿ ಸೋಪಿನ ಪುಡಿ ಬೆರೆಸಿ ನೆಲ ಮತ್ತು ಟೈಲ್ಸ್ ಗಳನ್ನು ತೊಳೆಯುತ್ತಿದ್ದರೆ ಕ್ರಿಮಿ ಕೀಟಾಣುಗಳನ್ನು ಕಡಿಮೆಮಾಡಬಹುದು ಎಂದು ಸಲಹೆ ನೀಡಿದೆ.