ಸೊಳ್ಳೆ ಬರದಂತೆ ತಡೆಯುವುದು ಹೇಗೆ?

ಸೊಳ್ಳೆ ಕಡಿತವನ್ನು ನಿವಾರಿಸಲು ನಾವು ಮನೆಯಲ್ಲಿ ಹಲವಾರು ರಾಸಾಯನಿಕ ಪದಾರ್ಥಾ ಆಧಾರಿತ ಉತ್ಪನ್ನಗಳನ್ನು ಬಳಸುತ್ತೇವೆ. ಆದರು ಈ ಉತ್ಪನ್ನಗಳು ಕಡಿಮೆ ಸುರಕ್ಷತೆಯನ್ನು ಹೊಂದಿದ್ದು, ಆರೋಗ್ಯದ ಮೇಲೆ ದುಷ್ಪರಿಣಾಮವನ್ನು ಬೀರುತ್ತವೆ.

ಅದಕ್ಕಾಗಿ ನಾವು ಇಲ್ಲಿ ನಿಮಗಾಗಿ ಕೆಲವು ಪ್ರಾಕೃತಿಕವಾಗಿ ಲಭ್ಯವಿರುವ ಪರಿಹಾರೋಪಾಯಗಳನ್ನು ನೀಡುತ್ತಿದ್ದೇವೆ, ನೋಡಿ:

ತೆಂಗಿನ ನಾರು: ಮೊದಲಿನಿಂದಲು ತೆಂಗಿನ ಕಾಯಿಯ ಒಣ ನಾರನ್ನು ಸೊಳ್ಳೆ ನಿವಾರಕವನ್ನಾಗಿ ಬಳಸಲಾಗುತ್ತಿದೆ. ಮೊದಲು ತೆಂಗಿನ ಕಾಯಿಯ ನಾರನ್ನು ತೆಗೆದುಕೊಂಡು ಬೆಂಕಿ ಹಚ್ಚಿ ಹೊಗೆ ಬರುವಂತೆ ಮಾಡಿ, 5-6 ನಿಮಿಷಗಳ ಕಾಲ ನಿಮ್ಮ ಕೋಣೆಯಲ್ಲಿ ಇಡಿ. ಈ ಹೊಗೆಯಿಂದ ಸೊಳ್ಳೆಗಳು ಓಡಿ ಹೋಗುತ್ತವೆ. ತೆಂಗಿನ ನಾರು ಹೊಗೆ ಉಂಟು ಮಾಡಿದರು ಅದು ಆರೋಗ್ಯಕ್ಕೆ ಒಳ್ಳೆಯದೇ ಆಗಿದೆ.

ಕರ್ಪೂರ ಗಂಧಕ: ಕರ್ಪೂರ ಗಂಧಕವು ಸೊಳ್ಳೆಗಳ ಪ್ರಬಲ ಶತ್ರು. ಈ ಅಂಶಗಳು ಕರ್ಪೂರದಲ್ಲಿ ದೊರೆಯುತ್ತವೆ. ಕರ್ಪೂರವನ್ನು ನಿಮ್ಮ ಕೋಣೆಯಲ್ಲಿ ಹಚ್ಚಿ, ಸ್ವಲ್ಪ ಹೊತ್ತಿನ ನಂತರ ನೋಡಿ, ಸೊಳ್ಳೆಗಳು ಆ ಕೋಣೆಯಲ್ಲಿ ಇಲ್ಲದಿರುವುದನ್ನು ನೀವು ಗಮನಿಸುತ್ತೀರಿ.

ಸೀಮೆ ಎಣ್ಣೆ ಮತ್ತು ಕರ್ಪೂರ: ಸೀಮೆ ಎಣ್ಣೆಯ ವಾಸನೆ ಅಷ್ಟೇನು ಹಿತಕರವಾಗಿರುವುದಿಲ್ಲ. ಆದ್ದರಿಂದ ಸೀಮೆ ಎಣ್ಣೆಯನ್ನು ಕರ್ಪೂರದ ಜೊತೆಗೆ ಬೆರೆಸಿ, ಅದನ್ನು ಕೋಣೆಯಲ್ಲಿ ಸಿಂಪಡಿಸಿ. ಸ್ವಾಭಾವಿಕವಾಗಿ ಸೊಳ್ಳೆಗಳು ಅಲ್ಲಿಂದ ಕಾಲು ಕೀಳುತ್ತವೆ. ನಿಮಗೆ ಇನ್ನು ಸೊಳ್ಳೆ ಕಚ್ಚುವ ಭೀತಿ ಇರುವುದಿಲ್ಲ.