ಕೊತ್ತಂಬರಿ ಸೊಪ್ಪು ಹಾಳಾಗದಂತೆ ಇಡುವ ಸುಲಭದ ಮಾರ್ಗವಿದು..!!

ಕೊತ್ತಂಬರಿ ಸೊಪ್ಪನ್ನು ಸಾಮಾನ್ಯವಾಗಿ ಎಲ್ಲರ ಮನೆಯಲ್ಲೂ ಬಳಸಿಯೇ ಬಳಸುತ್ತಾರೆ. ಯಾವುದೇ ರೀತಿಯ ಅಡುಗೆ ಇದ್ದರೂ ಅದಕ್ಕೆ ಕೊತ್ತಂಬರಿ ಸೊಪ್ಪು ಹಾಕಿದರೆ ಅದರ ರುಚಿ ದುಪ್ಪಟ್ಟಾಗುತ್ತೆ. ಅದರಲ್ಲೂ ನಾಟಿ ಕೊತ್ತಂಬರಿ ಹಾಗೂ ಅಪರೂಪದ ತಳಿಯ ಕೊತ್ತಂಬರಿಗಳ ನಾವು ನೋಡಬಹುದು. ಹಾಗೆ ಹಲವು ರೀತಿಯ ಕೊತ್ತಂಬರಿಗಳು ಮಾರುಕಟ್ಟೆಯಲ್ಲಿ ದುಬಾರಿಯಾಗಿರುವುದು ಕೂಡ ಹೌದು.

ಇತ್ತೀಚಿಗೆ ಈ ಕೊತ್ತಂಬರಿ ಸೊಪ್ಪಿನ ದರವು 5 ರೂಪಾಯಿಂದ ಹಿಡಿದು 25 ರೂಪಾಯಿ ವರೆಗೂ ಇರುವುದು ನೋಡಬಹುದು. ಹಾಗೆ ಪ್ರತಿ ದಿನ ಮಾರುಕಟ್ಟೆಯಲ್ಲಿ ತರಕಾರಿ ಜೊತೆಗೆ ಎಲ್ಲರು ಕೊತ್ತಂಬರಿ ಸೊಪ್ಪು ಖರೀದಿಸಿಯೇ ಖರೀದಿಸುತ್ತಾರೆ. ಹಾಗೆ ಮತ್ತೆ ಕೆಲವು ಬಾರಿ ಚಿಲ್ಲರೆ ಇಲ್ಲಾದಾಗ ತರಕಾರಿ ಅಂಗಡಿಯಾತ ಈ ಕೊತ್ತಂಬರಿ ಸೊಪ್ಪನ್ನು ನೀಡುವುದು ಸಹ ನೋಡಬಹುದು.

ಆದ್ರೆ ಈಗ ಬಿಸಿಲಿನ ಕಾಲವಾಗಿರುವುದರಿಂದ ಬಹಳ ಕಾಲ ಸೊಪ್ಪನ್ನ ಮನೆಯಲ್ಲಿ ಇಡಲು ಆಗುವುದಿಲ್ಲ. ಮಾರುಕಟ್ಟೆಯಿಂದ ತಂದಾಗ ಎಷ್ಟು ಫ್ರೆಶ್ ಆಗಿರುತ್ತೋ ಒಂದೇ ದಿನದಲ್ಲಿ ಒಣಗುವುದು ಇಲ್ಲವೆ ಕೊಳೆತಂತೆ ಆಗುವುದು ನೋಡಬಹುದು. ಹಾಗೆ ನೀವು ಫ್ರಿಡ್ಜ್‌ನಲ್ಲಿಟ್ಟರು ಕೂಡ ಬಹುಬೇಗ ಕೊಳೆಯುವುದು ನೋಡಬಹುದು. ಹಾಗಾದ್ರೆ ಈ ಕೊತ್ತಂಬರಿ ಸೊಪ್ಪು ಹಾಳಾಗದಂತೆ ಇಡುವ ಸರಿಯಾದ ಮಾರ್ಗ ಯಾವುದು ಅನ್ನೋದನ್ನು ನಾವಿಂದು ತಿಳಿದುಕೊಳ್ಳೋಣ.

ಮೊದಲಿಗೆ ಎಲೆಗಳು ಹಾಳಾಗುತ್ತವೆ. ಅನಂತರ ದಂಟು ಕೂಡ ಹಾಳಾಗುತ್ತದೆ. ಹಾಗಾದ್ರೆ ಕೊತ್ತಂಬರಿ ಸೊಪ್ಪನ್ನು ಸಂಗ್ರಹಿಸಿಡುವ ಸರಿಯಾದ ಮಾರ್ಗ ಯಾವುದು? ಯಾವ ರೀತಿಯಲ್ಲಿ ಇಟ್ಟರೆ ಬಹುಬೇಗ ಕೆಡುವುದಿಲ್ಲ ಅನ್ನೋದನ್ನು ತಿಳಿದುಕೊಳ್ಳೋಣ.

ಆಹಾರದಲ್ಲಿ ಕೊತ್ತಂಬರಿ ಸೊಪ್ಪನ್ನು ಸೇರಿಸುವುದರಿಂದ ನಮ್ಮ ದೇಹಕ್ಕೆ ಅನೇಕ ಪ್ರಯೋಜನಗಳನ್ನು ಪಡೆಯಬಹುದು. ಮುಖ್ಯವಾಗಿ ಕೊತ್ತಂಬರಿ ಸೊಪ್ಪು ಮಧುಮೇಹವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಕೊತ್ತಂಬರಿ ಸೊಪ್ಪು ಸೇವಿಸುವುದು ಇನ್ಸುಲಿನ್ ನಿಯಂತ್ರಣದಲ್ಲಿಡಲು ಸಹಕರಿಯಾಗಲಿದೆ. ದೇಹದ ಚಯಾಪಚಯ ಕ್ರಿಯೆಯನ್ನು ಹೆಚ್ಚಿಸುತ್ತದೆ. ಚಯಾಪಚಯ ಕ್ರಿಯೆ ಹೆಚ್ಚಾದಾಗ ದೇಹದ ತೂಕವೂ ಕಡಿಮೆಯಾಗುತ್ತದೆ. ಹೀಗೆ ಅನೇಕ ಆರೋಗ್ಯಕರ ಲಾಭ ಹೊಂದಿರುವ ಕೊತ್ತಂಬರಿ ಸೊಪ್ಪನ್ನು ಮನೆಯಲ್ಲಿ ಹೇಗೆ ಸಂಗ್ರಹಿಸಬೇಕು ಎಂಬುದನ್ನು ತಿಳಿದುಕೊಳ್ಳೋಣ.

ಕೊಳೆತ ಅಥವಾ ಹಣ್ಣಾಗಿರುವ ಎಲೆ ತೆಗೆದುಹಾಕಿ

ಅಂಗಡಿಯಲ್ಲಿ ಕೊತ್ತಂಬರಿ ಸೊಪ್ಪು ಖರೀದಿಸುವ ಮುನ್ನವೇ ಹಸಿರಾಗಿರುವ ಕಟ್ಟನ್ನು ಆಯ್ದುಕೊಳ್ಳಿ. ಹಾಗೆ ಈ ಕಟ್ಟುಗಳಲ್ಲಿರುವ ಹಣ್ಣಾಗಿರುವ ಹಾಗೂ ಕೊಳೆತ ಎಲೆಗಳನ್ನು ಹುಡುಕಿ ತೆಗೆದುಹಾಕಿ. ಇದರಿಂದ ಬೇರೆ ಎಲೆಗಳು ಕೂಡ ಕೊಳೆಯುವುದರಿಂದ ತಡೆಯಬಹುದು. ಹಾಗೆ ಕೊತ್ತಂಬರಿ ಸೊಪ್ಪನ್ನು ಮನೆಗೆ ತಂದು ಅದನ್ನು ನೀರಿನಲ್ಲಿ ನೆನೆಸಬೇಕು. ಬಳಿಕ ಒಂದು ಪೇಪರ್ ಮೇಲೆ ಅದನ್ನು ಚೆನ್ನಾಗಿ ಬಿಡಿ ಬಿಡಿಯಾಗಿ ಹರಡಬೇಕು. ಹೀಗೆ ಹರಡುವುದರಿಂದ ತೇವಾಂಶದಿಂದ ಕೊಳೆಯುವುದಿಲ್ಲ, ಹಾಗೆ ಬಹಳ ದಿನ ಇದೇ ರೀತಿ ಇಡಬಹುದು.

ಕೊತ್ತಂಬರಿ ಸೊಪ್ಪನ್ನು ತಣ್ಣೀರಿನಲ್ಲಿ ಎರಡು ಅಥವಾ ಮೂರು ಬಾರಿ ನೆನೆಸಿ ನಂತರ ನೀರಿನಿಂದ ತೆಗೆದು ಜರಡಿ ಮೇಲೆ ಹಾಕಿ. ಕೊತ್ತಂಬರಿ ಸೊಪ್ಪಿನಿಂದ ನೀರು ಬಸಿದ ನಂತರ, ಕೊತ್ತಂಬರಿ ಸೊಪ್ಪನ್ನು ಹತ್ತಿ ಬಟ್ಟೆಯ ಮೇಲೆ ಹಾಕಿ. ನಂತರ ಒಣಗಲು ಬಿಡಿ. ಹೀಗೆ ಮಾಡುವುದರಿಂದಲೂ ಬಹಳ ದಿನಗಳ ಕಾಲ ಕೊತ್ತಂಬರಿ ಸೊಪ್ಪು ಹಾಳಾಗದಂತೆ ಇಡಬಹುದು. ಇನ್ನು ಈ ಕೊತ್ತಂಬರಿ ಸೊಪ್ಪನ್ನು ಬಿಡಿಸಿಕೊಂಡು ನಂತರ ಜಿಪ್ ಲಾಕ್ ಕವರ್‌ನಲ್ಲಿ ಹಾಕಿ ಇಡಬಹುದು.

ಇನ್ನು ನೀರಿನ ಅಂಶವಿಲ್ಲದೆ ಒಣಗಿದ ಬಳಿಕ ಕೊತ್ತಂಬರಿ ಸೊಪ್ಪನ್ನು ಬಾಕ್ಸ್‌ಗೆ ಹಾಕಿ ಇಡಬಹುದು. ಬಾಕ್ಸ್‌ನಲ್ಲಿ ಟಿಷ್ಯೂ ಪೇಪರ್ ಇಟ್ಟು ನಂತರ ಅದರ ಮೇಲೆ ಕೊತ್ತಂಬರಿ ಸೊಪ್ಪು ಇಟ್ಟು ಅದರ ಮೇಲೆ ಮತ್ತೆ ಟಿಷ್ಯೂ ಪೇಪರ್ ಇಟ್ಟು ಮುಚ್ಚಳ ಮುಚ್ಚಿ ಗಾಳಿ ಹೋಗದಂತೆ ಇಟ್ಟರೆ ಬಹಳ ದಿನಗಳ ಕಾಲ ಇಡಬಹುದು.