ತುಂಬಾ ಈಸಿ.. ಕೈ ನೋವಿಲ್ಲ, ನಿಮಿಷದಲ್ಲಿ ಕೆಜಿಗಟ್ಟಲೆ ಬೆಳ್ಳುಳ್ಳಿ ಸುಲಿಯಿರಿ! ಈ ಟ್ರಿಕ್ಸ್‌ ಸಮಯ ಉಳಿಸುತ್ತೆ

ಬೆಳ್ಳುಳ್ಳಿ ಸುಲಿಯೋದು ಇನ್ಮುಂದೆ ತುಂಬಾ ಈಸಿ! ಕೈ ಸುಡದೆ, ಕೇವಲ 1 ನಿಮಿಷದಲ್ಲಿ ಕೆಜಿಗಟ್ಟಲೆ ಬೆಳ್ಳುಳ್ಳಿ ಸುಲಿಯಿರಿ. ಈ 5 ಮ್ಯಾಜಿಕ್ ಟ್ರಿಕ್ಸ್‌ ನಿಮ್ಮ ಸಮಯ ಉಳಿಸುತ್ತೆ. ಹೌದು, ಅಡುಗೆ (Kitchen) ತಯಾರಿಕೆ ಒಂದು ಕಲೆಯಾದರೂ, ಅದಕ್ಕೆ ಅಗತ್ಯವಿರುವ ಪೂರ್ವಸಿದ್ಧತೆಗಳು ಕೆಲವೊಮ್ಮೆ ದೊಡ್ಡ ಸವಾಲಾಗಿದೆ. ವಿಶೇಷವಾಗಿ ಬೆಳ್ಳುಳ್ಳಿ ಸುಲಿಯುವುದು ಅನೇಕರಿಗೆ ಬೇಸರದ ಮತ್ತು ಸಮಯ ತೆಗೆದುಕೊಳ್ಳುವ ಕೆಲಸ.

ಬೆಳ್ಳುಳ್ಳಿಯ ಸಣ್ಣ ಸಿಪ್ಪೆಗಳನ್ನು ತೆಗೆಯುವಾಗ ಸಮಯ ವ್ಯರ್ಥವಾಗುವುದಲ್ಲದೆ, ಉಗುರುಗಳ ಸಂಧಿಯಲ್ಲಿ ನೋವು ಅಥವಾ ಉರಿಯೂ ಕಾಣಿಸಿಕೊಳ್ಳಬಹುದು. ಈ ಕಾರಣದಿಂದಾಗಿ, ಬಹಳಷ್ಟು ಜನರು ಬೆಳ್ಳುಳ್ಳಿ ಬಳಕೆಗೆ ಹಿಂದೇಟು ಹಾಕುತ್ತಾರೆ. ಆದರೆ, ಇನ್ನು ಮುಂದೆ ಬೆಳ್ಳುಳ್ಳಿ ಸುಲಿಯುವ ಬಗ್ಗೆ ಚಿಂತಿಸುವ ಅಗತ್ಯವಿಲ್ಲ. ನಿಮ್ಮ ಅಡುಗೆಮನೆ ಕೆಲಸವನ್ನು ಇನ್ನಷ್ಟು ಸುಲಭವಾಗಿಸಲು ಇಲ್ಲಿ ಐದು ಅದ್ಭುತ ಕಿಚನ್ ಟ್ರಿಕ್ಸ್ (Kitchen tricks) ಇವೆ.

Photo Credit: ಸಂಗ್ರಹ ಚಿತ್ರ

ಕೆಲವೇ ನಿಮಿಷಗಳಲ್ಲಿ ಕೆಜಿಗಟ್ಟಲೆ ಬೆಳ್ಳುಳ್ಳಿ ಸುಲಿಯಲು (Garlic peeling tricks) ಈ ಸರಳ ವಿಧಾನಗಳು ಸಹಕಾರಿ. ಬೆಳ್ಳುಳ್ಳಿ ಅಡುಗೆಗೆ ಅದ್ಭುತ ರುಚಿ ನೀಡುವುದಲ್ಲದೆ, ಆರೋಗ್ಯಕ್ಕೂ ಉತ್ತಮವಾಗಿದೆ. ಸಿಪ್ಪೆ ತೆಗೆಯುವ ಕಷ್ಟವನ್ನು ತಪ್ಪಿಸಲು ಈ ಕೆಳಗಿನ ಉಪಯುಕ್ತ ಟಿಕ್ಸ್‌ ನೀವು ಬಳಸಬಹುದು.

ಬಿಸಿ ನೀರು

ಬೆಳ್ಳುಳ್ಳಿ ಸಿಪ್ಪೆ ತೆಗೆಯಲು ಇದು ಅತ್ಯಂತ ಸರಳ ಹಾಗೂ ಸಾಂಪ್ರದಾಯಿಕ ವಿಧಾನವಾಗಿದೆ. ಮೊದಲು, ಬೆಳ್ಳುಳ್ಳಿಯ ಎಸಳುಗಳನ್ನು ಪ್ರತ್ಯೇಕಿಸಿ ಒಂದು ಬಟ್ಟಲಿನಲ್ಲಿ ಹಾಕಿ. ನಂತರ, ಅದಕ್ಕೆ ಉಗುರು ಬೆಚ್ಚಗಿನ ನೀರನ್ನು ಸುರಿದು ಸುಮಾರು ಹತ್ತು ನಿಮಿಷಗಳ ಕಾಲ ನೆನೆಯಲು ಬಿಡಿ. ನೀರಿನಲ್ಲಿ ನೆನೆದ ನಂತರ, ಸಿಪ್ಪೆಯು ಮೃದುಗೊಂಡು ಬೆಳ್ಳುಳ್ಳಿಯಿಂದ ಸುಲಭವಾಗಿ ಬೇರ್ಪಡುತ್ತದೆ. ಬೆಳ್ಳುಳ್ಳಿಯನ್ನು ಲಘುವಾಗಿ ಒತ್ತಿದರೆ ಸಿಪ್ಪೆ ಸಲೀಸಾಗಿ ಹೊರಬರುತ್ತದೆ.

ಗಾಜಿನ ಜಾರ್ / ಪ್ಲಾಸ್ಟಿಕ್ ಡಬ್ಬಿ

ಕೈಗಳಿಗೆ ಬೆಳ್ಳುಳ್ಳಿಯ ವಾಸನೆ ಹತ್ತದಂತೆ ಸುಲಿಯಲು ಇದು ಅತ್ಯುತ್ತಮ ವಿಧಾನ. ಬೆಳ್ಳುಳ್ಳಿ ಎಸಳುಗಳನ್ನು ಖಾಲಿ ಗಾಜಿನ ಜಾರ್ ಅಥವಾ ಪ್ಲಾಸ್ಟಿಕ್ ಡಬ್ಬಿಯಲ್ಲಿ ಹಾಕಿ, ಮುಚ್ಚಳವನ್ನು ಬಿಗಿಯಾಗಿ ಮುಚ್ಚಿರಿ. ಈಗ, ಈ ಡಬ್ಬಿಯನ್ನು ಒಂದೆರಡು ನಿಮಿಷಗಳ ಕಾಲ ಜೋರಾಗಿ ಕುಲುಕಬೇಕು.

ಡಬ್ಬಿಯ ಒಳಭಾಗದ ಗೋಡೆಗಳಿಗೆ ತಾಗಿ ಉಂಟಾಗುವ ಘರ್ಷಣೆಯಿಂದ ಬೆಳ್ಳುಳ್ಳಿಯ ಸಿಪ್ಪೆಗಳು ತಾನಾಗಿಯೇ ಬೇರ್ಪಡುತ್ತವೆ. ನಂತರ, ಡಬ್ಬಿಯನ್ನು ತೆರೆದಾಗ ಸುಲಿದ ಬೆಳ್ಳುಳ್ಳಿ ಮತ್ತು ಸಿಪ್ಪೆಗಳು ಪ್ರತ್ಯೇಕವಾಗಿರುವುದನ್ನು ಕಾಣಬಹುದು.

ಮೈಕ್ರೋವೇವ್

ತ್ವರಿತವಾಗಿ ಹೆಚ್ಚು ಬೆಳ್ಳುಳ್ಳಿ ಸುಲಿಯಲು ಮೈಕ್ರೋವೇವ್ ವಿಧಾನ ಹೆಚ್ಚು ಪರಿಣಾಮಕಾರಿ. ಬೆಳ್ಳುಳ್ಳಿ ಗಡ್ಡೆಯನ್ನು ಸಂಪೂರ್ಣವಾಗಿ ಅಥವಾ ಎಸಳುಗಳನ್ನು ಪ್ರತ್ಯೇಕಿಸಿ ಕೇವಲ ಇಪ್ಪತ್ತು ಸೆಕೆಂಡ್‌ಗಳ ಕಾಲ ಮೈಕ್ರೋವೇವ್‌ನಲ್ಲಿ ಇರಿಸಬೇಕು.

ಬಿಸಿ ಮಾಡಿದಾಗ ಬೆಳ್ಳುಳ್ಳಿ ಮತ್ತು ಸಿಪ್ಪೆಯ ನಡುವಿನ ತೇವಾಂಶ ಕಡಿಮೆಯಾಗುತ್ತದೆ. ಮೈಕ್ರೋವೇವ್‌ನಿಂದ ತೆಗೆದ ನಂತರ, ಸಿಪ್ಪೆಯು ಒಣಗಿದ ಕಾಗದದಂತೆ ಸಲೀಸಾಗಿ ಬೇರ್ಪಡುತ್ತದೆ. ಬೆಳ್ಳುಳ್ಳಿ ಬೇಯುವುದನ್ನು ತಪ್ಪಿಸಲು ಇಪ್ಪತ್ತು ಸೆಕೆಂಡ್‌ಗಿಂತ ಹೆಚ್ಚು ಕಾಲ ಇಡದಿರಲು ಗಮನಹರಿಸಿ.

ಲಟ್ಟಣಿಗೆ / ಪಾತ್ರೆ

ತಕ್ಷಣಕ್ಕೆ ಒಂದೆರಡು ಎಸಳು ಬೆಳ್ಳುಳ್ಳಿ ಬೇಕಾದಾಗ ಈ ವಿಧಾನ ಹೆಚ್ಚು ಸಹಕಾರಿ. ಬೆಳ್ಳುಳ್ಳಿ ಎಸಳನ್ನು ಸಮತಟ್ಟಾದ ಮೇಲ್ಮೈ ಮೇಲೆ ಇರಿಸಿ. ಅದರ ಮೇಲೆ ಲಟ್ಟಣಿಗೆ ಅಥವಾ ಯಾವುದೇ ಭಾರವಾದ ಪಾತ್ರೆಯಿಂದ ನಿಧಾನವಾಗಿ ಒತ್ತಡ ಹಾಕಬೇಕು. ಬೆಳ್ಳುಳ್ಳಿ ಲಘುವಾಗಿ ಜಜ್ಜಿದೊಡನೆ ಸಿಪ್ಪೆಯು ಸಡಿಲಗೊಂಡು ಕ್ಷಣಾರ್ಧದಲ್ಲಿ ಸುಲಿಯಲು ಸುಲಭವಾಗುತ್ತದೆ.

ಚಾಕು

ದೊಡ್ಡ ಹೋಟೆಲ್‌ಗಳ ವೃತ್ತಿಪರ ಶೆಫ್‌ಗಳು ಹೆಚ್ಚಾಗಿ ಈ ವಿಧಾನವನ್ನೇ ಬಳಸುತ್ತಾರೆ. ಬೆಳ್ಳುಳ್ಳಿ ಎಸಳನ್ನು ಸಮತಟ್ಟಾದ ಜಾಗದಲ್ಲಿ ಇರಿಸಿ, ಅದರ ಮೇಲೆ ದೊಡ್ಡ ಚಾಕುವಿನ ಅಗಲವಾದ ಪಾರ್ಶ್ವವನ್ನು ಗಟ್ಟಿಯಾಗಿ ಇಡಬೇಕು. ನಿಮ್ಮ ಹಸ್ತದಿಂದ ಚಾಕುವಿನ ಮೇಲೆ ಒಂದು ಪೆಟ್ಟು ನೀಡಿ.

ಈ ಕ್ರಿಯೆಯಿಂದ ಬೆಳ್ಳುಳ್ಳಿ ಚಪ್ಪಟೆಯಾಗಿ ಸಿಪ್ಪೆಯು ಕೂಡಲೇ ಬೇರ್ಪಡುತ್ತದೆ. ಹೀಗೆ ಜಜ್ಜಿದ ಬೆಳ್ಳುಳ್ಳಿಯನ್ನು ಅಡುಗೆಗೆ ಬಳಸುವುದರಿಂದ ಆಹಾರಕ್ಕೆ ಆಳವಾದ ರುಚಿ ಮತ್ತು ಉತ್ತಮ ಪರಿಮಳ ದೊರೆಯುತ್ತದೆ.

ಸುಲಿದ ಬೆಳ್ಳುಳ್ಳಿ ಸಂಗ್ರಹ

ಒಂದೇ ಬಾರಿಗೆ ಹೆಚ್ಚು ಬೆಳ್ಳುಳ್ಳಿ ಸುಲಿದುಕೊಂಡರೆ, ಅದನ್ನು ಗಾಳಿಯಾಡದ ಡಬ್ಬದಲ್ಲಿ ಹಾಕಿ ಫ್ರಿಡ್ಜ್‌ನಲ್ಲಿ ಇಡಬಹುದು. ಈ ವಿಧಾನದಿಂದ ಅಡುಗೆ ಮಾಡುವಾಗ ಸಮಯ ಉಳಿತಾಯ ಆಗುತ್ತೆ. ಅಲ್ಲದೆ, ಸುಲಿದ ಬೆಳ್ಳುಳ್ಳಿಯನ್ನು ಮುಂದಿನ ಒಂದು ವಾರದವರೆಗೆ ತಾಜಾವಾಗಿ ಬಳಸಲು ಸಾಧ್ಯವಾಗುತ್ತದೆ.