ಸಿಹಿ ಅಡಿಕೆಪುಡಿ ಇಷ್ಟು ರುಚಿಯಾಗಿ ಮಾಡಿದ್ರೆ ದಿನಾಲು ವೀಳ್ಯ ಸವಿಯುತ್ತೀರಿ..! ಮನೆಯಲ್ಲೇ ಮಾಡಿ!

ನೀವು ಮದುವೆ ಮನೆ, ಗೃಹ ಪ್ರವೇಶ, ಶುಭ ಸಮಾರಂಭಗಳಲ್ಲಿ ಊಟದ ಬಳಿಕ ಸಂಪ್ರದಾಯದಂತೆ ಫಲ ತಾಂಬುಲು ನೀಡುತ್ತಾರೆ. ಹಾಗೆ ಅತಿಥಿಗಳಿಗಾಗಿ ಊಟದ ಬಳಿಕ ಸವಿಯಲು ಸಿಹಿ ಅಡಿಕೆಪುಡಿ ಇಟ್ಟಿರುತ್ತಾರೆ. ಬಹುತೇಕ ಎಲ್ಲರು ಇದನ್ನು ಸವಿಯಲು ಇಷ್ಟಪಡುತ್ತಾರೆ. ಮಕ್ಕಳಿಂದ ಹಿಡಿದು ಹಿರಿಯರು ಕೂಡ ಈ ಸಿಹಿ ಅಡಿಕೆಯ ಪುಡಿಯನ್ನು ಸವಿಯುತ್ತಾರೆ.

ನಿಮಗೆ ವೀಳ್ಯದೆಲೆಯ ಉಪಯೋಗ ತಿಳಿದಿರಬಹುದು, ಇದರಿಂದ ನಮ್ಮ ಆರೋಗ್ಯಕ್ಕೂ ಹಲವು ರೀತಿ ಲಾಭವಿದೆ. ನಮ್ಮ ಜೀರ್ಣಕ್ರಿಯೆಗೆ ವೀಳ್ಯದೆಲೆಯಲ್ಲಿ ಉಪಯುಕ್ತ ಅಂಶವಿದೆ. ವೀಳ್ಯದೆಲೆಯು ಪ್ರಬಲವಾದ ಕ್ಯಾನ್ಸರ್ ವಿರೋಧಿ ಮತ್ತು ಆಂಟಿಮ್ಯುಟಾಜೆನಿಕ್ ಸಂಯುಕ್ತಗಳನ್ನು ಹೊಂದಿದೆ ಮತ್ತು ಕ್ಯಾನ್ಸರ್ ಬೆಳವಣಿಗೆಯ ಅಪಾಯವನ್ನು ಕಡಿಮೆ ಮಾಡುತ್ತದೆ ಕೂಡ. ವೀಳ್ಯದೆಲೆಯು ಬಾಯಿಯ ದುರ್ವಾಸನೆಯನ್ನು ಕಡಿಮೆ ಮಾಡುತ್ತದೆ.

ಆದ್ರೆ ಸಿಹಿ ಅಡಿಕೆ ಪುಡಿಯನ್ನು ನಾವು ಮನೆಯಲ್ಲೇ ಮಾಡಿಕೊಳ್ಳಬಹುದು ಎಂಬುದು ನಿಮಗೆ ಗೊತ್ತಾ?, ಹೌದು ಈ ಅದ್ಭುತ ರುಚಿ ನೀಡುವ ಸಿಹಿ ಅಡಿಕೆ ಪುಡಿಯನ್ನು ಮನೆಯಲ್ಲಿ ಮಾಡಿ ಸವಿಯಬಹುದು. ನಾವು ಕೂಡ ಊಟವಾದ ಬಳಿಕ ಮೌತ್ ಫ್ರೇಶ್‌ನರ್ ಬಳಸುತ್ತೇವೆ. ಅಂಗಡಿಯಿಂದ ಖರೀದಿಸಿ ತಂದು ಊಟದ ಬಳಿಕ ಸವಿಯು ಅಭ್ಯಾಸ ಇರುತ್ತದೆ. ಹಾಗಾದ್ರೆ ಈ ಸಿಹಿ ಅಡಿಕೆ ಪುಡಿಯನ್ನು ಮನೆಯಲ್ಲೇ ಮಾಡೋದು ಹೇಗೆ?

ಸಿಹಿ ಅಡಿಕೆ ಪುಡಿ ಮಾಡಿಕೊಳ್ಳಲು ಯಾವೆಲ್ಲಾ ಪದಾರ್ಥಗಳು ಬೇಕು?

• ಅಡಿಕೆ ಪುಡಿ
• ಕುಂಬಳಕಾಯಿ ಬೀಜ
• ರೆಡ್ ಬಾಲ್ಸ್‌ ಅಥವಾ ಸ್ವೀಟ್ ಬಾಲ್
• ಡೈಮಂಡ್ ಸಕ್ಕರೆ /ಕಲ್ಲು ಸಕ್ಕರೆ
• ಜಾಯಿಕಾಯಿ
• ಕೊಬ್ಬರಿ- ಅರ್ಧ ಕಪ್
• ಜಾಯಿ ಪತ್ರೆ - 5ಗ್ರಾಮ್
• ಸೋಂಪು
• ಲವಂಗ
• ಏಲಕ್ಕಿ - 4

ಸಿಹಿ ಅಡಿಕೆ ಪುಡಿ ಮಾಡುವುದು ಹೇಗೆ?

ಮೊದಲಿಗೆ ಏಲಕ್ಕಿ, ಲವಂಗ, ಜಾಯಿಕಾಯಿ, ಜಾಯಿಪತ್ರೆಯನ್ನು ಕುಟ್ಟಿ ಪುಡಿ ಮಾಡಿಕೊಳ್ಳಬೇಕು. ಮಿಕ್ಸಿಗೆ ಹಾಕುವುದಕ್ಕಿಂತ ಕಲ್ಲಿನಲ್ಲಿ ಕುಟ್ಟಿ ಪುಡಿ ಮಾಡಿಕೊಳ್ಳುವುದು ಉತ್ತಮ. ತರಿತರಿಯಾಗಿ ಕುಟ್ಟಿ ಪುಡಿ ಮಾಡಿಕೊಳ್ಳಿ. ಅನಂತರ ಒಂದು ಬಾಣಲೆ ಒಲೆ ಮೇಲೆ ಇಟ್ಟು ಉಪ್ಪು, ಚಿಟಿಕೆ ಉಪ್ಪು ಹಾಕಿಕೊಂಡು ಅದಕ್ಕೆ 2 ಕಪ್ ಅಡಿಕೆ ಪುಡಿ ಹಾಕಿ ಹುರಿದುಕೊಳ್ಳಬೇಕು. 1 ನಿಮಿಷ ಹುರಿದುಕೊಂಡ ಬಳಿಕ ಕುಟ್ಟಿ ಪುಡಿ ಮಾಡಿಕೊಂಡಿರುವ ಎಲ್ಲಾ ಮಸಾಲೆಗಳನ್ನು ಸಹ ಸೇರಿಸಿಕೊಂಡು ಒಲೆ ಆಫ್ ಮಾಡಿಕೊಳ್ಳಿ. ಹಾಗೆ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ.

ಸ್ವಲ್ಪ ಕೊಬ್ಬರಿ ಕೂಡ ಹಾಕಿ ಮಿಕ್ಸ್ ಮಾಡಿ. ಈಗ ಒಂದು ಪಾತ್ರೆಗೆ ಹಾಕಿಕೊಂಡು ತಣ್ಣಗಾಗಲು ಬಿಡಿ. ಪೂರ್ಣ ತಣ್ಣಗಾದ ಬಳಿಕ ಇದಕ್ಕೆ ಡೈಮಂಡ್ ಸಕ್ಕರೆ ಹಾಗೂ ಸ್ವೀಟ್ ಬಾಲ್‌ಗಳನ್ನು ಹಾಕಿಕೊಳ್ಳಿ (ಅಡಿಕೆ ಪುಡಿ ಮಧ್ಯೆ ಕೆಂಪು ಬಣ್ಣದಲ್ಲಿರುವ ಸಣ್ಣ ಸಣ್ಣ ಕಾಳುಗಳು). ಇದನ್ನು ಹಾಕಿದ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ. ಇಷ್ಟಾದರೆ ಸಾಕು ನಿಮ್ಮ ಮುಂದೆ ಅದ್ಭುತ ರುಚಿಯ ಈ ಅಡಿಕೆ ಪುಡಿ ರೆಡಿಯಾಗುತ್ತದೆ.

ನೀವು ಇದನ್ನು ಹಲವು ದಿನಗಳ ಇಟ್ಟು ಊಟ ಆದ ಬಳಿಕ ಸವಿಯಬಹುದು. ಅಂಗಡಿಯಿಂದ ತಂದು ಸವಿಯುವುದಕ್ಕಿಂತ ಮನೆಯಲ್ಲೇ ಮಾಡುವುದು ತುಂಬಾ ಒಳ್ಳೆಯದು. ನೀವು ಕೂಡ ಮಾಡಿ ನೋಡಿ.