ಕಡಿಮೆ ನೀರು ಬಳಸಿ ಬೆಳೆಯುವ ಸುಂದರ ಗಿಡಗಳು

Updated: Thursday, October 25, 2012, 16:59 [IST]

ಹೂಗಿಡಗಳಿದ್ದರೆ ಮನೆಯ ಅಂದ ಹೆಚ್ಚುವುದು. ಮನೆಯನ್ನು ಎಷ್ಟೇ ಚೆಂದ ಕಟ್ಟಿಸಿ, ಆದರೆ ಮನೆ ಮುಂದೆ ಹೂ ಗಿಡ ನೆಡಲಿಲ್ಲ ಅಂದರೆ ಮನೆಯ ಅಂದದಲ್ಲಿ ಏನೋ ಕೊರತೆ ತೋರುತ್ತದೆ. ಹಾಗಂತ ನಗರ ಪ್ರದೇಶದಲ್ಲಿ ಒಂದು ಚದರ ಅಡಿಗೆ ಲಕ್ಷಾಂತರ ರುಪಾಯಿ ಸುರಿಯಬೇಕಾಗಿರುವಾಗ ಮನೆ ಮುಂದೆ ಹೂ ತೋಟ ಮಾಡುವುದು ಸಾಮಾನ್ಯ ವ್ಯಕ್ತಿಗಳಿಗೆ ಸಾಧ್ಯವಾಗುವ ಮಾತಲ್ಲ.

ಅದರೆ ಹೂಗಿಡಗಳನ್ನು ಹೂಕುಂಡದಲ್ಲಿ ನೆಟ್ಟು ಬೆಳೆಸಬಹುದು. ಇದಕ್ಕೆ ಹೆಚ್ಚಿನ ಜಾಗದ ಅವಶ್ಯಕತೆಯಿಲ್ಲ. ಈ ಹೂಗಿಡಗಳನ್ನು ಹೂಕುಂಡದಲ್ಲಿ ನೆಟ್ಟರೆ ಮನೆ ಬದಲಾಯಿಸುವುದಾದರೆ ಒಂದು ಕಡೆಯಿಂದ ಮತ್ತೊಂದು ಕಡೆಗೆ ಸಾಗಿಸುವುದು ಸುಲಭವಾಗುತ್ತದೆ. ಇಲ್ಲಿ ಸುಲಭವಾಗಿ ಬೆಳೆಯಬಹುದಾದ ಕೆಲವು ಗಿಡಗಳ ಬಗ್ಗೆ ಹೇಳಲಾಗಿದೆ. ಇವುಗಳಿಗೆ ನೀರು ಸ್ವಲ್ಪ ಸಾಕಾಗಿರುವುದರಿಂದ ನಗರ ಪ್ರದೇಶಗಳಿಗೆ ತುಂಬಾ ಸೂಕ್ತವಾಗಿವೆ. ಇವುಗಳನ್ನು ನೆಟ್ಟರೆ ಮನೆ ಸೌಂದರ್ಯ ಹೆಚ್ಚಾಗುವುದರ ಜೊತೆಗೆ ಅದನ್ನು ನೋಡುವಾಗ ಮನಸ್ಸಿಗೆ ಆನಂದವೂ ದೊರೆಯುತ್ತದೆ.

ಹಾವು ಗಿಡ:

ಈ ಗಿಡವನ್ನು ಸ್ನ್ಯಾಕ್ ಪ್ಲಾಂಟ್ ಅಥವಾ ಹಾವಿನ ಗಿಡ ಎಂದು ಕರೆಯಲಾಗುವುದು. ಇದನ್ನು ಬಿಸಿಲಿರುವ ಜಾಗದಲ್ಲಿ ಹಾಗೂ ತಂಪಾದ ಜಾಗದಲ್ಲಿ ಎರಡೂ ಕಡೆ ಬೆಳೆಯಬಹುದು. ಈ ಗಿಡನ್ನು ನೆಟ್ಟರೆ ಪ್ರತಿದಿನ ನೀರು ಹಾಕಬೇಕಾದ ಅವಶ್ಯಕತೆ ಕೂಡ ಇಲ್ಲ. ವಾರದಲ್ಲಿ ಎರಡು ಬಾರಿ ಹಾಕಿದರೂ ಸಾಕು.

ಲೋಳೆಸರ:

ಈ ಗಿಡವನ್ನು ಮನೆಯಲ್ಲಿ ಬೆಳೆಯಲು ಮರೆಯಬೇಡಿ. ಈ ಗಿಡ ನೆಟ್ಟರೆ ನೋಡುವುದಕ್ಕೆ ಆಕರ್ಷಕ ಮಾತ್ರವಲ್ಲ ಅನೇಕ ಔಷಧೀಯ ಗುಣವನ್ನು ಹೊಂದಿದೆ.

ಜೇಡರ ಗಿಡ:

ಈ ಗಿಡವನ್ನು ಹೆಚ್ಚಿನ ಮನೆಗಳಲ್ಲಿ ಕಾಣಬಹುದು. ಇದು ಹಸಿರು ಬಣ್ಣದಲ್ಲಿ ಮಾತ್ರವಲ್ಲದೆ ಅನೇಕ ಬಣ್ಣದಲ್ಲಿ ದೊರೆಯುತ್ತದೆ. ಈ ಗಿಡ ನೆಟ್ಟರೆ ಮಣ್ಣು ತಂಪಾಗಿ ಇರುವಂತೆ ನೋಡಿಕೊಳ್ಳಬೇಕು. ಆದರೆ ಅಧಿಕ ನೀರಿನ ಅವಶ್ಯಕತೆಯಿಲ್ಲ.