ಫೆಂಗ್ ಶ್ಯೂ ಪ್ರಕಾರ ತೋಟಕ್ಕೆ ಯಾವ ಗಿಡ ಸೂಕ್ತ?

ಫೆಂಗ್ ಶ್ಯೂ ಪ್ರಕಾರ ಐದು ಶಕ್ತಿಗಳ ಸಂಕೇತ
* ಮರ: ಸಂಪತ್ತು
* ನೀರು: ಗುರಿ
* ಭೂಮಿ: ನಿಶ್ಚಲತೆ
* ಅಗ್ನಿ: ಭರವಸೆ ಮತ್ತು ಸಂತಸ
* ಮೆಟಲ್: ಶಕ್ತಿ

ಈ ಎಲ್ಲಾ ಅಂಶವನ್ನು ಒಳಗೊಂಡಿರುವ ಬಿದಿರನ್ನು ಕೆಲವರು ತಮ್ಮ ತೋಟಗಳಲ್ಲಿ ಬೆಳೆಸುತ್ತಾರೆ. ಆದರೆ ಫೆಂಗ್ ಶ್ಯೂ ಪ್ರಕಾರ ಸುಲಭವಾಗಿ ಮನೆಯ ತೋಟದಲ್ಲಿ ನೆಡಬಹುದಾದ ಕೆಲವು ಗಿಡಗಳು ಇಲ್ಲಿವೆ.

* ಮನಿ ಪ್ಲಾಂಟ್ ನಲ್ಲಿ ಮೆಟಲ್: ಮನಿ ಪ್ಲಾಂಟನ್ನು ಲಕ್ಕಿ ಪ್ಲಾಂಟ್ ಎಂದೇ ಹೇಳಲಾಗುತ್ತದೆ. ಇದು ಸಂಪತ್ತನ್ನು ಮನೆಗೆ ಒದಗಿಸುತ್ತದೆ ಎಂದು ನಂಬಲಾಗಿದೆ. ಆದರೆ ಫೆಂಗ್ ಶ್ಯೂ ಪ್ರಕಾರ ಮನಿ ಪ್ಲಾಂಟ್ ಎಲೆಗೆ ನಾಣ್ಯದ ಹೋಲಿಕೆಯಿರುವುದರಿಂದ ಮೆಟಲ್ ನ ಶಕ್ತಿ ಮತ್ತು ನೀರಿನಲ್ಲಿ ಬೆಳೆಯುವುದರಿಂದ ನೀರಿನ ಶಕ್ತಿಯಾದ ಗುರಿಯನ್ನೂ ನೀಡುತ್ತದೆ ಎನ್ನಲಾಗಿದೆ.

* ಮಲ್ಲಿಗೆಯಲ್ಲಿ ಮರದ ಅಂಶ: ಫೆಂಗ್ ಶ್ಯೂ ಪ್ರಕಾರ ಮರ ಸಂಪತ್ತಿನ ಸಂಕೇತ. ಆದ್ದರಿಂದ ನಿಮ್ಮ ತೋಟದಲ್ಲಿರುವ ಮರಗಳೆಲ್ಲವೂ ಸಂಪತ್ತನ್ನು ಪ್ರತಿನಿಧಿಸುತ್ತದೆ. ಅದರಲ್ಲೂ ಮಲ್ಲಿಗೆ ಸ್ನೇಹದ ಗುರುತಾಗಿರುವುದರಿಂದ ನಿಮ್ಮ ಮನೆಗೆ ಸ್ನೇಹದ ಸಂಪತ್ತನ್ನು ಹರಿಸುತ್ತದೆ ಎಂದಿದೆ.

* ಕಮಲದ ಹೂವಿನಲ್ಲಿ ನೀರಿನ ಶಕ್ತಿ: ದೈವೀ ಶಕ್ತಿ ಮತ್ತು ಶುದ್ಧತೆಯ ಸಂಕೇತವಾಗಿರುವ ಕಮಲವನ್ನು ಮನೆಯಲ್ಲಿ ಬೆಳೆದರೆ ನಿಮ್ಮ ಜೀವನದ ದಿಕ್ಕನ್ನು ಒಳ್ಳೆಯ ಕಡೆಗೆ ಕೊಂಡೊಯ್ಯುತ್ತದೆ. ನೀರು ಎತ್ತ ಹರಿದರೂ ಅದರ ಗುರಿಯನ್ನು ಮರೆಯುವುದಿಲ್ಲ, ಹಾಗೆಯೇ ಜೀವನವೂ ನೀರಿನಂತೆ ಸರಾಗವಾಗಿ ಗುರಿ ತಲುಪಲು ಕಮಲದ ಹೂವನ್ನು ಬೆಳೆಸಬಹುದು ಎಂದು ಫೆಂಗ್ ಶ್ಯೂ ಹೇಳುತ್ತದೆ.

* ಡೆಲ್ಫಿನಿಯಂನಲ್ಲಿ ಭೂಮಿಯ ನಿಶ್ಚಲತೆ: ಭೂಮಿ ನಿಶ್ಚಲತೆ ಮತ್ತು ಧೃಡತೆಯ ಸಂಕೇತ. ಲ್ಯಾವೆಂಡರ್ ಪರ್ಪಲ್ ಕಲರ್ ನಲ್ಲಿರುವ ಈ ಇಂಗ್ಲಿಷ್ ಹೂವು ಮನೆ ಮಂದಿಯ ಮನಸ್ಸನ್ನು ಹತೋಟಿಯಲ್ಲಿಡುತ್ತದೆ ಮತ್ತು ಧೃಡ ಸಂಕಲ್ಪ ನೀಡುತ್ತದೆ ಎಂದು ತಿಳಿಸಿದೆ.

* ಸೂರ್ಯಕಾಂತಿಯಲ್ಲಿ ಅಗ್ನಿ: ಫೆಂಗ್ ಶ್ಯೂ ಪ್ರಕಾರ ಅಗ್ನಿ ಭರವಸೆ ಮತ್ತು ಸಂತಸದ ಗುರುತು. ಸೂರ್ಯ ಕಾಂತಿಯಲ್ಲಿ ಅಗ್ನಿ ಅಂಶವಿರುವುದರಿಂದ ಇದು ಮನೆ ಮಂದಿ ಸಂತಸದಿಂದಿರಲು ಸಹಾಯ ಮಾಡುತ್ತದೆ ಎಂದು ತಿಳಿಸಿದೆ.