ತಾಮದ ಪಾತ್ರೆಗಳನ್ನು ಫಳ-ಫಳ ಹೊಳೆಯುವಂತೆ ಮಾಡಲು ಟಿಪ್ಸ್

ಹಿಂದೆಯೆಲ್ಲಾ ಪೂಜೆಗೆ ಬಳಸುವುದರಿಂದ ಹಿಡಿದು ಅಡುಗೆ ಮಾಡುವುದಕ್ಕೆ, ಆಹಾರ ಸೇವಿಸುವುದಕ್ಕೆ ತಾಮ್ರದ ಪಾತ್ರೆಗಳನ್ನು ಬಳಸುತ್ತಿದ್ದರು. ಬರ್ತಾ... ಬರ್ತಾ ಫ್ಯಾಷನ್ ಹೆಸರಿನಲ್ಲಿ ಗಾಜಿನ ಅಥವಾ ಸ್ಟೀಲ್ ಪ್ಲೇಟ್‌ಗಳು, ಲೋಟಗಳನ್ನು ಬಳಸಲಾರಂಭಿಸಿದೆವು, ಅಡುಗೆಯಲ್ಲೂ ತಾಮ್ರದ ಪಾತ್ರೆ ಬಳಕೆ ಕಡಿಮೆಯಾಯಿತು, ದೇವರ ಕಾರ್ಯಗಳಿಗಷ್ಟೇ ತಾಮ್ರದ ಪಾತ್ರೆಗಳನ್ನು ಬಳಸಲಾರಂಭಿಸಿದೆವು.

ಇದೀಗ ಮತ್ತೆ ಟ್ರೆಂಡ್‌ ಬದಲಾಗಿದೆ. ತಾಮ್ರದ ಪಾತ್ರೆಗಳನ್ನು ಬಳಸಿದರೆ ಆರೋಗ್ಯಕ್ಕೆ ಒಳ್ಳೆಯದು ಎಂದು ತಿಳಿದು ಬಂದ ಮೇಲೆ ಮತ್ತೆ ತಾಮ್ರದ ಪಾತ್ರೆಗಳನ್ನು ಬಳಸುವ ಟ್ರೆಂಡ್ ಶುರುವಾಗಿದೆ. ಅದರಲ್ಲೂ ನೀರು ಕುಡಿಯಲು ತಾಮ್ರದ ಬಾಟಲಿಗಳನ್ನು ಹೆಚ್ಚಾಗಿ ಬಳಸಲಾರಂಭಿಸಿದ್ದಾರೆ.

ತಾಮ್ರದ ಪಾತ್ರೆಗಳು ಆರೋಗ್ಯಕ್ಕೆ ಒಳ್ಳೆಯದು, ಆದರೆ ಅವುಗಳನ್ನು ನಿರ್ವಹಣೆ ಮಾಡುವುದು ಇದೆಯೆಲ್ಲಾ ತುಂಬಾನೇ ಕಷ್ಟ, ಈ ಕಾರಣಕ್ಕೆ ಕೆಲವರು ತಾಮ್ರದ ಪಾತ್ರೆಯನ್ನು ಬಳಸಲು ಹಿಂದೇಟು ಹಾಕುತ್ತಾರೆ. ಅವುಗಳು ಫಳ-ಫಳ ಹೊಳೆಯುತ್ತಿದ್ದರೆ ಮಾತ್ರ ಚೆಂದ, ಕಪ್ಪಾದರೆ ಶುಚಿಯಾಗಿ ಕಾಣಲ್ಲ.

ತಾಮ್ರದ ಪಾತ್ರೆಯನ್ನು ಸುಲಭದಲ್ಲಿ ಶುಚಿಗೊಳಿಸುವುದು ಹೇಗೆ ಎಂದು ನೋಡೋಣ ಬನ್ನಿ:
ವಿನಿಗರ್ ಮತ್ತು ಉಪ್ಪು
ತಾಮ್ರದ ಪಾತ್ರೆ ಬೆಳ್ಳಗಾಗಿಸಲು ಸೂಪರ್ ವಿಧಾನವಾಗಿದೆ. ಈ ಎರಡು ವಸ್ತುಗಳನ್ನು ಹಾಕಿ ತಿಕ್ಕಿ ತೊಳೆದರೆ ಪಾತ್ರೆ ಬೇಗನೆ ಬೆಳ್ಳಗಾಗುವುದು.

ವಿನೆಗರ್‌, ಉಪ್ಪು ಹಾಕಿ ತೊಳೆಯುವ ಮತ್ತೊಂದು ವಿಧಾನ
ಒಂದ ದೊಡ್ಡ ಪಾತ್ರೆಗೆ ನೀರು ಹಾಕಿ ಅದಕ್ಕೆ ಉಪ್ಪು ಮತ್ತು ವಿನೆಗರ್ ಹಾಕಿ, ಆ ನೀರಿಗೆ ತಾಮ್ರದ ಪಾತ್ರೆಗಳನ್ನು ಹಾಕಿ ಕಾಯಿಸಿ ಉರಿಯಿಂದ ಇಳಿಸಿ ಹಾಗೇ ಇಡಿ, ನೀರು ತಣ್ಣಗಾದ ಮೇಲೆ ಸೋಪು ಹಾಕಿ ತಿಕ್ಕಿದರೆ ಸಾಕು ಪಾತ್ರೆ ಫಳ-ಫಳ ಹೊಳೆಯುವುದು.

ನಿಂಬೆಹಣ್ಣು ಅಥವಾ ಹುಣಸೆ ಹಣ್ಣು
ತಾಮ್ರದ ಪಾತ್ರೆ ತಿಕ್ಕಿ ತೊಳೆಯಲು ನಿಂಬೆಹಣ್ಣು ಅಥವಾ ಹುಣಸೆಹಣ್ಣು ಕೂಡ ತುಂಬಾನೇ ಪ್ರಯೋಜನಕಾರಿ, ನಿಂಬೆಹಣ್ಣಿಗೆ ಅಥವಾ ಹುಣಸೆಹಣ್ಣಿಗೆ ಕಲ್ಲುಪ್ಪು ಸೇರಿಸಿ ತಿಕ್ಕಿ ತೊಳೆದರೆ ಸಾಕು ತಾಮ್ರದ ಪಾತ್ರೆಗಳು ಫಳ-ಫಳ ಹೊಳೆಯುವುದು.

ಉಪ್ಪು, ವಿನೆಗರ್, ಹಿಟ್ಟು ಅಥವಾ ಬೂದಿ
ಮನೆಯಲ್ಲಿ ಹಿಟ್ಟು ತುಂಬಾ ಸಮಯ ಇಟ್ಟು ಹಾಳಾದರೆ ಅವುಗಳನ್ನು ಬಿಸಾಡಬೇಡಿ, ತಾಮ್ರದ ಪಾತ್ರೆ ತೊಳೆಯಲು ಬಳಸಬಹುದು. ನೀವು ಹಿಟ್ಟಿಗೆ ಸ್ವಲ್ಪ ಕಲ್ಲುಪ್ಪು, ವಿನೆಗರ್ ಹಾಕಿ ತಿಕ್ಕಿ ತೊಳೆದರೆ ಸಾಕು ಪಾತ್ರೆ ಫಳ-ಫಳ ಹೊಳೆಯುವುದು. ತುಂಬಾ ಕಪ್ಪಗೆ ಹಾಕಿದರೆ ಈ ಪೇಸ್ಟ್ ಹಚ್ಚಿ ಅರ್ಧ ಗಂಟೆ ಬಿಟ್ಟು ನಂತರ ತಿಕ್ಕಿ ತೊಳೆಯಿರಿ.

ಈ ವಿಧಾನ ಕೂಡ ಪರಿಣಾಮಕಾರಿ
ಬೇಕಾಗುವ ಸಾಮಗ್ರಿ
1 ಚಮಚ ಕಡ್ಲೆಹಿಟ್ಟು
1 ಚಮಚ ಉಪ್ಪು
3-4 ಚಮಚ ಮೊಸರು
1 ಚಮಚ ಅರಿಶಿಣ
2 ಚಮಚ ನಿಂಬೆರಸ

ಇವುಗಳ ಪೇಸ್ಟ್ ಮಾಡಿ, ಪಾತ್ರೆಗೆ ತಿಕ್ಕಿದರೆ ಸಾಕು ತಾಮ್ರ ಪಾತ್ರೆ ಹೊಚ್ಚ ಹೊಸದರಂತೆ ಫಳ-ಫಳ ಹೊಳೆಯುವುದು.