ಚೈನೀಸ್ ಭವಿಷ್ಯದ ಪ್ರಕಾರ ಮನೆಯಲ್ಲಿ ಏನಿರಬೇಕು?

Decor

oi-Sumalatha

By Sumalatha

Published: Friday, September 30, 2011, 11:44 [IST]

ನಿಮ್ಮ ಕನಸಿನ ಮನೆ ಸರಳ, ಸುಂದರ, ಶಾಂತವಾಗಿರಬೇಕೆಂದರೆ ಹೆಚ್ಚು ಶ್ರಮವಹಿಸಬೇಕಿಲ್ಲ. ಇದಕ್ಕೆಂದು ಹೆಚ್ಚು ಹಣವನ್ನೂ ಖರ್ಚು ಮಾಡಬೇಕೆಂದಿಲ್ಲ. ಫೆಂಗ್ ಶ್ಯೂ ಶಾಸ್ತ್ರ ತಿಳಿಸಿರುವ ಸಿಂಪಲ್ ಟೆಕ್ನಿಕ್ ಉಪಯೋಗಿಸಿದರೆ ನಿಮ್ಮ ಮನೆ ಆಕರ್ಷಕ ಮತ್ತು ಶಾಂತವಾಗಿರುವಂತೆ ಮಾಡಬಹುದು.

ಮನೆಯ ಅಲಂಕಾರಕ್ಕೆ ಫೆಂಗ್ ಶ್ಯೂ ಸೂತ್ರ ಹೀಗಿದೆ:

1. ಫೋಟೋ ಫ್ರೇಂ: ನಿಮಗೆ ಬೇಸರವಾಗುವ ಸಂಗತಿಯನ್ನು ಮನೆಯಿಂದ ಹೊರಗೆ ಹಾಕಿದರೆ ಅದು ಮನಸ್ಸಿನಿಂದಲೂ ಹೊರಗೆ ಹೋಗುತ್ತದೆ ಎನ್ನುತ್ತದೆ ಫೆಂಗ್ ಶ್ಯೂ. ಆದ್ದರಿಂದ ಮನೆಗೆ, ಮನಕ್ಕೆ ಮುದ ನೀಡುವ ನಗು ತರುವ ಕೆಲವು ಫೋಟೋ ಫ್ರೇಂಗಳನ್ನು ಮನೆಯಲ್ಲಿ ತೂಗು ಹಾಕಿ. ಇದು ಅಲಂಕಾರಕ್ಕೂ ಚೆಂದ. ಮನಕ್ಕೂ ಶಾಂತಿ ನೀಡುತ್ತದೆ.

2. ಉಲ್ಲಾಸಕ್ಕಿರಲಿ ಈ ಬಣ್ಣ: ಕೆಲವು ಬಣ್ಣಗಳು ಮನಸ್ಸಿನ ಮೇಲೂ ಪರಿಣಾಮ ಬೀರುತ್ತದೆ ಎಂದಿದೆ ಫೆಂಗ್ ಶ್ಯೂ. ಆದ್ದರಿಂದ ಮನೆಗೆ ತಿಳಿ ನೀಲಿ ಅಥವಾ ತಿಳಿ ಹಸಿರು ಬಣ್ಣವನ್ನು ಬಳಸಿದರೆ ಅದು ಧನಾತ್ಮಕ ಪರಿಣಾಮ ಬೀರುತ್ತದೆ ಎಂದಿದೆ.

3. 21/2 ಅಡಿ ಸ್ಥಳಾವಕಾಶ: ಹೆಚ್ಚು ಇಕ್ಕಟ್ಟಿದ್ದರೆ ಮನಸ್ಸೂ ಕೂಡ ಸಮಸ್ಯೆಯ ಗೂಡಾಗುತ್ತದೆ. ಆದ್ದರಿಂದ ಮನೆಯ ಪೀಠೋಪಕರಣಗಳ ನಡುವೆ 21/2 ಅಡಿ ಜಾಗವನ್ನು ಬಿಟ್ಟರೆ ಮನೆ ನೋಡಲೂ ಚೆಂದ, ಓಡಾಡಲೂ ಸರಾಗ, ಮನಸ್ಸೂ ವಿಶಾಲವಾಗುತ್ತದೆ ಎಂದು ತಿಳಿಸಿದೆ.

4. ಚೆಂದದ ಗಿಡ, ಹೂವು: ನೈಸರ್ಗಿಕ ಅಂಶವನ್ನು ಮನೆಯಲ್ಲಿಟ್ಟರೆ ಅದು ಮನಸ್ಸಿನ ಮೇಲೆ ಒಳ್ಳೆಯ ಪರಿಣಾಮ ಬೀರುತ್ತದೆ. ಆದ್ದರಿಂದ ಹೊಸ ಜೀವನ, ಬೆಳವಣಿಗೆ ಮತ್ತು ಜೀವಕುಲದ ಸಂಕೇತವಾಗಿರುವ ಗಿಡ, ಹೂವುಗಳನ್ನು ಮನೆಯಲ್ಲಿಟ್ಟರೆ ಮನೆ ಮನ ಹಸನಾಗಿರುತ್ತದೆ ಎಂದಿದೆ ಚೈನೀಸ್ ಭವಿಷ್ಯ.

5. ಗಾಜಿನ ವಸ್ತುಗಳು: ನಿಮ್ಮ ಮನೆಯಲ್ಲಿ ಗಾಜಿನ ವಸ್ತುಗಳು, ಸೋಫಾ ಇನ್ನಿತರ ಮೆತ್ತಗಿನ ವಸ್ತುಗಳನ್ನೂ ಇಡಿ. ಗಾಜಿನ ವಸ್ತುಗಳು ಮನಸ್ಸಿನ ಪಾರದರ್ಶಕತೆಯ ಸಂಕೇತ. ಮೆತ್ತಗಿನ ವಸ್ತುಗಳು ನಿಮ್ಮ ಮನಸ್ಸನ್ನೂ ಮೆತ್ತಗಿರುವಂತೆ ಮಾಡುತ್ತದೆ ಎಂದಿದೆ ಭವಿಷ್ಯ.

ಈ ಐದು ಅಂಶಗಳನ್ನು ಪಾಲಿಸಿದರೆ ಮನೆ, ಮನ ಹಸನಾಗಿ ಯಾವಾಗಲೂ ನಗುನಗುತ್ತಾ, ಆರೋಗ್ಯವಾಗಿ ಇರಲು ಸಾಧ್ಯ ಎಂದು ನುಡಿದಿದೆ ಫೆಂಗ್ ಶ್ಯೂ.