ಗಾರ್ಡನ್ ಬ್ಯೂಟಿಸ್! ಇವೆ 5 ಸುಂದರ ಹೂಬಿಡುವ ಸಸ್ಯಗಳು.. ಮಳೆಗಾಲಕ್ಕೆ ಪರ್ಫೆಕ್ಟ್

ಮಳೆಗಾಲವು ಕೇವಲ ಹಸಿರನ್ನು ತರುವುದಿಲ್ಲ. ಬದಲಾಗಿ ಇದು, ತೋಟಗಳನ್ನು ಬಣ್ಣ ಬಣ್ಣದ ಹೂವುಗಳಿಂದ ಅಲಂಕರಿಸಲು ಸೂಕ್ತ ಸಮಯ. ಮಾನ್ಸೂನ್‌ನಲ್ಲಿನ (Monsoon) ತೇವಾಂಶ ಮತ್ತು ತಂಪಾದ ವಾತಾವರಣವು ಅನೇಕ ಹೂಬಿಡುವ ಸಸ್ಯಗಳು ವೇಗವಾಗಿ ಬೆಳೆಯಲು ಮತ್ತು ಅರಳಲು ಸಹಾಯ ಮಾಡುತ್ತದೆ. ನಾವಿಂದು ಈ ಲೇಖನದಲ್ಲಿ ಮಾನ್ಸೂನ್‌ನಲ್ಲಿ ನೆಡಲು ಸೂಕ್ತವಾದ 5 ಅತ್ಯುತ್ತಮ ಹೂಬಿಡುವ ಸಸ್ಯಗಳ (Best Flowering Plants) ಬಗ್ಗೆ ತಿಳಿಸಲಿದ್ದೇವೆ. ಅಲ್ಲದೆ, ಮಳೆಗಾಲದಲ್ಲಿ ಅವುಗಳನ್ನು ಹೇಗೆ ನಿರ್ವಹಿಸಬೇಕು ಎಂಬುದನ್ನು ನೀವು ತಿಳಿಯಬಹುದು.

ನಮ್ಮಲ್ಲಿ ಬೆಳೆಯಲು ಅನೇಕ ಸುಂದರವಾದ ಹೂಬಿಡುವ ಸಸ್ಯಗಳಿವೆ. ಜೂನ್ ಮತ್ತು ಜುಲೈನ ಬಿಸಿಲಿನಲ್ಲಿ ನಿಮ್ಮ ತೋಟ ಅಥವಾ ಬಾಲ್ಕನಿಯನ್ನು ಹಸಿರು ಮತ್ತು ವರ್ಣರಂಜಿತ ಹೂವುಗಳಿಂದ ತುಂಬಲು ಬಯಸಿದರೆ, ಇದು ಸರಿಯಾದ ಸಮಯ. ಆಗಸ್ಟ್ ಮತ್ತು ಸೆಪ್ಟೆಂಬರ್‌ನಲ್ಲಿ ಹೂಬಿಡುವ ಕೆಲವು ಸಸ್ಯಗಳನ್ನು ನೆಡಬಹುದು. ಕೆಲವು ಜನಪ್ರಿಯ ಆಯ್ಕೆಗಳೆಂದರೆ ಮಾರಿಗೋಲ್ಡ್, ದಾಸವಾಳ, ಗುಲ್ಮೆಹಂದಿ, ಮಲ್ಲಿಗೆ ಮತ್ತು ಮೊಗ್ರಾ. ಈ ಸಸ್ಯಗಳು ವಿವಿಧ ಬಣ್ಣಗಳಲ್ಲಿ ಬರುತ್ತವೆ. ಕಡಿಮೆ ನಿರ್ವಹಣೆಯೊಂದಿಗೆ ಬೆಳೆಯಲು ಸುಲಭ. ನಿಮಗೆ ಯಾವ ರೀತಿಯ ಹೂವುಗಳು ಇಷ್ಟವಾಗುತ್ತವೆ ಮತ್ತು ನಿಮ್ಮ ಮನೆಯ ಹವಾಮಾನಕ್ಕೆ ಯಾವುದು ಸೂಕ್ತ ಎಂಬುದನ್ನು ಮೊದಲು ಅರಿಯಬೇಕು.

ಮನೆಯಂಗಳದಲ್ಲಿ ನೆಡಬಹುದಾದ ಹೂವಿನ ಗಿಡಗಳು ಇಲ್ಲಿವೆ

ಮಾರಿಗೋಲ್ಡ್ ಅಥವಾ ಚೆಂಡು ಹೂವು

ಮಾನ್ಸೂನ್‌ನಲ್ಲಿ ಸುಂದರವಾದ ಹೂಬಿಡುವ ಸಸ್ಯಗಳಲ್ಲಿ ಮಾರಿಗೋಲ್ಡ್ (Marigold) ಸಹ ಒಂದು. ಚೆಂಡು ಹೂವುಗಳು ಹಳದಿ ಮತ್ತು ಕಿತ್ತಳೆ ಬಣ್ಣಗಳಲ್ಲಿ ಲಭ್ಯವಿದೆ. ಇವು ನಿಮ್ಮ ಉದ್ಯಾನವನ ಮತ್ತು ಬಾಲ್ಕನಿಯ ಸೌಂದರ್ಯ ಹೆಚ್ಚಿಸುತ್ತವೆ. ಈ ಸಸ್ಯ ಕೀಟಗಳನ್ನು ದೂರವಿಡಲು ಸಹಾಯ ಮಾಡುತ್ತದೆ. ಮಳೆಗಾಲದ ಸಲಹೆ ಎಂದರೆ, ಚೆಂಡು ಹೂವುಗಳಿಗೆ ಉತ್ತಮ ಸೂರ್ಯನ ಬೆಳಕು ಮತ್ತು ನೀರು ಬಸಿದು ಹೋಗುವಂತಹ ಮಣ್ಣು ಬೇಕಾಗುತ್ತದೆ. ನೀರು ನಿಲ್ಲದಂತೆ ನೋಡಿಕೊಳ್ಳಿ. ಪ್ರತಿ 3 ರಿಂದ 4 ದಿನಗಳಿಗೊಮ್ಮೆ ಮಣ್ಣಿನ ತೇವಾಂಶವನ್ನು ಪರೀಕ್ಷಿಸಿ. ಜೊತೆಗೆ ಅಗತ್ಯವಿದ್ದಾಗ ಮಾತ್ರ ನೀರು ಹಾಕಿ.

ದಾಸವಾಳ

ದಾಸವಾಳವು (Hibiscus) ದೊಡ್ಡ ಮತ್ತು ವರ್ಣರಂಜಿತ ಹೂವುಗಳನ್ನು ನೀಡುತ್ತದೆ. ಇದು ತುಂಬಾ ಆಕರ್ಷಕವಾಗಿ ಕಾಣುತ್ತದೆ. ಇದು ಧಾರ್ಮಿಕ ಆಚರಣೆಗಳಲ್ಲಿ (ಪೂಜೆ) ಸಹ ಉಪಯುಕ್ತವಾಗಿದೆ. ಮಳೆಗಾಲದ ಸಲಹೆ ಎಂದರೆ, ಈ ಸಸ್ಯಕ್ಕೆ ಸ್ವಲ್ಪ ಸೂರ್ಯನ ಬೆಳಕು ಮತ್ತು ತೆರೆದ ಸ್ಥಳ ಸೂಕ್ತವಾಗುತ್ತದೆ. ನೆನಪಿಡಿ, ಮಳೆಗಾಲದಲ್ಲಿ ಕುಂಡದ ಕೆಳಗೆ ರಂಧ್ರವಿರಬೇಕು. ಇದರಿಂದ ಹೆಚ್ಚುವರಿ ನೀರು ಹೊರಗೆ ಹೋಗುತ್ತದೆ. ಕಾಲಕಾಲಕ್ಕೆ ಕೊಂಬೆಗಳನ್ನು (ಟೊಂಗೆ) ಕತ್ತರಿಸಿ.

ಗುಲ್ಮೆಹೆಂದಿ ಅಥವಾ ಬಾಲ್ಸಾಮ್

ಗುಲ್ಮೆಹಂದಿ (Gulmehndi / Balsam) ಹೂವುಗಳು ಗುಲಾಬಿ, ನೇರಳೆ ಮತ್ತು ಬಿಳಿ ಬಣ್ಣಗಳಲ್ಲಿ ಬರುತ್ತವೆ. ಈ ಸಸ್ಯವು ಬೇಗನೆ ಬೆಳೆಯುತ್ತದೆ ಮತ್ತು ಹೆಚ್ಚು ಕಾಳಜಿಯ ಅಗತ್ಯವಿಲ್ಲ. ಮಳೆಗಾಲದಲ್ಲಿ ನೀವು ಬೀಜಗಳನ್ನು ಮಣ್ಣಿನಲ್ಲಿ ಉದುರಿಸಿ. ಮತ್ತು ತೇವಾಂಶವನ್ನು ಕಾಪಾಡಿಕೊಳ್ಳುವಂತೆ ನೋಡಿಕೊಳ್ಳಿ. ಪ್ರತಿ ವಾರಕ್ಕೊಮ್ಮೆ ಗೊಬ್ಬರವನ್ನು ಹಾಕಬೇಕು. ಕುಂಡದಲ್ಲಿ ಹೆಚ್ಚು ನೀರು ನಿಲ್ಲದಂತೆ ನೋಡಿಕೊಳ್ಳಬೇಕು.

ಮಲ್ಲಿಗೆ

ಮಲ್ಲಿಗೆಯ (Chameli / Jasmine) ಸಣ್ಣ ಬಿಳಿ ಹೂವುಗಳು ನಿಮ್ಮ ಮನೆಯನ್ನು ಸುವಾಸನೆ ಅಥವಾ ಪರಿಮಳದಿಂದ ತುಂಬಿಸುತ್ತವೆ. ಇದರ ಪರಿಮಳವು ಮಳೆಗಾಲದಲ್ಲಿ ಇನ್ನಷ್ಟು ತಾಜಾತನ ನೀಡುತ್ತದೆ. ಮಳೆಗಾಲದಲ್ಲಿ ಈ ಗಿಡಕ್ಕೆ ಸ್ವಲ್ಪ ಸೂರ್ಯನ ಬೆಳಕು ಮತ್ತು ತೆರೆದ ಗಾಳಿಯ ಅಗತ್ಯವಿದೆ. ಮಳೆಗಾಲದಲ್ಲಿ ಬೇರುಗಳಿಗೆ ಶಿಲೀಂಧ್ರ ತಗುಲದಂತೆ ಮಣ್ಣಿನಲ್ಲಿ ಬೇವಿನ ಹಿಂಡಿಯನ್ನು ಮಿಕ್ಸ್ ಮಾಡಿ.

ಮೊಗ್ರಾ

ಮೊಗ್ರಾ ಹೂವು (Mogra) ತನ್ನ ಸಿಹಿ ಪರಿಮಳ ಮತ್ತು ಸೌಂದರ್ಯಕ್ಕೆ ಹೆಸರುವಾಸಿ. ಇವು ಬೆಚ್ಚಗಿನ ಮತ್ತು ತೇವಾಂಶವುಳ್ಳ ವಾತಾವರಣದಲ್ಲಿ ಅದ್ಭುತವಾಗಿ ಅರಳುತ್ತವೆ. ಮಳೆಗಾಲದಲ್ಲಿ ಈ ಸಸ್ಯಕ್ಕೆ ಪ್ರತಿದಿನ ಸ್ವಲ್ಪ ಸೂರ್ಯನ ಬೆಳಕು ಬೇಕು. ಜೊತೆಗೆ ನೀರಿನ ಸಮತೋಲನ ಕಾಪಾಡಿಕೊಳ್ಳುವುದು ಮುಖ್ಯ. ಮಣ್ಣಿನಲ್ಲಿ ಸಾವಯವ ಗೊಬ್ಬರವನ್ನು ಮಿಕ್ಸ್ ಮಾಡಿ. ವಾರಕ್ಕೊಮ್ಮೆ ಹೂವುಗಳನ್ನು ಕತ್ತರಿಸಬೇಕು.

ಮಳೆಗಾಲದಲ್ಲಿ ಗಿಡಗಳ ಆರೈಕೆ ಹೇಗೆ?

* ಗಿಡಗಳ ಬೇರುಗಳಲ್ಲಿ ನೀರು ನಿಲ್ಲದಂತೆ ನೋಡಿಕೊಳ್ಳಬೇಕು.
* ಸಾವಯವ ಗೊಬ್ಬರ ಮತ್ತು ಬೇವಿನ ಹಿಂಡಿಯನ್ನು ಬಳಸಬೇಕು. ಇದರಿಂದ ಶಿಲೀಂಧ್ರಗಳು ಹತ್ತಿರ ಬರುವುದಿಲ್ಲ.
* ಗಿಡಗಳನ್ನು ಸ್ವಲ್ಪ ಬಿಸಿಲು ಇರುವ ಜಾಗದಲ್ಲಿ ಇಡಬೇಕು.
* ಎಲೆಗಳ ಮೇಲೆ ನೀರು ನಿಲ್ಲದಂತೆ ಸ್ವಚ್ಛವಾಗಿಡಬೇಕು.

ಮಳೆಗಾಲವು ಈ ಹೂವುಗಳನ್ನು ನೆಡಲು ಮತ್ತು ಪ್ರಕೃತಿಯೊಂದಿಗೆ ಬೆರೆಯಲು ಒಂದು ಅದ್ಭುತ ಅವಕಾಶ. ಸ್ವಲ್ಪ ಕಾಳಜಿ ಮತ್ತು ಸರಿಯಾದ ಸಸ್ಯಗಳ ಆಯ್ಕೆಯೊಂದಿಗೆ, ನಿಮ್ಮ ಉದ್ಯಾನ ಅಥವಾ ಬಾಲ್ಕನಿಯನ್ನು ಸುಂದರ ಮತ್ತು ಪರಿಮಳಯುಕ್ತವಾಗಿಸಬಹುದು. ಒಟ್ಟಾರೆ, ಮಳೆಗಾಲವು ಹೂವಿನ ಗಿಡಗಳನ್ನು ನೆಡಲು ಮತ್ತು ಬೆಳೆಸಲು ಉತ್ತಮ ಸಮಯ. ಸೂಕ್ತವಾದ ಕಾಳಜಿ ಮತ್ತು ಗಮನದಿಂದ, ನಿಮ್ಮ ಮನೆಯಂಗಳವನ್ನು ಸುಂದರವಾದ ಹೂವುಗಳಿಂದ ಅಲಂಕರಿಸಬಹುದು.