ಡಿಸೆಂಬರ್ 1 ರಂದೇ ಏಡ್ಸ್ ದಿನ ಏಕೆ? ಏಡ್ಸ್ ಹೇಗೆ ಬಂತು ಮತ್ತು ಮೊದಲು ಯಾರಿಗೆ ಬಂತು?

ಪ್ರತಿ ವರ್ಷ ಡಿಸೆಂಬರ್ 1 ರಂದು ವಿಶ್ವ ಏಡ್ಸ್ ದಿನವನ್ನು (World AIDS Day) ಆಚರಿಸಲಾಗುತ್ತದೆ. ಈ ದಿನದಂದು ಕೆಂಪು ರಿಬ್ಬನ್ ಧರಿಸಿ, ರ್‍ಯಾಲಿಗಳನ್ನು ನಡೆಸಲಾಗುತ್ತದೆ. ಆದರೆ, ಡಿಸೆಂಬರ್ 1 ಅನ್ನೇ ಏಡ್ಸ್ ದಿನಾಚರಣೆಗೆ ಏಕೆ ಆಯ್ಕೆ ಮಾಡಲಾಯಿತು? ಏಡ್ಸ್ ಮಹಾಮಾರಿಗೆ ತುತ್ತಾದ ಮೊದಲ ವ್ಯಕ್ತಿ ಯಾರು? ಎಂಬ ಪ್ರಶ್ನೆಗಳು ಹಲವರನ್ನು ಕಾಡಬಹುದು.

ಹೌದು, ಈ ದಿನ ಕೇವಲ ಜಾಗೃತಿ ಅಭಿಯಾನ ಮಾತ್ರವಲ್ಲದೆ, ಏಡ್ಸ್ ವಿರುದ್ಧ ಹೋರಾಡಿ ಪ್ರಾಣ ಕಳೆದುಕೊಂಡವರಿಗೆ ಶ್ರದ್ಧಾಂಜಲಿ ಹಾಗೂ ಪ್ರಸ್ತುತ ಹೋರಾಡುತ್ತಿರುವವರಿಗೆ ಬೆಂಬಲ ನೀಡುವ ದಿನವಾಗಿದೆ. ಇದು ಸಮಾಜದಲ್ಲಿ ರೋಗದ ಬಗ್ಗೆ ಇರುವ ತಪ್ಪು ಕಲ್ಪನೆಗಳನ್ನು ಹೋಗಲಾಡಿಸಿ, ಜಾಗೃತಿ ಮೂಡಿಸುವ ಪ್ರಯತ್ನವಾಗಿದೆ.

ವಿಶ್ವ ಏಡ್ಸ್ ದಿನ 2025ರ ಥೀಮ್

ವಿಶ್ವಸಂಸ್ಥೆಯು ಪ್ರತಿ ವರ್ಷ ಹೊಸ ಘೋಷವಾಕ್ಯದೊಂದಿಗೆ ಏಡ್ಸ್ ದಿನವನ್ನು (AIDS Day 2025) ಆಯೋಜಿಸುತ್ತದೆ. 2030ರ ವೇಳೆಗೆ ಏಡ್ಸ್ ಅನ್ನು ವಿಶ್ವದಿಂದ ಸಂಪೂರ್ಣವಾಗಿ ನಿರ್ಮೂಲನೆ ಮಾಡುವುದು ಇದರ ಪ್ರಮುಖ ಗುರಿಯಾಗಿದೆ. 2025ರ ಥೀಮ್ "ಅಡ್ಡಿಗಳನ್ನು ನಿವಾರಿಸುವುದು, ಏಡ್ಸ್ ಪ್ರತಿಕ್ರಿಯೆಯನ್ನು ಪರಿವರ್ತಿಸುವುದು" (Overcoming disruption, Transforming the AIDS response) ಎಂಬುದಾಗಿದೆ. ಏಡ್ಸ್ ತಡೆಗಟ್ಟುವಿಕೆಯಲ್ಲಿರುವ ಅಡೆತಡೆಗಳನ್ನು ತೆಗೆದುಹಾಕಿ, ಸಮಾಜದ ಪ್ರತಿಯೊಬ್ಬರೂ ಈ ಹೋರಾಟದಲ್ಲಿ ಪಾಲ್ಗೊಳ್ಳುವಂತೆ ಮಾಡುವುದು ಇದರ ಉದ್ದೇಶವಾಗಿದೆ.

ಡಿಸೆಂಬರ್ 1 ಆಯ್ಕೆ ಮಾಡಿದ್ದು ಏಕೆ?

1988ರ ವೇಳೆಗೆ ವಿಶ್ವದಾದ್ಯಂತ ಏಡ್ಸ್ ಉಲ್ಬಣಗೊಳ್ಳುತ್ತಿತ್ತು. ಆ ಸಮಯದಲ್ಲಿ ಜನರು ಈ ಕಾಯಿಲೆಯ ಬಗ್ಗೆ ತೀವ್ರ ಭಯ ಮತ್ತು ತಪ್ಪು ಕಲ್ಪನೆಗಳನ್ನು ಹೊಂದಿದ್ದರು. ಆ ತಪ್ಪು ಕಲ್ಪನೆಗಳನ್ನು ಹೋಗಲಾಡಿಸಲು, ಜನರಲ್ಲಿ ಜಾಗೃತಿ ಮೂಡಿಸಲು ಮತ್ತು ಎಚ್ಐವಿ (HIV) ಸೋಂಕಿತರ ಬಗ್ಗೆ ಐಕ್ಯತೆ ತೋರಿಸಲು ವಿಶೇಷ ದಿನದ ಅವಶ್ಯಕತೆ ಇದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ (WHO) ಭಾವಿಸಿತು. ಡಿಸೆಂಬರ್ 1ರ ಆಯ್ಕೆಯ ಹಿಂದೆ ಒಂದು ಆಸಕ್ತಿದಾಯಕ ಕಾರಣವಿದೆ.

ವರ್ಷದ ಕೊನೆಯ ತಿಂಗಳಲ್ಲಿ ಜನರು ಹೊಸ ವರ್ಷಕ್ಕೆ ಸಿದ್ಧರಾಗುತ್ತಾ, ಸಾಮಾಜಿಕ ಜವಾಬ್ದಾರಿ ಬಗ್ಗೆ ಹೆಚ್ಚು ಗಮನ ಹರಿಸುತ್ತಾರೆ. ಈ ಸಮಯದಲ್ಲಿ ಮಾಧ್ಯಮಗಳ ಗಮನ ಸೆಳೆಯಲು ಇದು ಸೂಕ್ತ ಸಮಯ ಎಂದು ಭಾವಿಸಿ ಈ ದಿನಾಂಕವನ್ನು ಅಂತಿಮಗೊಳಿಸಲಾಯಿತು. ಹೀಗಾಗಿ, 1988ರಲ್ಲಿ ಮೊದಲ ಬಾರಿಗೆ ವಿಶ್ವ ಏಡ್ಸ್ ದಿನವನ್ನು (World AIDS Day 2025) ಆಚರಿಸಲಾಯಿತು.

ಏಡ್ಸ್‌ಗೆ ತುತ್ತಾದ ಮೊದಲ ವ್ಯಕ್ತಿ ಯಾರು?

ಏಡ್ಸ್ ಇತ್ತೀಚೆಗೆ ಬಂದ ಕಾಯಿಲೆ ಎಂದು ಹಲವರು ಭಾವಿಸುತ್ತಾರೆ. ಆದರೆ, ಇದರ ಮೂಲಗಳು ಬಹಳ ಆಳದಲ್ಲಿವೆ. ಸಂಶೋಧನೆಗಳ ಪ್ರಕಾರ, ಹೆಚ್ಐವಿಗೆ ಸಂಬಂಧಿಸಿದ ಮೊದಲ ಪ್ರಕರಣ 1959ರಲ್ಲಿ ಬೆಳಕಿಗೆ ಬಂದಿತು. ಕಾಂಗೋ ದೇಶದ ಕಿನ್ಷಾಸಾ ನಗರದ ಒಬ್ಬ ವ್ಯಕ್ತಿಯಿಂದ ಸಂಗ್ರಹಿಸಿದ ರಕ್ತದ ಮಾದರಿಯನ್ನು ದಶಕಗಳ ನಂತರ ಆಧುನಿಕ ವಿಧಾನಗಳಲ್ಲಿ ಪರೀಕ್ಷಿಸಿದಾಗ ಅದರಲ್ಲಿ ಎಚ್ಐವಿ ಅಂಶಗಳು ಪತ್ತೆಯಾಗಿವೆ. ಅಂದರೆ, ವಿಶ್ವಕ್ಕೆ ಗೊತ್ತಾಗುವ ಮುನ್ನವೇ ಈ ವೈರಸ್ ಸದ್ದಿಲ್ಲದೆ ತನ್ನ ಅಸ್ತಿತ್ವವನ್ನು ಸ್ಥಾಪಿಸಿತ್ತು.

ರೋಗಕ್ಕಿಂತ ತಾರತಮ್ಯ ಅಪಾಯಕಾರಿ

ಇಂದಿಗೂ ಏಡ್ಸ್ ಎಂದರೆ ಸಾಮಾಜಿಕ ಕಳಂಕ ಎಂಬ ಭಾವನೆ ಹೋಗಿಲ್ಲ. ಔಷಧಿಗಳಿಲ್ಲದ ಕಾಲದಲ್ಲಿ ಏಡ್ಸ್ ಎಂದರೆ ಸಾವಿನ ಆಹ್ವಾನ ಎಂದು ಭಯಪಡುತ್ತಿದ್ದರು. ಆದರೆ, ಇಂದು ವೈದ್ಯಕೀಯ ಕ್ಷೇತ್ರದಲ್ಲಿ ಅದ್ಭುತ ಪ್ರಗತಿ ಸಾಧಿಸಲಾಗಿದೆ. ಸರಿಯಾದ ಸಮಯದಲ್ಲಿ ಎಚ್ಐವಿಯನ್ನು ಗುರುತಿಸಿ, ಔಷಧಿಗಳನ್ನು ಬಳಸಿದರೆ, ಸೋಂಕಿತರು ಕೂಡ ಸಾಮಾನ್ಯ ಜನರಂತೆ ಆರೋಗ್ಯಕರ, ದೀರ್ಘಕಾಲದ ಜೀವನ ನಡೆಸಬಹುದು.

ಏಡ್ಸ್ ಒಂದು ಅಪರಾಧವಲ್ಲ, ಅದು ಕೇವಲ ಒಂದು ರೋಗ. ಸೋಂಕಿತರಿಗೆ ನಮ್ಮ ಅನುಕಂಪ ಬೇಕಾಗಿಲ್ಲ, ಬದಲಿಗೆ ನಮ್ಮ ಸ್ನೇಹ ಮತ್ತು ಬೆಂಬಲ ಬೇಕು. ಅವರನ್ನು ದೂರವಿಡುವುದು ನಮ್ಮ ಜವಾಬ್ದಾರಿಯಲ್ಲ, ಅವರನ್ನು ಹತ್ತಿರಕ್ಕೆ ತೆಗೆದುಕೊಳ್ಳುವುದು ನಮ್ಮ ಕರ್ತವ್ಯ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.