ಖಾಲಿ ಹೊಟ್ಟೆಯಲ್ಲಿ ಜೀರಿಗೆ ನೀರು ಕುಡಿದರೆ- ದೇಹದ ತೂಕ ಇಳಿಸಬಹುದು!

ಜೀರಿಗೆ ನೀರು ತಯಾರಿಸುವುದು ಹೇಗೆ?

ಜೀರಿಗೆ ನೀರು ತಯಾರಿಸುವುದು ಅತ್ಯಂತ ಸುಲಭ. ರಾತ್ರಿ ಮಲಗುವ ಮುನ್ನ ಒಂದು ಬಟ್ಟಲು ನೀರಲ್ಲಿ ಒಂಚೂರು ಜೀರಿಗೆ ಹಾಕಿ ಇಟ್ಟರೆ ಸಾಕು. ಬೆಳಗ್ಗೆ ಎದ್ದ ತಕ್ಷಣ ಜೀರಿಗೆ ನೀರು ಸಿದ್ಧವಾಗಿರುತ್ತದೆ. ನೀರಲ್ಲಿ ಜೀರಿಗೆ ಬೆರೆಸಿದಾಗ ಓಸ್ಮೊಸಿಸ್ ಪ್ರಕ್ರಿಯೆ ನಡೆಯುತ್ತದೆ. ನೀರಲ್ಲಿ ಚೆನ್ನಾಗಿ ನೆನೆದ ಜೀರಿಗೆ ಕಾಳುಗಳು ತಮ್ಮಲ್ಲಿನ ಪೋಷಕಾಂಶಗಳನ್ನು ನೀರಿಗೆ ಬಿಡುಗಡೆ ಮಾಡುತ್ತವೆ. ಈ ಪೋಷಕಾಂಶಗಳಿಂದ ತುಂಬಿದ ಜೀರಿಗೆ ನೀರು ಹಳದಿ ಬಣ್ಣದ್ದಾಗಿ ಕಾಣುತ್ತದೆ.

ಕಡಿಮೆ ಕ್ಯಾಲೋರಿ

ಅತ್ಯಂತ ಕಡಿಮೆ ಕ್ಯಾಲೋರಿಗಳನ್ನು ಹೊಂದಿರುವ ಜೀರಿಗೆ ನೀರು ದೇಹಕ್ಕೆ ಯಾವುದೇ ಅಪಾಯ ಉಂಟು ಮಾಡುವುದಿಲ್ಲ. ತೂಕ ಇಳಿಸುವ ಪ್ರಯತ್ನದಲ್ಲಿರುವಾಗ ಜೀರಿಗೆ ನೀರು ಸೇವನೆ ಅತ್ಯಂತ ಸೂಕ್ತವಾಗಿದೆ. ಒಂದು ಟೇಬಲ್ ಚಮಚೆ ಜೀರಿಗೆಯಲ್ಲಿ ಕೇವಲ ೭ ಕ್ಯಾಲೋರಿ ಶಕ್ತಿ ಇರುವುದರಿಂದ ಇದನ್ನು ಕರಗಿಸಲು ಹೆಚ್ಚುವರಿ ವ್ಯಾಯಾಮದ ಅವಶ್ಯಕತೆ ಇರುವುದಿಲ್ಲ. ಅತ್ಯುತ್ತಮ ಆಂಟಿ ಆಕ್ಸಿಡೆಂಟ್ ಅಧ್ಯಯನಗಳ ಪ್ರಕಾರ ಜೀರಿಗೆ ಅತ್ಯುತ್ತಮ ಆಂಟಿ ಆಕ್ಸಿಡೆಂಟ್‌ಗಳಾಗಿವೆ. ವಿಟಮಿನ್ ಎ, ಸಿ ಗಳಿಂದ ಸಮೃದ್ಧ ವಾಗಿರುವ ಜೀರಿಗೆಯಲ್ಲಿ ದೇಹಕ್ಕೆ ಅಗತ್ಯವಾದ ಮ್ಯಾಂಗನೀಸ್ ಮತ್ತು ತಾಮ್ರದ ಪೋಷಕಾಂಶಗಳೂ ಇವೆ. ಉತ್ತಮ ಆಂಟಿ ಆಕ್ಸಿಡೆಂಟ್‌ ಗಳಾಗಿರುವ ಜೀರಿಗೆ ದೇಹದಲ್ಲಿ ಬೇಡವಾದ ಆಕ್ಸಿಜನ್ ರ್‍ಯಾಡಿಕಲ್ ಅಂಶಗಳನ್ನು ನಿವಾರಿಸುತ್ತವೆ.

ಚಯಾಪಚಯ ಕ್ರಿಯೆ ಸುಧಾರಣೆ

ದೇಹದಲ್ಲಿ ನಿಧಾನ ಗತಿಯ ಚಯಾಪಚಯ (ಮೆಟಬಾಲಿಸಂ) ಪ್ರಕ್ರಿಯೆಯಿಂದ ಹೆಚ್ಚುವರಿ ತೂಕವನ್ನು ಕಡಿಮೆ ಮಾಡುವುದು ಕಷ್ಟಕರವಾಗಿ ಪರಿಣಮಿಸುತ್ತದೆ. ನಿಧಾನ ಗತಿಯ ಚಯಾಪಚಯದಿಂದ ದೇಹವು ಸಕ್ಕರೆ ಹಾಗೂ ಕೊಬ್ಬಿನ ಅಂಶಗಳನ್ನು ಕರಗಿಸಲು ಸಾಧ್ಯವಾಗುವುದಿಲ್ಲ. ಇದರಿಂದ ತೂಕ ಹೆಚ್ಚಾಗುತ್ತಲೇ ಹೋಗುವ ಸಾಧ್ಯತೆ ಇರುತ್ತದೆ. ಆದರೆ ಇಂಥ ಸಮಸ್ಯೆಗಳಿಗೆ ಜೀರಿಗೆ ಉತ್ತಮ ಔಷಧಿಯಾಗಿದೆ ಎಂಬುದು ವೈಜ್ಞಾನಿಕ ಅಧ್ಯಯನಗಳಿಂದ ದೃಢಪಟ್ಟಿದೆ. ನಿಯಮಿತವಾಗಿ ಜೀರಿಗೆ ನೀರು ಸೇವಿಸಿದವರಲ್ಲಿ ದೇಹದ ಚಯಾಪಚಯ ಪ್ರಕ್ರಿಯೆ ಸುಧಾರಿಸಿ, ಲಿಪಿಡ್ ಸಂಖ್ಯೆಯಲ್ಲಿ ಸಮತೋಲನ ಕಂಡು ಬಂದಿದೆ. ಅಲ್ಲದೆ ಅತಿತೂಕ ಹೊಂದಿದವರಲ್ಲಿ ಬಾಡಿ ಮಾಸ್ ಇಂಡೆಕ್ಸ್ (ಬಿಎಂಐ) ಕಡಿಮೆಯಾಗಿರುವುದು ಸಹ ಸಾಬೀತಾಗಿದೆ.

ಜೀರ್ಣಕ್ರಿಯೆ ಸುಧಾರಣೆ

ಜೀರ್ಣಕ್ರಿಯೆಗೆ ಒಳ್ಳೆಯದು

ದೇಹದಲ್ಲಿನ ಜೀರ್ಣಕ್ರಿಯೆ ಉತ್ತಮವಾಗಿದ್ದರೆ ಮಾತ್ರ ವ್ಯಕ್ತಿ ಆರೋಗ್ಯದಿಂದಿರಲು ಸಾಧ್ಯ. ಜೀರಿಗೆ ನೀರು ಸೇವನೆಯಿಂದ ಕರುಳಿನ ಕಾರ್ಯಕ್ಷಮತೆ ಹೆಚ್ಚಾಗುತ್ತದೆ. ಇದರಿಂದ ಜೀರ್ಣಕ್ರಿಯೆ ಸಹಜವಾಗಿಯೇ ಸುಧಾರಿಸುತ್ತದೆ. ಉತ್ತಮ ಜೀರ್ಣಕ್ರಿಯೆಯಿಂದ ಚಯಾಪಚಯ ಕ್ರಿಯೆ ಸುಸೂತ್ರವಾಗಿ ದೇಹದಲ್ಲಿನ ಹೆಚ್ಚುವರಿ ಕೊಬ್ಬು ನಿವಾರಣೆಗೆ ಇದು ಸಹಕಾರಿಯಾಗುತ್ತದೆ. ಜೀರ್ಣಕ್ರಿಯೆಯ ಎಂಝೈಮ್‌ಗಳನ್ನು ಉತ್ತೇಜಿಸುವ ಗುಣ ಹೊಂದಿರುವ ಜೀರಿಗೆ ಹೊಟ್ಟೆ ಉಬ್ಬರವನ್ನು ಕಡಿಮೆ ಮಾಡುತ್ತದೆ.

ಕೊಲೆಸ್ಟ್ರಾಲ್ ತಡೆಗಟ್ಟಲು ಸಹಕಾರಿ

ದೇಹದಲ್ಲಿ ಕೆಟ್ಟ ಕೊಲೆಸ್ಟ್ರಾಲ್ ಅಂಶ ಹೆಚ್ಚಾಗುವುದರಿಂದ ಹೃದಯ ಸಂಬಂಧಿ ಸಮಸ್ಯೆಗಳನ್ನು ಎದುರಿಸಬೇಕಾಗಬಹುದು. ಆದರೆ ಜೀರಿಗೆ ನೀರು ಸೇವನೆಯಿಂದ ಇಂಥ ಕೆಟ್ಟ ಕೊಲೆಸ್ಟ್ರಾಲ್ ಅಂಶಗಳನ್ನು ಹೋಗಲಾಡಿಸಬಹುದು. ಅಲ್ಲದೆ ದೇಹಕ್ಕೆ ಬೇಕಾದ ಉತ್ತಮ ಕೊಲೆಸ್ಟರಾಲ್ ಅಂಶಗಳ ಉತ್ಪಾದನೆಯನ್ನು ಜೀರಿಗೆ ಹೆಚ್ಚಿಸುತ್ತದೆ. ಇದರಿಂದ ಸೊಂಟದ ಸುತ್ತ ಶೇಖರವಾಗಿರುವ ಕೆಟ್ಟ ಫ್ಯಾಟ್ ಅನ್ನು ನಿವಾರಿಸಿ ಆರೋಗ್ಯವಂತರಾಗಲು ಸಹಾಯಕವಾಗುತ್ತದೆ.

ದೇಹದಲ್ಲಿ ವಿಷಕಾರಿ ಅಂಶಗಳ ನಿವಾರಣೆ

ನಾವು ಬದುಕುವ ಪರಿಸರದಲ್ಲಿ ಹಲವಾರು ಕಡೆ ವಿಷಕಾರಿ ಅಂಶಗಳು ಇದ್ದೇ ಇರುತ್ತವೆ. ಉಸಿರಾಡುವ ಗಾಳಿ, ಕುಳಿತುಕೊಳ್ಳುವ ಕುರ್ಚಿ ಅಥವಾ ಕೆಲಸದ ಮೇಜು ಹೀಗೆ ಎಲ್ಲಿ ಬೇಕಾದರೂ ಕೀಟಾಣುಗಳು ಇರಬಹುದು. ಅನಾರೋಗ್ಯಕರ ಜೀವನ ಶೈಲಿಯಿಂದ ಇಂಥ ವಿಷಕಾರಿ ಅಂಶಗಳು ದೇಹದಲ್ಲಿ ಶೇಖರಣೆಯಾಗುವ ಸಾಧ್ಯತೆಗಳಿರುತ್ತವೆ. ಈ ವಿಷಕಾರಿ ಅಂಶಗಳಿಂದ ಮಾನಸಿಕ ಒತ್ತಡ ಹೆಚ್ಚಾಗುತ್ತದೆ. ಜೊತೆಗೆ ಅಜೀರ್ಣತೆ ಉಂಟಾಗಿ ಬೇಡವಾದ ಕೊಬ್ಬಿನಂಶ ಹೆಚ್ಚಳವಾಗುತ್ತದೆ. ಆದರೆ ಜೀರಿಗೆಯ ನೀರು ಸೇವನೆಯಿಂದ ದೇಹದಲ್ಲಿನ ವಿಷಕಾರಿ ಅಂಶಗಳನ್ನು ಹೊರಹಾಕಿ ಆರೋಗ್ಯಕರ ಜೀವನ ನಮ್ಮದಾಗಿಸಿಕೊಳ್ಳಲು ಸಹಕಾರಿಯಾಗುತ್ತದೆ. ಜೀರಿಗೆ ಬಳಸಿ ತೂಕ ಇಳಿಸಿಕೊಳ್ಳುವ ಮತ್ತಷ್ಟು ವಿಧಾನಗಳು

ಮೊಸರಿನೊಂದಿಗೆ ಜೀರಿಗೆ

ತೂಕ ಇಳಿಸಿಕೊಳ್ಳುವಾಗ ಊಟದೊಂದಿಗೆ ಮೊಸರು ಸೇವಿಸುವಂತೆ ವೈದ್ಯರು ಸಲಹೆ ನೀಡುತ್ತಾರೆ. ಆದರೆ ಮೊಸರಿಗೆ ಒಂದು ಚಮಚ ಜೀರಿಗೆ ಪುಡಿಯನ್ನು ಸೇರಿಸಿ ಸೇವಿಸಿದರೆ ತೂಕ ಇಳಿಸಿಕೊಳ್ಳುವ ಪ್ರಕ್ರಿಯೆ ಇನ್ನೂ ಸುಲಭವಾಗುತ್ತದೆ.

ನಿಂಬೆ, ಶುಂಠಿ ಮತ್ತು ಜೀರಿಗೆ

ನಿಂಬೆ ಹಾಗೂ ಶುಂಠಿಗಳ ಸೇವನೆಯು ಸಹ ತೂಕ ಇಳಿಸಿಕೊಳ್ಳಲು ಸಹಕಾರಿಯಾಗಿದೆ. ತುರಿದ ಶುಂಠಿಯನ್ನು ಇತರ ತರಕಾರಿಗಳೊಂದಿಗೆ ಮಿಕ್ಸ್ ಮಾಡಿ ನೀರಲ್ಲಿ ಕುದಿಸಬೇಕು. ಇದಕ್ಕೆ ಒಂಚೂರು ಜೀರಿಗೆ ಪುಡಿಯನ್ನು ಹಾಕಿ ಕುಡಿದರೆ ದೇಹದ ತೂಕ ಕಡಿಮೆ ಮಾಡಿಕೊಳ್ಳಬಹುದು. ಇದನ್ನು ಮಧ್ಯಾಹ್ನ ಹಾಗೂ ರಾತ್ರಿ ಹೊತ್ತಿನ ಊಟದಲ್ಲಿ ಬಳಸಬಹುದು.

ಜೀರಿಗೆ ನಿಂಬೆ ನೀರು

ದೇಹದ ಬೊಜ್ಜು ಇಳಿಸಲು ಜೀರಿಗೆ ಹಾಗೂ ನಿಂಬೆ ನೀರು ಸೇವನೆ ಮತ್ತೊಂದು ಸುಲಭ ವಿಧಾನವಾಗಿದೆ. ಎರಡು ಟೇಬಲ್ ಚಮಚದಷ್ಟು ಜೀರಿಗೆ ಕಾಳುಗಳನ್ನು ರಾತ್ರಿ ನೀರಿಗೆ ಬೆರೆಸಿ ಇಡಬೇಕು. ಬೆಳಗ್ಗೆ ಈ ನೀರನ್ನು ಕುದಿಸಿ ಇದಕ್ಕೆ ಒಂದು ನಿಂಬೆ ಹಣ್ಣಿನ ರಸ ಸೇರಿಸಬೇಕು. ನಿತ್ಯ ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಈ ನಿಂಬೆ ಹಾಗೂ ಜೀರಿಗೆ ನೀರು ಸೇವಿಸುತ್ತಿದ್ದರೆ ಅತಿ ಶೀಘ್ರ ಆರೋಗ್ಯಕರ ಪರಿಣಾಮಗಳನ್ನು ನೀವು ಕಾಣಬಹುದು.