ವಿಶ್ವ ದೃಷ್ಟಿ ದಿನ- ಕಣ್ಣಿನ ಸುರಕ್ಷತೆಗಾಗಿ ಒಂದಿಷ್ಟು ಟಿಪ್ಸ್

ಕಣ್ಣುಗಳಿಗೆ ದಣಿವಾಗಲು ಪ್ರಮುಖ ಕಾರಣ

ಕಣ್ಣುಗಳಿಗೆ ದಣಿವಾಗಲು ಪ್ರಮುಖ ಕಾರಣಗಳೆಂದರೆ ಪರದೆಯ ಪ್ರಖರತೆ (brightness), ಅದರಿಂದ ಯಾವ ತರಹದ ಕಿರಣಗಳು ಸೂಸುತ್ತಿವೆ ಎಂಬುದು, ಕೋಣೆಯಲ್ಲಿರುವ ಬೆಳಕಿನ ಪ್ರಮಾಣ, ಬೆಳಕಿನ ಮೂಲ (ಬಲ್ಬ್ ಅಥವಾ ಟ್ಯೂಬ್ ಲೈಟ್) ಮತ್ತು ಗಾಳಿಯಲ್ಲಿರುವ ಧೂಳು ಅಥವಾ ಇತರ ಸೂಕ್ಷ್ಮ ಕಣಗಳು. ಸೂಕ್ತ ಆರೈಕೆ ಪಡೆದುಕೊಳ್ಳದೇ ಇದ್ದರೆ ಕಣ್ಣಿಗೆ ಸಂಬಂಧಿಸಿದ ತೊಂದರೆಗಳು ಎದುರಾಗುತ್ತಾ ಹೋಗುತ್ತವೆ. ಇದು ನಿಮ್ಮ ಕಾರ್ಯಕ್ಷಮತೆಯನ್ನು ಅಪಾರವಾಗಿ ಬಾಧಿಸುತ್ತದೆ. ಮುಂದಿನ ಸ್ಲೈಡ್ ಕ್ಲಿಕ್ ಮಾಡಿ

ಕಣ್ಣುಗಳಿಗೆ ದಣಿವಾಗಲು ಪ್ರಮುಖ ಕಾರಣ

ಕೆಲವರು ಕಣ್ಣುಗಳ ಬಗ್ಗೆ ಚಿಂತಿಸದೇ ತಮ್ಮ ಕೆಲಸದ ಬಗ್ಗೆ ಹೆಚ್ಚು ಚಿಂತಿಸುವ ಕಾರಣ ಅವರ ಕಣ್ಣುಗಳು ಕೆಂಪಗಾಗಿ ಅವರ ಕನ್ನಡಕದ ಸಂಖ್ಯೆ ವೇಗವಾಗಿ ಏರುಗತಿಯಲ್ಲಿ ಸಾಗುತ್ತದೆ. ಈ ಸ್ಥಿತಿಯಿಂದ ದೂರವಿರಲು ಹೆಚ್ಚಿನ ವಿವರಗಳನ್ನು ಈಗ ನೋಡೋಣ:

ಕೋಣೆಯಲ್ಲಿನ ಬೆಳಕಿನ ವ್ಯವಸ್ಥೆ

ನಿಮ್ಮ ಕೋಣೆಯ ಬೆಳಕಿನ ವ್ಯವಸ್ಥೆಯನ್ನು ಗಮನಿಸಿ. ನಿಮ್ಮ ಕಂಪ್ಯೂಟರ್ ಇರುವ ಕೋಣೆಯಲ್ಲಿ ಬೆಳಕು ಅತಿ ಹೆಚ್ಚೂ ಇರಬಾರದು, ಅತಿ ಕಡಿಮೆಯೂ ಇರಬಾರದು. ಅಲ್ಲದೇ ಬೆಳಕಿನ ಕಿರಣಗಳು ನಿಮ್ಮ ಕಣ್ಣುಗಳಿಗೆ ಬೇರೊಂದು ಕೋನದಿಂದ ನೇರವಾಗಿ ಬರದಂತಿರಬೇಕು. ಇದಕ್ಕಾಗಿ ಮಾರುಕಟ್ಟೆಯಲ್ಲಿ ಮೇಲ್ಛಾವಣಿಗೆ ಅಳವಡಿಸಲಾಗುವ ಟ್ಯೂಬ್ ಲೈಟುಗಳ ವ್ಯವಸ್ಥೆ ಲಭ್ಯವಿದೆ.

ಕೋಣೆಯಲ್ಲಿನ ಬೆಳಕಿನ ವ್ಯವಸ್ಥೆ

ಕೊಂಚ ದುಬಾರಿಯಾದರೂ ಇದು ಎಲ್ಲರ ಕಣ್ಣುಗಳಿಗೆ ಸುರಕ್ಷಿತವಾಗಿದೆ. ಈ ಕ್ಷೇತ್ರದಲ್ಲಿ ಪರಿಣಿತರ ಸಲಹೆ ಪಡೆಯುವುದು ಉತ್ತಮ. ಸಾಧ್ಯವಾದಷ್ಟು ಸೂರ್ಯನ ಬೆಳಕನ್ನು ಪಡೆಯಲು ಯತ್ನಿಸಿ. ಹಗಲಿನಲ್ಲಿ ಕೋಣೆಯೊಳಗೆ ಸಾಕಷ್ಟು ಸೂರ್ಯನ ಬೆಳಕಿರುವುದು ಕಣ್ಣುಗಳಿಗೆ ಉತ್ತಮವಾಗಿದೆ.

ದೀಪಗಳ ಆಯ್ಕೆ

ನಿಮ್ಮ ಕೋಣೆಯಲ್ಲಿ ಯಾವ ದೀಪಗಳನ್ನು ಬಳಸುತ್ತೀರಿ ಎಂಬುದೂ ಮುಖ್ಯ. ಹಳೆಯ ಹಳದಿ ಬಣ್ಣದ ಬಲ್ಬುಗಳಿದ್ದರೆ ಕೂಡಲೇ ಬದಲಿಸಿ. ಇದರ ಬದಲಿಗೆ ಬಿಳಿಯ ಬಣ್ಣದ ಟ್ಯೂಬ್ ಲೈಟ್ ಅಥವಾ ಸಿ ಎಫ್ ಎಲ್ ಗಳನ್ನು ಅಳವಡಿಸಿ. ಒಂದು ವೇಳೆ ಹಗಲು ಮಾತ್ರ ಉಪಯೋಗಿಸುವುದಾದರೆ warm white ಎಂದಿರುವ ಟ್ಯೂಬ್ ಲೈಟುಗಳನ್ನು ಆರಿಸಿ. ಸಂಜೆ ಮತ್ತು ರಾತ್ರಿಯ ವೇಳೆಗೂ ಉಪಯೋಗಿಸುವುದಾದರೆ cool day light ಎಂದಿರುವ ಟ್ಯೂಬ್ ಲೈಟುಗಳನ್ನು ಆರಿಸಿ. ಆದರೆ ಎರಡರಲ್ಲಿ warm white ಕಣ್ಣುಗಳಿಗೆ ಹೆಚ್ಚು ಸೂಕ್ತವಾಗಿದೆ.

ನಿಮ್ಮ ಮಾನಿಟರ್ ನ ಪ್ರಖರತೆಯನ್ನು ನಿಯಂತ್ರಿಸಿ

ಈಗ ಪ್ರತಿ ಮಾನಿಟರ್ ನಲ್ಲಿಯೂ ಪ್ರಖರತೆ (brightness)ಯನ್ನು ಬದಲಿಸುವ ಸುಲಭ ಬಟನ್ನುಗಳನ್ನು ಒದಗಿಸಲಾಗಿರುತ್ತದೆ. ಇದನ್ನು ಉಪಯೋಗಿಸಿ ನಿಮ್ಮ ಕೋಣೆಯ ಬೆಳಕಿಗೆ ಅನುಸಾರವಾಗಿ ಮಾನಿಟರ್ ನ ಪ್ರಖರತೆಯನ್ನು ನಿಯಂತ್ರಿಸಿ. ಇದು ನಿಮ್ಮ ಕಣ್ಣುಗಳಿಗೆ ಹೆಚ್ಚು ಶ್ರಮವಾಗದಂತೆ ನೋಡಿಕೊಳ್ಳುತ್ತದೆ.

ಕಣ್ಣುಗಳನ್ನು ಆಗಾಗ ಮುಚ್ಚಿಕೊಳ್ಳುತ್ತಿರಿ

ಪ್ರತಿ ಬಾರಿಯೂ ಕಣ್ಣುಗಳನ್ನು ಮುಚ್ಚಿಕೊಂಡಾಗ ತೆಳುವಾದ ದ್ರವವನ್ನು ಕಣ್ಣಿನ ಪಾಪೆಯ ಮೇಲೆ ಹರಡಿದಂತಾಗುತ್ತದೆ. ಇದರಿಂದ ಕಣ್ಣುಗಳು ಒಣಗುವುದು ತಪ್ಪುತ್ತದೆ. ಒಣಗಿದ ಕಣ್ಣು ಬೇಗನೇ ದಣಿಯುತ್ತದೆ ಹಾಗೂ ಉರಿಯುತ್ತದೆ. ನೆನಪಾದಾಗಲೆಲ್ಲಾ ಕಣ್ಣುಗಳನ್ನು ಮಿಟುಕಿಸುತ್ತಾ ಇರಿ.

ದೃಷ್ಟಿಯನ್ನು ಬೇರೆಡೆಗೆ ಹೊರಳಿಸಿ

ನೀವು ಎಷ್ಟೇ ವ್ಯಸ್ತರಿದ್ದರು ಕೆಲವು ಕ್ಷಣಗಳಿಗಾದರೂ ನಿಮ್ಮ ಚಿತ್ತವನ್ನು ಬೇರೆಡೆಗೆ ಹರಿಸುವುದು ಸಾಧ್ಯ. ಸದಾ ಮಾನಿಟರ್ ಕಡೆಗೇ ನೋಡುತ್ತಿರುವ ಬದಲು ನಿಮ್ಮ ದೃಷ್ಟಿಯನ್ನು ಬೇರೆಡೆಯೂ ಪ್ರತಿ ಹದಿನೈದು ನಿಮಿಷಗಳಿಗೊಮ್ಮೆ ಹೊರಳಿಸುತ್ತಿರಿ. ಇದು ಕಣ್ಣುಗಳಿಗೆ ಒಂದು ರೀತಿಯ ವ್ಯಾಯಾಮವೂ ಹೌದು. ಇದಕ್ಕಾಗಿ ಮೊದಲು ನಿಮ್ಮ ಮಾನಿಟರ್ ಗೆ ಸರಿಸಮಾನವಾದ ದೂರದಲ್ಲಿರುವ ವಸ್ತುವನ್ನು ಹತ್ತು ಸೆಕೆಂಡುಗಳ ಕಾಲ ದಿಟ್ಟಿಸಿ. (ನಿಮ್ಮ ಕುಟುಂಬದ ಚಿತ್ರ ಅಥವಾ ಮನೆದೇವರ ಪಟ ಯಾವುದೂ ಆಗಬಹುದು) ಬಳಿಕ ಸುಮಾರು ಹತ್ತು ಹದಿನೈದು ಅಡಿ ದೂರದಲ್ಲಿರುವ ವಸ್ತುವನ್ನು ಹತ್ತು ಸೆಕೆಂಡುಗಳ ಕಾಲ ದಿಟ್ಟಿಸಿ.

ದೃಷ್ಟಿಯನ್ನು ಬೇರೆಡೆಗೆ ಹೊರಳಿಸಿ

ನಂತರದ ಹತ್ತು ಸೆಕೆಂಡುಗಳ ಕಾಲ ಸುಮಾರು ಇಪ್ಪತ್ತು ಮೂವತ್ತು ಅಡಿ ದೂರದಲ್ಲಿರುವ ವಸ್ತುವನ್ನು ದಿಟ್ಟಿಸಿ. ನಂತರದ ಹತ್ತು ಸೆಕೆಂಡುಗಳ ಕಾಲ ಅತ್ಯಂತ ದೂರದಲ್ಲಿರುವ ವಸ್ತುವನ್ನು ನೋಡಲು ಯತ್ನಿಸಿ. ನಂತರ ಕೆಲವು ಸೆಕೆಂಡುಗಳ ಕಾಲ ಕಣ್ಣು ಮುಚ್ಚಿಕೊಂಡು ಬಳಿಕ ನಿಮ್ಮ ಕಾರ್ಯಕ್ಕೆ ಹಿಂದಿರುಗಿ.

ತೀಕ್ಷ್ಣಬೆಳಕಿನ ಪರದೆ ಬಳಸಿ

ಬೆಳಕಿನ ಕೆಲವು ಪ್ರಖರ ಕಿರಣಗಳ ಪ್ರಖರತೆಯನ್ನು ಕಡಿಮೆಗೊಳಿಸುವ ಪರದೆಗಳು (anti glare sheet) ಮಾರುಕಟ್ಟೆಯಲ್ಲಿ ದೊರಕುತ್ತವೆ. ಇದನ್ನು ನಿಮ್ಮ ಕಂಪ್ಯೂಟರ್ ಪರದೆಗೆ ಅಳವಡಿಸುವ ಮೂಲಕ ತೀಕ್ಷ್ಣ ಕಿರಣಗಳಿಂದ ರಕ್ಷಣೆ ಪಡೆಯಬಹುದು. ಪರ್ಯಾಯವಾಗಿ ಇದೇ ಕಾರ್ಯಕ್ಕೆ ಇರುವ ಕನ್ನಡಗಳನ್ನೂ ಬಳಸಬಹುದು ಅಥವಾ ನೀವು ಈಗಾಗಲೇ ಕನ್ನಡಕ ಬಳಸುತ್ತಿದ್ದರೆ ನಿಮ್ಮ ಕನ್ನಡದಕ ಗಾಜುಗಳಿಗೆಗೂ ಈ ವ್ಯವಸ್ಥೆ ಇರುವಂತೆ ನೋಡಿಕೊಳ್ಳಬಹುದು.

ಆಗಾಗ ವಿರಾಮ ಪಡೆದುಕೊಳ್ಳುತ್ತಿರಿ

ನೀವೆಷ್ಟೇ ವ್ಯಸ್ತರಿದ್ದರೂ ನಿಮ್ಮ ಆರೋಗ್ಯ ಅದಕ್ಕಿಂತ ಮುಖ್ಯವಾಗಿದೆ. ಯಾವುದಾದರೂ ನೆಪ ಮಾಡಿಕೊಂಡು ಆಗಾಗ ಒಂದೆರಡು ನಿಮಿಷಗಳಿಗಾದರೂ ನಿಮ್ಮ ಕಾರ್ಯಸ್ಥಳದಿಂದ ಹೊರಬನ್ನಿ. (ಇದಕ್ಕೆ ಸಿಗರೇಟಿನ ನೆವ ಸರ್ವಥಾ ಬೇಡ) ಅಲ್ಲದೇ ಒಂದೇ ಬಾರಿ ಸತತವಾಗಿ ಹಲವು ಘಂಟೆ ಕೆಲಸ ಮಾಡಬೇಡಿ. ಟೀವಿಯಲ್ಲಿ ನಿರೂಪಕರು ನಡುನಡುವೆ ಬ್ರೇಕ್ ತೆಗೆದುಕೊಳ್ಳುವುದು ಏಕೆಂದು ಈಗ ಅರ್ಥವಾಯಿತೇ?

ಕಣ್ಣುಗಳನ್ನು ಆಗಾಗ ತಪಾಸಣೆಗೊಳಪಡಿಸಿ

ನಿಮ್ಮ ನೇತ್ರತಜ್ಞರ ಬಳಿ ನಿಯಮಿತವಾಗಿ ಭೇಟಿ ನೀಡಿ ಕಣ್ಣುಗಳನ್ನು ಪರೀಕ್ಷಿಸಿಕೊಳ್ಳುತ್ತಿರಿ ಮತ್ತು ವೈದ್ಯರ ಸಲಹೆಯ ಪ್ರಕಾರವೇ ಕನ್ನಡಕ ಮತ್ತು ಇತರ ಸೂಚನೆಗಳನ್ನು ಪಾಲಿಸಿ. ಒಂದು ವೇಳೆ ಕಂಪ್ಯೂಟರ್ ಪರದೆಯ ವಿಕಿರಣ ಬಾಧಿಸಿದ್ದರೆ ವೈದ್ಯರು ಖಂಡಿತಾ ಗಮನಿಸುತ್ತಾರೆ. ಒಂದು ವೇಳೆ ಹೌದು ಎಂದಾದರೆ ಮುಂದೆ ಅತಿ ಹೆಚ್ಚಿನ ಕಾಳಜಿ ವಹಿಸುವುದು ಅಗತ್ಯ.

ಗುಣಮಟ್ಟದ ಮಾನಿಟರ್ ಬದಲಿಸಿ

ಕೆಲವರ್ಷಗಳ ಹಿಂದಿನ ಸಿಆರ್ ಟಿ (cathode ray Tube) ಮಾನಿಟರ್ ಅಥವಾ ಚಪ್ಪಟೆ ಮಾನಿಟರ್ ಹೆಚ್ಚಿನ ವಿಕಿರಣ ಸೂಸುತ್ತಿದ್ದಲ್ಲಿ ಯಾವುದೇ ಮುಲಾಜಿಗೆ ಒಳಗಾಗದೇ ಇವನ್ನು ಮೂಲೆಗೆ ತಳ್ಳಿ ಆಧುನಿಕ ಮತ್ತು ಅತಿ ಕಡಿಮೆ ವಿಕಿರಣವಿರುವ ಎಲ್.ಇ.ಡಿ ಪರದೆಯ ಮಾನಿಟರುಗಳನ್ನು ಖರೀದಿಸಿ. ಇದು ನಿಮ್ಮ ಕಣ್ಣುಗಳಿಗೆ ಅತಿ ಕಡಿಮೆ ಶ್ರಮ ನೀಡುತ್ತದೆ ಮತ್ತು ಆರೋಗ್ಯವನ್ನು ಕಾಪಾಡುತ್ತದೆ.