ಹೈ ಬ್ಲಡ್ ಫ್ರೆಶರ್ ಸಮಸ್ಯೆ ಬಾರದಂತೆ ತಡೆಯಬೇಕೆ?

1. ನಿಮ್ಮ ತೂಕ ನಿಮ್ಮ ನಿಯಂತ್ರಣ

ನಿಮ್ಮ ದೇಹದ ಅತೀಯಾದ ದೇಹದ ತೂಕ, ಅಧಿಕ ರಕ್ತದೊತ್ತಡದಂತಹ ತೊಂದರೆಗಳಿಗೆ ಪ್ರಾಥಮಿಕ ಕಾರಣ! ಈ ಸಮಸ್ಯೆಯಿಂದ ದೂರವುಳಿಯಬೇಕಾದರೆ ವ್ಯಾಯಾಮ, ಆಹಾರಗಳ ಮೂಲಕ ನಿಮ್ಮ ದೇಹ ತೂಕವನ್ನು ನಿಯಂತ್ರಿಸಿಕೊಳ್ಳಿ. ಇದು ನಿಮ್ಮ ದೇಹದ ಸಂಪೂರ್ಣ ಆರೋಗ್ಯವನ್ನು ಕಾಯ್ದುಕೊಳ್ಳಲೂ ಸಹ ಸಹಾಯಕವಾಗುತ್ತದೆ.

2. ಒತ್ತಡ ಮಟ್ಟದ ನಿಯಂತ್ರಣ

ಅಧಿಕ ರಕ್ತದೊತ್ತಡಕ್ಕೆ ಇನ್ನೊಂದು ಮೂಲ ಕಾರಣ, ನಿಮ್ಮಲ್ಲಿನ ಒತ್ತಡ! ಆದ್ದರಿಂದ ನಿಮ್ಮ ದೈಹಿಕ ಹಾಗೂ ಮಾನಸಿಕ ಒತ್ತಡವನ್ನು ನಿಯಂತ್ರಿಸಲು ಇಂದೇ ಕ್ರಮ ತೆಗೆದುಕೊಳ್ಳಿ. ಯೋಗ, ಧ್ಯಾನ, ಸಂಗೀತ, ಮಸಾಜ್ ಮೊದಲಾದವು ನಿಮ್ಮ ಒತ್ತಡವನ್ನು ನಿಯಂತ್ರಿಸಲು ಪರಿಣಾಮಕಾರಿ ವಿಧಾನಗಳಾಗಿವೆ.

3. ಕಡಿಮೆ ಉಪ್ಪು ಬಳಕೆ

ವಯಸ್ಸಿನ ಒಂದು ಹಂತದಲ್ಲಿ ಕಡಿಮೆ ಪ್ರಮಾಣದಲ್ಲಿ ಉಪ್ಪನ್ನು ಸೇವಿಸುವುದೂ ಸಹ ಅತ್ಯಂತ ಅಗತ್ಯ. ಉಪ್ಪು ಮತ್ತು ಸೋಡಿಯಂ ಗಳು ರಕ್ತದೊತ್ತಡವನ್ನು ಹೆಚ್ಚಿಸುತ್ತವೆ. ಆದ್ದರಿಂದ ಅತ್ಯಂತ ಮಿತವಾಗಿ ಉಪ್ಪನ್ನು ಸೇವಿಸುವುದು ನಿಮ್ಮ ಆರೋಗ್ಯಕ್ಕೆ ಅಕ್ಷರಶಃ ಒಳ್ಳೆಯದು.

4. ಮದ್ಯಪಾನದಲ್ಲಿ ಮಿತಿಯಿರಲಿ

ಮಿತ ಪ್ರಮಾಣದ ಆಲ್ಕೋಹಾಲ್ / ಮದ್ಯಪಾನ ಆರೋಗ್ಯಕ್ಕೆ ಒಳ್ಳೆಯದು ಎಂದು ಹೇಳಲಾಗುತ್ತದೆ. ಆದರೆ ಇದು ಅತಿಯಾದರೆ ರಕ್ತದೊತ್ತಡದ ಮಟ್ಟ ಅತೀಯಾಗಿ ಹೆಚ್ಚಾಗುತ್ತದೆ. ಅಲ್ಲದೇ ಲಿವರ್ ಹಾನಿ ಹಾಗೂ ಮಿದುಳಿನ ತೊಂದರೆಗಳನ್ನೂ ಸಹ ಇದರಿಂದ ಎದುರಿಸಬೇಕಾಗುತ್ತದೆ! ನಿಮ್ಮ ಮದ್ಯಪಾನದ ಹವ್ಯಾಸದಿಂದ ದೂರವಿದ್ದಷ್ಟೂ ನಿಮ್ಮ ಆಯಸ್ಸು ಗಟ್ಟಿಯಾಗುತ್ತಾ ಹೋಗುತ್ತದೆ!

5. ಹಣ್ಣುಗಳು ಮತ್ತು ತರಕಾರಿಗಳು

ತಾಜಾ ಹಣ್ಣುಗಳು ಮತ್ತು ತರಕಾರಿಗಳನ್ನು ದಿನವೂ ನಿಮ್ಮ ಆಹಾರದ ಒಂದು ಭಾಗವಾಗಿ ಸೇವಿಸಿದರೆ ಸರಿಯಾದ ಪ್ರಮಾಣದಲ್ಲಿ ಪೊಟ್ಯಾಶೀಯಂ ಅಂಶ ನಿಮ್ಮ ದೇಹವನ್ನು ಸೇರುತ್ತದೆ. ಇದು ಸದಾ ಅಧಿಕ ರಕ್ತದೊತ್ತಡದ ಸಮಸ್ಯೆಯಿಂದ ನಿಮ್ಮನ್ನು ದೂರವಿಡುತ್ತದೆ. ಆದ್ದರಿಂದ ದಿನವೂ ನೀವು ಸೇವಿಸುವ ಆಹಾರ ಹಣ್ಣುಗಳು ಮತ್ತು ತರಕಾರಿಗಳಿಂದ ಕೂಡಿರಲಿ!

6. ಕ್ರೀಯಾಶೀಲರಾಗಿರಿ

ನಿಮ್ಮನ್ನು ನೀವು ಆರೋಗ್ಯಕರವಾಗಿಟ್ಟುಕೊಳ್ಳಲು ನಿಮ್ಮ ದೈಹಿಕ ಸಕ್ರಿಯತೆ, ಕ್ರೀಯಾಶೀಲತೆ ಅತ್ಯಂತ ಅಗತ್ಯ. ನಿಮ್ಮ ಚಿಕ್ಕ ಚಿಕ್ಕ ಅಗತ್ಯಗಳಿಗೂ ಬೇರೆಯವರನ್ನು ಅವಲಂಬಿಸದೇ ನಿಮ್ಮ ಕಾರ್ಯವನ್ನು ಸದಾ ನೀವೇ ಮಾಡಿಕೊಂಡು ಕ್ರೀಯಾಶೀಲರಾಗಿದ್ದರೆ ಅಧಿಕ ರಕ್ತದೊತ್ತಡದಂತಹ ಸಮಸ್ಯೆಯನ್ನು ಸಾಕಷ್ಟು ದೂರವಿಡಬಹುದು.

7. ಧೂಮಪಾನ ಸಲ್ಲದು

ಮಧ್ಯಪಾನದಂತೆ ಧೂಮಪಾನ ಮಾಡುವುದೂ ಸಹ ಆರೋಗ್ಯದ ದೃಷ್ಟಿಯಿಂದ ಕಿಂಚಿತ್ತೂ ಒಳ್ಳೆಯದಲ್ಲ! ಧೂಮಪಾನವನ್ನು ನಿರಂತರವಾಗಿ ಮಾಡುವುದರಿಂದ ಅಧಿಕ ರಕ್ತದೊತ್ತಡದಂತಹ ಹಲವಾರು ಸಮಸ್ಯೆಗೆ ಕಾರಣವಾಗುತ್ತದೆ. ಕ್ಯಾನ್ಸರ್, ಪಾರ್ಶ್ವವಾಯು ಹಾಗೂ ಇನ್ನೂ ಅನೇಕ ಸಮಸ್ಯೆಗಳು ಇದರಿಂದ ಉದ್ಭವಿಸುತ್ತವೆ. ಆದ್ದರಿಂದ ನಿಮ್ಮ ಆರೋಗ್ಯವನ್ನು ಕಾಯ್ದುಕೊಳ್ಳಲು ಧೂಮಪಾನದಿಂದ ದೂರವಿದ್ದರೆ ಮಾತ್ರ ಸಾಧ್ಯ!

8. ನಿರಂತರ ತಪಾಸಣೆ

ಆಗಾಗ ನಿಮ್ಮ ಕುಟುಂಬ ವೈದ್ಯರಿಗೆ ನಿಮ್ಮ ದೇಹ ಪ್ರಕೃತಿಯನ್ನು ತೋರಿಸಿ ತಪಾಸಣೆ ಮಾಡಿಸಿಕೊಳ್ಳುವುದು ಅತ್ಯಂತ ಒಳ್ಳೆಯದು. ಪ್ರಜ್ಞಾಪೂರ್ವಕ ಜೀವನ ವಿಧಾನ ಆರೋಗ್ಯಕರ ಜೀವನವನ್ನು ನಿಮ್ಮದಾಗಿಸುತ್ತದೆ. ನಿಮ್ಮ ದಿನನಿತ್ಯದ ಆಹಾರ ಸೇವನೆಯಲ್ಲಾಗಲಿ ಅಥವಾ ಯಾವುದೇ ವಿಷಯಗಳಲ್ಲಾಗಲೀ ಸಣ್ಣ ಬದಲಾವಣೆಗಳಾದರೂ ಅದು ನಿಮ್ಮ ಆರೋಗ್ಯದ ಮೇಲೆ ಪರಿಣಾಮ ಬೀರಬಹುದು. ಆದ್ದರಿಂದ ನಿಮ್ಮ ಆರೋಗ್ಯದ ದೃಷ್ಟಿಯಿಂದ ಆಗಾಗ್ಗೆ ಸಾಮಾನ್ಯ ತಪಾಸಣೆಗೆ ಒಳಗಾಗುವುದು ಅತ್ಯಂತ ಸೂಕ್ತ.

ಯಾವುದೇ ಖಾಯಿಲೆ - ಕಸಾಲೆಗಳು ಇದೇ ವಯಸ್ಸಿಗೆ ಬರುತ್ತವೆ ಎನ್ನಲಾಗುವುದಿಲ್ಲ. ಬಾಲ್ಯಾವಸ್ಥೆಯಿಂದ ಹಿಡಿದು ಯೌವ್ವನಾವಸ್ಥೆಯಲ್ಲಿಯೂ ಕೂಡ ಹಲವಾರು ಆರೋಗ್ಯದ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು ಆದ್ದರಿಂದ ಇವೆಲ್ಲದರ ಮುಂಜಾಗ್ರತಾ ಕ್ರಮವಾಗಿ ನಿಮ್ಮ ಆರೋಗ್ಯದ ಮೇಲೆ ನಿಮಗೆ ಸದಾ ಗಮನವಿರುವುದು ಅತ್ಯಗತ್ಯ.