ಮಹಿಳೆಯರು ಎದುರಿಸುತ್ತಿರುವ 5 ಪ್ರಮುಖ ಕಾಯಿಲೆಗಳು

Wellness

oi-Reena

By Hema S

Published: Tuesday, March 20, 2012, 11:49 [IST]

ಹೆಚ್ಚಿನ ಮಹಿಳೆಯರು ಮನೆ, ಮಕ್ಕಳು ಅಂತ ಜಂಜಾಟದಲ್ಲಿ ತಮ್ಮ ಆರೋಗ್ಯದ ಬಗ್ಗೆ ಗಮನ ಹರಿಸುವುದಿಲ್ಲ. ಸಣ್ಣ-ಪುಟ್ಟ ಕಾಯಿಲೆಗಳಿಗೆ ಮೆಡಿಕಲ್ ಶಾಪ್ ಗಳಿಂದ ಮದ್ದು ತಂದು ತಿನ್ನುತ್ತಾರೆ ವಿನಾಃ ವೈದ್ಯರನ್ನು ಸಂಪರ್ಕಿಸುವವರು ತುಂಬಾ ವಿರಳ. ಆದ್ದರಿಂದಲೆ ಮಧ್ಯ ವಯಸ್ಸು ದಾಟಿದ ಮಹಿಳೆಯರಲ್ಲಿ ಕಾಯಿಲೆಗಳು ಹೆಚ್ಚಾಗಿ ಕಂಡು ಬರುತ್ತಿದೆ.

ಈ ಕೆಳಗೆ ಮಹಿಳೆಯರಲ್ಲಿ ಸಾಮಾನ್ಯವಾಗಿ ಕಾಣಿಸಿಕೊಳ್ಳುವ ಕಾಯಿಲೆಗಳ ಪಟ್ಟಿ ಮಾಡಲಾಗಿದೆ. ಇವುಗಳ ಬಗ್ಗೆ ಮುನ್ನೆಚ್ಚರಿಕೆ ವಹಿಸಿದರೆ ಈ ಕಾಯಿಲೆಗಳನ್ನು ಸುಲಭದಲ್ಲಿ ನಿವಾರಿಸಬಹುದು.

1. ಮೂಳೆ ಸವೆತ: ಹೆಚ್ಚಿನ ಮಹಿಳೆಯರಲ್ಲಿ ಈ ರೀತಿಯ ಸಮಸ್ಯೆ ಕಂಡು ಬರುತ್ತದೆ. ಅದಕ್ಕೆ ಕಾರಣ ಕ್ಯಾಲ್ಸಿಯಂ ಕೊರತೆ. ಹೆರಿಗೆ ಸಮಯದಲ್ಲಿ ಹೆಚ್ಚಿನ ಕ್ಯಾಲ್ಸಿಯಂ ನಷ್ಟವಾಗುತ್ತದೆ. ಆದ್ದರಿಂದ ಬಾಣಂತಿಯಲ್ಲಿ ಉತ್ತಮ ರೀತಿಯ ಆರೈಕೆ ಬೇಕು. ಆದರೆ ಬಡತನ, ಕೆಲಸದ ಒತ್ತಡ ಇವುಗಳಿಂದ ಸಾಕಷ್ಟು ಜನರಿಗೆ ಈ ಸಮಯದಲ್ಲಿ ಉತ್ತಮ ಪೋಷಕಾಂಶ ತೆಗೆದುಕೊಳ್ಳುವುದು ಸಾದ್ಯವಾಗಿರುವುದಿಲ್ಲ. ಇದರಿಂದಾಗಿ ಮಧ್ಯ ವಯಸ್ಸು ದಾಟುತ್ತಿದ್ದ ಹಾಗೆ ಮೂಳೆ ಸವೆತ, ಕೈ ಕಾಲುಗಳ ಗಂಟುಗಳಲ್ಲಿ ನೋವು ಕಾಣಿಸಿಕೊಳ್ಳುತ್ತದೆ.

2. ಹೃದಯಾಘಾತ: ದೇಹದಲ್ಲಿ ಅಧಿಕ ಕೊಲೆಸ್ಟ್ರಾಲ್ ಹೆಚ್ಚಾಗಿದ್ದರೆ, ಅನಾರೋಗ್ಯಕರ ಜೀವನ ಶೈಲಿ, ವ್ಯಾಯಾಮದೆಡೆಗೆ ನಿರ್ಲಕ್ಷ್ಯ ಇವುಗಳಿಂದಾಗಿ ಹೃದಯಾಘಾತ ಪ್ರಮಾಣ ಇತ್ತೀಚಿಗೆ ಹೆಚ್ಚಾಗುತ್ತಿದೆ.

3. ಖಿನ್ನತೆ: ಮಧ್ಯ ವಯಸ್ಸಿನ ಮಹಿಳೆಯರಲ್ಲಿ ಈ ರೀತಿಯ ಖಿನ್ನತೆ ಹೆಚ್ಚಾಗಿ ಕಂಡು ಬರುತ್ತದೆ. ಈ ಸಮಯದಲ್ಲಿ ಅವರು ತುಂಬಾ ಮಂಕಾಗಿ ಇರುತ್ತಾರೆ. ಯಾರೂ ನಮ್ಮನ್ನು ನೋಡಿ ಕೊಳ್ಳುತ್ತಿಲ್ಲ, ಮಕ್ಕಳು ಪ್ರೀತಿ ತೋರುತ್ತಿಲ್ಲ ಎಂದು ಅನಾವಶ್ಯಕವಾಗಿ ಬೇಸರ ಪಟ್ಟುಕೊಳ್ಳುತ್ತಾರೆ. ಈ ಸಮಯದಲ್ಲಿ ಇವರಿಗೆ ಕೌನ್ಸಿಲಿಂಗ್ ಕೊಡಿಸಿ. ಗಂಡ ಮಕ್ಕಳು ಪ್ರೀತಿ ಮಹಿಳೆಯರನ್ನು ಸಮಸ್ಯೆಯಿಂದ ಹೊರಬರಲು ಸಹಾಯಮಾಡುತ್ತದೆ.

4. ಸ್ತನ ಮತ್ತು ಗರ್ಭಕೋಶದ ಕ್ಯಾನ್ಸರ್: ಸ್ತನ ಕ್ಯಾನ್ಸರ್ ಪ್ರಮಾಣ ಹೆಚ್ಚುತ್ತಿದೆ. ಎಲ್ಲಾ ವಯಸ್ಸಿನ ಮಹಿಳೆಯರು ಸ್ವತಃ ಸ್ತನ ಪರೀಕ್ಷೆ ಮಾಡುತ್ತಿರಬೇಕು. ಆ ಭಾಗದಲ್ಲಿ ಗೆಡ್ಡೆಗಳು ಗೋಚರವಾದರೆ ಕೂಡಲೇ ವೈದ್ಯರನ್ನು ಸಂಪರ್ಕಿಸಬೇಕು. ಏಕೆಂದರೆ ಸ್ತನ ಕ್ಯಾನ್ಸರ್ ಮೊದಲ ಹಂತದಲ್ಲಿದ್ದರೆ ಚಿಕಿತ್ಸೆಯಿಂದ ಸುಲಭವಾಗಿ ಗುಣಪಡಿಸಬಹುದು.

5. ಅನಿಯಮಿತ ಮುಟ್ಟು: ಸಾಕಷ್ಟು ಸ್ತ್ರೀಯರಲ್ಲಿ ಕಂಡು ಬರುವ ಸಮಸ್ಯೆಯಾಗಿದೆ. ಅದಕ್ಕೆ ಕಾರಣ ಅನಾರೋಗ್ಯಕರ ಜೀವನ ಶೈಲಿ ಅಥವಾ ಪೋಷಕಾಂಶವಿರುವ ಆಹಾರಗಳ ಕೊರತೆ. ಈ ರೀತಿಯ ಸಮಸ್ಯೆ ಇದ್ದರೆ ನಿರ್ಲಕ್ಷ್ಯ ತೋರದೆ ವೈದ್ಯರನ್ನು ಸಂಪರ್ಕಿಸುವುದು ಒಳ್ಳೆಯದು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.