ನಿದ್ದೆ ಹೊಡೆದದ್ದು ಸಾಕು ಏಳ್ರಿ, ಹೋಗ್ಬೇಕು ಹೊತ್ತಾಯ್ತು

ರಜಾ ದಿನದಂದು ಸೂರ್ಯ ನೆತ್ತಿಯವರೆಗೆ ಬರುವರೆಗೆ ಹೊದ್ದುಕೊಂಡು ಮಲಗುವುದು ಕೆಲವರಿಗೆ ಪಂಚಪ್ರಾಣ. ಆಫೀಸ್ ಗೆ ಹೊತ್ತಾಯಿತು, ಬಾಸ್ ಬೈಯ್ಯುತ್ತಾರೆ ಎಂಬ ಯಾವುದೇ ಚಿಂತೆ ಇಲ್ಲದೆ ನಿದ್ದೆ ಮಾಡಿ ಅಬ್ಬಾ! ಎಷ್ಟು ನಿದ್ದೆ ಮಾಡಿದೆ ಎಂದು ಸಂತೋಷಪಡುತ್ತೇವೆ. ಆದರೆ ಮರುದಿನ ಶರೀರದಲ್ಲಿ ತುಂಬಾ ಆಲಸ್ಯ, ಕೆಲಸ ಮಾಡಲು ಸೋಮಾರಿತನ ಉಂಟಾಗುತ್ತದೆ.

ಅಷ್ಟು ನಿದ್ದೆ ಮಾಡಿ ಸುಸ್ತು ಕಾಣಿಸಿಕೊಂಡಾಗ ದೇಹಕ್ಕೆ ವಿಶ್ರಾಂತಿ ಸಾಕಾಗಲಿಲ್ಲ ಎಂದು ಭಾವಿಸಿದರೆ ತಪ್ಪು. ಏಕೆಂದರೆ ಈ ರೀತಿಯ ತಲೆನೋವು ತುಂಬಾ ಹೊತ್ತು ನಿದ್ದೆ ಮಾಡುವುದರಿಂದ ಉಂಟಾಗುತ್ತದೆ. ಇದು ಸ್ವಲ್ಪ ಆಲ್ಕೋಹಾಲ್ ಕುಡಿದು ಮಲಗಿ ಬೆಳಗ್ಗೆ ಏಳುವಾಗ ಕಾಣಿಸಿಕೊಳ್ಳುವ ತಲೆನೋವಿನ ಹಾಗೆ ತಲೆನೋವು ಕಾಣಿಸಿಕೊಳ್ಳುತ್ತದೆ.

ಅತಿ ನಿದ್ದೆಯಿಂದ ತಲೆನೋವು ಉಂಟಾಗಲು ಕಾರಣ:

1. ಆಮ್ಲಜನಕದ ಕೊರತೆ: ನಿದ್ದೆಯಲ್ಲಿ ಒಮ್ಮೆ ಉಸಿರಾಡುವಾಗ ಮಧ್ಯೆ -ಮಧ್ಯೆ ಸ್ವಲ್ಪ ಹೊತ್ತು ನಿಲ್ಲಿಸಿ ನಂತರ ಉಸಿರಾಡುವುದರಿಂದ ದೇಹದಲ್ಲಿ ಆಮ್ಲಜನಕದ ಪ್ರಮಾಣ ಕಡಿಮೆಯಾದಾಗ ತಲೆನೋವು ಕಾಣಿಸಿಕೊಳ್ಳುತ್ತದೆ.

2. ಒತ್ತಡ: ನಿದ್ದೆ ಮಾಡುವಾಗ ದುಃಖ ಅಥವಾ ಒತ್ತಡವನ್ನು ಮರೆಯಬಹುದು ಎಂದು ಕೆಲವರು ಹೆಚ್ಚು ಹೊತ್ತು ನಿದ್ದೆ ಮಾಡುತ್ತಾರೆ. ಈ ರೀತಿ ನಿದ್ದೆ ಮಾಡಿದಾಗ ದೈಹಿಕ ಚಟುವಟಿಕೆಗಳು ಕಡಿಮೆಯಾಗಿ ಅದರ ಜೊತೆಗೆ ಮನದಲ್ಲಿರುವ ಒತ್ತಡ ಎಲ್ಲಾ ಸೇರಿ ಕುತ್ತಿಗೆ ನೋವು, ತಲೆನೋವು ಕಾಣಿಸಿಕೊಳ್ಳುತ್ತದೆ.

ನಿದ್ದೆ ತರುವ ತಲೆನೋವನ್ನು ಹೋಗಲಾಡಿಸುವ ವಿಧಾನ:

1. ಮನುಷ್ಯ ಆರೋಗ್ಯವಾಗಿರಲು ಮತ್ತು ಚಟುವಟಿಕೆಯಿಂದರಲು (ಗರಿಷ್ಠ) 8 ಗಂಟೆ ನಿದ್ದೆ ಸಾಕು. ಆದ್ದರಿಂದ ಇದಕ್ಕಿಂತ ಹೆಚ್ಚಾಗಿ ನಿದ್ದೆ ಮಾಡಬಾರದು.

2.ಮಧ್ಯಾಹ್ನ 2-3 ಗಂಟೆ ನಿದ್ದೆ ಮಾಡುವ ಅಭ್ಯಾಸವನ್ನು ಬಿಡಬೇಕು. ಕೆಫೀನ್, ಮದ್ಯ ಮತ್ತು ತುಂಬಾ ಖಾರದ ಪದಾರ್ಥಗಳನ್ನು ನಿದ್ದೆ ಮಾಡುವ ಮುಂಚೆ ಸೇವಿಸಬಾರದು.

3. ಹಾಸಿಗೆ ಮತ್ತು ದಿಂಬನ್ನು ಶುದ್ಧವಾಗಿ ಇಟ್ಟುಕೊಳ್ಳಬೇಕು. ಮಂಚದಲ್ಲಿಯೆ ಕುಳಿತು ಊಟ ಮಾಡುವುದಾಗಲಿ, ಲ್ಯಾಪ್ ಟಾಪ್ ಸೊಟ್ಟಾಪಟ್ಟಾ ಇಟ್ಟುಕೊಂಡು ಕೆಲಸ ಮಾಡುವುದಾಗಲಿ ಮಾಡಬಾರದು.

4.ನಿದ್ದೆ ಮಾಡುವ ಮುಂಚೆ ಹಾಡುಗಳನ್ನು ಕೇಳುವುದು ಅಥವಾ ಧ್ಯಾನವನ್ನು ಮಾಡುವುದು ಒಳ್ಳೆಯದು.

ಇನ್ನು ಮುಂದೆ ಸೋಮಾರಿಗಳಾಗಿ ತುಂಬಾ ಹೊತ್ತು ನಿದ್ದೆ ಮಾಡಿ ತಲೆನೋವು ಬರೆಸಿಕೊಳ್ಳುವ ಬದಲು 6-8 ಗಂಟೆ ನಿದ್ದೆ ಮಾಡಿ ಚಟುವಟಿಕೆಯಿಂದ ಇರಿ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.