ದೇಹದಲ್ಲಿ ನೀರಿನ ಕೊರತೆ ತಲೆನೋವು ತರಬಹುದಂತೆ!

Wellness

oi-Sumalatha

By Sumalatha

Published: Friday, November 18, 2011, 12:16 [IST]

ತಲೆನೋವು ಬರೋದಕ್ಕೆ ಅನೇಕ ಕಾರಣಗಳುಂಟು. ಆಹಾರ ಕ್ರಮದ ಬದಲಾವಣೆ, ನಿದ್ದೆ, ಒತ್ತಡ, ಕೆಲಸ, ಊಟ ಬಿಡುವುದು, ಕುಡಿತ, ಕತ್ತಲೆ ಕೋಣೆಯಲ್ಲಿ ಟಿವಿ ನೋಡುವುದು, ಕಂಪ್ಯೂಟರ್ ವೀಕ್ಷಣೆ ಇವೆಲ್ಲವೂ ತಲೆ ನೋವಿಗೆ ಸಾಮಾನ್ಯ ಕಾರಣ.

ಆದರೆ ಇವೆಲ್ಲದರ ಹೊರತಾಗಿ ತಲೆ ನೋವಿಗೆ ಇನ್ನೊಂದು ಮುಖ್ಯ ಕಾರಣವೂ ಇದೆ. ದೇಹದಲ್ಲಿ ನೀರಿನ ಕೊರತೆಯಾದರೆ ತಲೆ ನೋವು ಬರಲು ಕಾರಣವಾಗುತ್ತದೆ. ಆಮ್ಲಜನಕದ ನಂತರ ದೇಹಕ್ಕೆ ಅತಿ ಅಗತ್ಯವಿರುವ ಅಂಶ ನೀರು. ಕನಿಷ್ಠ 2 ತಿಂಗಳು ಆಹಾರವಿಲ್ಲದೆ ಇರಬಹುದು, ಆದರೆ ನೀರಿಲ್ಲದೆ ಕೆಲವು ದಿನಗಳೂ ಕೂಡ ಬದುಕಲು ಸಾಧ್ಯವಿಲ್ಲ.

ಆದರೆ ಹಲವರಿಗೆ ದೇಹ ಸರಿಯಾಗಿ ಕಾರ್ಯ ನಿರ್ವಹಿಸಲು ಎಷ್ಟು ನೀರಿನ ಅವಶ್ಯಕತೆ ಎಂಬುದರ ಬಗ್ಗೆ ಅರಿವಿರುವುದಿಲ್ಲ. ಈ ಬಗ್ಗೆ ಹೆಚ್ಚು ತಲೆ ಕೆಡಿಸಿಕೊಳ್ಳದ ಸಂದರ್ಭದಲ್ಲಿಯೇ ಉಂಟಾಗುವುದು ತಲೆನೋವಿನ ಸಮಸ್ಯೆ.

ನಿರ್ಜಲೀಕರಣವೆಂದರೆ ದೇಹದಲ್ಲಿ ನೀರು ಮತ್ತು ಸೋಡಿಯಂ, ಕ್ಲೋರೈಡ್, ಪೊಟಾಶಿಯಂ ಮುಂತಾದ ಅವಶ್ಯಕ ಅಂಶಗಳು ಕಡಿಮೆಗೊಳ್ಳುತ್ತಿರುವುದರ ಸಂಕೇತ. ದೇಹಕ್ಕೆ ಅಗತ್ಯವಿದ್ದಷ್ಟು ನೀರು ದೊರಕದಿರುವುದೇ ಇದಕ್ಕೆ ಕಾರಣ.

ತಲೆನೋವು ಅನಾರೋಗ್ಯಕರವಲ್ಲ, ಆದರೆ ಆರೋಗ್ಯದಲ್ಲಿ ಏನೋ ವ್ಯತ್ಯಾಸಗೊಂಡಿರುವುದನ್ನು ತೋರ್ಪಡಿಸುವ ವಿಧಾನವೇ ತಲೆನೋವು. ದೇಹಕ್ಕೆ ನೀರಿನಂಶ ಬೇಕೆಂದಾಗ ದಾಹವೇ ಆಗಬೇಕೆಂದೇನಿಲ್ಲ. ಅದು ತಲೆನೋವಿನ ಮೂಲಕವು ವ್ಯಕ್ತಗೊಳ್ಳಬಹುದು. ಆದ್ದರಿಂದ ನೀರಿನ ಸೇವನೆ ಹೆಚ್ಚಿದ್ದಷ್ಟೂ ಒಳ್ಳೆಯದು. ದಿನಕ್ಕೆ 8 ರಿಂದ 10 ಲೋಟ ನೀರು ಸೇವನೆ ಅತ್ಯವಶ್ಯಕ. ಅದರಲ್ಲೂ ತಲೆನೋವು ಆಗಾಗ್ಗೆ ಕಾಡುತ್ತಿದ್ದರೆ ನೀರನ್ನು ಹೆಚ್ಚು ಕುಡಿಯಲು ಆರಂಭಿಸಿ. ಇದು ಬೇಗನೆ ಕೆಲಸ ಮಾಡುತ್ತದೆ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.