ಮುಂಬೈನಲ್ಲಿ ಬಿಸಿಲಿನ ಅಬ್ಬರ: ಯೆಲ್ಲೋ ಅಲರ್ಟ್ ಘೋಷಣೆ, ಆರೋಗ್ಯ ಕಾಪಾಡಿಕೊಳ್ಳಲು ಈ ಕ್ರಮಗಳನ್ನು ತಪ್ಪದೇ ಪಾಲಿಸಿ

ಮುಂಬೈ ಮತ್ತು ಠಾಣೆಯಲ್ಲಿ ಅಕ್ಟೋಬರ್ 16ರವರೆಗೆ ಭಾರತೀಯ ಹವಾಮಾನ ಇಲಾಖೆ (IMD) 'ಯೆಲ್ಲೋ ಅಲರ್ಟ್' ಘೋಷಿಸಿದೆ. ಅದರಲ್ಲೂ ಅಕ್ಟೋಬರ್ 15ರ ಗುರುವಾರ ತಾಪಮಾನವು 37ರಿಂದ 38 ಡಿಗ್ರಿ ಸೆಲ್ಸಿಯಸ್‌ಗೆ ಏರುವ ಸಾಧ್ಯತೆಯಿದ್ದು, ವಿಪರೀತ ಸೆಖೆ ಮತ್ತು ಉರಿಬಿಸಿಲು ಇರಲಿದೆ. ಹೀಗಾಗಿ ಆಫೀಸ್‌ಗೆ ಹೋಗುವವರು ಹಾಗೂ ಮಕ್ಕಳನ್ನು ಶಾಲೆಗೆ ಕಳುಹಿಸುವಾಗ ಕೊಂಚ ಎಚ್ಚರ ವಹಿಸುವುದು ಒಳಿತು. ಮಧ್ಯಾಹ್ನ 12ರಿಂದ 3 ಗಂಟೆಯವರೆಗೆ ಬಿಸಿಲಿನ ತಾಪ ಹೆಚ್ಚಿರಲಿದ್ದು, ಮನೆಮಂದಿಯೆಲ್ಲಾ ಹೆಚ್ಚು ನೀರು ಕುಡಿಯುವುದು ಮತ್ತು ಬೇಗ ಹಾಳಾಗದ ಆಹಾರ ಸೇವಿಸುವುದಕ್ಕೆ ಆದ್ಯತೆ ನೀಡಬೇಕು.

ಹೆಚ್ಚು ಬೆವರುವುದರಿಂದ ದೇಹದಲ್ಲಿ ನೀರಿನಾಂಶ ಕಡಿಮೆಯಾದರೆ, ವಿಶೇಷವಾಗಿ ಮಕ್ಕಳು ಮತ್ತು ಹಿರಿಯರಿಗೆ 'ಒಆರ್‌ಎಸ್' (ORS) ನೀಡುವುದು ಅಗತ್ಯ. ವಿಶ್ವ ಆರೋಗ್ಯ ಸಂಸ್ಥೆಯ (WHO) ಫಾರ್ಮುಲಾದಲ್ಲಿರುವ ಒಆರ್‌ಎಸ್ ದೇಹದಲ್ಲಿ ಸೋಡಿಯಂ ಮತ್ತು ಪೊಟ್ಯಾಶಿಯಂ ಪ್ರಮಾಣವನ್ನು ಸರಿದೂಗಿಸುತ್ತದೆ. ಒಆರ್‌ಎಸ್ ಪ್ಯಾಕೆಟ್ ಇಲ್ಲದಿದ್ದರೆ ಮನೆಯಲ್ಲೇ ತಯಾರಿಸಿಕೊಳ್ಳಬಹುದು. ಇದರ ಜೊತೆಗೆ ಮಜ್ಜಿಗೆ, ಎಳೆನೀರು ಅಥವಾ ಸಕ್ಕರೆ ರಹಿತ ಸತ್ತು ಶರಬತ್ ಕುಡಿಯುವುದು ಒಳ್ಳೆಯದು. ಆದರೆ ಎನರ್ಜಿ ಡ್ರಿಂಕ್ಸ್, ಮದ್ಯ ಮತ್ತು ಅತಿಯಾದ ಕೆಫೀನ್ ಸೇವನೆಯಿಂದ ದೂರವಿರಿ; ಇವು ದೇಹದಲ್ಲಿ ನೀರಿನಾಂಶವನ್ನು ಮತ್ತಷ್ಟು ಕಡಿಮೆ ಮಾಡುತ್ತವೆ.

ಮುಂಬೈ ತಾಪಮಾನ ಹೆಚ್ಚಳ: ಯಾವ ಪಾನೀಯ ಸೂಕ್ತ? ಒಆರ್‌ಎಸ್ ಬಳಕೆ ಹೇಗೆ? ಇಲ್ಲಿದೆ ಮಾಹಿತಿ

ನವರಾತ್ರಿ ಉಪವಾಸ ಮಾಡುವವರು ಮನೆ ಬಿಡುವ ಮುನ್ನವೇ ಸಾಕಷ್ಟು ನೀರು ಕುಡಿಯುವುದು ಒಳಿತು. ನಿಂಬೆ-ಉಪ್ಪಿನ ನೀರು ಅಥವಾ ಹುರಿದ ಜೀರಿಗೆ ಹಾಕಿದ ಮಜ್ಜಿಗೆ ಕುಡಿಯುವುದು ದೇಹಕ್ಕೆ ತಂಪು ನೀಡುತ್ತದೆ. ಇನ್ನು ಮಧುಮೇಹಿಗಳು (ಶುಗರ್ ಇದ್ದವರು) ಸಕ್ಕರೆ ಬೆರೆಸಿದ ಪಾನೀಯಗಳು ಮತ್ತು ಫ್ರೂಟ್ ಜ್ಯೂಸ್‌ಗಳಿಂದ ದೂರವಿರಬೇಕು. ಬದಲಿಗೆ ಸಕ್ಕರೆ ರಹಿತ ಮಜ್ಜಿಗೆ, ಎಳೆನೀರು ಅಥವಾ ಇನ್‌ಫ್ಯೂಸ್ಡ್ ವಾಟರ್ ಅನ್ನು ಕಡಿಮೆ ಪ್ರಮಾಣದಲ್ಲಿ ಕುಡಿಯಬಹುದು. ಜತೆಗೆ ಇಂತಹ ಬಿಸಿಲಿನ ದಿನಗಳಲ್ಲಿ ಆಗಾಗ್ಗೆ ಬ್ಲಡ್ ಶುಗರ್ ಲೆವೆಲ್ ತಪಾಸಣೆ ಮಾಡಿಕೊಳ್ಳುವುದು ಮುಖ್ಯ.

ಬಿಸಿಲಿಗೆ ಹಾಳಾಗದಂತೆ ಟಿಫಿನ್ ಪ್ಯಾಕ್ ಮಾಡುವುದು ಹೇಗೆ? ಇಲ್ಲಿದೆ ಟಿಪ್ಸ್

ಮಧ್ಯಾಹ್ನದ ಊಟಕ್ಕೆ ಬೇಗ ಹಾಳಾಗದ ಚಿತ್ರಾನ್ನ, ಖಾರಪೌಡಿಯೊಂದಿಗೆ ಇಡ್ಲಿ ಅಥವಾ ಮೆಂತೆ ಥೇಪ್ಲಾಗಳನ್ನು ಪ್ಯಾಕ್ ಮಾಡಿ. ಬಿಸಿ ಆಹಾರವನ್ನು ಪೂರ್ತಿಯಾಗಿ ತಣ್ಣಗಾಗಿಸಿದ ನಂತರವೇ ಡಬ್ಬಿ ಮುಚ್ಚಿ. 5°C ನಿಂದ 60°C ತಾಪಮಾನದ ನಡುವೆ ಆಹಾರ ಬೇಗ ಹಾಳಾಗುವುದರಿಂದ ಜಾಗ್ರತೆ ವಹಿಸಿ. ಫ್ರಿಡ್ಜ್‌ನಲ್ಲಿ ಇಡಲು ಸಾಧ್ಯವಾಗದಿದ್ದರೆ ಮಯೋನೈಸ್, ಮೊಸರನ್ನ ಮತ್ತು ಹೆಚ್ಚಿದ ಹಣ್ಣುಗಳನ್ನು ಕೊಂಡೊಯ್ಯಬೇಡಿ. ಹೊರಗಡೆ ತಿನ್ನುವುದಾದರೆ, ಮುಚ್ಚಿಟ್ಟ ಶುಚಿ-ರುಚಿಯಾದ ಆಹಾರ ಮತ್ತು ಶುದ್ಧ ನೀರು ಬಳಸುವ ಅಂಗಡಿಗಳನ್ನೇ ಆಯ್ಕೆ ಮಾಡಿ.

ತೀವ್ರ ತಲೆನೋವು, ಗೊಂದಲ, ತಲೆತಿರುಗಿ ಬೀಳುವುದು, ಒಣ ಚರ್ಮ ಅಥವಾ ಸ್ನಾಯು ಸೆಳೆತ ಕಾಣಿಸಿಕೊಂಡರೆ ತಕ್ಷಣ ವೈದ್ಯಕೀಯ ನೆರವು ಪಡೆಯಿರಿ. ಅಂತಹ ಸಂದರ್ಭದಲ್ಲಿ ತಕ್ಷಣ ನೆರಳಿಗೆ ತೆರಳಿ, ಒಆರ್‌ಎಸ್ ನೀರು ಕುಡಿದು ದೇಹದ ತಾಪಮಾನ ಕಡಿಮೆ ಮಾಡಿಕೊಳ್ಳಿ. ಮುಂಬೈ ಮತ್ತು ಠಾಣೆಯಲ್ಲಿ ಅಕ್ಟೋಬರ್ 16ರವರೆಗೆ 'ಯೆಲ್ಲೋ ಅಲರ್ಟ್' ಮುಂದುವರಿಯುವುದರಿಂದ ನಿತ್ಯ IMD ಅಪ್‌ಡೇಟ್‌ಗಳನ್ನು ಗಮನಿಸಿ. ಅತಿಯಾದ ಬಿಸಿಲಿರುವ ಸಮಯದಲ್ಲಿ ಹೊರಗೆ ಹೋಗುವುದನ್ನು ತಪ್ಪಿಸಿ, ಕೆಲಸಗಳನ್ನು ಬೆಳಿಗ್ಗೆ ಅಥವಾ ಸಂಜೆ ವೇಳೆ ಯೋಜಿಸಿಕೊಳ್ಳಿ. ಮನೆಗಳಲ್ಲಿ ಮಕ್ಕಳು ಮತ್ತು ಹಿರಿಯರ ಆರೋಗ್ಯದ ಬಗ್ಗೆ ವಿಶೇಷ ನಿಗಾ ವಹಿಸಿ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.