ಅಡುಗೆ ಮನೆಯ ಉಪ್ಪಿನಲ್ಲಿ ಅಯೋಡಿನ್ ಇದೆಯೇ? ಥೈರಾಯ್ಡ್ ಆರೋಗ್ಯಕ್ಕೆ ಈ ತಪ್ಪು ಮಾಡಬೇಡಿ!

ಇಂದು (ಅಕ್ಟೋಬರ್ 21) ‘ಜಾಗತಿಕ ಅಯೋಡಿನ್ ಕೊರತೆ ತಡೆ ದಿನ’. ಥೈರಾಯ್ಡ್ ಆರೋಗ್ಯದಲ್ಲಿ ಅಯೋಡಿನ್ ವಹಿಸುವ ಪ್ರಮುಖ ಪಾತ್ರದ ಬಗ್ಗೆ ಈ ದಿನ ಜಾಗೃತಿ ಮೂಡಿಸುತ್ತದೆ. ಭಾರತದಲ್ಲಿ ಅಯೋಡಿನ್ ಕೊರತೆಯ ಪ್ರಮಾಣ ಗಣನೀಯವಾಗಿ ಕಡಿಮೆಯಾಗಿದ್ದರೂ, ಕೆಲವು ಪ್ರದೇಶಗಳಲ್ಲಿ ಇಂದಿಗೂ ಈ ಸಮಸ್ಯೆ ಎದ್ದು ಕಾಣುತ್ತಿದೆ. ಹಾಗಾದರೆ, ನಿತ್ಯದ ಅಡುಗೆಗೆ ಯಾವ ಉಪ್ಪು ಸೂಕ್ತ? ಸರಿಯಾದ ಪೌಷ್ಟಿಕಾಂಶ ಪಡೆಯುವುದು ಹೇಗೆ? ಭಾರತೀಯ ಮನೆಗಳಿಗೆ ಅಗತ್ಯವಿರುವ ಈ ಪ್ರಶ್ನೆಗಳಿಗೆ ಪ್ರಸ್ತುತ ನಿಯಮಗಳು ಮತ್ತು ಸರಳ ಸಲಹೆಗಳೊಂದಿಗೆ ಉತ್ತರ ಇಲ್ಲಿದೆ.

ಮೊದಲು ನಿಮ್ಮ ಮನೆಯ ಉಪ್ಪಿನ ಜಾರ್‌ನಿಂದಲೇ ಶುರು ಮಾಡೋಣ. ಭಾರತೀಯ ಮಾನದಂಡಗಳ ಪ್ರಕಾರ, ಉಪ್ಪು ಪ್ಯಾಕಿಂಗ್ ಮಾಡುವಾಗ ಕನಿಷ್ಠ 30 ppm ಮತ್ತು ಚಿಲ್ಲರೆ ಮಾರಾಟದ ಹಂತದಲ್ಲಿ 15 ppm ಅಯೋಡಿನ್ ಇರಲೇಬೇಕು. ಕಲ್ಲುಪ್ಪು, ಪಿಂಕ್ ಸಾಲ್ಟ್ ಅಥವಾ ಸಮುದ್ರದ ಉಪ್ಪಿನಲ್ಲಿ ಅಯೋಡಿನ್ ಸೇರಿಸದಿದ್ದರೆ (ಫೋರ್ಟಿಫೈ ಮಾಡದಿದ್ದರೆ), ಅವುಗಳಲ್ಲಿ ಅಯೋಡಿನ್ ಪ್ರಮಾಣ ತೀರಾ ಕಡಿಮೆ ಇರುತ್ತದೆ ಅಥವಾ ಇರುವುದೇ ಇಲ್ಲ. ಬಣ್ಣ ಅಥವಾ ವಿನ್ಯಾಸವನ್ನು ನೋಡಿ ಪೌಷ್ಟಿಕಾಂಶವನ್ನು ತೀರ್ಮಾನಿಸಬೇಡಿ. ಜೊತೆಗೆ ಕಾವು ಮತ್ತು ತೇವಾಂಶದಿಂದ ಉಪ್ಪಿನಲ್ಲಿರುವ ಅಯೋಡಿನ್ ಬೇಗನೆ ಕಡಿಮೆಯಾಗುತ್ತದೆ, ಹಾಗಾಗಿ ಅದನ್ನು ಸರಿಯಾಗಿ ಶೇಖರಿಸಿಡುವುದು ಬಹಳ ಮುಖ್ಯ.

ಅಯೋಡಿನ್ ಉಪ್ಪಿನ ಲೇಬಲ್ ಪರೀಕ್ಷೆ ಮತ್ತು ಶೇಖರಣೆ ಹೇಗೆ?

ಅಂಗಡಿಯಲ್ಲಿ ಉಪ್ಪು ಕೊಳ್ಳುವಾಗ ಪ್ಯಾಕೆಟ್ ಮುಂಭಾಗದಲ್ಲಿ "iodised salt" ಅಥವಾ "fortified with iodine" ಎಂದು ಬರೆದಿರುವುದನ್ನು ಗಮನಿಸಿ. ಪ್ಯಾಕೆಟ್ ಹಿಂತಿರುಗಿಸಿ FSSAI ಲೋಗೋ, 14 ಅಂಕಿಯ ಲೈಸೆನ್ಸ್ ಸಂಖ್ಯೆ, ಪ್ಯಾಕ್ ಮಾಡಿದ ದಿನಾಂಕ ಮತ್ತು ಶೇಖರಣಾ ಸೂಚನೆಗಳನ್ನು ಪರಿಶೀಲಿಸಿ; ಇವು ಉಪ್ಪಿನ ಗುಣಮಟ್ಟವನ್ನು ಖಾತರಿಪಡಿಸುತ್ತವೆ. ಪದಾರ್ಥಗಳ ಪಟ್ಟಿಯಲ್ಲಿ ಸಾಮಾನ್ಯವಾಗಿ ಪೊಟ್ಯಾಸಿಯಮ್ ಅಯೋಡೇಟ್ (KIO3) ಇರುತ್ತದೆ. ಉಪ್ಪಿನಲ್ಲಿರುವ ಅಯೋಡಿನ್ ಸಾಮರ್ಥ್ಯ ಕುಂದದಿರಲು ಅದನ್ನು ಗಾಳಿಯಾಡದ, ಒಣಗಿದ ಡಬ್ಬಿಯಲ್ಲಿಟ್ಟು, ಗ್ಯಾಸ್ ಸ್ಟೌವ್‌ನಿಂದ ದೂರವಿಡಿ.

ಥೈರಾಯ್ಡ್‌ಗೆ ಸುರಕ್ಷಿತ ಆಹಾರ ಮತ್ತು ಕಲ್ಲುಪ್ಪಿನ ಗೊಂದಲಗಳು

ನಮ್ಮ ದೇಹಕ್ಕೆ ದಿನನಿತ್ಯ ಬೇಕಾಗುವ ಅಯೋಡಿನ್ ಪ್ರಮಾಣ ತೀರಾ ಸರಳವಾಗಿದೆ: ಹಿರಿಯರಿಗೆ 150 ಮೈಕ್ರೋಗ್ರಾಂ, ಮಕ್ಕಳಿಗೆ 90–120 ಮೈಕ್ರೋಗ್ರಾಂ ಹಾಗೂ ಗರ್ಭಿಣಿಯರು ಮತ್ತು ಬಾಣಂತಿಯರಿಗೆ 250 ಮೈಕ್ರೋಗ್ರಾಂ. ಹಾಲು, ಮೊಸರು, ಮೊಟ್ಟೆ, ಮೀನು ಮತ್ತು ದಿನನಿತ್ಯ ಅಯೋಡಿನ್‌ಯುಕ್ತ ಉಪ್ಪು ಬಳಸುವುದರಿಂದ ಈ ಅಗತ್ಯವನ್ನು ಸುಲಭವಾಗಿ ಪೂರೈಸಿಕೊಳ್ಳಬಹುದು. ಅಯೋಡಿನ್ ಉಪ್ಪು ಹಾಕಿದ ಮೊಸರನ್ನ, ಮೊಟ್ಟೆ ಸಾಂಬಾರ್ ಅಥವಾ ವಾರಕ್ಕೊಮ್ಮೆ ಮಾಡುವ ಮೀನು ಸಾರು ದಕ್ಷಿಣ ಭಾರತೀಯರಿಗೆ ಸುಲಭ ಹಾಗೂ ಜೇಬಿಗೂ ಹೊರೆಯಾಗದ ಉತ್ತಮ ಆಯ್ಕೆಗಳು. ಆದರೆ ಥೈರಾಯ್ಡ್ ಸಮಸ್ಯೆ ಇರುವವರು, ಎಮಿಯೋಡರಾನ್ (amiodarone) ಔಷಧ ತೆಗೆದುಕೊಳ್ಳುತ್ತಿರುವವರು ಅಥವಾ ಸೋಡಿಯಂ ಪ್ರಮಾಣ ಕಡಿಮೆ ಮಾಡಬೇಕಿರುವವರು ಮೊದಲು ವೈದ್ಯರ ಸಲಹೆ ಪಡೆಯುವುದು ಒಳಿತು.

ಉಪ್ಪಿನ ಪರೀಕ್ಷಾ ಕಿಟ್‌ಗಳು ಮತ್ತು ಅಂಗಡಿಯಲ್ಲಿ ಖರೀದಿಸುವಾಗ ವಹಿಸಬೇಕಾದ ಎಚ್ಚರ

ರ್ಯಾಪಿಡ್ ಅಯೋಡಿನ್ ಟೆಸ್ಟ್ ಕಿಟ್‌ಗಳು ಉಪ್ಪಿನಲ್ಲಿ ಸರಿಯಾದ ಪ್ರಮಾಣದ ಅಯೋಡಿನ್ ಇದ್ದರೆ ತಿಳಿ ನೀಲಿ ಅಥವಾ ನೇರಳೆ (ವಯೊಲೆಟ್) ಬಣ್ಣಕ್ಕೆ ತಿರುಗುತ್ತವೆ. ಇವು ಉಪ್ಪಿನಲ್ಲಿ ಅಯೋಡಿನ್ ಇರುವುದನ್ನು ಖಚಿತಪಡಿಸುತ್ತವೆಯೇ ಹೊರತು ಖಚಿತ ppm ಪ್ರಮಾಣವನ್ನಲ್ಲ. ಅಂಗಡಿಗಳಲ್ಲಿ ಸ್ಪಷ್ಟವಾಗಿ ಲೇಬಲ್ ಇರುವ ಅಯೋಡಿನ್ ಉಪ್ಪನ್ನೇ ಕೇಳಿ ಪಡೆಯಿರಿ, ಲೇಬಲ್ ಇಲ್ಲದ ಬಿಡಿ ಉಪ್ಪನ್ನು ಖರೀದಿಸಬೇಡಿ. ಭಾರತದ ಸಾಲ್ಟ್ ಕಮಿಷನರ್ ಸರಳ ಸ್ಪಾಟ್-ಟೆಸ್ಟಿಂಗ್ ಅನ್ನು ಉತ್ತೇಜಿಸುತ್ತಿದ್ದರೆ, ಯುನೆಸೆಫ್ (UNICEF) ಮತ್ತು FSSAI ನ 'ರಾಫ್ಟ್' (RAFT) ಉಪಕ್ರಮವು ಜಾಗೃತಿ ಅಭಿಯಾನಗಳಿಗಾಗಿ ಇಂತಹ ಕಿಟ್‌ಗಳಿಗೆ ಬೆಂಬಲ ನೀಡುತ್ತಿವೆ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.