ಕೋವಿಡ್ 19 ಚಿಕಿತ್ಸೆ ಬಳಿಕ ನೀವು ಮಾಡಲೇಬೇಕಾದ ಕಾರ್ಯಗಳಿವು

ವಿಶ್ರಾಂತಿ ತೆಗೆದುಕೊಳ್ಳಿ

ಕೋವಿಡ್ ವರದಿ ನೆಗೆಟಿವ್ ಬಂತು ಅಂತ ನಿಮ್ಮ ಕೆಲಸ ಕಾರ್ಯಗಳಿಗೆ ಮರಳಬೇಡಿ. ನಿಮ್ಮ ದೇಹ ದಣಿದಿರುತ್ತದೆ, ಅದಕ್ಕೆ ವಿಶ್ರಾಂತಿಯ ಅವಶ್ಯಕತೆ ಇದೆ. ನಿಮ್ಮ ದಿನನಿತ್ಯದ ಕೆಲಸ ಕಾರ್ಯಗಳನ್ನು ನಿಧಾನಕ್ಕೆ ಪ್ರಾರಂಭಿಸಿ. ಮೊದಲಿಗೆ ಚೆನ್ನಾಗಿ ವಿಶ್ರಾಂತಿ ತೆಗೆದುಕೊಳ್ಳಿ. ನೀವು ವಿಶ್ರಾಂತಿ ತೆಗೆದುಕೊಂಡಷ್ಟೂ ದೇಹ ಬೇಗ ಚೇರಿಸಿಕೊಳ್ಳುತ್ತದೆ.

ನಿಮ್ಮ ಮೆದುಳು ಚುರುಕಾಗಿಸುವ ಆಟಗಳನ್ನು ಆಡಿ

ಚುಟುಕು, ಪದಬಂಧ ಮುಂತಾದ ಆಟಗಳನ್ನು ಆಡಿ, ಇವೆಲ್ಲಾ ನಿಮ್ಮ ಮೆದುಳನ್ನು ಚುರುಕುಗೊಳಿಸುತ್ತದೆ. ಹೀಗೆ ಮಾಡುವುದರಿಂದ ನೆನಪಿನ ಶಕ್ತಿ, ಏಕಾಗ್ರತೆ ಇವುಗಳನ್ನು ಮರಳಿ ಪಡೆಯಬಹುದು, ಅಲ್ಲದೆ ಇಂಥ ಆಟಗಳು ಮನಸ್ಸಿಗೆ ಖುಷಿ ಕೊಡುವುದರಿಂದ ಸೋಂಕು ತಗುಲಿದಾಗ ಮನಸ್ಸಿಗೆ ಕಾಡಿದ ಭಯ, ಖಿನ್ನತೆ ದೂರವಾಗುವುದು.

ದೇಹದಲ್ಲಿ ಏನಾದರೂ ಬದಲಾವಣೆ ಉಂಟಾಗುತ್ತದೆಯೇ ಗಮನಿಸಿ

ಆಗಾಗ ತಲೆನೋವು ಉಂಟಾಗುವುದು, ಉಸಿರಾಟಕ್ಕೆ ತೊಂದರೆ ಕಾಣಿಸಿದರೆ ನಿಮ್ಮ ದೇಹ ಸಂಪೂರ್ಣ ಚೇತರಿಸಿಕೊಂಡಿಲ್ಲ ಎಂಬ ಸೂಚನೆಯಾಗಿದೆ. ಈ ಸಂದರ್ಭದಲ್ಲಿ ವೈದ್ಯರಿಗೆ ಕರೆ ಮಾಡಿ ಸೂಕ್ತ ಸಲಹೆ ಸೂಚನೆಗಳನ್ನು ಪಡೆದುಕೊಳ್ಳಿ.

ದೀರ್ಘಕಾಲಿಕ ಸಮಸ್ಯೆಗಳಿದ್ದರೆ ಔಷಧಿ ಮುಂದುವರೆಸಿ

ಮಧುಮೇಹ, ರಕ್ತದೊತ್ತಡ ಮುಂತಾದ ಸಮಸ್ಯೆಯಿದ್ದರೆ ಔಷಧಿಯನ್ನು ಮುಂದುವರೆಸಿ, ಅಲ್ಲದೆ ಡೋಸೇಜ್ ಬಗ್ಗೆ ತಿಳಿದುಕೊಳ್ಳಲು ನಿಮ್ಮ ವೈದ್ಯರ ಸಲಹೆ ಕೇಳಿ.

ಕೊರೊನಾವೈರಸ್‌ ಮತ್ತೆ ಮರುಕಳಿಸದಂತೆ ಎಚ್ಚರವಹಿಸಿ

ಕೊರೊನಾವೈರಸ್‌ ಸೋಂಕು ತಗುಲಿ ಚೇತರಿಸಿಕೊಂಡ ಅನೇಕರಲ್ಲಿ ಮತ್ತೆ ಸೋಂಕು ಕಾಣಿಸಿಕೊಂಡಿದೆ. ಹಾಗಾಗಿ ಕೋವಿಡ್‌ 19ನಿಂದ ಗುಣಮುಖರಾದರೂ ಮತ್ತೆ ಆ ಸೋಂಕು ಬಾರದಿರಲು ಸಾರ್ವಜನಿಕ ಸ್ಥಳಗಳಿಗೆ ಹೋಗುವಾಗ ಮಾಸ್ಕ್ ಧರಿಸಿ, ಕೈಗಳಿಗೆ ಸ್ಯಾನಿಟೈಸರ್ ಹಚ್ಚಿ ಹಾಗೂ ಸಾಮಾಜಿಕ ಅಂತರ ಕಾಯ್ದುಕೊಳ್ಳಿ.

ಚೇರಿಸಿಕೊಳ್ಳುವುದೇ ನಿಮ್ಮ ಪ್ರಮುಖ ಕೆಲಸ

ಕೋವಿಡ್ 19 ಸೋಂಕಿನಿಂದ ಗುಣಮುಖರಾಗಿ ಮನೆಗೆ ಬಂದ ಮೇಲೆ ಕೆಲವು ವಾರಗಳ ಕಾಲ ನಿಮ್ಮ ಆರೋಗ್ಯದ ಕಡೆ ಸಂಪೂರ್ಣ ಗಮನ ನೀಡಿ. ಆರೋಗ್ಯಕರ ಆಹಾರ ಸೇವಿಸಿ, ಚೆನ್ನಾಗಿ ನಿದ್ದೆ ಮಾಡಿ. ಉಳಿದ ಕಾರ್ಯಗಳ ಬಗ್ಗೆ ತಲೆ ಕೆಡಿಸಿಕೊಳ್ಳಬೇಡಿ, ಅವುಗಳೆನ್ನೆಲ್ಲಾ ನಿಧಾನಕ್ಕೆ ಮಾಡಬಹುದು.