ಹಬ್ಬದ ಅಡುಗೆಗೆ ನಕಲಿ ತುಪ್ಪದ ಆತಂಕ: ಶುದ್ಧ ತುಪ್ಪ ಖರೀದಿಸಲು ಈ ಸರಳ ಟಿಪ್ಸ್ ಪಾಲಿಸಿ

ಹಬ್ಬದ ದಿನಗಳಲ್ಲಿ ಅಡುಗೆಯ ಸಿದ್ಧತೆಗಳು ಬಿರುಸಿನಿಂದ ಸಾಗಿರುವ ಬೆನ್ನಲ್ಲೇ, ಮಾರುಕಟ್ಟೆಯಲ್ಲಿ ನಕಲಿ ಮತ್ತು ಕಳಪೆ ತುಪ್ಪದ ಹಾವಳಿ ಮತ್ತೆ ಸದ್ದು ಮಾಡುತ್ತಿದೆ. ದೆಹಲಿಯಲ್ಲಿ ಇತ್ತೀಚೆಗೆ ನಡೆದ ತಪಾಸಣೆಗಳು ಗ್ರಾಹಕರಲ್ಲಿ ಆತಂಕ ಮೂಡಿಸಿವೆ. ಕಳೆದ ಜೂನ್‌ನಲ್ಲಿ ಎಫ್‌ಎಸ್‌ಎಸ್‌ಎಐ (FSSAI) ದೆಹಲಿ ಮತ್ತು ಹರಿಯಾಣದಲ್ಲಿ ಬೃಹತ್ ಜಾಲವನ್ನು ಭೇದಿಸಿ, 6,500 ಲೀಟರ್‌ಗೂ ಹೆಚ್ಚು ನಕಲಿ ತುಪ್ಪವನ್ನು ಜಪ್ತಿ ಮಾಡಿತ್ತು. ನಿನ್ನೆಯಷ್ಟೇ ನವರಾತ್ರಿ ಕಾರ್ಯಾಚರಣೆಯ ವೇಳೆ ಲೇಬಲ್ ನಿಯಮಗಳನ್ನು ಉಲ್ಲಂಘಿಸಿದ್ದಕ್ಕಾಗಿ ನೋಯ್ಡಾ ಅಧಿಕಾರಿಗಳು 240 ಲೀಟರ್ ತುಪ್ಪವನ್ನು ವಶಪಡಿಸಿಕೊಂಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಎಫ್‌ಎಸ್‌ಎಸ್‌ಎಐ ಕಟ್ಟುನಿಟ್ಟಿನ ಸೂಚನೆ ನೀಡಿದ್ದು, ಗ್ರಾಹಕರು ತುಪ್ಪ ಖರೀದಿಸುವ ಮುನ್ನ ಲೇಬಲ್ ಪರೀಕ್ಷಿಸುವುದನ್ನು ಕಡ್ಡಾಯಗೊಳಿಸಿಕೊಳ್ಳಬೇಕಿದೆ.

ತುಪ್ಪದ ಪ್ಯಾಕೆಟ್ ಖರೀದಿಸುವಾಗ ಮೊದಲಿಗೆ ಅದರ ಮೇಲಿರುವ FSSAI ಲೋಗೋ ಮತ್ತು 14 ಅಂಕಿಗಳ ಲೈಸೆನ್ಸ್ ಸಂಖ್ಯೆಯನ್ನು ಪರಿಶೀಲಿಸಿ. ಅದರೊಂದಿಗೆ ಬ್ಯಾಚ್ ಅಥವಾ ಲಾಟ್ ಸಂಖ್ಯೆ, ಪ್ಯಾಕಿಂಗ್ ದಿನಾಂಕ, 'ಬೆಸ್ಟ್ ಬಿಫೋರ್' ದಿನಾಂಕ ಮತ್ತು ತಯಾರಕರ ವಿವರಗಳು ಸರಿಯಾಗಿವೆಯೇ ಎಂದು ಖಚಿತಪಡಿಸಿಕೊಳ್ಳಿ. '2024ರ ಗೀ ಗ್ರೇಡಿಂಗ್ ನಿಯಮಾವಳಿ' ಅಡಿಯಲ್ಲಿ ನೀಡಲಾಗುವ ಅಗ್‌ಮಾರ್ಕ್ (AGMARK) ಕಡ್ಡಾಯವಲ್ಲವಾದರೂ, ಅದು ಗುಣಮಟ್ಟದ ಖಾತರಿ ನೀಡುತ್ತದೆ. ನೀವು ಶುದ್ಧ ತುಪ್ಪವನ್ನೇ ಖರೀದಿಸಲು ಬಯಸಿದರೆ, ಲೇಬಲ್‌ನಲ್ಲಿ 'ಬ್ಲೆಂಡೆಡ್ ಎಡಿಬಲ್ ವೆಜಿಟೇಬಲ್ ಆಯಿಲ್' (Blended Edible Vegetable Oil) ಅಥವಾ 'ವನಸ್ಪತಿ' (Vanaspati) ಎಂದು ನಮೂದಿಸಿರುವ ಪ್ಯಾಕೆಟ್‌ಗಳನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಿ. ಕೇವಲ ಅಂದಾಜಿನ ಮೇಲೆ ನಂಬಿಕೆ ಇಡುವ ಬದಲು ಈ ಸಣ್ಣ ವಿವರಗಳನ್ನು ಗಮನಿಸುವುದು ಸುರಕ್ಷಿತ.

ಶುದ್ಧ ತುಪ್ಪದ ಲೇಬಲ್‌ ಗುರುತಿಸುವುದು ಹೇಗೆ? ಮನೆಮದ್ದಿಗಿಂತ ಅಧಿಕೃತ ತಪಾಸಣೆ ಮುಖ್ಯ

ಫ್ರೀಜರ್‌ನಲ್ಲಿಡುವುದು ಅಥವಾ ಚಮಚದಲ್ಲಿ ಬಿಸಿ ಮಾಡುವಂತಹ ಸೋಶಿಯಲ್ ಮೀಡಿಯಾದ ನಕಲಿ 'ಟ್ರಿಕ್ಸ್'ಗಳಿಂದ ತುಪ್ಪದ ಶುದ್ಧತೆಯನ್ನು ಖಚಿತಪಡಿಸಲು ಸಾಧ್ಯವಿಲ್ಲ. ತುಪ್ಪದಲ್ಲಿ ವನಸ್ಪತಿ ಕಲಬೆರಕೆಯಾಗಿದೆ ಎಂಬ ಸಂಶಯವಿದ್ದರೆ, FSSAI ಸೂಚಿಸಿರುವ ತ್ವರಿತ ಶುಗರ್-ಆಸಿಡ್ ಪರೀಕ್ಷೆ ಮಾಡಬಹುದು. ಆದರೆ ಲ್ಯಾಬ್ ಪರೀಕ್ಷೆಯೊಂದೇ ಅಂತಿಮ ಮತ್ತು ನಿಖರ ತೀರ್ಪು ನೀಡುತ್ತದೆ. ಮಾರುಕಟ್ಟೆಯಲ್ಲಿ ಯಾವಾಗಲೂ ಸೀಲ್ ಮಾಡಿದ ಪ್ಯಾಕೆಟ್‌ಗಳನ್ನೇ ಖರೀದಿಸಿ ಹಾಗೂ ಅತಿಯಾದ ರಿಯಾಯಿತಿ ಆಫರ್‌ಗಳ ಬಗ್ಗೆ ಎಚ್ಚರದಿಂದಿರಿ. ಉದಾಹರಣೆಗೆ, ಜುಲೈ ದರ ಏರಿಕೆಯ ನಂತರ ಬೆಂಗಳೂರಿನಲ್ಲಿ ನಂದಿನಿ ತುಪ್ಪದ ಬೆಲೆ ಲೀಟರ್‌ಗೆ ಸುಮಾರು ₹715 ಇದ್ದರೆ, ಕಡಲೆಕಾಯಿ ಎಣ್ಣೆಯ ಬೆಲೆ ಸರಾಸರಿ ₹200 ರಿಂದ ₹240 ರಷ್ಟಿದೆ. ವಿವಿಧ ಎಣ್ಣೆ ಹಾಗೂ ತುಪ್ಪದ 'ಸ್ಮೋಕಿಂಗ್ ಪಾಯಿಂಟ್' (Smoke Point) ಮಾಹಿತಿ ಕೆಳಗಿನ ಕೋಷ್ಟಕದಲ್ಲಿದೆ.

ದಿನಕ್ಕೆಷ್ಟು ತುಪ್ಪ ಸೇವಿಸಬೇಕು? ದೂರು ಸಲ್ಲಿಕೆಗೆ ಇಲ್ಲಿದೆ ದಾರಿ

ICMR-NIN ಮಾರ್ಗದರ್ಶಿ ಸೂತ್ರಗಳ ಪ್ರಕಾರ, ದಿನಕ್ಕೆ 20 ರಿಂದ 30 ಗ್ರಾಂನಷ್ಟು ಕಣ್ಣಿಗೆ ಕಾಣುವ ಕೊಬ್ಬಿನಂಶವನ್ನು ಮಾತ್ರ ಸೇವಿಸಬೇಕು. ಅಂದರೆ, ದಿನಕ್ಕೆ ಒಂದರಿಂದ ಎರಡು ಟೀಚಮಚ ತುಪ್ಪ ಸಾಕು. ನಿಮಗೇನಾದರೂ ಮಧುಮೇಹ ಅಥವಾ ಹೃದಯಸಂಬಂಧಿ ತೊಂದರೆಗಳಿದ್ದರೆ, ಸ್ಯಾಚುರೇಟೆಡ್ ಫ್ಯಾಟ್ ಪ್ರಮಾಣವನ್ನು ಕ್ಯಾಲೊರಿಯ ಶೇ. 7-10 ಕ್ಕಿಂತ ಕಡಿಮೆ ಇರಿಸಿ, ಅನ್‌ಸ್ಯಾಚುರೇಟೆಡ್ ಎಣ್ಣೆಗಳಿಗೆ ಆದ್ಯತೆ ನೀಡಿ. ಒಗ್ಗರಣೆಗೆ ಅಥವಾ ಕಮ್ಮಿ ಸಮಯದ ಹೆಚ್ಚಿನ ಉರಿಯ ಅಡುಗೆಗೆ ತುಪ್ಪ ಬಳಸಿ, ಧೀರ್ಘಕಾಲ ಕರಿಯುವ ಅಡುಗೆಗಳಿಗೆ ಸೂಕ್ತ ಎಣ್ಣೆಯನ್ನು ಆಯ್ಕೆ ಮಾಡಿಕೊಳ್ಳಿ.

ಒಂದು ವೇಳೆ ನೀವು ಖರೀದಿಸಿದ ತುಪ್ಪ ನಕಲಿ ಅಥವಾ ಸಂಶಯಾಸ್ಪದ ಅನಿಸಿದರೆ, ಅದರ ಬಿಲ್ ಅನ್ನು ಸುರಕ್ಷಿತವಾಗಿಟ್ಟುಕೊಳ್ಳಿ. ಬ್ಯಾಚ್ ಸಂಖ್ಯೆ ಮತ್ತು ದಿನಾಂಕ ಸ್ಪಷ್ಟವಾಗಿ ಕಾಣಿಸುವಂತೆ ಪ್ಯಾಕೆಟ್‌ನ ಫೋಟೋ ತೆಗೆದಿಟ್ಟುಕೊಳ್ಳಿ. 'ಫುಡ್ ಸೇಫ್ಟಿ ಕನೆಕ್ಟ್' (Food Safety Connect) ಆ್ಯಪ್ ಮೂಲಕ ಕೆಲವೇ ನಿಮಿಷಗಳಲ್ಲಿ ದೂರು ದಾಖಲಿಸಬಹುದು ಅಥವಾ 1800-11-2100 ಉಚಿತ ಕರೆ ಸಂಖ್ಯೆಗೆ ಸಂಪರ್ಕಿಸಬಹುದು. ನಿಮ್ಮ ದೂರು ತಕ್ಷಣವೇ ಜಿಲ್ಲಾಧಿಕಾರಿ ಮತ್ತು ಸಂಬಂಧಿತ ಕಂಪನಿಗೆ ತಲುಪಲಿದ್ದು, ದೂರಿನ ಸ್ಥಿತಿಗತಿಯನ್ನು ಆ್ಯಪ್‌ ಅಥವಾ ಪೋರ್ಟಲ್‌ನಲ್ಲಿ ನೀವೇ ಟ್ರ್ಯಾಕ್ ಮಾಡಬಹುದು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.