ಬೇಸಿಗೆಯಲ್ಲಿ ದಾಸವಾಳ ಜ್ಯೂಸ್‌ ಕುಡಿದರೆ ಈ ಎಲ್ಲಾ ಪ್ರಯೋಜನಗಳಿವೆ

ಬೇಕಾಗಿರುವ ಸಾಮಗ್ರಿ

• ದಾಸಾವಾಳದ ಹೂ 20-25
• ಸಕ್ಕರೆ 250ಗ್ರಾಂ
• ನೀರು 1/4 ಲೀಟರ್
• ನಿಂಬೆ ಹಣ್ಣು 5-6



ಮಾಡುವ ವಿಧಾನ

ನೀರನ್ನು ಬಾಣಲಿಗೆ ಹಾಕಿ ಕುದಿಸಿ, ನೀರು ಕುದಿಯಲಾರಂಭಿಸಿದಾಗ ಸಕ್ಕರೆ ಹಾಕಿ.

• ಇದರಲ್ಲಿ ಸಕ್ಕರೆ ಕರಗಿದರೆ ಸಾಕು, ನಂತರ ಗ್ಯಾಸ್‌ ಆಫ್‌ ಮಾಡಿ, ಈಗ ದಾಸವಾಳದ ಹೂಗಳನ್ನು ಹಾಕಿ. ದಾಸಾವಾಳದ ಹೂ ಹಾಕಿದ ಮೇಲೆ ಕುದಿಸಬೇಡಿ. ತಣ್ಣಗಾದ ಮೇಲೆ ಅದನ್ನು ಸೋಸಿ. ಹೂ ಹೆಚ್ಚು ಹಾಕಿದರೆ ಮತ್ತಷ್ಟು ಬಣ್ಣ ಚೆನ್ನಾಗಿರುತ್ತದೆ.
• ಈಗ ಹಿಂಡಿದ ನಿಂಬೆ ರಸ ಹಾಕಿ ಮಿಶ್ರ ಮಾಡಿ. ಇದು ಎರಡು ತಿಂಗಳವರೆಗೆ ಚೆನ್ನಾಗಿರುತ್ತದೆ. ಇನ್ನು ಸುವಾಸನೆಗೆ ಬೇಕಾದರೆ ರೋಸ್‌ ಎಸೆನ್ಸ್ ಹಾಕಿಡ ಬಹುದು.
• ಇದನ್ನು ಡಬ್ಬದಲ್ಲಿ ಸಂಗ್ರಹಿಸಿಟ್ಟು ಎರಡು ತಿಂಗಳವರೆಗೆ ಬಳಸಬಹುದು.
• ಇದನ್ನು ಬೇಕಾದಾಗ ಅರ್ಧ ಲೋಟ ಜ್ಯೂಸ್‌ಗೆ ಅರ್ಧ ಲೋಟ ನೀರು ಬಳಸಿ ಮಿಕ್ಸ್ ಮಾಡಿ ಕುಡಿಯಬಹುದು.

ಇದನ್ನು ಕುಡಿಯುವುದರಿಂದ ಹಲವಾರು ಪ್ರಯೋಜನಗಳನ್ನು ಪಡೆಯಬಹುದು:



1. ದೇಹದ ಉಷ್ಣತೆ ಕಡಿಮೆ ಮಾಡುತ್ತದೆ.

ಬೇಸಿಗೆಗಾಲಕ್ಕೆ ತುಂಬಾ ಸೂಕ್ತವಾದ ಪಾನೀಯ ಇದಾಗಿದೆ. ಬೇಸಿಗೆಯಲ್ಲಿ ದೇಹದ ಉಷ್ಣತೆ ಕಾಪಾಡುವಲ್ಲಿ ಈ ಪಾನೀಯ ತುಂಬಾ ಸಹಕಾರಿ. ಇನ್ನು ಈ ಪಾನೀಯ ದೇಹದಲ್ಲಿ ನೀರಿನಂಶ ಕಡಿಮೆಯಾಗದಂತೆ ಕಾಪಾಡುತ್ತದೆ. ಇನ್ನು ಬಿಳಿ ಬಣ್ಣದ ದಾಸವಾಳ ಹೂ ಕಣ್ಣುಗಳಿಗೆ ತಂಪು ನೀಡುತ್ತದೆ.



2. ಮಹಿಳೆಯರಿಗೆ ಬಿಳುಪು ಹೋಗುವುದು ತಡೆಗಟ್ಟುವಲ್ಲಿ ಸಹಕಾರಿ

ಕೆಲ ಮಹಿಳೆಯರಿಗೆ ಬಿಳುಪು ಹೋಗುವ ಸಮಸ್ಯೆ ಇರುತ್ತದೆ. ಅಂಥವರು ಈ ಪಾಣಿಯ ಕುಡಿದರೆ ಬಿಳುಪು ಹೋಗುವುದು ಕಡಿಮೆಯಾಗುವುದು. ಕೆಂಪು ದಾಸವಾಳದ ಜಿತೆ ಬಿಳಿ ದಾಸವಾಳದ ಹೂ ಹಾಕಿ ಈ ಪೇಯ ತಯಾರಿಸಿ ಕುಡಿದರೆ ಬಿಳುಪು ಹೋಗುವುದನ್ನು ತಡೆಗಟ್ಟಬಹುದು.



3. ಹೃದಯದ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು

ಹೃದಯ ಸಂಬಂಧಿ ಸಮಸ್ಯೆ ಇರುವವರಿಗೆ ಈ ಪಾನೀಯ ತುಂಬಾ ಒಳ್ಳೆಯದು. ಇದನ್ನು ಕುಡಿಯುವುದರಿಂದ ರಕ್ತದೊತ್ತಡ ನಿಯಂತ್ರಣದಲ್ಲಿಡಬಹುದು, ಹಾಗೂ ಇದು ಬೊಜ್ಜು ನಿವಾರಕ ಗುಣ ಹೊಂದಿರುವುದರಿಂದ ಕೊಲೆಸ್ಟ್ರಾಲ್ ಕಡಿಮೆ ಮಾಡುತ್ತದೆ. ಇದರಿಂದ ಹೃದಯದ ಸ್ವಾಸ್ಥ್ಯ ಹೆಚ್ಚುವುದು.



4. ಬಿಪಿ ಕಡಿಮೆ ಮಾಡುತ್ತದೆ

ಈ ಜ್ಯೂಸ್ ಅಧಿಕ ರಕ್ತದೊತ್ತಡವನ್ನು ಕಡಿಮೆ ಮಾಡುತ್ತದೆ. ಇದರಿಂದ ಸಂಧಿವಾತ ನೋವು ಕೂಡ ಕಡಿಮೆಯಾಗುವುದು.ಇದರಲ್ಲಿ ಆ್ಯಂಟಿಆಕ್ಸಿಡೆಂಟ್ ಅಂಶವಿರುವುದರಿಂದ ದೇಹದಲ್ಲಿ ರೋಗ ನಿರೋಧಕ ಶಕ್ತಿ ಹೆಚ್ಚಿಸುವುದು.

• ಇದಕ್ಕೆ ಸಕ್ಕರೆ ಹಾಕದಿದ್ದರೆ ಅತ್ಯಂತ ಆರೋಗ್ಯಕರವಾದ ಪೇಯ ಇದಾಗಿದೆ. ಇದರಲ್ಲಿ ಕೊಲೆಸ್ಟ್ರಾಲ್ ಪ್ರಮಾಣ ಶೂನ್ಯವಾಗಿರುತ್ತದೆ.
• ಇದು ಬೊಜ್ಜನ್ನು ಕರಗಿಸುವ ಗುಣ ಹೊಂದಿದೆ.



5. ಮೂತ್ರ ನಾಳದ ಸೋಂಕು ನಿವಾರಣೆ

ಮೂತ್ರ ನಾಳದ ಸೋಂಕು ನಿವಾರಣೆಗೆ ಈ ಪೇಯ ಅತ್ಯಂತ ಸಹಕಾರಿಯಾಗಿದೆ. ಕೆಲವೊಮ್ಮೆ ದೇಹದ ಉಷ್ಣತೆ ಹೆಚ್ಚಾದ ಕೆಲವರಿಗೆ ಮೂತ್ರ ಮಾಡುವಾಗ ಉರಿ ಕಂಡು ಬರುತ್ತದೆ. ಅದನ್ನು ಕಡಿಮೆ ಮಾಡುವಲ್ಲಿ ಎಳನೀರಿನಷ್ಟೇ ಈ ಪೇಯ ಪರಿಣಾಮಕಾರಿಯಾಗಿದೆ. ಇನ್ನು ಮಹಿಳೆಯರಿಗೆ ಕಾಡುವ ಮುಟ್ಟಿನ ನೋವು ಕಡಿಮೆ ಮಾಡುವಲ್ಲಿ ಕೂಡ ಈ ಜ್ಯೂಸ್ ಸಹಕಾರಿಯಾಗಿದೆ.



6. ಕೆಮ್ಮು-ಶೀತಕ್ಕೆ ಮನೆಮದ್ದು

ಬೇಸಿಗೆಯಲ್ಲಿ ಅಲರ್ಜಿ ಸಮಸ್ಯೆ ಇರುವವರಿಗೆ ಕೆಮ್ಮು-ಶೀತ ಕಾಣಿಸಿಕೊಳ್ಳುತ್ತದೆ. ಅದನ್ನು ಕಡಿಮೆ ಮಾಡುವ ಸಾಮರ್ಥ್ಯ ಈ ಪಾನೀಯದಲ್ಲಿ. ಈ ಪಾನೀಯದಲ್ಲಿ ದಾಸವಾಳ ಹೂ ಹಾಗೂ ನಿಂಬೆಸ ಹಾಕಲಾಗಿದೆ. ಎರಡರಲ್ಲೂ ವಿಟಮಿನ್‌ ಸಿ ಇರುವುದರಿಂದ ಕೆಮ್ಮು-ಶೀತ ಕಡಿಮೆ ಮಾಡುವಲ್ಲಿ ಸಹಕಾರಿಯಾಗಿದೆ.



7.ಕೂದಲಿನ ಆರೋಗ್ಯಕ್ಕೂ ಒಳ್ಳೆಯದು

ದಾಸವಾಳದ ಹೂ ಹಾಗೂ ಎಲೆ ಕೂದಲನ್ನು ಬಾಹ್ಯವಾಗಿ ಆರೈಕೆ ಮಾಡುವಲ್ಲಿ ತುಂಬಾ ಪ್ರಯೋಜನಕಾರಿ. ಇನ್ನು ಈ ರೀತಿ ಜ್ಯೂಸ್ ಮಾಡಿ ಕುಡಿಯುವುದರಿಂದ ಆಂತರಿಕವಾಗಿ ಕೂಡ ಪೋಷಣೆ ಮಾಡುತ್ತದೆ. ಕೂದಲಿಗೆ ಅಗ್ಯತವಾದ ವಿಟಮಿನ್‌ ಒದಗಿಸುತ್ತದೆ. ಕೂದಲು ಮಂದವಾಗಿ ಬೆಳೆಯುವುದು.

ಸೂಚನೆ: ಇತರ ಔಷಧಿಯನ್ನು ತೆಗೆದುಕೊಳ್ಳುತ್ತಿರುವವರು ಇದನ್ನು ತೆಗೆದುಕೊಳ್ಳಬಾರದು.

• ಇನ್ನು ಗರ್ಭಣಿಯರು ಈ ಜ್ಯೂಸ್ ಕುಡಿಯಬೇಡಿ.