ಮಧುಮೇಹಿಗಳಿಗೆ ವಿಶೇಷ ಆಹಾರದ ಅಗತ್ಯವಿಲ್ಲ!

Diabetes

oi-Reena

By Hema S

Published: Monday, May 28, 2012, 13:47 [IST]

ದೇಹ ಆರೋಗ್ಯವಾಗಿ ಇರಲು ಕಾರ್ಬೋಹೈಡ್ರೇಟ್‌ ಮತ್ತು ಕೊಬ್ಬಿನ ಪದಾರ್ಥಗಳು ಅವಶ್ಯಕ. ಮಧುಮೇಹ ಅಥವಾ ಡಯಾಬಿಟಿಸ್ ಕಾಯಿಲೆಯಿಂದ ಬಳಲುತ್ತಿರುವವರು ಕೆಲವೊಂದು ಆಹಾರ ತಿನ್ನಬಾರದು, ಕಟ್ಟುನಿಟ್ಟಿನ ಆಹಾರಕ್ರಮ ಪಾಲಿಸಬೇಕು. ಹಾಗಂತ ಮಧುಮೇಹಿಗಳಲ್ಲಿ ಕೆಲವರು ದೇಹಕ್ಕೆ ಅಗತ್ಯವಾದ ಆಹಾರವನ್ನು ಕೂಡ ತಿನ್ನದೇ ಬರೀ ಪಥ್ಯದ ಊಟ ಮಾಡುತ್ತಾರೆ.

ಆದರೆ ಮಧುಮೇಹಿಗಳಿಗೆ ವಿಶೇಷವಾದ ಆಹಾರದ ಅಗತ್ಯವೇನಿಲ್ಲ. ತನ್ನ ಕುಟುಂಬದ ಸದಸ್ಯರು ಸೇವಿಸುವ ಆಹಾರವನ್ನೇ ಅಳತೆ ಪ್ರಮಾಣದಲ್ಲಿ ಸೇವಿಸಬೇಕಾಗುತ್ತದಷ್ಟೆ. ಮಧುಮೇಹ ಕಾಯಿಲೆಯ ಚಿಕಿತ್ಸೆಯಲ್ಲಿ ಆಹಾರ ಪ್ರಧಾನ ಪಾತ್ರವನ್ನು ವಹಿಸುತ್ತದೆ, ಔಷಧಿಗಳು ಮತ್ತು ವ್ಯಾಯಾಮ ಕಾಯಿಲೆ ಹೆಚ್ಚಾಗದಂತೆ ತಡೆಗಟ್ಟುವಲ್ಲಿ ಸಹಕಾರಿಯಾಗಿದೆ. ಮಧುಮೇಹಿಗಳು ಯಾವ ಆಹಾರ ತಿನ್ನಬಹುದು ಯಾವ ಬಗೆಯ ಆಹಾರವನ್ನು ತಿಂದರೆ ಅಪಾಯ ಎಂದು ತಿಳಿಯೋಣ ಬನ್ನಿ.

ಮಧುಮೇಹಿಗಳು ಪಾಲಿಸಬೇಕಾದ ಆಹಾರಕ್ರಮ:

1. ವೈದ್ಯರು ತಿಳಿಸಿರುವ ಆಹಾರಕ್ರಮವನ್ನು ಪಾಲಿಸಬೇಕು. ಒಂದು ವೇಳೆ ಆಹಾರ ಸೇವನೆಯಲ್ಲಿ ವ್ಯತ್ಯಾಸ ಮಾಡಿಕೊಳ್ಳುವ ಉದ್ದೇಶವಿದ್ದರೆ ನಿಮ್ಮ ವೈದ್ಯರ ಸಲಹೆಯನ್ನು ಪಡೆಯುವುದು ಒಳ್ಳೆಯದು.

2. ಮುಖ್ಯವಾದ ಅಂಶವೆಂದರೆ ಊಟವನ್ನು ಬಿಡಬಾರದು. ಅಲ್ಲದೆ ಊಟದ ಜೊತೆ ತಿಂಡಿ ತಿನಿಸನ್ನು ಸೇವಿಸದಿರುವುದು ಉತ್ತಮ. ಬೇಕರಿ ತಿಂಡಿಗಳು ಮತ್ತು ಮದ್ಯವನ್ನು ದೂರವಿಡಬೇಕು.

3. ಇನ್ಸುಲಿನ್‌ ತೆಗೆದುಕೊಳ್ಳುತ್ತಿರುವವರು ನಿಗದಿಪಡಿಸಿದ ವೇಳೆಯಲ್ಲಿ ಊಟವನ್ನು ಮಾಡಬೇಕು. ಈ ರೀತಿ ಮಾಡಿದರೆ ರಕ್ತದಲ್ಲಿ ಸಕ್ಕರೆಯ ಅಂಶದ ಕೊರತೆಯನ್ನು ತಡೆಗಟ್ಟಿಕೊಳ್ಳಬಹುದು.

4. ಹೊಟ್ಟೆ ತುಂಬಾ ಊಟ ಮಾಡುವ ಬದಲು, ಸ್ವಲ್ಪ-ಸ್ವಲ್ಪ ಆಹಾರವನ್ನು ಆಗಾಗ ಸೇವಿಸುವುದು ಒಳ್ಳೆಯದು.

5. ದ್ವಿದಳ ಧಾನ್ಯಗಳು, ಕಾಳುಗಳು, ತುಪ್ಪ ಅಥವಾ ಎಣ್ಣೆಯನ್ನು ಅಳತೆ ಪ್ರಮಾಣದಲ್ಲಿ ಸೇವಿಸಬೇಕು. ಬೇಯಿಸಿದ ನಂತರ ಆಹಾರವನ್ನು ಕಡಿಮೆ ಅಥವಾ ಪ್ರಮಾಣದಲ್ಲಿ ಸೇವಿಸಬೇಕು.

6. ಅನ್ನ, ಆಲೂಗಡ್ಡೆ , ಹಣ್ಣುಗಳನ್ನು ತಿನ್ನಬಹುದು. ಆದರೆ ಇವುಗಳನ್ನು ಕಡಿಮೆ ಪ್ರಮಾಣದಲ್ಲಿ ತಿನ್ನಬೇಕು. ಅಧಿಕ ಕಾರ್ಬೋಹೈಡ್ರೇಟ್ಸ್ ಮತ್ತು ಕ್ಯಾಲೊರಿ ಆಹಾರಗಳನ್ನು ತಿನ್ನುವುದು ಒಳ್ಳೆಯದಲ್ಲ.

ಈ ಕೆಳಕಂಡ ಆಹಾರ ಪದಾರ್ಥಗಳನ್ನು ಮಧುಮೇಹದವರು ಸೇವಿಸಬಹುದು.

1. ನೀರು, ಸಕ್ಕರೆ ಇಲ್ಲದೆ ಕಾಫಿ, ಟೀ, ಕೊಬ್ಬು ಇಲ್ಲದ ಸೂಪನ್ನು ಸೇವಿಸಬಹುದು.

2. ನಿಂಬೆಹಣ್ಣಿನ ರಸ, ಉಪ್ಪಿನ ಸೇವಿಸಬಹುದು.

3. ಕಡಿಮೆ ಪ್ರಮಾಣದಲ್ಲಿ ಸಫೋಲದಂತಹ ಎಣ್ಣೆಯನ್ನು ಉಪಯೋಗಿಸಬಹುದು.

4. ಶೇ. 3-4 ರಷ್ಟು ಕಾರ್ಬೋಹೈಡ್ರೇಟ್ಸ್‌ ಇರುವ ತಾಜಾ ತರಕಾರಿಗಳನ್ನು, ಹಾಗೆಯೇ ಅಥವಾ ಅರ್ಧ ಬೇಯಿಸಿದ ಕ್ಯಾರೆಟ್ , ಆಲೂಗೆಡ್ಡೆ, ಬೀಟ್ ರೂಟ್ ತಿನ್ನಬಹುದು.

5. ದವಸ ಧಾನ್ಯಗಳಲ್ಲಿ ರಾಗಿ, ಗೋಧಿ, ಅಕ್ಕಿಯನ್ನು ಅತಿ ಕಡಿಮೆ ಪ್ರಮಾಣದಲ್ಲಿ ಸೇವಿಸಬಹುದು.

ಮಧುಮೇಹಿಗಳು ಮುಟ್ಟಬಾರದ ಆಹಾರಗಳು:

1. ಐಸ್‌ಕ್ಯಾಂಡಿ, ಐಸ್‌ಕ್ರೀಮ್‌, ಗ್ಲೂಕೋಸ್‌, ಜೇನುತುಪ್ಪ, ಬೆಲ್ಲ, ಜಾಮ್‌, ಸಕ್ಕರೆ, ಪಾನಕ.

2. ಕೇಕ್‌ಗಳು, ಪೇಡ, ಬಿಸ್ಕಟ್ ಗಳು, ಹಾಲಿನ ಉತ್ಪನ್ನಗಳು.

3. ಬಿಯರ್, ವೈನ್‌ ಸೇರಿದಂತೆ ಇತರೆ ಮದ್ಯ ಪದಾರ್ಥಗಳನ್ನು ಸೇವಿಸಬಾರದು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.