ಭಾರತದಲ್ಲಿ 17 HMPV ಪ್ರಕರಣ: ಚೀನಾದ ಪರಿಸ್ಥಿತಿ ಈಗ ಹೇಗಿದೆ ಗೊತ್ತಾ?

ಚೀನಾದಲ್ಲಿ ಆತಂಕ ಸೃಷ್ಟಿಸಿದೆ ಎನ್ನಲಾಗಿರುವ ಹ್ಯೂಮನ್ ಮೆಟಾಪ್ನ್ಯೂಮೋವೈರಸ್ (HMPV) ಭಾರತ ಸೇರಿ ಹಲವು ದೇಶಗಳಲ್ಲಿ ವರದಿಯಾಗಿರುವು ತಿಳಿದೇ ಇದೆ. ಚೀನಾ ಮಾತ್ರವಲ್ಲ ಹಲವು ದೇಶದಲ್ಲಿ ಪ್ರಕರಣಗಳು ನಿಧಾನವಾಗಿ ಏರಿಕೆಯಾಗುತ್ತಿರುವುದನ್ನು ನೋಡಬಹುದು. ಏಷ್ಯನ್ ದೇಶಗಳಲ್ಲಿ ಈ ಸಂಖ್ಯೆ ಹೆಚ್ಚಾಗಿರುವುದುದು ಗಮನಸಿಬೇಕಾದ ಅಂಶವಾಗಿದೆ.

ಇನ್ನು ಭಾರತದಲ್ಲಿ ಅದರಲ್ಲೂ ಕರ್ನಾಟಕದಲ್ಲಿಯೇ ಮೊದಲ ಕೇಸ್‌ ಪತ್ತೆಯಾಗಿತ್ತು. ಇದಾದ ಬಳಿಕ ದೇಶದ ಹಲವು ರಾಜ್ಯಗಳಲ್ಲು ಪ್ರಕರಣಗಳು ವರದಿಯಾಗಿವೆ. ತಮಿಳುನಾಡು, ಗುಜರಾತ್, ಪುದುಚೆರಿಯಲ್ಲೂ ಕೂಡ ಈ ಪ್ರಕರಣಗಳು ವರದಿಯಾಗಿವೆ. ಇನ್ನು ಆಸ್ಪತ್ರೆಗೆ ದಾಖಲಾಗಿದ್ದ ಎಲ್ಲಾ ಮಕ್ಕಳು ಚೇತರಿಸಿಕೊಂಡಿದ್ದಾರೆ. ಹಾಗೆ ಈ ವೈರಸ್‌ನಿಂದ ಆತಂಕ ಪಡುವ ಅಗತ್ಯವಿಲ್ಲ ಎಂದು ಆರೋಗ್ಯ ಇಲಾಖೆ ತಿಳಿಸಿದೆ.

ಇತ್ತೀಚಿನ ವರದಿಗಳ ಪ್ರಕಾರ ಭಾರತದಲ್ಲಿ ಈವರೆಗೆ 17 ಹೆಚ್‌ಎಂಪಿವಿ ಪ್ರಕರಣಗಳು ವರದಿಯಾಗಿವೆ. ಎಲ್ಲಾ ಪ್ರಕರಣಗಳು ಮಕ್ಕಳಲ್ಲಿ ಕಂಡುಬಂದಿದೆ. ಗುಜರಾತ್ ಹಾಗೂ ಅಸ್ಸಾಂನಲ್ಲಿ ಹೊಸ ಪ್ರಕರಣಗಳು ವರದಿಯಾಗಿವೆ. ಪುದುಚೆರಿಯಲ್ಲಿ ಒಂದು ಮಗುವಿನಲ್ಲಿ ವೈರಸ್ ದೃಢವಾಗಿದ್ದು, JIPMER ನಲ್ಲಿ ಚಿಕಿತ್ಸೆ ಪಡೆಯುತ್ತಿದೆ ಎಂದು ತಿಳಿದುಬಂದಿದೆ.

ಪುದುಚೆರಿಯ ಆಸ್ಪತ್ರೆಯಲ್ಲಿ ದಾಖಲಾಗಿರುವ ಮಗು ತೀವ್ರ ಜ್ವರದ ಕಾರಣಕ್ಕೆ ಆಸ್ಪತ್ರೆಗೆ ಕರೆತರಲಾಗಿತ್ತು. ಈ ವೇಳೆ ರಕ್ತ ಪರೀಕ್ಷೆ ನಡೆಸಿದಾಗ ಆಕೆಗೆ ಹೆಚ್‌ಎಂಪಿವಿ ವೈರಸ್ ಇರುವುದು ದೃಢವಾಗಿದೆ. ಈ ಮಗುವಿನ ಪೋಷಕರ ಪ್ರಯಾಣದ ಇತಿಹಾಸ ಕೂಡ ಇಲ್ಲ. ಹೀಗಾಗಿ ವೈರಸ್ ಹರಡುವಿಕೆ ಕುರಿತ ಮೂಲ ತಿಳಿಯುವುದು ಕಷ್ಟವಾಗಿದೆ. ಇನ್ನು ಗುಜರಾತ್‌ನಲ್ಲಿ ಈ ಪ್ರಕರಣಗಳ ಸಂಖ್ಯೆ 5ಕ್ಕೆ ಏರಿಕೆಯಾಗಿದೆ.

ಚೀನಾದಲ್ಲಿ ಪರಿಸ್ಥಿತಿ ಹೇಗಿದೆ?

ಉತ್ತರ ಚೀನಾದಲ್ಲಿ ಈ ವೈರಸ್ ಪ್ರಮಾಣ ಗಣನೀಯವಾಗಿ ಕಡಿಮೆಯಾಗಿದೆ ಎಂದು ಅಲ್ಲಿ ರೋಗ ನಿಯಂತ್ರಣ ಮತ್ತು ತಡೆಗಟ್ಟುವಿಕೆ ಕೇಂದ್ರದ ಅಧಿಕಾರಿಗಳು ವಿವರಿಸಿದ್ದಾರೆ. 14 ವರ್ಷಕ್ಕಿಂರ ಕಡಿಮೆ ವಯಸ್ಸಿನ ಮಕ್ಕಳಲ್ಲಿ ಈ ವೈರಸ್ ಹರಡುವಿಕೆ ಪ್ರಮಾಣ ಈಗ ಕಡಿಮೆಯಾಗಿದೆ ಎಂದು ರೋಗ ನಿಯಂತ್ರಣ ಮತ್ತು ತಡೆಗಟ್ಟುವಿಕೆ ಕೇಂದ್ರದ ಸಂಶೋಧಕಿ ವಾಂಗ್ ಲಿಪಿಂಗ್ ಹೇಳಿದ್ದಾರೆ.

ಎಲ್ಲೆಲ್ಲಿ ಎಷ್ಟೆಷ್ಟು ಕೇಸ್?

ಕರ್ನಾಟಕ: ಮೂರು ತಿಂಗಳ ಬಾಲಕಿ ಮತ್ತು ಎಂಟು ತಿಂಗಳ ಗಂಡು ಮಗು ಸೇರಿ 3 ಕೇಸ್
ತಮಿಳುನಾಡು: ಇಬ್ಬರು ಮಕ್ಕಳಿಗೆ ಈ ವೈರಸ್ ಸೋಂಕು ತಗುಲಿರುವುದು ಪತ್ತೆಯಾಗಿದೆ.
ಗುಜರಾತ್: ಅಹಮದಾಬಾದ್‌ನಲ್ಲಿ ಸೇರಿ ಒಟ್ಟು 5 ಪ್ರಕರಣಗಳು
ಪುದುಚೆರಿ: ಒಂದು ಮಗುವಿನಲ್ಲಿ ವೈರಸ್ ದೃಢ
ಅಸ್ಸಾಂ: ಐವರು ಮಕ್ಕಳಲ್ಲಿ ವೈರಸ್ ದೃಢವಾಗಿದೆ.

ಈ ಪ್ರಕಣಗಳಲ್ಲಿ ಬಹುತೇಕ ಎಲ್ಲಾ ಪ್ರಕರಣಗಳು ಚೇತರಿಸಿಕೊಂಡಿದ್ದು ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಮಾಡಲಾಗಿದೆ.

HMPV ವೈರಸ್‌ನ ಲಕ್ಷಣಗಳು
ಕೆಮ್ಮು
ಜ್ವರ
ಗಂಟಲು ನೋವು
ಉಸಿರಾಟದ ತೊಂದರೆ
ಮೂಗಿನಿಂದ ನೀರು ಬರುವುದು

ಮೆಟಾಪ್ನ್ಯೂಮೋ ವೈರಸ್ ಹೊಸದಾಗಿ ಕಂಡುಬಂದಿರುವ ವೈರಸ್ ಅಲ್ಲ. ಇದು 2001ರಲ್ಲಿ ಪತ್ತೆ ಮಾಡಲಾಗಿರುವ ವೈರಸ್ ಆಗಿದೆ. ಇದು ಹಲವು ರೀತಿಯ ಉಸಿರಾಟ ಸಂಬಂಧಿ ಸಮಸ್ಯೆಯಾಗಿ ಕಾಡುವ ವೈರಸ್ ಆಗಿದೆ. 2001ರಲ್ಲಿ ನೆದರ್‌ಲ್ಯಾಂಡ್‌ನಲ್ಲಿ ಮೊಟ್ಟ ಮೊದಲ ಬಾರಿಗೆ ಮಾನವರಲ್ಲಿ ಈ ವೈರಸ್ ಕಂಡುಬಂದಿದೆ. ಇದಾದ ಬಳಿಕ ಹಲವು ರೀತಿ ರೂಪಾಂತರವಾಗಿದೆ. ಆದ್ರೆ ಇತ್ತೀಚಿಗೆ ಚೀನಾದಲ್ಲಿ ಈ ಹರಡುವಿಕೆ ಪ್ರಮಾಣ ಹೆಚ್ಚಳವಾಗಿದೆ. ಈ ವೈರಸ್ ಹೊಸದಲ್ಲದಿದ್ದರೂ ಆತಂಕ ಹುಟ್ಟಿಸಿದೆ. ಸದ್ಯ ಚೀನಾದಲ್ಲಿ ಈ ವೈರಸ್ ಹರಡುವಿಕೆ ಪ್ರಮಾಣ ಇಳಿಕೆಯಾಗಿರುವುದು ಆಶಾದಾಯಕ ಬೆಳವಣಿಗೆಯಾಗಿದೆ.

ಭಾರತದಲ್ಲೂ ಮೊದಲೇ ಈ ವೈರಸ್ ಇತ್ತು ಎನ್ನಲಾಗಿದೆ. ಆದ್ರೆ ಚೀನಾದಲ್ಲಿ ಹೆಚ್ಚಾಗಿ ಹರಡಿ ಸುದ್ದಿಯಾದ ಪರಿಣಾಮ ಇಲ್ಲಿಯೂ ಮುನ್ನಲೆಗೆ ಬಂದಿದೆ ಎಂಬ ಅಭಿಪ್ರಾಯವಿದೆ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.