ಈ ಎಣ್ಣೆಯ ಒಂದು ಹನಿ ಕೂಡ ಮುಖಕ್ಕೆ ತಾಗಬಾರದು, ಅದು ಹಾನಿಕಾರಕ!

Updated: Tuesday, April 12, 2022, 15:17 [IST]

ಸಾಮಾನ್ಯವಾಗಿ ಚರ್ಮ ಮತ್ತು ಕೂದಲು ನಾವು ಅತೀ ಹೆಚ್ಚು ಕಾಳಜಿ ಮಾಡುವ ಎರಡು ವಿಷಯವಾಗಿದೆ. ಇದಕ್ಕಾಗಿ ನಾನಾ ಪ್ರಯೋಗಗಳನ್ನು ಮಾಡಿದರೂ, ಕೆಲವೊಮ್ಮೆ ಯಾವುದು ಸರಿ ಮತ್ತು ಯಾವುದು ಅಲ್ಲ ಎಂದು ನಮಗೆ ತಿಳಿದಿರುವುದಿಲ್ಲ. ಅದೇ ರೀತಿ ತ್ವಚೆಯನ್ನು ಆರೋಗ್ಯವಾಗಿಡಲು ಮುಖ್ಯವಾದ ಕಾರ್ಯ ನಿರ್ವಹಿಸುವುದು ಮಾಯಿಶ್ಚರೈಸರ್. ಇದನ್ನು ಜನರು ತಮ್ಮ ಚರ್ಮದ ಪ್ರಕಾರಕ್ಕೆ ಅನುಗುಣವಾಗಿ ಬಳಸುತ್ತಾರೆ.

ಎಣ್ಣೆಯನ್ನು ಮಾಯಿಶ್ಚರೈಸರ್ ಆಗಿ ಬಳಸುವರು ಇದ್ದಾರೆ. ಸ್ನಾನದ ನಂತರ, ಎಣ್ಣೆಯನ್ನು ಕೈಗಳಿಗೆ ಹಚ್ಚಿಕೊಂಡು, ಅದನ್ನು ಮುಖ ಮತ್ತು ಇತರ ಸ್ಥಳಗಳಿಗೆ ಹಚ್ಚಲಾಗುವುದು. ಇದಕ್ಕೆ ತೆಂಗಿನೆಣ್ಣೆ, ಸಾಸಿವೆ ಎಣ್ಣೆ ಜೊತೆಗೆ ಆಲಿವ್ ಎಣ್ಣೆ ಹೆಚ್ಚು ಬಳಸಲ್ಪಡುತ್ತವೆ. ಆದರೆ, ಆಲಿವ್ ಆಯಿಲ್ ಮುಖಕ್ಕೆ ಬಳಸುವುದು ಸೂಕ್ತ ಆಯ್ಕೆ ಅಲ್ಲ.

ತಜ್ಞರ ಪ್ರಕಾರ, ಇದನ್ನು ಚರ್ಮದ ಮೇಲೆ ಬಳಸುವುದರಿಂದ ಸಮಸ್ಯೆ ಹೆಚ್ಚಾಗಬಹುದು. ಅದು ಏಕೆ ಎಂಬುದನ್ನು ಇಲ್ಲಿ ನೋಡೋಣ.

ಆಲಿವ್ ಎಣ್ಣೆಯನ್ನು ಏಕೆ ಹಚ್ಚಬಾರದು?:

ಚರ್ಮರೋಗ ತಜ್ಞರ ಪ್ರಕಾರ, ಆಲಿವ್ ಎಣ್ಣೆಯಲ್ಲಿರುವ ಲಿನೋಲಿಯಮ್ ಆಮ್ಲ ಮತ್ತು ಒಲೀಕ್ ಆಮ್ಲದ ಅನುಪಾತವು ಚರ್ಮದ ಮೇಲೆ ಅವುಗಳ ಪರಿಣಾಮವನ್ನು ನಿರ್ಧರಿಸುತ್ತದೆ ಎಂದು ಅಧ್ಯಯನವು ಹೇಳುತ್ತದೆ. ಒಲೀಕ್ ಆಮ್ಲವು ಆಲಿವ್ ಎಣ್ಣೆಯಲ್ಲಿ ಹೇರಳವಾಗಿ ಕಂಡುಬರುತ್ತದೆ. ಇದರಿಂದ ಚರ್ಮದ ಮೇಲ್ಮೈಯಲ್ಲಿ ನೀರಿನ ನಷ್ಟವು ಹೆಚ್ಚಾಗುತ್ತದೆ. ಇದರಿಂದ ತ್ವಚೆ ಒಣಗುವುದು. ತನ್ನ ಕಾಂತಿಯನ್ನು ಕಳೆದುಕೊಳ್ಳುವುದು. ಜೊತೆಗೆ, ಇದು ಚರ್ಮದ ಹೊರ ಪದರದಲ್ಲಿ ಕಂಡುಬರುವ ಸ್ಟ್ರಾಟಮ್ ಕಾರ್ನಿಯಮ್‌ನ ಲಿಪಿಡ್ ರಚನೆಯನ್ನು ಅಡ್ಡಿಪಡಿಸುತ್ತದೆ.

ಈ ಎಣ್ಣೆಯನ್ನು ಉತ್ಪನ್ನಗಳಲ್ಲಿ ಬಳಸಲಾಗುತ್ತದೆಯೇ?:

ಆಲಿವ್ ಎಣ್ಣೆಯಲ್ಲಿ ವಿಟಮಿನ್ ಇ ಹೇರಳವಾಗಿದೆ. ಜೊತೆಗೆ ಇದರ ಸಾರಗಳು ಉತ್ಕರ್ಷಣ ನಿರೋಧಕ ಗುಣಲಕ್ಷಣಗಳಲ್ಲಿ ಸಮೃದ್ಧವಾಗಿವೆ , ಅದಕ್ಕಾಗಿಯೇ ಇದನ್ನು ಚರ್ಮಕ್ಕೆ ಚಿಕಿತ್ಸೆ ನೀಡುವ ತ್ವಚೆ ಉತ್ಪನ್ನಗಳಲ್ಲಿ ಬಳಸಲಾಗುತ್ತದೆ. ಆದರೆ ಇದನ್ನು ನೇರವಾಗಿ ಮುಖಕ್ಕೆ ಬಳಸುವುದು ಉತ್ತಮವಲ್ಲ.

ಹೇಗೆ ಬಳಸುವುದು ಹಾನಿಕಾರಕ?:

ಇದನ್ನು ಚರ್ಮದ ಆರೈಕೆ ಉತ್ಪನ್ನಗಳಲ್ಲಿ ಬಳಸಲಾಗಿದ್ದರೂ, ಇದನ್ನು ಮಾಯಿಶ್ಚರೈಸರ್ ಆಗಿ ಮಾತ್ರ ಬಳಸಬಾರದು ಎಂದು ತಜ್ಞರು ಹೇಳಿದ್ದಾರೆ. ಇದು ಚರ್ಮಕ್ಕೆ ಒಳ್ಳೆಯದಲ್ಲ. ನೀವು ಒಣ ಚರ್ಮ, ಅಟೊಪಿಕ್ ಡರ್ಮಟೈಟಿಸ್ ಅಥವಾ ಸೋರಿಯಾಸಿಸ್ ಹೊಂದಿದ್ದರೆ ಆಲಿವ್ ಎಣ್ಣೆಯನ್ನು ಬಳಸುವುದನ್ನು ತಪ್ಪಿಸಿ. ಇದರಿಂದ ನಿಮ್ಮ ಸಮಸ್ಯೆ ಹೆಚ್ಚಾಗುವುದು. ಆದ್ದರಿಂದ ಯಾವುದೇ ಕಾರಣಕ್ಕೂ ಆಲಿವ್ ಎಣ್ಣೆಯನ್ನು ನಿಮ್ಮ ಮಾಯಿಶ್ಚರೈಸರ್ ಆಗಿ ಬಳಸಬೇಡಿ.

ಈ ಪ್ರಮುಖ ವಿಷಯಗಳನ್ನು ನೆನಪಿನಲ್ಲಿಡಿ:

ಆಲಿವ್ ಎಣ್ಣೆಯನ್ನು ಫೇಸ್ ಪ್ಯಾಕ್‌ಗಳು, ಎಕ್ಸ್‌ಫೋಲಿಯೇಟರ್‌ಗಳು ಮತ್ತು ಇತರ ಹಲವು ವಿಧಾನಗಳಲ್ಲಿ ಬಳಸಲಾಗುತ್ತದೆ. ಆದರೆ, ಇದು ತ್ವಚೆಗೆ ಹೊಂದುತ್ತದೆಯೋ ಇಲ್ಲವೋ, ಎಂದು ತಿಳಿದುಕೊಳ್ಳಲು ತಜ್ಞರ ಅಭಿಪ್ರಾಯವನ್ನು ತೆಗೆದುಕೊಳ್ಳಬಹುದು. ವಿಶೇಷವಾಗಿ ನೀವು ಸೂಕ್ಷ್ಮ ಚರ್ಮವನ್ನು ಹೊಂದಿದ್ದರೆ, ಈ ವಿಷಯಗಳನ್ನು ನೆನಪಿನಲ್ಲಿಡಿ.