ನಿಮ್ಮ ತ್ವಚೆ ಮಿರುಗುತ್ತೆ ರೋಸ್ ವಾಟರ್ ನಿಂದ

Skin Care

oi-Sumalatha N

By Sumalatha N

Published: Monday, September 5, 2011, 18:10 [IST]

ತ್ವಚೆಯ ಆರೋಗ್ಯ ವೃದ್ಧಿಸುವ ಸೌಂದರ್ಯ ಸಾಮಾಗ್ರಿಗಳಲ್ಲಿ ರೋಸ್ ವಾಟರ್ ಇದ್ದೇ ಇರುತ್ತೆ. ಗುಲಾಬಿ ಜಲದ ನಿರಂತರ ಬಳಕೆಯಿಂದ ತ್ವಚೆಯ ಅನೇಕ ಸಮಸ್ಯೆಗಳನ್ನು ದೂರವಿರಿಸಬಹುದು. ರೋಸ್ ವಾಟರ್ ನಿಂದ ತ್ವಚೆಗೆ ಏನೆಲ್ಲಾ ಉಪಯೋಗವಿದೆ ಎಂಬುದನ್ನು ತಿಳಿಯೋಣ.

ರೋಸ್ ವಾಟರ್ ನಲ್ಲಿರುವ ಉಪಯೋಗ:
1. ಅರೋಮ ಥೆರಪಿ: ಅರೋಮ ಥೆರಪಿಯಲ್ಲಿ (ಹೂವುಗಳಿಂದ ಚಿಕಿತ್ಸೆ) ರೋಸ್ ವಾಟರ್ ಇರಲೇಬೇಕು. ಅರೋಮ ಥೆರಪಿ ತ್ವಚೆಯ ಮೇಲೆ ಧನಾತ್ಮಕ ಪರಿಣಾಮ ಬೀರುತ್ತದೆ ಎಂದು ಸಂಶೋಧನೆಯಿಂದ ಸಾಬೀತಾಗಿದೆ. ಇದು ಒತ್ತಡದಿಂದ ಹೊರಬರಲು, ಒಳ್ಳೆ ನಿದ್ದೆ ಪಡೆಯಲು ಮತ್ತು ತ್ವಚೆ ತಾಜಾ ಇರುವಂತೆ ನೋಡಿಕೊಳ್ಳಲು ಮುಂದಾಗುತ್ತದೆ.

2. ಉತ್ತಮ ಟೋನರ್: ತ್ವಚೆಯ ಸಾಂದ್ರತೆ ಹೆಚ್ಚಿಸುವಲ್ಲಿ ರೋಸ್ ವಾಟರ್ ಹೆಚ್ಚು ಪರಿಣಾಮಕಾರಿ. ಸಾಂದ್ರತೆ ಹೆಚ್ಚಿಸಿ ತ್ವಚೆ ಸುಂದರ ಮತ್ತು ಕಂಗೊಳಿಸುವಂತೆ ಮಾಡುತ್ತದೆ. ಮಲಗುವ ಮುನ್ನ ರೋಸ್ ವಾಟರನ್ನು ಮುಖಕ್ಕೆ ಲೇಪಿಸಿಕೊಂಡರೆ ಸುಕ್ಕು ಕಡಿಮೆ ಮಾಡಿ, ವಯಸ್ಸಾದವರಂತೆ ಕಾಣುವುದನ್ನು ತಡೆಯುತ್ತದೆ.

3. ಬೆಸ್ಟ್ ಕ್ಲೆನ್ಸರ್: ರೋಸ್ ವಾಟರ್ ಉತ್ತಮ ಕ್ಲೆನ್ಸರ್ ಕೂಡ ಹೌದು. ರೋಸ್ ವಾಟರ್ ನಲ್ಲಿನ ಉರಿ ಕಡಿಮೆ ಮಾಡುವ ವಿಶೇಷ ಗುಣ, ಮೊಡವೆಗೆ ಕಾರಣವಾಗುವ ತ್ವಚೆಯ ರಂಧ್ರಗಳನ್ನು ತೆರೆದು ಅಲ್ಲಿ ಸೇರಿರುವ ಎಣ್ಣೆ ಮತ್ತು ಧೂಳನ್ನು ತೆಗೆದುಹಾಕುತ್ತದೆ. ಚರ್ಮದ ರಂಧ್ರಗಳನ್ನು ಶುದ್ಧಗೊಳಿಸುತ್ತದೆ.

4.ಕಪ್ಪು ಕಲೆಗೆ ಉತ್ತಮ: ಬಿಸಿಲಿನಲ್ಲಿ ನಿಮ್ಮ ತ್ವಚೆ ಕಳೆಗುಂದಿದ್ದರೆ ರೋಸ್ ವಾಟರ್ ಲೇಪಿಸಿಕೊಳ್ಳುವುದರಿಂದ ನಿವಾರಣೆಯಾಗುತ್ತದೆ. ಸೂರ್ಯನ ಕಿರಣಗಳಿಂದ ತ್ವಚೆ ಕಪ್ಪಗಾಗಿರುವುದನ್ನು ನಿವಾರಿಸಿ ತ್ವಚೆಗೆ ಮತ್ತೆ ಚೈತನ್ಯವನ್ನು ನೀಡುತ್ತದೆ.

5. ಬ್ಯಾಕ್ಟೀರಿಯಾ ವಿರೋಧಿ: ರೋಸ್ ವಾಟರ್ ತ್ವಚೆ ಸಂಬಂಧಿ ಸಮಸ್ಯೆಗಳನ್ನು ತಂದೊಡ್ಡುವ ಕೀಟಾಣು, ಬ್ಯಾಕ್ಟೀರಿಯಾಗಳನ್ನು ತೊಲಗಿಸುವಲ್ಲಿ ಸಹಕಾರಿ. ಚರ್ಮದ ಉರಿಯನ್ನು ಕಡಿಮೆಗೊಳಿಸಿ ಆರೋಗ್ಯ ಪೂರ್ಣ ತ್ವಚೆ ಹೊಂದಲು ಸಹಾಯ ಮಾಡುತ್ತದೆ.

ಪ್ರತಿ ರಾತ್ರಿ ರೋಸ್ ವಾಟರ್ ಲೇಪಿಸಿಕೊಂಡರೆ, ದಿನವಿಡೀ ತ್ವಚೆಯಲ್ಲಿ ಸೇರಿಕೊಳ್ಳುವ ಕೊಳೆ ಧೂಳನ್ನು ತೊಲಗಿಸಿ ತ್ವಚೆ ಆರೋಗ್ಯದಿಂದ ಹೊಳೆಯುವಂತೆ ಮಾಡುತ್ತದೆ. ಆದರೆ ರೋಸ್ ವಾಟರ್ ಹಚ್ಚಿಕೊಂಡ ನಂತರ ಶಾಖಕ್ಕೆ ಚರ್ಮವನ್ನು ಒಡ್ಡಿದರೆ ಟ್ಯಾನ್ ಸಮಸ್ಯೆ ಉಂಟಾಗಬಹುದು.