ಸ್ಲೀವ್ ಲೆಸ್ ಬಟ್ಟೆ ತೊಡಲು ಹಿಂಜರಿಕೆ ಏಕೆ?

Skin Care

oi-Sumalatha N

By Sumalatha N

Published: Saturday, August 27, 2011, 10:33 [IST]

ಸ್ಲೀವ್ ಲೆಸ್ ಅಥವಾ ತುಂಡು ತೋಳಿನ ಬಟ್ಟೆ ತೊಟ್ಟಾಗ ಕಪ್ಪಗಿರುವ ಕಂಕುಳಿನ ಭಾಗ ಹಿಂಜರಿಕೆ ಪಟ್ಟುಕೊಳ್ಳುವಂತೆ ಮಾಡಬಹುದು. ಅದರಲ್ಲೂ ಮೈ ಬಣ್ಣ ಸ್ವಲ್ಪ ಬೆಳ್ಳಗಿದ್ದು, ಈ ಭಾಗ ಮಾತ್ರ ಕಪ್ಪಗಿದ್ದರೆ ಖಂಡಿತ ಮುಜುಗರ ಪಟ್ಟುಕೊಳ್ಳಲೇಬೇಕಾಗುತ್ತದೆ. ವ್ಯಾಕ್ಸ್ ಮಾಡಿದ ನಂತರವೂ ಯಾವುದೇ ವ್ಯತ್ಯಾಸ ಕಂಡುಬಂದಿಲ್ಲ ಎಂದರೆ ಏನು ಪ್ರಯೋಜನ? ಆದರೆ ಇದಕ್ಕೆ ಬೇಜಾರಾಗುವ ಅಗತ್ಯ ಇಲ್ಲ.

ಅಂಡರ್ ಆರ್ಮ್ಸ್ ಬೆಳ್ಳಗೆ ಮಾಡಬಹುದಾದ ಕೆಲವು ಸಲಹೆ ಪಾಲಿಸಿದರೆ ಖಂಡಿತ ಈ ಸಮಸ್ಯೆ ದೂರಾಗಿ ಹಾಯಾಗಿ ಇಷ್ಟ ಬಂದ ಬಟ್ಟೆಗಳನ್ನು ತೊಡಬಹುದು.

ಅಂಡರ್ ಆರ್ಮ್ಸ್ ಬೆಳ್ಳಗೆ ಮಾಡಿಕೊಳ್ಳುವ ವಿಧಾನ ಹೀಗೆ:
1. ತುಂಬಾ ಗಡುಸಾದ ಬಟ್ಟೆಯಿಂದ ಒರೆಸಿಕೊಳ್ಳುವುದು, ಕಳಪೆ ಗುಣಮಟ್ಟದ ಡಿಯೋಡ್ರೆಂಟ್, ಚರ್ಮದ ನಿರ್ಜೀವ ಕಣ, ವ್ಯಾಕ್ಸಿಂಗ್ ವಿಧಾನ ಇವೆಲ್ಲವೂ ಕಂಕುಳು ಕಪ್ಪು ಬಣ್ಣಕ್ಕೆ ತಿರುಗುವುದಕ್ಕೆ ಕಾರಣವಾಗಬಹುದು. ಅದಕ್ಕೆ ನಿಂಬೆಹಣ್ಣು ಉತ್ತಮ ಪರಿಹಾರ. ನಿಂಬೆಹಣ್ಣಿನ ಸಿಪ್ಪೆಯನ್ನು ಎಸೆಯದಂತೆ ಹಚ್ಚಿಕೊಂಡರೆ ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಬಹುದು.

2. ಕಸ್ತೂರಿ ಅರಿಶಿನ ಮತ್ತು ವಿಟಮಿನ್ ಇ ಇರುವ ಎಣ್ಣೆ ಅಥವಾ ಕ್ರೀಂ ನಿಂದ ಮಸಾಜ್ ಮಾಡಿದರೆ ಕಂಕುಳಲ್ಲಿ ನಿರಂತರ ವ್ಯಾಕ್ಸಿಂಗ್ ನಿಂದ ಉಂಟಾಗಿರುವ ಸುಕ್ಕು ಕಡಿಮೆಯಾಗಿ ಚರ್ಮ ಮೃದುವಾಗುತ್ತದೆ. ಅರಿಶಿನ ನೈಸರ್ಗಿಕ ಬ್ಲೀಚ್ ನಂತೆ ಕೆಲಸ ಮಾಡುತ್ತದೆ.

3. ಸೌತೆಕಾಯಿ ರಸ ಮತ್ತು ಟೊಮೊಟೊ ಹೋಳಿನಿಂದ ಮಸಾಜ್ ಮಾಡಿಕೊಂಡು 8 ನಿಮಿಷದ ನಂತರ ಬೆಚ್ಚಗಿನ ನೀರಿನಿಂದ ತೊಳೆಯಬೇಕು. ಇದರಿಂದ ಚರ್ಮ ಮೃದುಗೊಂಡು ಬೆಳ್ಳಗಾಗುವಂತೆ ಮಾಡುತ್ತದೆ.

4. ಸ್ನಾನಕ್ಕೆ ಮುಂಚೆ ಅರಿಶಿನ, ಕಡಲೆಹಿಟ್ಟು, ನಿಂಬೆರಸ ಮತ್ತು ಹಾಲನ್ನು ಬೆರೆಸಿ ಹಚ್ಚಿಕೊಂಡರೆ ನಿರ್ಜೀವ ಕಣಗಳನ್ನು ತೊಲಗಿಸಿ ಚರ್ಮ ಹೊಳೆಯುವಂತೆ ಮಾಡುತ್ತದೆ.

5. ಗಂಧದ ಪುಡಿ ಈ ಸಮಸ್ಯೆಗೆ ಸೂಕ್ತ ಮದ್ದು. ಸುಗಂಧವನ್ನೂ ನೀಡುವುದರೊಂದಿಗೆ ನೈಸರ್ಗಿಕ ಬ್ಲೀಚ್ ಕೂಡ ಮಾಡುತ್ತದೆ. ತಾಜಾ ಹಾಲಿನೊಂದಿಗೆ ಗಂಧದ ಪುಡಿ ಬೆರೆಸಿ ಹಚ್ಚಿಕೊಂಡರೆ ಕಪ್ಪು ಕಲೆಯಿಂದ ಕ್ರಮೇಣ ಮುಕ್ತಿ ಹೊಂದಬಹುದು.

6.ಮೊಸರಿನೊಂದಿಗೆ ನಿಂಬೆರಸ ಮತ್ತು ಅರಿಶಿನ ಬೆರೆಸಿ ಹಚ್ಚಿಕೊಂಡರೆ ಚರ್ಮದ ಅನೇಕ ವ್ಯಾಧಿಗಳಿಂದ ಹೊರಬರುವುದು ಸಾಧ್ಯವಿದೆ.

ಈ ಸಲಹೆಗಳ ಹೊರತಾಗಿ ದೇಹದ ಬೊಜ್ಜನ್ನು ಇಳಿಸಿಕೊಳ್ಳಲು ಪ್ರಯತ್ನ ಪಡಿ. ಅತಿಯಾದ ಬೊಜ್ಜಿನಿಂದ ಕೂಡ ಚರ್ಮ ಉಜ್ಜಿಕೊಂಡು ಕಪ್ಪಗಾಗುವ ಸಾಧ್ಯತೆ ಇದೆ. ಇದಕ್ಕೆ ಕೀಟಾಣು ವಿರುದ್ಧ ಹೋರಾಡುವ ಸೂಕ್ತ ಕ್ರೀಂ ಅನ್ನು ಬಳಕೆ ಮಾಡಿ.