ತಾಜಾ ಹಾಲು ಬಳಸಿ ತಾಜ್ ಮಹಲಿನಂತೆ ಮಿನುಗಿ

Skin Care

oi-Sumalatha N

By Sumalatha N

Published: Monday, August 1, 2011, 12:56 [IST]

ಆರೋಗ್ಯದ ಅಮೃತ ಹಾಲಿನ ಬಗ್ಗೆ ಹೇಳೋದೇ ಬೇಡ. ಉತ್ತಮ ಆರೋಗ್ಯ ಮತ್ತು ಸೌಂದರ್ಯಕ್ಕೆ ಪೂರಕವಾಗಿರುವ ಹಾಲಿನ ಬಗ್ಗೆ ಎಲ್ಲರಿಗೂ ತಿಳಿದೇ ಇದೆ. ಹಾಲಿನಲ್ಲಿರುವ ಪ್ರೊಟೀನ್, ಕ್ಯಾಲ್ಸಿಯಂ, ಲಾಕ್ಟೋಸ್, ಕೊಬ್ಬಿನಂಶ, ವಿಟಮಿನ್ ಎ, ಬಿ 12 ಇನ್ನಿತರ ಅವಶ್ಯಕ ಅಂಶಗಳು ಹಾಲಿನಲ್ಲಿವೆ ಎಂಬ ಮಾಹಿತಿ ತಿಳಿದೇ ಇದೆ.

ಹಾಲಿನಲ್ಲಿರುವ ಈ ಅಂಶಗಳು ಸೌಂದರ್ಯಕ್ಕೆ ಮತ್ತಷ್ಟು ಉಪಯೋಗಕ್ಕೆ ಬರಲಿವೆ. ನಿಮ್ಮ ತ್ವಚೆಯನ್ನು ಹಾಲಿನಂತೆ ಶುಭ್ರವಾಗಿ ಹೊಳೆಯುವಂತೆ ಮಾಡುವುದರಲ್ಲಿ ಹಾಲು ಎಷ್ಟು ಸಹಕಾರಿ ಎಂಬುದನ್ನು ಇಲ್ಲಿ ನೋಡಬಹುದು.

ಹಾಲನ್ನು ಉಪಯೋಗಿಸಿಕೊಂಡು ಹೇಗೆ ನಿಮ್ಮ ತ್ವಚೆಯ ಆರೋಗ್ಯವನ್ನು ಹೆಚ್ಚಿಸಿಕೊಳ್ಳಬಹುದು ಎಂಬುದನ್ನು ತಿಳಿದುಕೊಳ್ಳಿ.
1. ಚರ್ಮದಲ್ಲಿನ ಜೀವ ಕಣವನ್ನು ನೈಸರ್ಗಿಕವಾಗಿ ಪುನಶ್ಚೇತನಗೊಳಿಸಲು 2 ಚಮಚ ಹಾಲಿನೊಂದಿಗೆ 1 ಚಮಚ ಅರಿಶಿನ, ಅರ್ಧ ಚಮಚ ನಿಂಬೆ ರಸ ಸೇರಿಸಿ ಮುಖಕ್ಕೆ ಮತ್ತು ಕುತ್ತಿಗೆ ಭಾಗಕ್ಕೆ ಲೇಪಿಸಿಕೊಳ್ಳಿ. 15 ನಿಮಿಷ ಬಿಟ್ಟು ಉಗುರು ಬೆಚ್ಚಗಿನ ನೀರಿನಲ್ಲಿ ಮುಖ ತೊಳೆದುಕೊಳ್ಳಿ. ಇದು ನಿರ್ಜೀವ ಕಣಗಳನ್ನು ತೊಲಗಿಸಿ ಚರ್ಮವನ್ನು ಕಾಂತಿಯುತವಾಗಿ ಕಾಣುವಂತೆ ಮಾಡುತ್ತದೆ.

2. ನೀವು ಯಾವುದಾದರೂ ಸಮಾರಂಭಕ್ಕೆ ಹೋಗಬೇಕೆಂದಾಗ ತಕ್ಷಣಕ್ಕೇ ತ್ವಚೆ ಹೊಳೆಯುವಂತೆ ಕಾಣಬೇಕು ಎಂದರೆ ಬಾದಾಮಿಯನ್ನು ಹಾಲಿನ ಜೊತೆ ರುಬ್ಬಿಕೊಂಡು ಅದಕ್ಕೆ ಕೆಲವು ಹನಿ ಆಲಿವ್ ಎಣ್ಣೆ ಬೆರೆಸಿ ಪೇಸ್ಟ್ ಮಾಡಿಕೊಳ್ಳಬೇಕು. ಇದಕ್ಕೆ ಕಿತ್ತಳೆ ಸಿಪ್ಪೆಯ ಪುಡಿಯನ್ನು ಬೆರೆಸಿ ಮುಖಕ್ಕೆ ಮತ್ತು ಕುತ್ತಿಗೆಯ ಭಾಗಕ್ಕೆ ಹಚ್ಚಿಕೊಳ್ಳಬೇಕು. 20 ನಿಮಿಷದ ನಂತರ ತಣ್ಣನೆ ನೀರಿನಲ್ಲಿ ತೊಳೆದುಕೊಂಡು ನಂತರ ಐಸ್ ಕ್ಯೂಬ್ ನಿಂದ 3 ನಿಮಿಷ ಮಸಾಜ್ ಮಾಡಿ ಮುಖ ಒಣಗಲು ಬಿಡಬೇಕು. ದಿಢೀರ್ ಅಂತ ಹೊಳಪು ಬರಬೇಕಾದರೆ ಈ ರೀತಿ ಮಾಡಿ ನೋಡಿ.

3. ಹಾಲಿನಿಂದ ಸುಲಭವಾಗಿ ಫೇಶಿಯಲ್ ಮಾಡಬಹುದಾದ ಇನ್ನೊಂದು ವಿಧಾನವೆಂದರೆ ಬಿಸಿ ಮಾಡಿದ ಹಾಲನ್ನು ಹತ್ತಿಯ ತುಂಡುಗಳಿಂದ 3-5 ನಿಮಿಷ ಪ್ರತಿನಿತ್ಯ ಮಸಾಜ್ ಮಾಡಿಕೊಳ್ಳಿ, ಖಂಡಿತ ವ್ಯತ್ಯಾಸ ನಿಮಗೇ ಗೋಚರಿಸುತ್ತದೆ.

4. ಒಣ ಚರ್ಮ ಸಮಸ್ಯೆಯಿಂದ ಬಳಲುತ್ತಿರುವವರು ಹಾಲು, ಜೇನು ಮತ್ತು ಬಾಳೆಹಣ್ಣನ್ನು ಚೆನ್ನಾಗಿ ಮಿಶ್ರಣ ಮಾಡಿ ಮುಖಕ್ಕೆ ಲೇಪಿಸಬೇಕು. ಅದು ಒಣಗುತ್ತಿದ್ದ ಹಾಗೆಲ್ಲ ಹಾಲಿನಿಂದ ತೇವ ಮಾಡಿಕೊಂಡು 10 ನಿಮಿಷ ಮಸಾಜ್ ಮಾಡಿಕೊಂಡು ಮುಖ ತೊಳೆದುಕೊಳ್ಳಬೇಕು. ಹಾಲಿನಲ್ಲಿನ ಲಾಕ್ಟಿಕ್ ಆಸಿಡ್, ತ್ವಚೆಯನ್ನು ಕ್ಲೆನ್ಸ್ ಮಾಡಲು ತುಂಬಾ ಉಪಯುಕ್ತ. ಇದರಿಂದ ನಿಮ್ಮ ತ್ವಚೆ ಹಾಲಿನಂತೆ ಶುಭ್ರವಾಗುತ್ತದೆ.

5. ಬೇಗ ನೆರಿಗೆಗಳು ಕಾಣಿಸಿಕೊಳ್ಳುವುದನ್ನು ತಡೆಯಲು ಜೇನು ಮತ್ತು ಹಾಲಿನ ಮಿಶ್ರಣದ ಫೇಸ್ ಪ್ಯಾಕ್ ಹಾಕಿಕೊಳ್ಳಿ. ಇದು ತಾಜಾ ತ್ವಚೆ ಪಡೆಯಲು ಸುಲಭದ ದಾರಿ.

ಅನೇಕ ಬಗೆಯ ತ್ವಚೆ ಸಮಸ್ಯೆಯಿಂದ ಬಳಲುತ್ತಿರುವವರು ಪ್ರತಿನಿತ್ಯ ಸಿಗುವ ಹಾಲನ್ನು ಬಳಸಿಕೊಂಡು ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಬಹುದು. ನೈಸರ್ಗಿಕವಾಗಿ, ಯಾವುದೇ ವಿರುದ್ಧ ಫಲಿತಾಂಶವಿಲ್ಲದ ಈ ಹಾಲಿನ ಫೇಶಿಯಲ್ ನಿಜಕ್ಕೂ ಸೌಂದರ್ಯಕ್ಕೆ ವರ.