ಕಣ್ಣಂಚಿನ ಈ ಕಾಡಿಗೆ ಮಾತಾಡುತಿದೆ ಮೆಲ್ಲಗೆ...

Make Up

oi-Sumalatha N

By Sumalatha N

Published: Friday, August 19, 2011, 17:02 [IST]

ಕಾಡಿಗೆ ಇಲ್ಲದಿದ್ದರೆ ಹೆಣ್ಣಿನ ಸಿಂಗಾರಕ್ಕೆ ಅರ್ಥವೆಲ್ಲಿ? ಕಣ್ಣ ನೋಟದಲ್ಲೆ ಎಲ್ಲ ಗೆಲ್ಲಬಲ್ಲ ಹೆಣ್ಣಿನ ಸೌಂದರ್ಯಕ್ಕೆ ಇದು ಬೇಕೇ ಬೇಕು. ಕಾಡಿಗೆಗೆ ಸೌಂದರ್ಯ ಸಾಧನಗಳಲ್ಲಿ ಅಗ್ರ ಸ್ಥಾನವಿದೆ. ಎಲ್ಲ ಅಂಗಡಿಗಳಲ್ಲು ಕಾಡಿಗೆ ಲಭ್ಯವಿದೆ. ಆದರೆ ಕೆಮಿಕಲ್ ಬಳಸಿರುವ ಈ ಕಾಡಿಗೆ ಕಣ್ಣಿಗೆ ಅಷ್ಟು ಹಿತವಲ್ಲ. ಆದ್ದರಿಂದ ಮನೆಯಲ್ಲೇ ಕಾಡಿಗೆ ತಯಾರಿಸಿ ಹಚ್ಚಿಕೊಳ್ಳುವುದು ಉತ್ತಮ. ಸುಲಭವಾಗಿ ತಯಾರಿಸಬಹುದಾದ ಈ ಕಾಡಿಗೆ ಕಣ್ಣಿಗೆ ಆರೋಗ್ಯವನ್ನೂ ನೀಡುತ್ತದೆ.

ಕಾಡಿಗೆ ತಯಾರಿಸಲು ಬೇಕಾಗುವ ಸಾಮಾಗ್ರಿಗಳು:
* 50 ಮಿ.ಲೀ ತುಪ್ಪ ಅಥವಾ ಎಳ್ಳೆಣ್ಣೆ
* ಬೆಳ್ಳಿ ದೀಪ
* ಉದ್ದವಾದ ದೀಪದ ಬತ್ತಿ
* ಒಂದು ತಾಮ್ರದ ತಟ್ಟೆ

ಕಾಡಿಗೆ ತಯಾರಿಸುವ ವಿಧಾನ: ದೀಪದ ತುಂಬಾ ತುಪ್ಪ ಸುರಿಯಬೇಕು. ಬತ್ತಿಯನ್ನು ತುಪ್ಪದಲ್ಲಿ ಅದ್ದಿಕೊಂಡು ದೀಪ ಹಚ್ಚಿಸಬೇಕು. ಈಗ ಹೊಗೆಯಾಡುವ ಮೇಲ್ಭಾಗಕ್ಕೆ ತಾಮ್ರದ ತಟ್ಟೆಯನ್ನು ಯಾವುದಾದರೂ ಸ್ಟಾಂಡ್ ಸಹಾಯದಿಂದ ಇಡಬೇಕು. ನಂತರ ದೀಪವನ್ನು ಗಾಳಿಯಿರದ ಜಾಗದಲ್ಲಿ ಸುಮಾರು 10 ಗಂಟೆಗಳ ಅವಧಿ ಉರಿಯಲು ಬಿಡಬೇಕು. ಕಾಡಿಗೆ ತಯಾರಿಸಲು ರಾತ್ರಿ ಹೊತ್ತು ಸೂಕ್ತ. ಪೂರ್ತಿ ತುಪ್ಪ ಹೀರಿಕೊಳ್ಳುವವರೆಗೂ ದೀಪ ಉರಿಯಲು ಬಿಟ್ಟು ನಂತರ ಮೇಲೆ ಇರಿಸಿದ್ದ ತಾಮ್ರದ ತಟ್ಟೆ ತೆಗೆದು ಅದಕ್ಕೆ ಅಂಟಿಕೊಂಡಿದ್ದ ಗಟ್ಟಿಯಾದ ಕಪ್ಪನ್ನು ತೆಗೆದುಕೊಳ್ಳಬೇಕು.

ಈ ಕಪ್ಪು ಪುಡಿಗೆ ಅರ್ಧ ಚಮಚ ತುಪ್ಪ ಸೇರಿಸಿ ಮಿಶ್ರಣವನ್ನು ಬೆರಳಿನಿಂದ ಗಟ್ಟಿಯಾಗಿ ಕಾಡಿಗೆಯಂತಾಗುವವರೆಗೂ ಕದಡಬೇಕು. ಅತಿಯಾಗಿ ತೆಳುವೂ ಆಗಿರದ, ಗಟ್ಟಿಯೂ ಆಗಿರದ ರೀತಿ ಒಂದು ಹದಕ್ಕೆ ಕಾಡಿಗೆ ಕಲೆಸಬೇಕು. ಗಾಳಿಯಾಡದ ಡಬ್ಬದಲ್ಲಿ ಕಾಡಿಗೆ ಹಾಕಿ 2-3 ಗಂಟೆ ಫ್ರಿಡ್ಜ್ ನಲ್ಲಿ ಇಡಬೇಕು. ನಂತರ ತೆಗೆದು ಆಚೆ ಇಟ್ಟುಕೊಳ್ಳಬಹುದು.

ಈಗ ಕಾಡಿಗೆ ರೆಡಿಯಾಗಿದೆ. ಕೆಮಿಕಲ್ ಸೋಂಕೇ ಇಲ್ಲದೆ ನೈಸರ್ಗಿಕವಾಗಿ ತಯಾರಿಸಬಹುದಾದ ಈ ಕಾಡಿಗೆ ಕಣ್ಣಿಗೆ ಉಡುಗೊರೆ ಇದ್ದಂತೆ.