ಮನೆಯ ಹಿತ್ತಲಿನಲ್ಲಿದೆ ಸೊಂಪಾದ ಕೂದಲಿಗೆ ಮದ್ದು

Hair Care

oi-Reena

By Hema S

Published: Thursday, May 24, 2012, 16:11 [IST]

ಕೂದಲಿನ ಆರೈಕೆಗೆ ತುಂಬಾ ಹಣ ಖರ್ಚು ಮಾಡಬೇಕೆಂದಿಲ್ಲ. ಮನೆಯಲ್ಲಿರುವ ವಸ್ತುಗಳಿಂದಲೇ ಕೂದಲಿನ ಆರೈಕೆ ಮಾಡಬಹುದು. ಈ ರೀತಿ ಆರೈಕೆ ಮಾಡಿದರೆ ಕೂದಲಿನ ಮೇಲೆ ಯಾವುದೇ ಅಡ್ಡ ಪರಿಣಾಮ ಕೂಡ ಬೀರುವುದಿಲ್ಲ. ಕೂದಲು ಚೆನ್ನಾಗಿ ಬೆಳೆಯುತ್ತಿಲ್ಲ ಅಥವಾ ಚೆನ್ನಾಗಿದ್ದ ಕೂದಲು ಉದುರಿ ಹಾಳಾಗುತ್ತಿದೆ ಎಂದು ಶ್ಯಾಂಪೂ, ಕಂಡೀಷನರ್ ಅಂತ ಮತ್ತೆ ತುಂಬಾ ರಾಸಾಯನಿಕಗಳನ್ನು ಬಳಸಿ ಕೂದಲು ಹಾಳು ಮಾಡದೆ ಈ ಕೆಳಗಿನ ಸಲಹೆಗಳನ್ನು ಪಾಲಿಸುವುದು ಒಳ್ಳೆಯದು.

1. ತುಳಸಿ: ಒಂದು ಬಟ್ಟಲು ಬಿಸಿ ನೀರಿನಲ್ಲಿ ಒಂದು ಹಿಡಿಯಷ್ಟು ತುಳಸಿ ಎಲೆಯನ್ನು ಮತ್ತು 2 ಚಮಚ ಟೀ ಸೊಪ್ಪನ್ನು ಹಾಕಿ ಕುದಿಸಬೇಕು. ಈ ಮಿಶ್ರಣವನ್ನು ಸೋಸಿ ರಸವನ್ನು ತಲೆಗೆ ಹಚ್ಚಿ ಅರ್ಧ ತಾಸು ಬಿಟ್ಟು ಸ್ನಾನ ಮಾಡಿದರೆ ಕೂದಲು ಕಾಂತಿಯುತವಾಗಿ ನುಣುಪಾಗುವುದಲ್ಲದೆ ಬೇಗನೆ ಕೂದಲು ಬೆಳ್ಳಗಾಗುವುದಿಲ್ಲ.

2. ಮೊಟ್ಟೆ ಮತ್ತು ಗ್ಲಿಸರಿನ್: ಮೊಟ್ಟೆ ಬಳಸಿದರೆ ಕೂದಲು ಹೊಳಪನ್ನು ಹೊಂದುತ್ತದೆ. ಕೂದಲು ಮತ್ತಷ್ಟು ಕಾಂತಿಯುತವಾಗಲು ಎರಡು ಮೊಟ್ಟೆಯ ಬಿಳಿ, ಕೊಬ್ಬರಿ ಎಣ್ಣೆ ಮತ್ತು 1 ಚಮಚ ಗ್ಲಿಸರಿನ್ ಹಾಕಿ ಮಿಶ್ರಣವನ್ನು ಚೆನ್ನಾಗಿ ಕಲೆಸಿ ತಲೆಗೆ ಹಚ್ಚಬೇಕು. ನಂತರ ಟವಲ್ ಅನ್ನು ಬಿಸಿ ನೀರಿನಲ್ಲಿ ಅದ್ದಿ ಹಿಂಡಿ ತಲೆಗೆ ಸುತ್ತಿ ಒಂದು ಗಂಟೆಯ ಬಳಿಕ ತಲೆ ತೊಳೆಯಬೇಕು. ಈ ರೀತಿ ವಾರಕ್ಕೊಮ್ಮೆಯಾದರೂ ಮಾಡಿದರೆ ಕೂದಲು ಆಕರ್ಷಕವಾಗುತ್ತದೆ.

2. ನಿಂಬೆ ಹಣ್ಣು: ತಲೆಹೊಟ್ಟಿದ್ದರೆ ಎಣ್ಣೆ ಹಾಕಿ ನಿಂಬೆರಸವನ್ನು ತಲೆ ಬುಡಕ್ಕೆ ಉಜ್ಜಿ ಅರ್ಧ ಗಂಟೆ ಬಳಿಕ ತಲೆ ತೊಳೆಯಬೇಕು. ಈ ರೀತಿ ಮಾಡಿದರೆ ಹೊಟ್ಟು ಕಮ್ಮಿಯಾಗುತ್ತದೆ. ನಂತರ ತಲೆಯನ್ನು ಚೆನ್ನಾಗಿ ಒಣಗಿಸಿ ನಂತರ ಕೂದಲನ್ನು ಕಟ್ಟಬೇಕು.

4. ಟೀ ಎಲೆ: ಟೀ ಮಾಡಿದ ನಂತರ ಅದರ ಬೆಂದ ಸೊಪ್ಪನ್ನು ಹಾಗೇ ಬಿಸಾಡದೆ ತಣ್ಣೀರಿನಲ್ಲಿ ನೆನೆಸಿ ಬೆಳಗ್ಗೆ ಆ ನೀರಿನಲ್ಲಿ ಕೂದಲು ತೊಳೆದೆರ ಹೊಳೆಯುವ ಕಪ್ಪುಕೂದಲನ್ನು ಪಡೆಯಬಹುದು.

5. ತಾವರೆ: ತಾವರೆಯ ದಂಟನ್ನು ಜಜ್ಜಿ ಬೆಚ್ಚಗಿನ ನೀರಿನಲ್ಲಿ 1 ತಾಸಿನ ಕಾಲ ನೆನೆಸಿ, ಆನಂತರ ಶೋಧಿಸಿ ತಲೆ ನೆತ್ತಿಗೆ, ಕೂದಲಿನ ಬುಡಕ್ಕೆ ತಿಕ್ಕಿ ಸ್ನಾನ ಮಾಡುವುದರಿಂದ ಸೊಂಪಾಗಿ ಮತ್ತು ಕಾಂತಿಯುತವಾಗಿ ಬೆಳೆಯುತ್ತದೆ.

6. ದಾಸವಾಳದ ಸೊಪ್ಪು: ದಾಸವಾಳದ ಎಲೆಯನ್ನು ಅರೆದು ತಲೆಗೆ ಹಚ್ಚಿ ಸ್ನಾನ ಮಾಡಿದರೆ ಕೂದಲು ದಪ್ಪ ಮತ್ತು ಉದ್ದವಾಗುವುದು.