ಕೂದಲು ಉದುರದಿರುವುದಕ್ಕೆ ಪರಿಣಾಮಕಾರಿ ವಿಧಾನ

Hair Care

oi-Reena

By Hema S

Updated: Tuesday, August 7, 2012, 10:22 [IST]

ಕೂದಲು ಡ್ರೈ ಆಗುವುದು(ಒಣಗುವುದು), ಕೂದಲು ತುಂಬಾ ಉದುರುವುದು ಈ ರೀತಿಯ ಸಮಸ್ಯೆಗಳು ಪೋಷಕಾಂಶಗಳ ಕೊರತೆಯಿಂದ ಉಂಟಾಗುತ್ತದೆ. ಈ ರೀತಿಯ ಸಮಸ್ಯೆ ಕಂಡು ಬಂದರೆ ಬ್ಯೂಟಿಷಿಯನ್ ಹತ್ತಿರ ಸಲಹೆ ಕೇಳಲು ಹೋದರೆ ತುಂಬಾ ಬೆಲೆ ಬಾಳುವ ಶ್ಯಾಂಪೂ , ಕಂಡೀಷನರ್ ಹೆಸರು ಹೇಳುತ್ತಾರೆ.

ಅವರು ಹೇಳಿದ ಸಲಹೆಯನ್ನು ಪಾಲಿಸಿದಾಗ ಈ ಸಮಸ್ಯೆ ಸ್ವಲ್ಪ ಸಮಯ ಕಡಿಮೆಯಾದಂತೆ ಕಂಡರೂ ಸ್ವಲ್ಪ ದಿನದಲ್ಲಿ ಮತ್ತೆ ಅದೇ ಸಮಸ್ಯೆ ಕಂಡುಬರುತ್ತದೆ. ಅದರಲ್ಲೂ ಕೂದಲು ಉದುರುವ ಸಮಸ್ಯೆ ಪುರುಷರಲ್ಲಿ ಹೆಚ್ಚಾಗಿ ಕಂಡು ಬರುತ್ತಿದ್ದು, ಹೆಚ್ಚಿನವರಲ್ಲಿ ಬಕ್ಕ ತಲೆ ಚಿಕ್ಕ ಪ್ರಾಯದಲ್ಲಿಯೆ ಉಂಟಾಗುತ್ತಿದೆ. ಪುರುಷರಿಗೆ ಬಕ್ಕ ತಲೆ ಸಮಸ್ಯೆ ಉಂಟಾಗಲು ಈ ಕೆಳಗಿನ ಅಂಶಗಳು ಕಾರಣವಾಗಿವೆ.

* ಅಸಮತೋಲನದ ಆಹಾರಕ್ರಮ
* ವಿಟಮಿನ್ ಗಳ ಕೊರತೆ
* ಒತ್ತಡ ಮತ್ತು ಚಿಂತೆ
* ಕಾಮಲೆ, ರಕ್ತಹೀನತೆ, ಸರಿಯಾಗಿ ರಕ್ತ ಸಂಚಲನ ಆಗದಿರುವುದು
* ತಲೆಬುಡವನ್ನು ಶುದ್ಧವಾಗಿ ಇಟ್ಟುಕೊಳ್ಳದಿರುವುದು

ಪುರುಷರಾಗಲಿ ಅಥವಾ ಮಹಿಳೆಯರಾಗಲಿ ಕೂದಲು ಉದುರುವ ಸಮಸ್ಯೆ ಕಂಡು ಬಂದರೆ ಈ ಕೆಳಗಿನ ವಿಧಾನಗಳನ್ನು ಅನುಸರಿಸಿ ನೋಡಿ, ಕೂದಲು ಸಮಸ್ಯೆಯಿಂದ ಸಂಪೂರ್ಣ ಗುಣಮುಖವಾಗಬಹುದು.

1. ಅಗಸದ ಬೀಜ( flaxseed)ವನ್ನು ನೀರಿನಲ್ಲಿ ನೆನಹಾಕಿ ಪ್ರತಿದಿನ ಬೆಳಗ್ಗೆ ಖಾಲಿ ಹೊಟ್ಟಯಲ್ಲಿ ಸೇವಿಸಬೇಕು. ಇದರಲ್ಲಿ ಒಮೆಗಾ 3 ಕೊಬ್ಬಿನಂಶವಿರುವುದರಿಂದ ಕೂದಲಿನ ಆರೋಗ್ಯ ಹೆಚ್ಚುವುದು.

2. ಪ್ರತಿದಿನ ಒಂದು ನೆಲ್ಲಿಕಾಯಿ ತಿನ್ನಿ. ನೆಲ್ಲಿಕಾಯಿ ಎಣ್ಣೆಯನ್ನು ಕೂಡ ತಲೆಗೆ ಬಳಸಬಹುದು.

3. 4-5 ಬಾದಾಮಿಯನ್ನು ನಿರಿನಲ್ಲಿ ನೆನೆಹಾಕಿ ಬೆಳಗ್ಗೆ ಅದರ ಸಿಪ್ಪೆ ಸಹಿತ ತಿಂದರೆ ಕೂದಲಿಗೆ ಒಳ್ಳೆಯದು.

4. ಮೊಸರು, ಎಳನೀರು, ನಿಂಬೆ ಪಾನಕ ಇವುಗಳನ್ನು ಕುಡಿಯುವುದರಿಂದ ಕೂದಲಿನ ಬುಡ ಬಲವಾಗುವುದು. ದಿನಕ್ಕೆ 2 ಲೋಟ ಗಟ್ಟಿ ಹಾಲು ಕುಡಿಯುವುದರಿಂದ ಕೂದಲಿಗೆ ಅವಶ್ಯಕವಾದ ಪೋಷಕಾಂಶ ದೊರೆಯುತ್ತದೆ. ಪ್ರತಿನಿತ್ಯ 8-10 ಗ್ಲಾಸ್ ನೀರು ಕುಡಿಯಿರಿ.

5. ಪ್ರತಿದಿನ ಒಂದು ಮೊಟ್ಟೆ ತಿನ್ನುವುದು ಒಳ್ಳೆಯದು. ಚಿಕನ್ ನಲ್ಲಿರುವ ಪ್ರೊಟೀನ್ ಅಂಶ ಕೂದಲಿನ ಆರೋಗ್ಯ ಹೆಚ್ಚಿಸುವಲ್ಲಿ ಸಹಕಾರಿಯಾಗಿದೆ.

6. ಕಬ್ಬಿಣದಂಶ ಅಧಿಕವಿರುವ ಹಣ್ಣು , ಸೊಪ್ಪು ತರಕಾರಿಗಳನ್ನು ಸೇವಿಸಿ.

ಈ ಮೇಲಿನ ವಿಧಾನಗಳನ್ನು ಅನುಸರಿಸಿದರೆ ಒಂದು ತಿಂಗಳಿನೊಳಗೆ ಕೂದಲು ಉದುರುವ ಸಮಸ್ಯೆ ಸಂಪೂರ್ಣವಾಗಿ ನಿಲ್ಲುವುದು.