ವಿಚ್ಛೇದನದಿಂದ ಮಹಿಳೆಯರಲ್ಲಿ ಕೂದಲುದುರುವ ಸಮಸ್ಯೆ!

ಮಹಿಳೆ ಮತ್ತು ಪುರುಷರಲ್ಲಿ ಕೂದಲುದುರುವಿಕೆಗೆ ವಯಸ್ಸು ಮತ್ತು ಅನುವಂಶಿಕ ಕಾರಣ. ಆದರೆ ಇದೀಗ ಕೇಸ್ ವೆಸ್ಟರ್ನ್ ಸ್ಕೂಲ್ ಆಫ್ ಮೆಡಿಸನ್ ನಡೆಸಿದ ಸಂಶೋಧನೆಯಿಂದ, ವೈವಾಹಿಕ ಜೀವನದಲ್ಲಿ ಸಂತೋಷದಿಂದಿರುವ ಮಹಿಳೆಯರಿಗಿಂತ, ವಿಚ್ಛೇದನ ಪಡೆದ ಮಹಿಳೆಯರು ಕೂದಲಿನ ಸಮಸ್ಯೆಗೆ ಹೆಚ್ಚು ಒಳಗಾಗುತ್ತಾರೆ ಎಂದು ತಿಳಿಸಿದೆ.

ಇದಕ್ಕೆ ಅತಿಯಾದ ಒತ್ತಡವೇ ಕಾರಣ, ವಿಚ್ಛೇದನದ ನಂತರ ಒತ್ತಡ ಹೆಚ್ಚಾಗಿ ಕೂದಲುದುರುವಿಕೆಗೆ ಮುಖ್ಯ ಕಾರಣವಾಗುತ್ತದೆ, ಅದರಲ್ಲೂ ಮಹಿಳೆಯರಲ್ಲಿ ಈ ಸಮಸ್ಯೆ ಪರಿಣಾಮ ಹೆಚ್ಚಾಗಿರುತ್ತದೆ ಎಂದು ಸಂಶೋಧನೆ ವಕ್ತಾರ ಡಾ. ಬಹಮನ್ ಗಯುರಾನ್ ತಿಳಿಸಿದ್ದಾರೆ.

ವಿಚ್ಛೇದನದೊಂದಿಗೆ, ಮಕ್ಕಳ ಕುರಿತಾಗಿಯೂ ಮಹಿಳೆಯರಲ್ಲಿ ಹೆಚ್ಚುವ ಮಾನಸಿಕ ಒತ್ತಡ ಕೂದಲು ತೆಳ್ಳಗಾಗುವಂತೆ ಮಾಡುತ್ತದೆ. ವಿಚ್ಛೇದನದ ನಂತರ ಮಹಿಳೆಯರು ಮದ್ಯವ್ಯಸನಕ್ಕೆ ಇಳಿದರೆ ಕೂದಲಿನ ಸ್ಥಿತಿ ದಿನದಿಂದ ದಿನಕ್ಕೆ ಹದಗೆಡುತ್ತದೆ ಎಂದೂ ತಿಳಿಸಿದೆ.

84 ಮಹಿಳೆಯರ ಮೇಲೆ ನಡೆಸಿದ ಸಂಶೋಧನೆಯಿಂದ ಈ ಫಲಿತಾಂಶ ದೊರೆತಿದ್ದು, ವಿಚ್ಛೇದನದಿಂದ ಪುರುಷರಿಗಿಂತ ಮಹಿಳೆಯರ ಕೂದಲಿನ ಮೇಲೆ ಹೆಚ್ಚು ಪರಿಣಾಮ ಉಂಟಾಗುತ್ತದೆ. ಆದರೆ ಮಹಿಳೆ ಅಥವಾ ಪುರುಷರಲ್ಲಿ ಕುಡಿತ ಮತ್ತು ಧೂಮಪಾನ ಹೆಚ್ಚಾದರೆ ಕೂದಲುದುರುವ ಸಮಸ್ಯೆ ಇಬ್ಬರಲ್ಲೂ ಅಧಿಕವಾಗುತ್ತದೆ ಎಂದು ಅಧ್ಯಯನ ತಿಳಿಸಿದೆ.