ಕೂದಲಿನ ಚಿಂತೆ ಕಾಡದಿರಲಿ ಮತ್ತೆ ಮತ್ತೆ

Hair Care

oi-Sumalatha N

By Sumalatha N

Published: Friday, July 29, 2011, 15:51 [IST]

ಆರೋಗ್ಯಕರ ಮತ್ತು ಆಕರ್ಷಕ ಕೇಶ ರಾಶಿ ಇರಬೇಕು ಅಂತ ಎಲ್ಲ ಹುಡುಗಿಯರಿಗೂ ಆಸೆ ಇರುತ್ತೆ. ಆದ್ರೆ ಏನೇ ಮಾಡಿದ್ರೂ ಕೂದಲು ಸರಿಯಾಗಿ ಬೆಳೆಯೋದೆ ಇಲ್ಲ. ಉದುರಿಕೆ ಹೆಚ್ಚಾಗಿ ಚಿಂತೆ ಕಾಡೋದಕ್ಕೆ ಶುರು ಮಾಡುತ್ತೆ. ಏನೆಲ್ಲಾ ಮಾಡಿದ್ರು ದಿನೇದಿನೇ ತೆಳುವಾಗುತ್ತಿರೊ ಕೂದಲಿನ ಬಗ್ಗೆ ಅಸಹಾಯಕತೆ ಮೂಡುತ್ತೆ. ಆದರೆ ಇವೆಲ್ಲ ನಮ್ಮ ದೇಹದಲ್ಲಿನ ಪೌಷ್ಟಿಕಾಂಶದ ಕೊರತೆಯಿಂದ ಆಗುವುದು ಎಂಬುದನ್ನು ಮರೆಯಬಾರದು.

ಯಾವುದನ್ನು ಸೇವಿಸಿದರೆ ನಮ್ಮ ಕೂದಲ ಬೆಳವಣಿಗೆಗೆ ಅವಶ್ಯಕ ವಿಟಮಿನ್ ಮತ್ತು ಮಿನರಲ್ ದೊರೆಯುತ್ತದೆ ಎಂದು ತಿಳಿದುಕೊಳ್ಳೋಣ.

* ಹೂಕೋಸು ಮತ್ತು ಪಾಲಾಕ್ : ಇವುಗಳಲ್ಲಿ ವಿಟಮಿನ್ ಎ ಮತ್ತು ಸಿ ಹೇರಳವಾಗಿರುವುದರಿಂದ, ಇವುಗಳ ಸೇವನೆ ನೈಸರ್ಗಿಕ ಕಂಡೀಶನರ್ ಮತ್ತು ಕೂದಲಿಗೆ ಬೇಕಾಗುವ ಎಣ್ಣೆ ಅಂಶ ಕೊಡುವ ಸೆಬಂ ಉತ್ಪಾದನೆಗೆ ಸಹಕಾರಿಯಾಗುತ್ತದೆ. ಎಲ್ಲ ರೀತಿಯ ಹಸಿರು ತರಕಾರಿಗಳ ಸೇವನೆ ಕೂದಲು ಮತ್ತು ದೇಹ ಎರಡಕ್ಕೂ ಪ್ರಯೋಜನ.

* ಕಾಳುಗಳು: ಅವರೆಕಾಳು ಮತ್ತು ಸೋಯಾ ಬೀನ್ ನಲ್ಲಿ ಝಿಂಕ್ ಮತ್ತು ಪ್ರೊಟೀನ್ ಮಾತ್ರವಲ್ಲದೆ ಹೊಸ ಕೂದಲ ಬೆಳವಣಿಗೆಗೆ ಸಹಾಯ ಮಾಡುವ ಬೈಯೋಟಿನ್ ಅಂಶ ಹೆಚ್ಚಿರುವುದರಿಂದ ಇದರ ಸೇವನೆ ಕೂದಲನ್ನು ಸೂಕ್ಷ್ಮತೆಯಿಂದ ಮತ್ತು ತೆಳುಗೊಳ್ಳುವುದರಿಂದ ಕಾಪಾಡುತ್ತದೆ. ಇನ್ನಿತರ ಕಾಳುಗಳ ಸೇವನೆಯೂ ನಿಮ್ಮ ಆಹಾರದಲ್ಲಿ ಇರಲಿ.

* ಧಾನ್ಯಗಳು: ಎಲ್ಲ ರೀತಿಯ ಧಾನ್ಯಗಳೂ ದೇಹ ಮತ್ತು ಕೂದಲಿನ ಆರೋಗ್ಯಕ್ಕೆ ಪ್ರಮುಖವಾದದ್ದು. ಗೋಧಿ, ರಾಗಿ ಮುಂತಾದ ಧಾನ್ಯಗಳನ್ನು ದಿನನಿತ್ಯದ ಆಹಾರದಲ್ಲಿ ಬಳಸುವುದರಿಂದ ಹೆಚ್ಚು ಕಬ್ಬಿಣಾಂಶ, ವಿಟಮಿನ್ ಬಿ-12 ದೊರೆತು ಕೂದಲು ಗಟ್ಟಿ ಮುಟ್ಟಾಗುತ್ತದೆ.

*ಮೊಟ್ಟೆ ಮತ್ತು ಮಾಂಸ: ಮೊಟ್ಟೆ ಮತ್ತು ಕೋಳಿ ಮಾಂಸ ಕೂದಲ ಬೆಳವಣಿಗೆಗೆ ಅವಶ್ಯಕವಿರುವ ಪ್ರೊಟೀನ್ ಒದಗಿಸಿ, ಕೂದಲು ಕವಲೊಡೆಯುವುದು ಮತ್ತು ಉದುರಿಹೋಗುವುದನ್ನು ತಡೆಯಲು ಸಹಾಯ ಮಾಡುತ್ತದೆ.

* ಮೀನು: ಮೀನಿನಲ್ಲಿನ ಒಮೆಗಾ 3- ಫ್ಯಾಟಿ ಆಸಿಡ್ಸ್ ಕೂದಲು ಹೊಳೆಯುವಂತೆ ಮತ್ತು ಸೊಂಪಾಗಿ ಸುಂದರಗೊಳ್ಳುವಂತೆ ಮಾಡುತ್ತದೆ. ಮೀನನ್ನು ವಾರಕ್ಕೊಮ್ಮೆಯಾದರೂ ಸೇವಿಸಿದರೆ ತುಂಬಾ ಗಟ್ಟಿಮುಟ್ಟಾದ ಕೂದಲಲ್ಲದೆ ಮೆದುಳೂ ಚುರುಕುಗೊಳ್ಳುತ್ತದೆ.

* ಹುಳಿ ಹಣ್ಣುಗಳು: ಬೆಟ್ಟದ ನಲ್ಲಿಕಾಯಿ, ನೇರಳೆ, ಕಿತ್ತಳೆ, ನಿಂಬೆ ಮುಂತಾದ ಕೈಗೆಟುಕುವ ದರದಲ್ಲಿ ಸಿಗುವ ಹಣ್ಣುಗಳನ್ನು ತಿಂದರೆ ಕೂದಲು ಬೇರಿನಿಂದ ಗಟ್ಟಿಗೊಂಡು ಉದುರುವಿಕೆ ಕಡಿಮೆಯಾಗುತ್ತದೆ.

ಬೇರೆಲ್ಲಾ ಮಾರ್ಗ ಹಿಡಿದು ಕೂದಲು ಉದುರುವಿಕೆಯನ್ನು ತಡೆಯಲು ಪ್ರಯತ್ನಿಸುವುದರ ಬದಲು ಈ ನೈಸರ್ಗಿಕ ಮತ್ತು ಆರಾಮದಾಯಕ ಆಹಾರ ಕ್ರಮವನ್ನು ಅನುಸರಿಸುವುದು ತುಂಬಾ ಸುಲಭೋಪಾಯವಲ್ಲವೇ?