ಮೋಡಿಮಾಡಲಿ ನಿಮ್ಮ ಬೆನ್ನಿನ ಸೌಂದರ್ಯ

Body Care

oi-Sumalatha

By Sumalatha

Published: Monday, October 17, 2011, 15:52 [IST]

ನೀವು ಡೀಪ್ ನೆಕ್, ಬ್ಯಾಕ್ ಲೆಸ್ ಡ್ರೆಸ್ ಅಥವಾ ಬ್ಲೌಸ್ ತೊಡಲು ಹಿಂಜರಿಯುತ್ತೀರ ಎಂದರೆ ಅದಕ್ಕೆ ಕಳೆಗೆಟ್ಟ ಬೆನ್ನೂ ಒಂದು ಕಾರಣವಾಗಿರಬಹುದು. ಬಿಸಿಲು,ಇನ್ನಿತರ ಪ್ರದೂಷಣೆಗೆ ಬೇಗ ತೆರೆದುಕೊಳ್ಳುವ ಬೆನ್ನಿನಲ್ಲಿ ಬಣ್ಣ ಬದಲಾಗುವುದು, ಬ್ಲಾಕ್ ಹೆಡ್, ಮೊಡವೆಗಳು ಕಾಣಿಸಿಕೊಳ್ಳುವುದು ಸಾಮಾನ್ಯ.

ಆದರೆ ಮನೆಯಲ್ಲೇ ಸಿಗುವ ವಸ್ತುಗಳನ್ನು ಉಪಯೋಗಿಸಿಕೊಂಡು ಸಮಸ್ಯೆಗಳಿಂದ ಬೆನ್ನನ್ನು ಮುಕ್ತಗೊಳಿಸುವುದು ಸಾಧ್ಯವಿದೆ.

ಬೆನ್ನನ್ನು ಕಾಂತಿಯುತಗೊಳಿಸಲು ಹೀಗೆ ಮಾಡಿ:

ಟೊಮೆಟೊ: ಕಳಿತ ಟೊಮೆಟೊ ರಸ ತೆಗೆದುಕೊಂಡು ಅದನ್ನು ಬೆನ್ನಿನ ಮೇಲೆ ಉಜ್ಜಿ ಕೆಲವು ನಿಮಿಷ ಹಾಗೆಯೇ ಬಿಡಬೇಕು. ಎರಡು ದಿನಗಳಿಗೊಮ್ಮೆ ಈ ರೀತಿ ಮಾಡಿಕೊಳ್ಳುತ್ತಿದ್ದರೆ ಫಲಿತಾಂಶವನ್ನು ನೀವು ಕಂಡುಕೊಳ್ಳಬಹುದು.

ನಿಂಬೆಹಣ್ಣು: ಮೊಡವೆ, ಗುಳ್ಳೆಗಳ ನಿವಾರಣೆ ವಿಷಯಕ್ಕೆ ಬಂದರೆ ನಿಂಬೆಹಣ್ಣು ತುಂಬಾ ಪರಿಣಾಮಕಾರಿ. ಒಂದೇ ಪ್ರಮಾಣದಲ್ಲಿ ನಿಂಬೆ ರಸ ಮತ್ತು ರೋಸ್ ವಾಟರ್ ಬೆರೆಸಿ ಬೆನ್ನಿಗೆ ಹಚ್ಚಿಕೊಂಡರೆ ಕಲೆ, ಮೊಡವೆ ಕ್ರಮೇಣ ಮಾಯವಾಗುತ್ತದೆ.

ಮೆಂತ್ಯೆ ಕಾಳು: ಮೆಂತ್ಯೆ ಕಾಳನ್ನು ನೆನೆಸಿ ರುಬ್ಬಿ ಮೊಡವೆ ಎದ್ದ ಜಾಗಕ್ಕೆ ಮಾತ್ರ ಲೇಪಿಸಿಕೊಂಡು ಅದು ಒಣಗುವವರೆಗೂ ಕಾದು ತೊಳೆಯಬೇಕು. ಹೀಗೆ ಮಾಡುವುದರಿಂದ ಬೆನ್ನಿನ ಮೇಲಿನ ಮೊಡವೆ ಗುಳ್ಳೆಗಳು ಬೇಗನೆ ಹೊರಟುಹೋಗುತ್ತವೆ.

ಕಿತ್ತಳೆ ಸಿಪ್ಪೆ: ಒಣಗಿದ ಕಿತ್ತಳೆ ಸಿಪ್ಪೆಯನ್ನು ನೀರಿನಲ್ಲಿ ನೆನೆಸಿ ಹಾಲನ್ನು ಸೇರಿಸಿ ರುಬ್ಬಿಕೊಂಡು ಅದನ್ನು ಬೆನ್ನಿಗೆ ಹಚ್ಚಿಕೊಂಡು 15 ರಿಂದ 20 ನಿಮಿಷ ಬಿಟ್ಟು ತೊಳೆದುಕೊಳ್ಳಬೇಕು. ಇದು ಬೆನ್ನಿಗೆ ಕಾಂತಿಯನ್ನು ನೀಡುತ್ತದೆ.

ಮೊಟ್ಟೆ: ಮೊಟ್ಟೆಯ ಬಿಳಿ ಭಾಗವನ್ನು ಬೇರ್ಪಡಿಸಿಕೊಂಡು ಬೆನ್ನಿಗೆ ಹಚ್ಚಿಕೊಳ್ಳಬೇಕು. ಅದು ಸಂಪೂರ್ಣ ಒಣಗಿದ ನಂತರವಷ್ಟೇ ತೊಳೆಯಬೇಕು. ಇದನ್ನು ಲೇಪಿಸಿಕೊಂಡಾಗ ಯಾವುದೇ ಕೆಲಸವನ್ನು ಮಾಡಬಾರದು.

ಈ ಟಿಪ್ಸ್ ಗಳನ್ನು ಅನುಸರಿಸಿದರೆ ನಿಮ್ಮ ಮುಖದಂತೆ ನಿಮ್ಮ ಬೆನ್ನೂ ಕೂಡ ಸುಂದರವಾಗಿ ಗೋಚರಿಸಲು ಸಾಧ್ಯವಿದೆ.