ಟೈಟಾದ ಬಟ್ಟೆ ಆರೋಗ್ಯ ಕೆಡಿಸೀತು ಜೋಕೆ!

Body Care

oi-Sumalatha N

By Sumalatha N

Published: Friday, August 26, 2011, 16:14 [IST]

ತೆಳುವಾಗಿ ಬಳ್ಳಿಯಂತೆ ಕಾಣಲು ಮತ್ತು ಸಖತ್ ಮಾಡ್ ಆಗಿ ಕಾಣಲು ಮೈಗೆ ಅಂಟಿದ ಬಟ್ಟೆ ತೊಡುವುದು ಈಗಿನವರ ರೂಢಿ. ಅದರ ಹಿಂದಿನ ಕೆಟ್ಟ ಪರಿಣಾಮದ ಪರಿವಿಲ್ಲದೆ ಟೈಟ್ ಜೀನ್ಸ್, ಟೀ ಶರ್ಟ್ಸ್ ಇನ್ನೂ ಮುಂತಾದ ಬಟ್ಟೆಗಳನ್ನು ಬಿಗಿಯಾಗೇ ತೊಡುತ್ತಾರೆ ಇಂದಿನ ಹುಡುಗಿಯರು. ಆದರೆ ಇದರ ನಿರಂತರ ಬಳಕೆ ಚರ್ಮ ಮತ್ತು ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಉಂಟುಮಾಡುತ್ತದೆ.

ಬಿಗಿಯಾಗಿ ಉಡುಪು ತೊಡುವುದರಿಂದ ಆಗುವ ತೊಂದರೆಗಳು:

1. ಚರ್ಮದಲ್ಲಿ ಹುಣ್ಣು: ತುಂಬಾ ಹೆಚ್ಚು ಅವಧಿ ಮೈಗಂಟುವ ಬಟ್ಟೆಗಳನ್ನು ತೊಟ್ಟರೆ ಅದು ಚರ್ಮದ ಮೇಲೆ ಹುಣ್ಣನ್ನು ಉಂಟು ಮಾಡಬಹುದು. ತುಂಬಾ ಬಿಗಿಯಾದ ಉಡುಪು ತೊಡುವುದರಿಂದ ಚರ್ಮದಲ್ಲಿ ಅತಿಯಾದ ಬೆವರು ಉತ್ಪಾದನೆಯಾಗಿ ಗಾಳಿಯಾಡದೆ ಇದ್ದ ಸಂದರ್ಭದಲ್ಲಿ ಬೆವರು ಅಲ್ಲೆ ಸೇರಿಕೊಂಡು ತುರಿಕೆ ಉಂಟಾಗಿ, ಕಜ್ಜಿ ಹುಣ್ಣುಗಳಾಗುವ ಸಂಭವ ಹೆಚ್ಚು. ಆದ್ದರಿಂದ ಪ್ಯಾಂಟ್ ಗಳನ್ನು ಆಯ್ಕೆ ಮಾಡುವಾಗ ಎಚ್ಚರದಿಂದ ಆಯ್ಕೆ ಮಾಡಿ.

2. ಚರ್ಮದ ಗುಳ್ಳೆ: ಮೈಗಂಟುವ ಜೀನ್ಸ್ ಗಳು ಮತ್ತು ಎಲ್ಲಾ ಒಳ ಉಡುಪುಗಳನ್ನು ಧರಿಸುವಾಗ ಎಚ್ಚರದಿಂದಿರಿ. ಅತಿಯಾದ ಒತ್ತಡ ಮತ್ತು ಗಾಳಿಗೆ ಸರಿಯಾದ ಅವಕಾಶವಿಲ್ಲದಿರುವುದು ಕೆಂಪು ಗುಳ್ಳೆಗಳನ್ನು ಉಂಟು ಮಾಡಬಹುದು.

3. ತುರಿಕೆ : ತುಂಬಾ ಬೆವರುವವರು ಈ ಟೈಟ್ ಉಡುಪುಗಳನ್ನು ತೊಟ್ಟರೆ ಅದು ಕೀಟಾಣು ಮತ್ತು ಬ್ಯಾಕ್ಟೀರಿಯಾಗಳು ಬೇಗನೆ ಬೆವರಿನ ಮೂಲಕ ಚರ್ಮಕ್ಕೆ ಸೋಂಕು ತಗುಲುವಂತೆ ಮಾಡುತ್ತದೆ. ಗಟ್ಟಿಯಾದ ಮತ್ತು ಬಿಗಿಯಾದ ಉಡುಪುಗಳನ್ನು ಧರಿಸುವುದರಿಂದ ಗುಪ್ತಾಂಗಗಳಲ್ಲಿ ತುರಿಕೆ ಸಂಭವಿಸಬಹುದು. ನೀವು ಎಷ್ಟೇ ಔಷಧಿ ತೆಗೆದುಕೊಂಡರೂ ಸಹ ಬಿಗಿ ಉಡುಪು ಧರಿಸುವುದನ್ನು ನಿಲ್ಲಿಸುವವರೆಗೂ ಅದೂ ನಿಮ್ಮನ್ನು ಬಿಡುವುದಿಲ್ಲ.

4. ರಕ್ತ ಸಂಚಲನ ಕುಂದುವಿಕೆ: ನಿಮ್ಮ ಚರ್ಮ ಮತ್ತು ಆರೋಗ್ಯ ಸಮತೋಲನದಲ್ಲಿರಬೇಕೆಂದರೆ ದೇಹದಲ್ಲಿ ರಕ್ತ ಸಂಚಲನ ಸರಿಯಾಗಿ ನಡೆಯಬೇಕು. ಆದರೆ ಈ ಗಟ್ಟಿ ಉಡುಪುಗಳು ರಕ್ತ ಸಂಚಲನವನ್ನು ಕುಂಠಿತಗೊಳಿಸುತ್ತದೆ.

ಇಂತಹ ಬಿಗಿ ಉಡುಪುಗಳನ್ನು ತೊಟ್ಟು ಆರೋಗ್ಯಕ್ಕೆ ಸುಖಾಸುಮ್ಮನೆ ತೊಂದರೆ ತಂದುಕೊಳ್ಳುವುದರ ಬದಲು ಸ್ವಲ್ಪ ಸಡಿಲವಾದ ಉಡುಪು ತೊಟ್ಟು ನಿಮ್ಮ ತ್ವಚೆ ಸ್ವಚ್ಛಂದವಾಗಿ ಉಸಿರಾಡಲು ಅವಕಾಶ ಮಾಡಿಕೊಡಿ. ಆಗ ನಿಮ್ಮ ಆರೋಗ್ಯಕರ ತ್ವಚೆ ಬಿಗಿ ಉಡುಪುಗಳ ಹೊರತಾಗಿಯೂ ನಿಮ್ಮನ್ನು ಚೆಂದವಾಗಿ ಕಾಣಲು ಅವಕಾಶ ಮಾಡಿಕೊಡುತ್ತದೆ. ಅಥವಾ ಟೈಟ್ ಬಟ್ಟೆಗಳನ್ನು ತೊಡಲೇಬೇಕೆಂದಿದ್ದರೆ ಆಗಾಗ ಮಾತ್ರ ತೊಟ್ಟುಕೊಳ್ಳಿ ಮತ್ತು ವ್ಯಾಯಾಮ ಮಾಡುವುದನ್ನೂ ಹೆಚ್ಚಾಗಿ ರೂಢಿಸಿಕೊಳ್ಳಿ.