Valentines Day 2025: ಹಗ್‌ ಡೇ ಆಚರಿಸೋದ್ಯಾಕೆ? ಒಂದೇ ಒಂದು ಅಪ್ಪುಗೆಗೆ ಎಷ್ಟು ಶಕ್ತಿ ಇದೆ ಗೊತ್ತಾ?

ವ್ಯಾಲೆಂಟೈನ್ಸ್ ವೀಕ್‌ನಲ್ಲಿ ಫೆಬ್ರವರಿ 12ರಂದು ಹಗ್‌ ಡೇ ಅಂದರೆ ಅಪ್ಪುಗೆಯ ದಿನವೆಂದು ಆಚರಿಸಲಾಗುವುದು. ಪ್ರೇಮಿಗಳ ದಿನಕ್ಕೂ 2 ದಿನ ಮೊದಲು ಈ ಹಗ್‌ ಡೇ ಬರುತ್ತದೆ. ಈ ದಿನ ಪರಸ್ಪರ ಪ್ರೀತಿಯ ಅಪ್ಪುಗೆ ನೋಡಬಹುದು. ಅಪ್ಪುಗೆ ಬರಿ ದೈಹಿಕವಾಗಿ ಪ್ರಾಮುಖ್ಯತೆ ಅಷ್ಟೇ ಅಲ್ಲ ಮಾನಸಿಕವಾಗಿಯೂ ಅಪ್ಪುಗೆ ಅನ್ನೋದು ಬಹಳ ಮುಖ್ಯ.

ಪ್ರೀತಿ, ಸ್ನೇಹದ ಸಂಕೇತವಾಗಿಯೂ ಅಪ್ಪುಗೆ ಸ್ಥಾನ ಪಡೆದಿದೆ. ಒಂದು ಪ್ರೀತಿಯ ಅಪ್ಪುಗೆ ಹತ್ತಾರು ಸಮಸ್ಯೆಗಳ ದೂರ ಮಾಡಬಹುದು. ನಿಮ್ಮ ನೋವು ಕಡಿಮೆ ಮಾಡಬಹುದು ಅಷ್ಟೊಂದು ಶಕ್ತಿ ಇದಕ್ಕಿದೆ. ಪ್ರೀತಿಯ ಒಂದು ಅಪ್ಪು ನಾನು ನಿನ್ನೊಂದಿಗೆ ಇರುವೆ ಎಂಬ ಧೈರ್ಯ ನೀಡುತ್ತದೆ. ನೊಂದವರಿಗೆ ಸಾಂತ್ವನ ಹೇಳುತ್ತೆ. ಅಪ್ಪುಗೆಯಲ್ಲಿ ಬಹಳಷ್ಟು ಶಕ್ತಿ ಇದೆ ಎಂದು ನಂಬಲಾಗಿದೆ.

ಹಗ್ ಅನ್ನೋದು ಸಂಬಂಧಗಳನ್ನು ಮತ್ತಷ್ಟು ಗಟ್ಟಿಗೊಳಿಸುತ್ತವೆ. ಪ್ರೀತಿ ಪಾತ್ರರಲ್ಲಿ ಮತ್ತಷ್ಟು ನಂಬಿಕೆ ಹುಟ್ಟಿಸುತ್ತದೆ. ಸೋತವರಗೆ, ಗೆದ್ದವರಿಗೆ ಈ ಅಪ್ಪುಗೆ ಮತ್ತೊಮ್ಮೆ ಬದುಕುವ ಮತ್ತೊಮ್ಮೆ ಸಾಧಿಸುವ ಚಲ ನೀಡಲಿದೆ.

ಅಪ್ಪುಗೆಯ ಹಿಂದಿದೆ ಬಹುದೊಡ್ಡ ಶಕ್ತಿ

ಅಪ್ಪುಗೆ ಒಬ್ಬ ವ್ಯಕ್ತಿಯ ಮಾನಸಿಕ ಆರೋಗ್ಯಕ್ಕೆ ಬಹಳ ಒಳ್ಳೆಯ ಅಭ್ಯಾಸವಂತೆ. ಯಾರಾದರು ಭಯ ಪಡುತ್ತಿದ್ದರೆ ಅಪ್ಪುಗೆಯಿಂದ ಅವರ ಹೃದಯ ಬಡಿತ ಕಡಿಮೆ ಮಾಡುವ ಶಕ್ತಿ ಹೊಂದಿದೆ. ನಮ್ಮ ದೇಹದಲ್ಲಿ ಒತ್ತಡದ ಹಾರ್ಮೋನ್, ಕಾರ್ಟಿಸೋಲ್ ಮಟ್ಟವನ್ನು ಕಡಿಮೆ ಮಾಡುತ್ತದೆ. ಅಪ್ಪುಗೆಯು ನಮ್ಮನ್ನು ಶಾಂತ, ಸುರಕ್ಷಿತ ಮತ್ತು ನಿರಾಳ ಭಾವನೆಯನ್ನು ನೀಡುತ್ತದೆ. ಮೆದುಳಿನ ರಾಸಾಯನಿಕ ಕ್ರಿಯೆಯನ್ನು ಇದು ನಿಯಂತ್ರಿಸುವ ಶಕ್ತಿ ಹೊಂದಿದೆ. ಯಾರಾದರು ಅತಿಯಾದ ಸಿಟ್ಟಿನಿಂದ ನಿಮ್ಮ ಮೇಲೆ ಕೂಗಾಡುತ್ತಿದ್ದರೆ ಅಥವಾ ರೇಗಾಡುತ್ತಿದ್ದರೆ ಅವರನ್ನು ಅಪ್ಪಿಕೊಳ್ಳುವುದು ಶಾಂತತೆ ಕಾಪಾಡುವ ಒಂದು ಮಾರ್ಗವಾಗಿದೆ.

ಜರ್ಮನಿ ಮತ್ತು ನೆದರ್‌ಲ್ಯಾಂಡ್ಸ್‌ನ ಸಂಶೋಧಕರು ಸ್ಪರ್ಶದ ಕುರಿತು 200ಕ್ಕೂ ಹೆಚ್ಚು ಅಧ್ಯಯನಗಳ ನಡೆಸಿದ್ದು, ಅಪ್ಪುಗೆ ಎಂಬುದು ನೋವು, ಆತಂಕ, ಖಿನ್ನತೆ ಕಡಿಮೆ ಮಾಡುತ್ತದೆ ಎಂದು ಕಂಡುಕೊಂಡಿದ್ದಾರೆ. ಈ ಅಧ್ಯಯನಕ್ಕಾಗಿ ಅವರು 10 ಸಾವಿರ ಮಂದಿಯನ್ನು ಒಳಗೊಂಡ ಒಂದು ಗುಂಪನ್ನು ಆಯ್ಕೆ ಮಾಡಿಕೊಂಡಿದ್ದರು. ಈ ಗುಂಪಿನಲ್ಲಿ ಅಪ್ಪಿಕೊಳ್ಳುವುದರಿಂದ ಅವರ ಮನಸ್ಸಿನಲ್ಲಾಗುವ ಬದಲಾವಣೆಗಳನ್ನು ಸೂಕ್ಷ್ಮವಾಗಿ ಗಮನಿಸಿ 2024 ಏಪ್ರಿಲ್‌ನಲ್ಲಿ ಈ ಅಧ್ಯಯನದ ವರದಿಯನ್ನು ಕೂಡ ಬಿಡುಗಡೆ ಮಾಡಿದ್ದರು.

ವಿಶ್ವ ಅಪ್ಪುಗೆಯ ದಿನ ಆಚರಣೆ ಬಗ್ಗೆ ಗೊತ್ತಾ?

ಹಗ್ ಹಾಲಿಡೆ ಎಂದು ಪ್ರತಿ ವರ್ಷ ಜೂನ್ 29ರಂದು ಆಚರಿಸಲಾಗುತ್ತೆ. ಈ ದಿನದಂದು ಅಪ್ಪುಗೆಯ ಕುರಿತು ಜಾಗೃತಿ ಮೂಡಿಸಲಾಗುತ್ತೆ ಅಂದ್ರೆ ನೀವು ನಂಬುತ್ತೀರಾ? ಹೌದು ಈ ದಿನದಂದು ಅಪ್ಪುಗೆಯಿಂದ ಆಗುವಂತ ಲಾಭಗಳನ್ನು ತಿಳಿಸಲಾಗುತ್ತೆ. ಅಪ್ಪುಗೆಯ ಆರೋಗ್ಯಕರ ಲಾಭಗಳು, ಹಾಗೆ ಈ ಅಭ್ಯಾಸ ಉತ್ತೇಜಿಸುವ ಸಲುವಾಗಿ ಹಗ್ ಹಾಲಿಡೆ ಪ್ರತಿ ವರ್ಷ ಆಚರಿಸಲಾಗುತ್ತೆ.

ಅಂದರೆ ಪ್ರತಿ ವರ್ಷ ಎರಡು ಬಾರಿ ಹಗ್ ಡೆ ಆಚರಣೆಯಾದಂತಾಗುತ್ತದೆ. ಪ್ರೇಮಿಗಳ ದಿನಕ್ಕೂ 2 ದಿನ ಮುನ್ನ ಹಾಗೂ ಜೂನ್ 29ರಂದು ಕೂಡ ಆರಿಸಲಾಗುತ್ತದೆ, ಪ್ರೇಮಿಗಳ ವಾರದಲ್ಲಿ ಬರುವಂತಹ ಈ ಆಚರಣೆಗೆ ಈಗ ಹೆಚ್ಚು ಮಹತ್ವವಿದೆ.