ಗಂಡ-ಹೆಂಡತಿ ನಡುವೆ ಅಂತರ ಏಕೆ? ದಾಂಪತ್ಯ ಹಾಳುಮಾಡುವ 5 ಕಾರಣಗಳಿವು

ಮದುವೆ ಒಂದು ಸುಂದರ ಬಂಧ. ಪ್ರೀತಿ, ನಂಬಿಕೆ ಮತ್ತು ಹೊಂದಾಣಿಕೆ ಇದರಲ್ಲಿ ಅತೀ ಮುಖ್ಯ. ಆದರೆ, ಬದಲಾಗುತ್ತಿರುವ ಜೀವನಶೈಲಿ, ಒತ್ತಡ ಮತ್ತು ಭಾವನಾತ್ಮಕ ಅಂತರದ ಕಾರಣದಿಂದಾಗಿ, ಇತ್ತೀಚಿನ ದಿನಗಳಲ್ಲಿ ಗಂಡ ಮತ್ತು ಹೆಂಡತಿ (ದಂಪತಿಗಳ) ನಡುವೆ ಭಿನ್ನಾಭಿಪ್ರಾಯ ಹೆಚ್ಚುತ್ತಿವೆ. ಏಳು ಜನ್ಮಗಳ ಬಂಧ ಎಂದೇ ಹೇಳಲಾಗುತ್ತಿದ್ದ ಸಂಬಂಧಗಳು (relationship) ಈಗ ಕೇವಲ ಒಂದೆರಡು ವರ್ಷಗಳಲ್ಲೇ ಮುರಿದು ಬೀಳುವ ಹಂತಕ್ಕೆ ತಲುಪುತ್ತಿವೆ. ವಿವಾಹಿತ ದಂಪತಿಗಳ (married couples) ನಡುವೆ ದೂರ ಹೆಚ್ಚಾಗುವುದು ಸಾಮಾನ್ಯ ಸಮಸ್ಯೆಯಾಗಿದೆ. ಹಾಗಿದ್ರೆ, ದಾಂಪತ್ಯದಲ್ಲಿ ಬಿರುಕು ಮೂಡಲು ಕಾರಣಗಳೇನು? ತಿಳಿಯೋಣ ಬನ್ನಿ.

ಸಂಸಾರದಲ್ಲಿ ಏರಿಳಿತ ಬರುವುದು ಸಹಜ. ಆದರೆ, ತಿಳುವಳಿಕೆ, ಸಂವಹನ ಮತ್ತು ಪ್ರೀತಿಯಿಂದ ಯಾವುದೇ ಭಿನ್ನಾಭಿಪ್ರಾಯ ಇದ್ದರೂ ಪರಿಹರಿಸಿಕೊಳ್ಳಬಹುದು. ಸಂಬಂಧವನ್ನು ಮುರಿಯಲು ಹೆಚ್ಚು ಸಮಯ ಬೇಕಾಗುವುದಿಲ್ಲ. ಆದರೆ, ಅದನ್ನು ಉಳಿಸಿಕೊಳ್ಳುವುದು ಒಂದು ಕಲೆ. ಆ ಕಲೆ ನಿಮ್ಮ ಕೈಯಲ್ಲಿದೆ. ಸಮಯಕ್ಕೆ ಸರಿಯಾಗಿ ಕಾರಣಗಳನ್ನು ಅರ್ಥಮಾಡಿಕೊಂಡು ಪರಿಹಾರ ಕಂಡುಕೊಳ್ಳುವುದು ಬಹಳ ಮುಖ್ಯ. ಇಲ್ಲದಿದ್ದರೆ ಈ ಅಂತರವು ಸಂಬಂಧವನ್ನು ಮುರಿಯಬಹುದು. ಗಂಡ ಮತ್ತು ಹೆಂಡತಿಯ ದಾಂಪತ್ಯ ಅಥವಾ ಸಂಬಂಧದಲ್ಲಿ ಬಿರುಕು ಮೂಡಲು ಕಾರಣವಾಗುವ 5 ಮುಖ್ಯ ಕಾರಣಗಳನ್ನು ಇಲ್ಲಿವೆ ನೋಡಿ.

ನಂಬಿಕೆಯ ಕೊರತೆ

ಪ್ರತಿಯೊಂದು ಸಂಬಂಧದ ಆಧಾರ ನಂಬಿಕೆ. ಆದರೆ, ಗಂಡ ಅಥವಾ ಹೆಂಡತಿ ಒಬ್ಬರನ್ನೊಬ್ಬರು ಅನುಮಾನಿಸಲು ಪ್ರಾರಂಭಿಸಿದರೆ, ಫೋನ್ ಪರಿಶೀಲಿಸಿದರೆ ಅಥವಾ ಸುಳ್ಳು ಹೇಳಿದರೆ, ಆ ಸಂಬಂಧವು ನಿಧಾನವಾಗಿ ಕೊನೆಗೊಳ್ಳಲು ಪ್ರಾರಂಭಿಸುತ್ತದೆ. ಇತ್ತೀಚಿನ ದಿನಗಳಲ್ಲಿ ಇದು ಸಾಮಾನ್ಯವಾಗಿದೆ. ಗಂಡನಿಗೆ ಹೆಂಡತಿಯ ಮೇಲೆ ನಂಬಿಕೆ ಇಲ್ಲ. ಹೆಂಡತಿಗೆ ಗಂಡನ ಮೇಲೆ ನಂಬಿಕೆ ಇಲ್ಲ. ಇದರಿಂದಾಗಿ ವಿಚ್ಛೇದನ ಪ್ರಕರಣಗಳು ಹೆಚ್ಚುತ್ತಿವೆ. ನಿಮ್ಮ ಸಂಬಂಧವು ಗಟ್ಟಿಯಾಗಿರಬೇಕು ಎಂದು ನೀವು ಬಯಸಿದರೆ, ನಿಮ್ಮ ವೈವಾಹಿಕ ಸಂಬಂಧದಲ್ಲಿ ಸ್ಪಷ್ಟತೆ ಮತ್ತು ಪ್ರಾಮಾಣಿಕತೆಯನ್ನು ಕಾಪಾಡಿಕೊಳ್ಳಿ. ಏನಾದರೂ ತೊಂದರೆ ಇದ್ದರೆ, ಕೋಪಗೊಳ್ಳುವ ಅಥವಾ ಗದರಿಸುವ ಬದಲು ಶಾಂತವಾಗಿ ಮಾತನಾಡಿ ಬಗೆಹರಿಸಿಕೊಳ್ಳಬೇಕು.

ಸಂವಹನದ ಕೊರತೆ

ಇದು ಸಂಬಂಧದ ದೊಡ್ಡ ಶತ್ರು. ಮುಕ್ತವಾಗಿ ಮಾತನಾಡುವುದೇ ಒಂದು ಯಶಸ್ವಿ ವಿವಾಹದ ಅಡಿಪಾಯ. ದಂಪತಿಗಳು ತಮ್ಮ ಭಾವನೆಗಳನ್ನು ಹಂಚಿಕೊಳ್ಳದಿದ್ದಾಗ, ಸಮಸ್ಯೆಗಳ ಬಗ್ಗೆ ಚರ್ಚಿಸದಿದ್ದಾಗ ಅಥವಾ ಕೇವಲ ಹೌದು ಮತ್ತು ಇಲ್ಲ ಎಂದು ಉತ್ತರಿಸಿದಾಗ, ತಪ್ಪುಗ್ರಹಿಕೆಗಳು ಹುಟ್ಟಿಕೊಳ್ಳುತ್ತವೆ. ಸಣ್ಣ ವಿಷಯವೂ ದೊಡ್ಡದಾಗಿ ಕಾಣುತ್ತದೆ. ಹಾಗೆಯೇ ಭಿನ್ನಾಭಿಪ್ರಾಯಗಳು ಹೆಚ್ಚಾಗುತ್ತವೆ. ಅನೇಕ ಬಾರಿ ಸಂಭಾಷಣೆ ಅಥವಾ ಸಂವಹನದ ಕೊರತೆಯಿಂದ ಡಿವೋರ್ಸ್ (divorce) ಆಗುತ್ತದೆ. ನಿಮ್ಮ ಸಂಬಂಧವನ್ನು ಉಳಿಸಲು, ಪ್ರತಿದಿನ ಕನಿಷ್ಠ 15 ರಿಂದ 20 ನಿಮಿಷಗಳ ಕಾಲ ಫೋನ್ ಇಲ್ಲದೆ, ಒಬ್ಬರಿಗೊಬ್ಬರು ಟೈಮ್ ಕೊಡಿ. ಮುಕ್ತವಾಗಿ ಮಾತನಾಡಿ ಮತ್ತು ಇತರರು ಹೇಳುವುದನ್ನು ಕೇಳುವ ಅಭ್ಯಾಸ ಬಳಸಿಕೊಳ್ಳಿ.

ಸಮಯದ ಕೊರತೆ

ಸಂಬಂಧ ಒತ್ತಡದಲ್ಲಿ ಕಳೆದುಹೋಗಿದೆ. ಪ್ರಸ್ತುತ ಜೀವನದಲ್ಲಿ ಗಂಡ ಮತ್ತು ಹೆಂಡತಿ ಇಬ್ಬರೂ ತಮ್ಮ ಕೆಲಸದಲ್ಲಿ ಎಷ್ಟು ಬ್ಯುಸಿಯಾಗುತ್ತಾರೆ ಎಂದರೆ, ಒಬ್ಬರಿಗೊಬ್ಬರು ಟೈಮ್ ನೀಡಲು ಸಾಧ್ಯವಾಗುವುದಿಲ್ಲ. ಇದರಿಂದ ಭಾವನಾತ್ಮಕ ಬಾಂಧವ್ಯ ದುರ್ಬಲಗೊಳ್ಳುತ್ತದೆ. ಎಲ್ಲಾ ದಂಪತಿಗಳು ವಾರದಲ್ಲಿ ಕನಿಷ್ಠ ಒಂದು ದಿನ ತಮಗಾಗಿ (ದಂಪತಿಗಳಿಗಾಗಿ) ಸಮಯವನ್ನು ಮೀಸಲಿಡಬೇಕು. ಒಟ್ಟಿಗೆ ಪ್ರವಾಸಕ್ಕೆ ಹೋಗಿ, ಸಿನಿಮಾ ನೋಡಿ ಅಥವಾ ಹೊಸ ಅನುಭವ ಶೇರ್ ಮಾಡಿಕೊಳ್ಳಿ.

ಪೋಷಕರು, ಸ್ನೇಹಿತರ ಹಸ್ತಕ್ಷೇಪ

ಕೆಲವೊಮ್ಮೆ ಪೋಷಕರು (ತಂದೆ, ತಾಯಿ), ಸ್ನೇಹಿತರು ಅಥವಾ ಸೋಶಿಯಲ್ ಮೀಡಿಯಾಗಳ ಹಸ್ತಕ್ಷೇಪವು ಸಂಬಂಧದಲ್ಲಿ ಬಿರುಕು ಉಂಟುಮಾಡಬಹುದು. ವೈಯಕ್ತಿಕ ವಿಷಯಗಳನ್ನು ಹೊರಗೆ ಹಂಚಿಕೊಳ್ಳುವುದು ಅಥವಾ ಇತರರ ಮಾತನ್ನು ಕೇಳುವುದು ಸಂಬಂಧವನ್ನು ಹಾಳುಮಾಡುತ್ತದೆ. ಹಲವು ಬಾರಿ ಗಂಡ ಮತ್ತು ಹೆಂಡತಿಯ ಸಂಬಂಧದಲ್ಲಿ ಅತ್ತಿಗೆ, ತವರು ಮನೆಯವರು ಮತ್ತು ಅತ್ತೆ, ಮಾವಂದಿರ ಹಸ್ತಕ್ಷೇಪ ಹೆಚ್ಚಾಗಿ, ದಾಂಪತ್ಯ ಜೀವನ ದುರ್ಬಲಗೊಳ್ಳುತ್ತದೆ. ಸಂಬಂಧವನ್ನು ಬಲಪಡಿಸಲು, ಸಂಬಂಧದ ಮಿತಿಗಳನ್ನು ಅರ್ಥಮಾಡಿಕೊಳ್ಳಿ. ವೈಯಕ್ತಿಕ ವಿಷಯಗಳನ್ನು ಖಾಸಗಿಯಾಗಿ ಅಥವಾ ರಹಸ್ಯವಾಗಿ ಇಟ್ಟುಕೊಳ್ಳಿ. ನಿಮ್ಮ ಸಂಬಂಧದ ಬಗ್ಗೆ ನೀವೇ ನಿರ್ಧಾರಗಳನ್ನು ತೆಗೆದುಕೊಳ್ಳಿ. ಬದಲಾಗಿ ಇತರರ ಆಧಾರದ ಮೇಲೆ ಅವಲಂಬನೆ ಬೇಡ.

ಪ್ರೀತಿಯ ಕೊರತೆ

ನಿಮ್ಮ ಸಂಬಂಧ ಯಶಸ್ವಿಯಾಗಲು ಒಟ್ಟಿಗೆ ಇರುವುದು ಮಾತ್ರವಲ್ಲ, ಪ್ರೀತಿ ಅನುಭವಿಸುವುದು ಸಹ ಮುಖ್ಯ. ಸ್ಪರ್ಶ, ಪ್ರಶಂಸೆ, ಒಳ್ಳೆಯ ಮಾತುಗಳು ಅಥವಾ ಪ್ರಣಯ ಕಡಿಮೆಯಾದಾಗ, ದಂಪತಿಗಳು ಭಾವನಾತ್ಮಕವಾಗಿ ದೂರವಾಗುತ್ತಾರೆ. ಸಂಬಂಧವನ್ನು ಬಲಪಡಿಸಲು ಒಬ್ಬರನ್ನೊಬ್ಬರು ಪ್ರಶಂಸಿಸಿ. ದೈಹಿಕ ಸ್ಪರ್ಶವನ್ನು ನಿರ್ಲಕ್ಷಿಸಬೇಡಿ. ಇಬ್ಬರೂ ಪ್ರಣಯವನ್ನು ಜೀವಂತವಾಗಿಡಿ. ಸಣ್ಣ ಸನ್ನೆಗಳು ಸಹ ಬಹಳ ಮುಖ್ಯವಾಗುತ್ತವೆ.

ಒಟ್ಟಾರೆ, ದಾಂಪತ್ಯದಲ್ಲಿ ಪ್ರೀತಿ, ವಿಶ್ವಾಸ, ಹೊಂದಾಣಿಕೆ ಮತ್ತು ಉತ್ತಮ ಸಂವಹನ ಅತ್ಯಗತ್ಯ. ಇವುಗಳನ್ನು ಕಾಪಾಡಿಕೊಂಡರೆ, ದಾಂಪತ್ಯ ಜೀವನ ಸುಖಮಯವಾಗಿರುತ್ತದೆ.