ನಿಶ್ಚಿತಾರ್ಥ ಉಂಗುರ ಹುಡುಗಿಯ ಎಡಗೈಗೆ ಹಾಕುವುದೇಕೆ?

ಎಡಗೈ ಬೆರಳಿನಲ್ಲಿ ಅಡಗಿರುವ ಪ್ರೀತಿಯ ಗುಟ್ಟು

ಮಹಿಳೆಯರ ಎಡಗೈಯ ಬೆರಳಿನ ನರ ಹೃದಯದೊಂದಿಗೆ ಸಂಪರ್ಕ ಹೊಂದಿರುತ್ತದೆ. ಆ ಉಗುರಿಗೆ ವೃತ್ತಾಕಾರದ ಉಂಗುರ ಧರಿಸುವುದರಿಂದ ಹೃದಯದಲ್ಲಿ ಆ ವ್ಯಕ್ತಿಯೆಡೆಗಿನ ಪ್ರೀತಿ ಹೆಚ್ಚಾಗುವುದು ಎಂಬ ನಂಬಿಕೆ ಇದೆ. ಲ್ಯಾಟಿನ್ ಭಾಷೆಯಲ್ಲಿ ಉಂಗುರ ಬೆರಳಿಗೆ ವೆನಾ ಆಮೊರಿಸ್ ಎಂದು ಕರೆಯಲಾಗುವುದು, ಅಂದರೆ ಪ್ರೀತಿಯ ನರ ಎಂದರ್ಥ. ಈ ನರ ನಮ್ಮ ಹೃದಯಕ್ಕೆ ಪ್ರೀತಿಯ ಸಂದೇಶ ಕಳಹಿಸುವುದರಿಂದ ಜೀವನ ಸಂಗಾತಿ ಮೇಲೆ ಪ್ರೀತಿ ಹೆಚ್ಚುವುದು.

ಹೃದಯಕ್ಕೆ ಸಮೀಪವಾದ ವ್ಯಕ್ತಿ

ಹೆಣ್ಮಕ್ಕಳು ಎಡಗೈಗೆ ನಿಶ್ಚಿತಾರ್ಥ ಉಂಗುರ ಧರಿಸುವುದರಿಂದ ಬಾಳ ಸಂಗಾತಿಯೆಡೆಗಿನ ಆಕರ್ಷಣೆ ಹಾಗೂ ಪ್ರೀತಿ ಹೆಚ್ಚುವುದು. ಎಡಗೈಗೆ ಉಂಗುರ ಧರಿಸುವುದರಿಂದ ಆ ಬೆರಳಿನ ನರ ಹೃದಯಕ್ಕೆ ಸಂಪರ್ಕ ಹೊಂದಿರುವುದರಿಂದ ಹೃದಯಕ್ಕೆ ಸಮೀಪವಾದ ವ್ಯಕ್ತಿ ಎಂಬುವುದನ್ನು ಆ ಉಂಗುರ ಸೂಚಿಸುತ್ತದೆ.

ನಂಬಿಕೆಯ ಹಿಂದಿದೆ ಮಧುರ ಬಾವನೆ

ವೈಜ್ಞಾನಿಕ ದೃಷ್ಟಿಯಲ್ಲಿ ಈ ನಂಬಿಕೆಯನ್ನು ಒಪ್ಪದೇ ಇರಬಹುದು. ಏಕೆಂದರೆ ಬೆರಳಿನ ಪ್ರತಿಯೊಂದು ನರವೂ ಹೃದಯದೊಂದಿಗೆ ಸಂಪರ್ಕ ಹೊಂದಿರುತ್ತದೆ. ಆದರೆ ಕೆಲವೊಂದು ವಿಷಯಗಳನ್ನು, ಭಾವನೆಗಳನ್ನು ವೈಜ್ಞಾನಿಕ ದೃಷ್ಟಿಯಿಂದ ನೋಡು ಸಾಧ್ಯವಾಗುವುದಿಲ್ಲ ಹಾಗೂ ಹಾಗೇ ನೋಡಿದರೆ ಅದರಲ್ಲಿ ಸ್ವಾರಸ್ಯವೇ ಉಳಿಯುವುದಿಲ್ಲ. ಶತಮಾನದಿಂದಲೂ ಹೆಣ್ಮಕ್ಕಳಿಗೆ ನಿಶ್ಚಿತಾರ್ಥದ ಉಂಗುರವನ್ನು ಎಡಗೈನ ಉಂಗುರ ಬೆರಳಿಗೆ ಹಾಕುತ್ತಾರೆ, ಈಗಲೂ ಅದೇ ಸಂಪ್ರದಾಯ ಮುಂದುವರೆದಿದೆ.

ನಿಶ್ಚಿತಾರ್ಥ ಉಂಗುರ ಹಾಗೂ ಮದುವೆಯ ಉಂಗುರು

ಕೆಲವು ಕಡೆ ನಿಶ್ಚಿತಾರ್ಥಕ್ಕೆ ಮಾತ್ರ ಉಂಗುರು ಹಾಕುವ ಶಾಸ್ತ್ರ ಇದ್ದರೆ ಇನ್ನು ಕೆಲವು ಕಡೆ ಮದುವೆಯಲ್ಲೂ ಹುಡುಗ ಹುಡುಗಿಗೆ ಉಂಗುರ ತೊಡಿಸುತ್ತಾನೆ. ಇಂಥ ಸಂದರ್ಭದಲ್ಲಿ ಕೆಲವರು ನಿಶ್ಚತಾರ್ಥದ ಉಂಗುರವನ್ನು ಬಲಗೈಯ ಉಂಗುರ ಬೆರಳಿಗೆ ಧರಿಸಿ, ಎಡಗೈಗೆ ಮದುವೆಯಲ್ಲಿ ಹುಡುಗ ತೊಡಿಸಿದ ಉಂಗುರ ಧರಿಸುತ್ತಾರೆ.

ಇನ್ನು ಕೆಲವೊಂದು ಕಡೆ ಅಂದರೆ ರಷ್ಯಾ, ಗ್ರೀಸ್, ಕೊಲೆಂಬಿಯಾ ಇಲ್ಲೆಲ್ಲಾ ನಿಶ್ಚಿತಾರ್ಥ ಸಮಯದಲ್ಲಿ ಹೆಣ್ಮಕ್ಕಳ ಬಲಗೈಗೆ ಉಂಗುರ ತೊಡಿಸುತ್ತಾರೆ. ಇನ್ನು ಕೆಲವರಿಗೆ ಎಡಗೈಯಲ್ಲಿ ಉಂಗುರ ಧರಿಸಲು ಕಂಫರ್ಟ್ ಅನಿಸದಿದ್ದರೆ ಬಲಗೈಗೆ ಹಾಕುತ್ತಿದ್ದಾರೆ.

ನಿಶ್ಚಿತಾರ್ಥ ಉಂಗುರು ಎಡಗೈಯಲ್ಲಾದರೂ ಇರಲಿ, ಬಲಗೈಯಲ್ಲಾದರೂ ಇರಲಿ ಒಟ್ಟಿನಲ್ಲಿ ಉಂಗುರ ಹಾಕಿದವನ ಮೇಲೆ ಪ್ರೀತಿ ಮೂಡಬೇಕು ಎನ್ನುವುದೇ ನಿಶ್ಚಿತಾರ್ಥ ಉಂಗುರದ ಮುಖ್ಯ ಉದ್ದೇಶ ಅಲ್ಲವೇ?