ನಿಜವಾದ ಪ್ರೀತಿಯನ್ನು ಕಂಡುಹಿಡಿದುಕೊಳ್ಳುವುದು ಹೇಗೆ? ಉತ್ತಮ ಸಂಗಾತಿಯ ಆಯ್ಕೆಯು ಹೀಗಿರಲಿ

1. ಈ ಸಂಬಂಧ ನಿಜಕ್ಕೂ ಸುರಕ್ಷಿತವೇ?

ಹೇಗೆ ಕೆಲವು ಸ್ಥಳಗಳಲ್ಲಿ ಸುರಕ್ಷಿತಯ ಅನುಭವವಾಗಿ ಇಲ್ಲಿ ನಾವು ಕಂಫರ್ಟಬಲ್ ಆಗಿ ಇರಬಹುದು, ಯಾವುದೇ ಚಿಂತೆ ಇಲ್ಲ ಎಂದು ನೆಮ್ಮದಿಯ ಉಸಿರು ಬಿಡುತ್ತೀರೋ ಅದರಂತೆಯೇ ಸಂಬಂಧಗಳಲ್ಲಿ ಕೂಡ ಮೊಟ್ಟಮೊದಲು ಈ ಭಾವನೆ ಹುಟ್ಟಬೇಕು. ಯಾರ ಜೊತೆ ಇರುತ್ತೀರೋ ಅವರೊಂದಿಗೆ ಸುರಕ್ಷಿತವಾಗಿ ಇರುತ್ತೀವಿ ಎಂಬ ವಿಶ್ವಾಸ ಇರಬೇಕು. ನಿಜಕ್ಕೂ ಸುರಕ್ಷಿತವಾಗಿ ಇರುತ್ತೇವೆಯೇ? ಎಂಬ ಅನುಮಾನಕ್ಕೆ ಆಸ್ಪದವೇ ಇರಬಾರದು.ಏಕೆಂದರೆ ನಿಜವಾಗಿ ಪ್ರೀತಿಸುವವರು ನಿಮ್ಮನ್ನು ಎಂದಿಗೂ ಅಸುರಕ್ಷತೆಯ ಅನುಭವವಾಗುವಂತೆ, ಮನಸ್ಸಿಗೆ ಭಯ ಉಂಟಾಗುವಂತೆ ಖಂಡಿತ ನಡೆದುಕೊಳ್ಳುವುದಿಲ್ಲ. ರೆಪ್ಪೆಯು ಕಣ್ಣನ್ನು ಕಾಪಾಡುವಂತೆ ನೋಡಿಕೊಳ್ಳುವವರೇ ನಿಜವಾದ ಸಂಗಾತಿ.

2. ಪರಸ್ಪರ ಸಾಂಗತ್ಯ ಪರಿಪೂರ್ಣವೆನಿಸುತ್ತದೆಯೇ?

ಗಾಡಿಯಲ್ಲಿ ಎರಡು ಚಕ್ರಗಳು ಇದ್ದರೆ ಮಾತ್ರ ಅದು ಪರಿಪೂರ್ಣ. ಒಂದು ಚಕ್ರವಿಲ್ಲದೆ ಹೋದರೂ ಅದು ಹೇಗೆ ಅಪೂರ್ಣವೊ, ಅಂತೆಯೇ ಒಬ್ಬರನ್ನೊಬ್ಬರು ತೊರೆದು ಬದುಕುವುದು ಅಸಾಧ್ಯವೆಂಬ ಭಾವನೆ ಹುಟ್ಟ ಬೇಕು. ಸಂಗಾತಿಯಿಂದ ಜೀವನದ ಪರಿಪೂರ್ಣತೆಯ ಅನುಭವವ ಉಂಟಾಗುವುದು ಅತಿ ಮುಖ್ಯ.

3. ಸಂಗಾತಿಯ ಅವಶ್ಯಕತೆ ನಿಜಕ್ಕೂ ಇದೆಯೇ?

ಆಯ್ಕೆ ಮಾಡಿದ ಸಂಗಾತಿಯ ಬಗ್ಗೆ ಪದೇ ಪದೇ ಅನುಮಾನ ಹುಟ್ಟುವುದು, ಈ ಸಂಬಂಧ ನಿಜಕ್ಕೂ ಸರಿಯೇ ಮುಂದುವರಿಯಬೇಕೇ? ಅಂತಹ ಅವಶ್ಯಕತೆ ಇದೆಯೇ? ಇಂತಹ ಆಲೋಚನೆಗಳು ಮನಸ್ಸಿನಲ್ಲಿ ಏಳುತ್ತಿದ್ದರೆ, ಅದು ಖಂಡಿತ ಒಳ್ಳೆಯ ಲಕ್ಷಣವಲ್ಲ.

4. ಈ ಸಂಬಂಧದಲ್ಲಿ ಅರ್ಥವಿದೆಯೇ?

ಸಂಬಂಧವು ವೇಳೆ ಕಳೆಯಲಾಗಲೀ, ಮನಸ್ಸು, ಭವಿಷ್ಯ ಹಾಳು ಮಾಡಿಕೊಳ್ಳಲಾಗಲೀ ಅಲ್ಲ. ಈ ಸಂಬಂಧದಲ್ಲಿ ಸುಖವಿದೆ,ಒಳ್ಳೆಯ ಭವಿಷ್ಯವಿದೆ, ಉದ್ದೇಶವಿದೆ ಎಂಬುದುದನ್ನು ಖಾತ್ರಿಪಡಿಸಿಕೊಳ್ಳಬೇಕು. "ಪ್ರೀತಿ ನಮ್ಮ ಜೀವನಕ್ಕೆ ಉದ್ದೇಶವನ್ನು ನೀಡುತ್ತದೆ" ಎಂಬ ಮಾತನ್ನು ಗಮನದಲ್ಲಿರಿಸಿಕೊಂಡು ನಡೆಯಬೇಕು. ಅಂತಹ ಬಲವಾದ ಕಾರಣ ಕಾಣದಿದ್ದಲ್ಲಿ ಅಂತಹ ಪ್ರೀತಿಯಲ್ಲೂ ಬಲವಿಲ್ಲ ಎಂಬುದನ್ನು ಮನಗಾಣಬೇಕು.

5. ಈ ಸಂಬಂಧದಲ್ಲಿ ಪರಸ್ಪರ ಹೊಂದಾಣಿಕೆ ಇದೆಯೇ?

ಪರಸ್ಪರ ಹೊಂದಾಣಿಕೆಯು ಇಲ್ಲವಾದಲ್ಲಿ ಪದೇ ಪದೇ ಜಗಳ,ವಿತಂಡವಾದಗಳು ಕಟ್ಟಿಟ್ಟ ಬುತ್ತಿ. ಹೀಗಾದಲ್ಲಿ ಸಿಹಿಯಾಗಿರಬೇಕಾದ ಸಂಬಂಧದಲ್ಲಿ ಕಹಿಯೇ ಹೆಚ್ಚಾಗುತ್ತದೆ. ಹಾಲು-ಜೇನಿನಂತ ಸಂಬಂಧ ವಾಗಿರಬೇಕೇ ವಿನಹ, ಹಾಲು-ಹುಳಿಯಂತೆ ಆದಲ್ಲಿ ಸಂಬಂಧದಲ್ಲಿ ಒಡಕು ಉಂಟಾಗುವುದು ಸಹಜ. ಹಾಗಾಗಿ, ಪರಸ್ಪರರಲ್ಲಿ ಹೊಂದಾಣಿಕೆ, ಸಾಮರಸ್ಯ, ಸ್ಪಂದಿಸುವ ಗುಣಗಳು ಏರ್ಪಡುತ್ತಿಲ್ಲವಾದಲ್ಲಿ ಅಂತಹ ಪ್ರೀತಿಯಲ್ಲಿ ಅರ್ಥವೇ ಇರುವುದಿಲ್ಲ.

ಹೂವಿನಿಂದ ಪರಿಮಳವನ್ನು ಹೇಗೆ ಬೇರ್ಪಡಿಸಲು ಸಾಧ್ಯವಿಲ್ಲವೋ ಅಂತೆಯೇ ಎಂತಹ ಪರಿಸ್ಥಿತಿಯಲ್ಲೂ ನಮ್ಮನ್ನೂ ಬೇರ್ಪಡಿಸಲಾಗುವುದಿಲ್ಲ ಎಂಬ ಮನಸ್ಥಿತಿ ಹುಟ್ಟಬೇಕು. ಅಂತಹ ಸಂಗಾತಿ, ಪ್ರೀತಿಯನ್ನು ಕಂಡುಹಿಡಿದುಕೊಂಡು ಹೆಜ್ಜೆ ಇಟ್ಟಾಗ ಮಾತ್ರ ಬಾಳ ಪಯಣ ಸುಖಮಯವಾಗಿರುತ್ತದೆ.