ಹೆಣ್ಣಿನಲ್ಲಿ ಗಂಡಸರು ಬಯಸುವ 3 ಮುಖ್ಯ ಅಂಶಗಳು

Relationship

oi-Reena

By Hema S

Updated: Tuesday, July 17, 2012, 17:30 [IST]

ಕೆಲವೊಂದು ಡಿವೋರ್ಸ್ ಕೇಸ್ ಗಳನ್ನು ನೋಡಿ, ಹುಡುಗಿ ತುಂಬಾ ಸುಂದರಿಯಾಗಿರುತ್ತಾಳೆ, ಇವನೂ ಕೂಡ ಅವಳ ರೂಪಕ್ಕೆ ಮರುಳಾಗಿ, ತುಂಬಾ ಇಷ್ಟಪಟ್ಟು ಮದುವೆಯಾಗಿರುತ್ತಾನೆ. ಆದರೆ ಮದುವೆಯಾದ ಸ್ವಲ್ಪ ದಿನಗಳಲ್ಲಿಯೇ ಬೇರೆಯಾಗಿರುತ್ತಾರೆ, ಅವರ ಸಂಬಂಧ ಮುರಿದು ಬೀಳುತ್ತದೆ, ಅಂತಹವರನ್ನು ನೋಡುವಾಗ ಅವಳು ಅಷ್ಟೊಂದು ಸೌಂದರ್ಯವತಿ, ಆದರೂ ಅವನಿಗೆ ಅವಳು ಏಕೆ ಇಷ್ಟವಾಗಲಿಲ್ಲ ಎಂದು ಅನಿಸುವುದು ಸಹಜ.

ಹುಡುಗರು ತಾವು ಪ್ರೀತಿಸುವ ಹುಡುಗಿ, ತನ್ನ ಬಾಳ ಸಂಗಾತಿ ಆಗಿ ಬರುವ ಹೆಣ್ಣು ತುಂಬಾ ಸುಂದರವಾಗಿರಬೇಕೆಂದು ಬಯಸುತ್ತಾರೆ, ಆದ್ದರಿಂದ ಹುಡುಗರಿಗೆ ನಾವು ಇಷ್ಟವಾಗಲು ತುಂಬಾ ಸುಂದರವಾಗಿದ್ದರೆ ಮಾತ್ರ ಸಾಕು ಎಂಬ ಕಲ್ಪನೆ ಅನೇಕ ಹೆಣ್ಣು ಮಕ್ಕಳಲ್ಲಿ ಇದೆ, ಹುಡುಗರು ಕೂಡ ತನ್ನ ಹುಡುಗಿ ಸುಂದರಿಯಾಗಿ ಇರಬೇಕೆಂದು ಬಯಸುತ್ತಾರೆ ನಿಜ, ಆದರೆ ಸೌಂದರ್ಯಕ್ಕಿಂತ ಮಿಗಿಲಾಗಿ ಮುಖ್ಯ 3 ಗುಣಗಳು ಹೆಣ್ಣಿನಲ್ಲಿರಬೇಕೆಂದು ಬಯಸುತ್ತಾನೆ. ಆ ಗುಣಗಳು ಹೆಣ್ಣಿನಲ್ಲಿ ಇಲ್ಲದೇ ಹೋದರೆ ಅವಳು ಎಷ್ಟೇ ರೂಪಸಿ ಆಗಿರಲಿ, ಅವಳು ಅವನಿಗೆ ಇಷ್ಟವಾಗುವುದಿಲ್ಲ.

ಹೆಣ್ಣಿನಲ್ಲಿ ಪುರುಷರು ಬಯಸುವ 3 ಮುಖ್ಯ ಅಂಶಗಳು

ನೈತಿಕ ಬೆಂಬಲ: ಬೆಳೆಯುವವರೆಗೆ ಮಾತ್ರ ಹೆಚ್ಚಿನ ಹುಡುಗರು ತಮ್ಮ ಎಲ್ಲಾ ಅನಿಸಿಕೆಗಳನ್ನು ಅಮ್ಮನ ಹತ್ತಿರ ಹೇಳಿಕೊಳ್ಳುತ್ತಾರೆ. ಯೌವನದಲ್ಲಿ ಕೂಡ ಎಲ್ಲಾ ವಿಷಯವನ್ನು, ತನ್ನ ದುಃಖ ಸಂತೋಷಗಳನ್ನು ಅಮ್ಮನ ಮಡಿಲಿನಲ್ಲಿ ಹೇಳಿಕೊಳ್ಳುವ ಹುಡುಗರು ತುಂಬಾ ಕಡಿಮೆ, ಆದರೆ ತನ್ನ ಹೆಂಡತಿಯಾಗಿ ಬರುವವಳು ಅಮ್ಮನ ರೀತಿ ನನ್ನ ನೋಡಿಕೊಳ್ಳಬೇಕೆಂದು ಬಯಸುತ್ತಿರುತ್ತಾನೆ, ನಾನು ಮಾಡುವ ಕೆಲಸವನ್ನು ನನ್ನ ಹುಡುಗಿ ಪ್ರೋತ್ಸಾಹಿಸಬೇಕೆಂದು ಬಯಸುತ್ತಾನೆ, ತುಂಬಾ ಬೇಜಾರಾದಾಗ ಅಪ್ಪಿ ಸಮಧಾನ ಮಾಡಬೇಕೆಂದು ಬಯಸುತ್ತಾನೆ, ಆದರೆ ಹೆಂಡತಿಯಾದವಳು ಗಂಡನ ಭಾವನೆಗಳನ್ನು ಅರ್ಥೈಸಿಕೊಳ್ಳದೆ ತನ್ನದೇ ಲೋಕದಲ್ಲಿ ಇದ್ದರೆ ಅಂತಹ ಹೆಣ್ಣು ಹುಡುಗರಿಗೆ ಇಷ್ಟವಾಗುವುದಿಲ್ಲ.

ಅವರ ಮಾತುಗಳನ್ನು ಕೇಳುವವರು ಬೇಕು: ಹುಡುಗರು ಹೆಣ್ಣು ಮಕ್ಕಳಷ್ಟು ಭಾವನಾ ಜೀವಿಗಳಲ್ಲ. ಹುಡುಗಿಯರು ತಮಗೆ ದುಃಖವಾದರೆ ಜೋರಾಗಿ ಅತ್ತು ಸಮಧಾನ ಮಾಡಿಕೊಳ್ಳುತ್ತಾರೆ. ಆದರೆ ಹೆಚ್ಚಿನ ಪುರುಷರು ತಮ್ಮ ಭಾವನೆಗಳನ್ನು ದುಃಖವನ್ನು ಸಮಾಜದ ಎದುರು ತುಂಬಾ ನಿಯಂತ್ರಣದಲ್ಲಿಡಲು ಪ್ರಯತ್ನಿಸುತ್ತಾರೆ. ಆದರೆ ಅವರಿಗೆ ತಮ್ಮ ಭಾವನೆಗಳನ್ನು, ಅನಿಸಿಕೆಗಳನ್ನು ಕೇಳಲು ಒಬ್ಬರು ಬೇಕಾಗುತ್ತಾರೆ. ಕೆಲವೊಮ್ಮೆ ಅವರು ಹೇಳುತ್ತಿರುವುದು ಸಿಲ್ಲಿ, ರಬ್ಬಿಶ್ ಅಂತ ಅನಿಸಬಹುದು, ಆದರೂ ಅವರ ಮಾತುಗಳನ್ನು ಕೇಳಿಸಿಕೊಳ್ಳುವ ಪ್ರಯತ್ನ ಮಾಡಿ.

ಇನ್ನು ಹೆಚ್ಚಿನ ಗಂಡಸರಿಗೆ ನಾನು ಹೇಳಿದ್ದೇ ಸರಿ, ನಾನು ಹೇಳಿದ್ದನ್ನು ಪಾಲಿಸಬೇಕು ಎಂಬ ಭಾವನೆ ಇರುತ್ತದೆ, ಪುರುಷರ ಅಂತಹ ನಡುವಳಿಕೆ ನೋಡಿದಾಗ ಕೋಪ ಬವರುತ್ತದೆ, ಆದರೆ ಆ ಕ್ಷಣ ಪ್ರತಿಕ್ರಿಯಿಸಬೇಡಿ. ನಿಧಾನಕ್ಕೆ ತಿಳಿ ಹೇಳಿ, ನಿಮ್ಮ ಭಾವನೆಗಳನ್ನೂ ಅವರಿಗೆ ಮನವರಿಕೆ ಮಾಡಲು ಪ್ರಯತ್ನಿಸಬೇಕು. ಇಲ್ಲದಿದ್ದರೆ ಸಂಬಂಧದಲ್ಲಿ ಬಿರುಕು ಉಂಟಾಗುತ್ತದೆ.

ಹೊಗಳಿಕೆ: ತಾನು ಮಾಡುವ ಕೆಲಸವನ್ನು ತನ್ನ ಹೆಂಡತಿ ಹೊಗಳಬೇಕೆಂದು ಬಯಸುತ್ತಿರುತ್ತಾರೆ. ತಮ್ಮನ್ನು ಇತರರ ಜೊತೆ ಹೋಲಿಕೆ ಮಾಡಿದರೆ ಅವರಿಗೆ ಸಹಿಸಲು ಸಾಧ್ಯವಾಗುವುದಿಲ್ಲ. ತಮ್ಮಲ್ಲಿ ಸದಾ ತಪ್ಪು ಹುಡುಕುವ ಹೆಂಡತಿಗಿಂತ ತನ್ನ ಬಗ್ಗೆ ಉತ್ತಮ ಅಭಿಪ್ರಾಯ ನೀಡುವಂತಹ, ತನ್ನ ಕೆಲಸ ಕಾರ್ಯಗಳನ್ನು ಹೊಗಳುವಂತಹ ಹೆಂಡತಿ ಗಂಡಸರಿಗೆ ತುಂಬಾ ಇಷ್ಟವಾಗುತ್ತಾರೆ.