ರೆಸಿಪಿ: ಮಧುಮೇಹಿಗಳಿಗೆ, ತೂಕ ಇಳಿಕೆಗೆ ಬೆಸ್ಟ್ ಈ ಓಟ್ಸ್ ಕಿಚಡಿ, ಟೇಸ್ಟ್ ಸೂಪರ್

ಮಧುಮೇಹವಿದ್ದರೆ ಪಥ್ಯ ಆಹಾರ ಸೇವಿಸಬೇಕೆಂದಿಲ್ಲ, ರಕ್ತದಲ್ಲಿ ಸಕ್ಕರೆಯಂಶ ಹೆಚ್ಚು ಮಾಡುವ ಆಹಾರ ಸೇವಿಸಬಾರದು ಅಷ್ಟೇ.... ಮಧುಮೇಹಿಗಳಿಗೆ ಅತ್ಯುತ್ತಮವಾದ ಆಹಾರಗಳಲ್ಲಿ ಒಂದು ಓಟ್ಸ್. ಆದರೆ ಕೆಲವರಿಗೆ ಓಟ್ಸ್‌ ಅನ್ನು ರುಚಿಕರವಾಗಿ ಮಾಡುವುದು ಹೇಗೆ ಎಂಬುವುದೇ ಗೊತ್ತಿರುವುದಿಲ್ಲ. ಈ ಕಾರಣಕ್ಕೆ ಓಟ್ಸ್ ಎಂದ ಕ್ಷಣ ಮುಖ ಸಿಂಡರಿಸುತ್ತಾರೆ.

ಆದರೆ ಒಟ್ಸ್ ಅನ್ನು ತುಂಬಾ ರುಚಿಯಾಗಿ ಮಾಡಬಹುದು. ಇದರಿಂದ ಇಡ್ಲಿ ಮಾಡಬಹುದು, ಉಪ್ಪಿಟ್ಟು ಮಾಡಬಹುದು, ಅಷ್ಟೇ ಏಕೆ ರುಚಿಕರವಾದ ಕಿಚಡಿ ಕೂಡ ಮಾಡಬಹುದು. ಇನ್ನು ತೂಕ ಇಳಿಕೆಗೂ ಓಟ್ಸ್ ಕಿಚಡಿ ಬೆಸ್ಟ್.

ಈ ಓಟ್ಸ್‌ ಕಿಚಡಿ ಮಾಡುವುದು ಬಲು ಸುಲಭವಾಗಿದ್ದು ಬನ್ನಿ ಇದನ್ನು ಮಾಡುವುದು ಹೇಗೆ ಎಂದು ನೋಡೋಣ:

ಬೇಕಾಗುವ ಸಾಮಗ್ರಿ
1 ಕಪ್‌ ಓಟ್ಸ್
1 ಚಮಚ ಹೆಸರು ಬೇಳೆ
3 ಚಮಚ ಆಲೀವ್‌ ಎಣ್ಣೆ
2 ಚಮಚ ಬೆಳ್ಳುಳ್ಳಿ ಪೇಸ್ಟ್
ಹಸಿ ಮೆಣಸಿನಕಾಯಿ ಪೇಸ್ಟ್ ಅಥವಾ ಹಸಿ ಮೆಣಸಿನಕಾಯಿ (ನಿಮ್ಮ ರುಚಿಗೆ ತಕ್ಕಷ್ಟು)
1 ಚಿಕ್ಕ ಚಮಚ ಅರಿಶಿಣ ಪುಡಿ
ರುಚಿಗೆ ತಕ್ಕ ಉಪ್ಪು
ಡ್ರೈ ಫ್ರೂಟ್ಸ್ (ಬೇಕಿದ್ದರೆ)

ಮಾಡುವ ವಿಧಾನ:

* ಪ್ರೆಶರ್‌ ಕುಕ್ಕರ್ ಬಿಸಿ ಮಾಡಿ ಅದಕ್ಕೆ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದಾಗ ಹಸಿ ಮೆಣಸಿನಕಾಯಿ ಪೇಸ್ಟ್ ಹಾಗೂ ಬೆಳ್ಳುಳ್ಳಿ ಪೇಸ್ಟ್ ಹಾಕಿ 2 ನಿಮಿಷ ಫ್ರೈ ಮಾಡಿ.

* ಈಗ ಓಟ್ಸ್ ಹಾಗೂ ತೊಳೆದ ಹೆಸರು ಬೇಳೆ ಹಾಕಿ 2 ನಿಮಿಷ ಉರಿಯಿರಿ.

* ಇದಕ್ಕೆ 4 ಕಪ್‌ ನೀರು ಹಾಕಿ ರುಚಿಗೆ ತಕ್ಕ ಉಪ್ಪು, ಅರಿಶಿಣ ಪುಡಿ ಸೇರಿಸಿ.

* ಎರಡು ವಿಶಲ್‌ ಆದರೆ ಸವಿಯಲು ಓಟ್ಸ್ ಕಿಚಡಿ ರೆಡಿ.

*ಇದಕ್ಕೆ ನೀವು ಡ್ರೈ ಫ್ರೂಟ್ಸ್ ಅಥವಾ ಬೆರ್ರಿ ಫ್ರೂಟ್ಸ್ ಹಾಕಿ ಸವಿದರೆ ಮತ್ತಷ್ಟು ರುಚಿಯಾಗಿರುತ್ತದೆ.