ಸಂಕ್ರಾಂತಿ ಸ್ಪೆಷಲ್.. ದೇವಸ್ಥಾನದಲ್ಲಿ ನೀಡುವ ಖಾರ ಪೊಂಗಲ್ ಮಾಡೋದು ಹೇಗೆ? ಆ ರುಚಿಯ ಸೀಕ್ರೆಟ್ ಇಲ್ಲಿದೆ

ಪೊಂಗಲ್ ಹಬ್ಬಕ್ಕೆ ಪರ್ಫೆಕ್ಟ್ ಡಿಶ್! ದೇವಸ್ಥಾನದ ಶೈಲಿಯ ಅದ್ಭುತ ರುಚಿಯ ಖಾರ ಪಾಂಗಲ್.. ಮನೆಯಲ್ಲೇ ಮಾಡುವ ಸೀಕ್ರೆಟ್ ಇಲ್ಲಿದೆ. ಹೌದು, ದಕ್ಷಿಣ ಭಾರತದ ಪಾಕಪದ್ಧತಿಯಲ್ಲಿ ಖಾರ ಪೊಂಗಲ್ ಅಥವಾ 'ವೆನ್ ಪೊಂಗಲ್'ಗೆ (Temple Style Ven Pongal) ಮಹತ್ವದ ಸ್ಥಾನವಿದೆ. ತಮಿಳುನಾಡಿನಲ್ಲಿ ಇದನ್ನು ಕೆಲವೊಮ್ಮೆ 'ಘೀ ಪೊಂಗಲ್' (Ghee Pongal) ಎಂದೂ ಕರೆಯಲಾಗುತ್ತದೆ.

ಪ್ರಮುಖವಾಗಿ ದೇವಸ್ಥಾನಗಳಲ್ಲಿ ಪ್ರಸಾದವಾಗಿ ನೀಡಲಾಗುವ ಈ ಖಾದ್ಯವು, ತನ್ನ ಸೌಮ್ಯವಾದ ರುಚಿ, ತುಪ್ಪದ ಪರಿಮಳ, ಮತ್ತು ಸಮೃದ್ಧ ಪೌಷ್ಟಿಕಾಂಶಗಳಿಂದ ಜನಪ್ರಿಯವಾಗಿದೆ. ಮಕರ ಸಂಕ್ರಾಂತಿ (Makar Sankranti 2026) ಸೇರಿದಂತೆ ಯಾವುದೇ ಧಾರ್ಮಿಕ ಆಚರಣೆಗಳಲ್ಲಿ ಈ ಸರಳ ಹಾಗೂ ರುಚಿಕರ ಪೊಂಗಲ್ ಅನ್ನು ನಿತ್ಯ ತಯಾರಿಸುತ್ತಾರೆ. ದೇವಸ್ಥಾನಗಳಲ್ಲಿ ಸವಿಯುವಂತೆಯೇ ಘಮಘಮಿಸುವ, ಪರಿಪೂರ್ಣ ಖಾರ ಪೊಂಗಲ್ ಅನ್ನು ಮನೆಯಲ್ಲೇ ತಯಾರಿಸಲು ಬೇಕಾದ ಸಾಮಗ್ರಿಗಳು ಮತ್ತು ಸರಳ ವಿಧಾನ (Khara Pongal Recipe) ಇಲ್ಲಿದೆ.

ಖಾರ ಪೊಂಗಲ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಅಕ್ಕಿ (ಸೋನಾ ಮಸೂರಿ ಅಥವಾ ಕಚ್ಚಾ ಅಕ್ಕಿ) - 1 ಕಪ್
• ಹೆಸರು ಬೇಳೆ - ಅರ್ಧ ಕಪ್ (ಅಕ್ಕಿ ಮತ್ತು ಬೇಳೆಯ ಅನುಪಾತ 2:1 ಇರಲಿ)
• ತುಪ್ಪ - 3 ರಿಂದ 4 ಚಮಚ
• ಕಾಳುಮೆಣಸು (ತರಿತರಿಯಾಗಿ ಕುಟ್ಟಿದ್ದು) - 1 ಚಮಚ
• ಜೀರಿಗೆ - 1 ಚಮಚ
• ಶುಂಠಿ - 1 ಚಮಚ (ಸಣ್ಣಗೆ ಹೆಚ್ಚಿದ್ದು)
• ಕರಿಬೇವು - 8 ರಿಂದ 10 ಎಲೆಗಳು
• ಗೋಡಂಬಿ - 10 ರಿಂದ 12 (ತುಂಡು ಮಾಡಿದ್ದು)
• ಇಂಗು - ಒಂದು ಚಿಟಿಕೆ
• ಉಪ್ಪು - ರುಚಿಗೆ ತಕ್ಕಂತೆ
• ನೀರು - 4 ರಿಂದ 5 ಕಪ್ (ಪೊಂಗಲ್ ಮೆತ್ತಗೆ ಬರಲು ಹೆಚ್ಚು ನೀರು ಬೇಕು)

ಖಾರ ಪೊಂಗಲ್ ತಯಾರಿಸುವ ವಿಧಾನ

- ಮೊದಲು ಪಾತ್ರೆಯೊಂದರಲ್ಲಿ ಹೆಸರು ಬೇಳೆಯನ್ನು ಸಣ್ಣ ಉರಿಯಲ್ಲಿ ಲಘುವಾಗಿ ಹುರಿಯಿರಿ. ಬಣ್ಣ ಬದಲಾಗದಂತೆ ಪರಿಮಳ ಹೊರಬಂದಾಗ ಉರಿ ಆರಿಸಿ. ಇದು ಪೊಂಗಲ್‌ನ ರುಚಿಯನ್ನು ಹೆಚ್ಚಿಸುತ್ತದೆ.

- ಬಳಿಕ ಹುರಿದ ಹೆಸರು ಬೇಳೆ ಮತ್ತು ಅಕ್ಕಿಯನ್ನು ಚೆನ್ನಾಗಿ ತೊಳೆದು ಕುಕ್ಕರ್‌ಗೆ ಹಾಕಿ. ಇದಕ್ಕೆ 4 ರಿಂದ 5 ಕಪ್ ನೀರು ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ. ಅನ್ನ ಮತ್ತು ಬೇಳೆ ಸಂಪೂರ್ಣವಾಗಿ ಮೆತ್ತಗಾಗಲು 3 ರಿಂದ 4 ಸೀಟಿ ಬರುವವರೆಗೆ ಬೇಯಿಸಿ.

- ಈಗ ಸಣ್ಣ ಬಾಣಲೆಯಲ್ಲಿ ತುಪ್ಪ ಬಿಸಿ ಮಾಡಿ. ಗೋಡಂಬಿಗಳನ್ನು ಹೊಂಬಣ್ಣ ಬರುವವರೆಗೆ ಹುರಿದು ಪಕ್ಕಕ್ಕಿಡಿ. ನಂತರ ಅದೇ ತುಪ್ಪಕ್ಕೆ ಜೀರಿಗೆ, ಕುಟ್ಟಿದ ಕಾಳುಮೆಣಸು, ಹೆಚ್ಚಿದ ಶುಂಠಿ, ಕರಿಬೇವು ಮತ್ತು ಇಂಗು ಸೇರಿಸಿ ಚಟಪಟ ಎನ್ನುವವರೆಗೆ ಹುರಿಯಿರಿ.

- ಕುಕ್ಕರ್ ತಣ್ಣಗಾದ ನಂತರ, ಅನ್ನ-ಬೇಳೆಯ ಮಿಶ್ರಣವನ್ನು ಲಘುವಾಗಿ ಹಿಸುಕಿ. ಸಿದ್ಧಪಡಿಸಿದ ಒಗ್ಗರಣೆಯನ್ನು ಇದಕ್ಕೆ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಪೊಂಗಲ್ ಗಟ್ಟಿಯಾಗಿದ್ದರೆ, ಬೇಕಾದ ಕ್ರೀಮಿ ಹದಕ್ಕೆ ಬರಲು ಸ್ವಲ್ಪ ಬಿಸಿ ನೀರು ಸೇರಿಸಬಹುದು.

- ಬಿಸಿಬಿಸಿಯಾದ ದೇವಸ್ಥಾನದ ಶೈಲಿಯ ಖಾರ ಪೊಂಗಲ್ ಈಗ ಸವಿಯಲು ಸಿದ್ಧ. ಇದನ್ನು ತೆಂಗಿನಕಾಯಿ ಚಟ್ನಿ, ಸಾಂಬಾರ್ ಅಥವಾ ಯಾವುದೇ ಗೊಜ್ಜಿನೊಂದಿಗೆ ಬಡಿಸಬಹುದು.

ಪೊಂಗಲ್ ಮಾಡುವಾಗ ನೆನಪಿರಲಿ!

• ಖಾರ ಪೊಂಗಲ್‌ಗೆ ಕಾಯಿ ಚಟ್ನಿ, ಬಿಸಿ ಸಾಂಬಾರ್ ಅಥವಾ ಮೊಸರು ಬಜ್ಜಿಯು ಅತ್ಯುತ್ತಮ ಜೋಡಿ.

• ಉತ್ತಮ ರುಚಿಗಾಗಿ, 2 ಭಾಗ ಅಕ್ಕಿಗೆ 1 ಭಾಗ ಹೆಸರು ಬೇಳೆಯನ್ನು ಬಳಸುವುದು ಸೂಕ್ತ.

• ಪೊಂಗಲ್ ಮೆತ್ತಗೆ ಬರಲು, ಸಾಮಾನ್ಯ ಅನ್ನಕ್ಕೆ ಬಳಸುವುದಕ್ಕಿಂತ 1 ರಿಂದ 2 ಕಪ್ ಹೆಚ್ಚು ನೀರು ಹಾಕಿ ಚೆನ್ನಾಗಿ ಬೇಯಿಸಬೇಕು.