ಈ ರೀತಿ ಟೊಮೆಟೊ ಸೆಟ್ ದೋಸೆ! ಹಿಟ್ಟು ರುಬ್ಬುವ ಅವಶ್ಯಕತೆಯಿಲ್ಲ.. ಬ್ಯಾಚುಲರ್‌ಗಳಿಗೆ ಬೆಸ್ಟ್, ತೂಕ ಇಳಿಕೆಗೆ ಸೂಪರ್!

ಬೆಳಗಿನ ಅವಸರದ ದಿನಗಳಲ್ಲಿ ಪ್ರತಿಯೊಬ್ಬರೂ ಬಯಸುವುದು ತ್ವರಿತವಾಗಿ ತಯಾರಾಗುವ, ರುಚಿಕರವಾದ ತಿಂಡಿ. ಪ್ರತಿದಿನ ತಪ್ಪದೇ ಇಡ್ಲಿ, ದೋಸೆ ಅಥವಾ ಉಪ್ಪಿಟ್ಟು ಸೇವಿಸಿ ಬೇಸರವಾಗಿದೆಯೇ? ಹಾಗಾದರೆ, ನಿಮಗಾಗಿ ಇಲ್ಲಿದೆ ಒಂದು ವಿಭಿನ್ನ ಹಾಗೂ ಆರೋಗ್ಯಕರವಾದ ಹೊಸ ಆಯ್ಕೆ. ಈ 'ಟೊಮೆಟೊ ಸೆಟ್ ದೋಸೆ' (Tomato Set Dosa) ರೆಸಿಪಿ ಇದೀಗ ಸೋಶಿಯಲ್ ಮೀಡಿಯಾದಲ್ಲಿ ಭಾರೀ ವೈರಲ್ ಆಗಿದೆ.

ಈ ದೋಸೆಯ ಪ್ರಮುಖ ವಿಶೇಷತೆ ಎಂದರೆ, ಇದನ್ನು ತಯಾರಿಸಲು ಹಿಟ್ಟನ್ನು ಮುಂಚಿತವಾಗಿ ರುಬ್ಬಿ, ಹುದುಗು ಬರಿಸುವ ಅಗತ್ಯವಿಲ್ಲ. ಕೇವಲ ಹತ್ತೇ ನಿಮಿಷಗಳಲ್ಲಿ ದಿಢೀರ್ ಎಂದು ಈ ದೋಸೆಯನ್ನು ಸಿದ್ಧಪಡಿಸಬಹುದು. ಅಷ್ಟೇ ಅಲ್ಲ, ಇದು ಮೃದುವಾಗಿದ್ದು, ಸ್ಪಂಜಿನಂತಹ ರಚನೆ ಹೊಂದಿರುತ್ತದೆ. ಇಂತಹ ರುಚಿಕರ ಟೊಮೆಟೊ ಸೆಟ್ ದೋಸೆ ಮಾಡುವ ಸುಲಭ ವಿಧಾನವನ್ನು (Tomato Set Dosa Recipe) ಈ ಲೇಖನದಲ್ಲಿ ತಿಳಿಸಲಾಗಿದೆ.

ಟೊಮೆಟೊ ಸೆಟ್ ದೋಸೆಗೆ ಬೇಕಾಗುವ ಪದಾರ್ಥಗಳು

• ರವೆ
• ಗೋಧಿ ಹಿಟ್ಟು
• ತಾಜಾ ಟೊಮೆಟೊ
• ಹಸಿ ಮೆಣಸಿನಕಾಯಿ
• ಶುಂಠಿ
• ಬೆಳ್ಳುಳ್ಳಿ
• ಜೀರಿಗೆ
• ಮೊಸರು
• ಉಪ್ಪು
• ಅಡುಗೆ ಎಣ್ಣೆ
• ಅಡುಗೆ ಸೋಡಾ

ಟೊಮೆಟೊ ಸೆಟ್ ದೋಸೆ ಹೀಗೆ ಮಾಡಿ

- ಮೊದಲಿಗೆ, ಒಂದು ಮಿಕ್ಸರ್ ಜಾರ್‌ಗೆ ರವೆ, ಗೋಧಿ ಹಿಟ್ಟು, ಸಣ್ಣಗೆ ಕತ್ತರಿಸಿದ ಟೊಮೆಟೊಗಳು, ಹಸಿರು ಮೆಣಸಿನಕಾಯಿ, ಶುಂಠಿ, ಬೆಳ್ಳುಳ್ಳಿ, ಜೀರಿಗೆ, ಮೊಸರು ಮತ್ತು ಆವಶ್ಯಕತೆಗೆ ತಕ್ಕಷ್ಟು ಉಪ್ಪನ್ನು ಸೇರಿಸಬೇಕು. ನಂತರ, ನೀರನ್ನು ಸೇರಿಸಿಕೊಂಡು ನುಣ್ಣಗೆ, ಆದರೆ ಸೆಟ್ ದೋಸೆಯ ಹದಕ್ಕೆ, ಅಂದರೆ ತೀರಾ ತೆಳ್ಳಗಾಗದಂತೆ ಸ್ವಲ್ಪ ಗಟ್ಟಿಯಾಗಿ ರುಬ್ಬಿಕೊಳ್ಳಿ.

- ರುಬ್ಬಿದ ಹಿಟ್ಟನ್ನು ಒಂದು ದೊಡ್ಡ ಬೌಲ್‌ಗೆ ವರ್ಗಾಯಿಸಿ. ಇದಕ್ಕೆ ಒಂದು ಚಿಟಿಕೆ ಅಡುಗೆ ಸೋಡಾ ಅಥವಾ ಈನೋ ಸೇರಿಸಿ ಚೆನ್ನಾಗಿ ಬೆರೆಸಿ. ನಂತರ, ಸುಮಾರು 10 ನಿಮಿಷಗಳ ಕಾಲ ಹಿಟ್ಟನ್ನು ಮುಚ್ಚಿಡಿ. ಹೀಗೆ ಮಾಡುವುದರಿಂದ, ರವೆ ನೀರನ್ನು ಸಮರ್ಪಕವಾಗಿ ಹೀರಿಕೊಂಡು ಹಿಟ್ಟು ಸರಿಯಾದ ಹದಕ್ಕೆ ಬರುತ್ತದೆ.

- ಈಗ, ಗ್ಯಾಸ್ ಮೇಲೆ ದೋಸೆ ಹಂಚನ್ನು ಇಟ್ಟು ಚೆನ್ನಾಗಿ ಕಾಯಿಸಿ. ಹಂಚು ಕಾದ ನಂತರ, ಅದಕ್ಕೆ ಸ್ವಲ್ಪ ಅಡುಗೆ ಎಣ್ಣೆಯನ್ನು ಸವರಿ ಗ್ರೀಸ್ ಮಾಡಿ. ಬಳಿಕ, ಒಂದು ಸೌಟು ಹಿಟ್ಟನ್ನು ತೆಗೆದುಕೊಂಡು ಹಂಚಿನ ಮಧ್ಯದಲ್ಲಿ ಹಾಕಿ. ನೆನಪಿಡಿ, ಇದನ್ನು ತೆಳ್ಳಗೆ ಹರಡಬಾರದು, ಬದಲಿಗೆ ಸೆಟ್ ದೋಸೆಯಂತೆ ದಪ್ಪವಾಗಿಯೇ ಇರಬೇಕು.

- ದೋಸೆಯ ಮೇಲೆ ಸಣ್ಣ ಸಣ್ಣ ರಂಧ್ರಗಳುಮೂಡಲು ಪ್ರಾರಂಭಿಸಿದಾಗ, ಒಂದು ಮುಚ್ಚಳವನ್ನು ಮುಚ್ಚಿ 2-3 ನಿಮಿಷಗಳ ಕಾಲ ಬೇಯಲು ಬಿಡಿ. ಹಬೆಯಲ್ಲಿ ದೋಸೆ ಚೆನ್ನಾಗಿ ಬೆಂದು ಮೃದುವಾಗುತ್ತದೆ. ಈ ದೋಸೆಯನ್ನು ಎರಡೂ ಕಡೆ ಬೇಯಿಸುವ ಅಗತ್ಯವಿಲ್ಲ; ಒಂದು ಬದಿ ಬೆಂದರೂ ಸಾಕು, ಅದು ಸೇವನೆಗೆ ಸಿದ್ಧವಾಗಿರುತ್ತದೆ.

ಯಾರಿಗೆ ಸೂಕ್ತ ಈ ದೋಸೆ?

ಆಕರ್ಷಕ ಬಣ್ಣ ಮತ್ತು ಮೃದುವಾದ ವಿನ್ಯಾಸದಿಂದಾಗಿ ಈ ಟೊಮೆಟೊ ಸೆಟ್ ದೋಸೆ ಮಕ್ಕಳಿಗೆ ಅಚ್ಚುಮೆಚ್ಚಿನ ತಿಂಡಿಯಾಗಿದೆ. ಹಿಟ್ಟು ರುಬ್ಬುವ ಜಂಜಾಟವಿಲ್ಲದೆ ಕ್ಷಣಾರ್ಧದಲ್ಲಿ ತಯಾರಿಸಬಹುದಾದ್ದರಿಂದ, ಬ್ಯಾಚುಲರ್‌ಗಳಿಗೆ ಇದು ಹೇಳಿ ಮಾಡಿಸಿದಂತಿದೆ. ಅಲ್ಲದೆ, ಗೋಧಿ ಹಿಟ್ಟು ಮತ್ತು ಟೊಮೆಟೊ ಸೇರಿರುವ ಕಾರಣ, ತೂಕ ಇಳಿಸುವ ನಿಟ್ಟಿನಲ್ಲಿರುವವರಿಗೂ ಇದು ಆರೋಗ್ಯಕರ ಹಾಗೂ ಪೌಷ್ಟಿಕ ಆಯ್ಕೆಯಾಗಿದೆ.

ಸವಿಯುವ ವಿಧಾನ

ಈ ಬಿಸಿಬಿಸಿ ಟೊಮೆಟೊ ಸೆಟ್ ದೋಸೆಯನ್ನು ತಾಜಾ ತೆಂಗಿನಕಾಯಿ ಚಟ್ನಿ, ಪುದೀನಾ ಚಟ್ನಿ ಅಥವಾ ರುಚಿಕರ ಆಲೂಗಡ್ಡೆ ಪಲ್ಯದೊಂದಿಗೆ ಸವಿಯಬಹುದು. ಯಾವುದೇ ಸೈಡ್ ಡಿಶ್ ಇಲ್ಲದಿದ್ದಾಗಲೂ, ಟೊಮೆಟೊದ ನೈಸರ್ಗಿಕ ಸುವಾಸನೆ ಮತ್ತು ಮಸಾಲೆಗಳ ಘಮದಿಂದಾಗಿ ಇದು ಹಾಗೆಯೇ ತಿನ್ನಲು ಅತ್ಯಂತ ರುಚಿಕವಾಗಿರುತ್ತದೆ, ಆರೋಗ್ಯಕರ ತಿಂಡಿ ಮಾಡಲು ಇದು ಉತ್ತಮ ಆಯ್ಕೆ.